Panagbalin a kas Kenkuana
Babaen laeng ti nadiosan a tulong ti Mangisalakan a makapagdur-astayo amin nga agbalin a kas Kenkuana.
Iti maysa a napasnek nga agad-adal iti biag ken panagministro ni Jesucristo, ti balakad ti Mangisalakan nga “uray kas kaniak” 1 ket narigat ken kasla di maragpat. Nalabit a kaslakayo kaniak—ammoyo unay dagiti basol ken pannakapaayyo, isu a makitayo a nagin-gin-awa ti magna iti dana a di kasapulan ti panagdur-as. “Awan duadua, saan a pudno ken di nakappapati daytoy a sursuro,” irasonantayo no nagin-awa a pilientayo ti kalakaan a pangngeddeng, iti kasta maaramattayo iti kasapulan a panagbalbaliw.
Ngem ania no ti panagbalin nga “uray kas [Kenkuana]” ket saan a matalinhaga, uray iti mortal a kasasaadtayo? Ania no kastoy, iti sabali a digri, maragpat ditoy a biag ken, pudno, kasapulan iti panagindeg manen Kenkuana? Ania no “uray kas kaniak” ket eksakto a dayta ti kayat a sawen ti Mangisalakan? Sa ania? Ania a lebel ti aramid a sitatallugodtayo nga ited a pangawis iti namilagruan a bilegna iti biagtayo tapno mabalbaliwantayo ti mismo nga ugalitayo?
Insuro ni Elder Neal A. Maxwell: “No utobentayo a binilinnatayo ni Jesucristo nga agbalin a kas Kenkuana, makitatayo a ti agdama a kasasaadtayo ket maysa a di nasken nga agdakestayo, ngem ketdi maysa a ditayo unay napudno ken agkurang iti namnama para iti panggepna—a panggeptayo, met! Agdayawtayo ngem manmano a tuladentayo Isuna.” 2 Inyebkas ti ubing a minister, ni Charles M. Sheldon, ti isu met la nga ideya iti kastoy: “Kayatmi dagiti banag a nalaka ken nagin-awa ta saanmi a kayat nga aramiden dagiti narigat.” 3
Kinapudnona, mayaplikar iti amin a tao ti bilin nga agbalin kas Kenkuana, kas iti panagbalin ni Jesucristo a kas iti Ama. 4 Bayat ti panagdur-astayo, agbalintayo a nakumkumpleto, nakalpas, ken naan-anay a dimmur-as. 5 Saan a maibatay ti kasta a pannursuro iti ania man a doktrina ti maysa a sekta ngem umay a direkta manipud iti Apo a Mismo. Iti daytoy a lente a nasken nga agbiag iti biag, ibilang dagiti komunikasion, ken papigsaen dagiti pagnanaigan. Pudno, nga awan ti sabali a wagas a mangpalaing ti sugsugat ti nadadael a relasion wenno naperdi a kagimongan ngem iti naan-anay a panangtulad iti Prinsipe ti Kappia. 6
Ibilangtayo no kasano ti mangrugi iti napudno, ken naigagara a tarigagay ti panagbalin a kas Kenkuana babaen dagiti mismo a kababalin ni Jesucristo.
Mangikeddeng ken Agkumit
Sumagmamano a tawen ti naglabas, nagtakderkami nga agassawa iti sungadan ti kanguatan a bantay ti Japan, ti Bantay Fuji. Idi rugianmmi ti sumang-at tinangadmi ti nangato a tuktok ket nasdaawkami no kabaelanmi ti makadanon idiay.
Iti panagtultuloymi, nariknami ti pannakabannog, nasakit a piskel, ken dagiti epekto ti kjnangatona. Iti panunotmi, nagbalin a napateg nga agpokuskami laeng iti sumaruno nga addang. Kunami, “Nalabit a diak payla madanon ti ngato, ngem kabaelak daytoy sumaruno nga addang ita.” Iti agangay nagbalin a maragpat ti narigat nga aramid—in-inut.
Umuna nga addang ditoy a dana iti panagbalin a kas ken ni Jesucristo ti agtarigagay nga agaramid iti dayta. Nasayaat a maawatan ti balakad nga agbalin a kas Kenkuana, ngem kasapulan ti tarigagay a mangbalbaliw iti bagitayo, in-inut, iti laksid ti nailubongan a tao. 7 Tapno adda tarigagay, nasken nga ammuentayo no siasino ni Jesucristo. Nasken nga ammuentayo ti ugalina, 8 ken nasken nga sapulenentayo dagiti kababalinna iti nasantuan a kasuratan, serbisio ti panagdaydayaw, ken dadduma a nasantuan a lugar. Iti ad-adda a pannakaam-ammotayo Kenkuana, makitatayto dagiti kababalinna a nayanninaw kadagiti dadduma. Daytoyto ti mangpapigsa iti bukodtayo a gagem, a no maragpat dagiti dadduma dagiti kababalinna iti sumagmamano a pagrukodan, , kabaelantayo met.
No napudnotayo iti bagbagitayo, ti Silaw ni Cristo 9 iti kaunggantayo ti mangyarasaas nga adda distansia iti nagbaetan ti yantayo a maidasig iti tinarigagayan a kababalin ti Mangisalakan. 10 Napateg ti kasta a kinapudno no agtultuloytayo nga agbalin a kas Kenkuana. Pudno, kinapudno ti maysa kadagiti Kababalinna.
Ita, datayo a natured maibilangtayo a damagen iti matalek a miembro ti pamilia, asawa, gayyem, wenno espiritual lider no ania ti kababalin ni Jesucristo a kasapulantayo—ket nalabit a nakasaganatayo para iti sungbat! No dadduma makitatayo ti bagbagitayo iti naballikug a sarming tapno makitatayo a nakakatkatawa wenno naiduma ti ladawantayo.
Matulongandatayo dagiti matalek a gayyem ken pamilia a makita ti bagbagitayo a nalawlawag, nupay isuda, kas naayat ken managtulong a kayatda a pagbalinan, makitada dagiti banag a saan a perpekto. Kas bungana, napateg nga idawattayo iti Nailangitan nga Amatayo no ania ti kasapulantayo ken no sadino ti nasken a pangipokusantayo iti aramidtayo. Naan-anay a maawatannatayo ken naayat nga ipakitana dagiti pagkapsutantayo. 11 Nalabit a maadalyonto a kasapulanyo ti dakdakkel nga anus, kinapakumbaba, ayat, namnama, kinapasnek, ken panagtungpal. 12
Nabiit pay a napalabas, naaddaanak iti padas idi ti maysa a naayat a lider ti Simbaan nga insingasingna a mausarko ti dakdakkel a pagrukodan ti maysa a kababalin. Siaayat a dina binallikug ti ania man a kinapudno. Dayta a sardam, imbagak daytoy a padas iti asawak. Siaayat nga immannamong iti singasingna. Impatalged ti Espiritu Santo kaniak a naggapu ti balakadda iti naayat nga Ama iti Langit.
Makatulong met a sipupudno a mangkumpleto iti aktibidad a kababalin a kas ken Cristo iti kapitulo 6 ti Preach My Gospel. 13
No naaramidyon ti napudno a panangamiris ken mangeddeng a mangrugi nga umuli iti bantay, nasken nga agbabawikayo. Siaayat nga insuro ni Presidente Russell M. Nelson: “No pilientayo ti agbabawi, pilientayo ti agbalbaliw! Palugodantayo ti Mangisalakan a mangbalbaliw kadatayo nga agbalin a kasingpetan. Pilientayo ti dumur-as a naespirituan ken umawat iti rag-o—rag-o ti Pannubbotna. No pilientayo ti agbabawi, pilientayo ti agbalin nga ad-adda a kas ken ni Jesucristo.” 14
Ti panagbalin a kas ken Jesucristo agkasapulan iti panagbaliw ti puso ken panunottayo, pudno a kinataotayo, ken posible laeng ti panangaramid babaen ti pangisalakan a parabur ni Jesucristo. 15
Lasinen ken Agtignay
Ita ta inkeddengyon ti agbalbaliw nga agbabawi ken nagpatarabay babaen ti kararag, panagutob, ken mabalin a pannakiinnuman iti dadduma, kasapulanyonto ti pumili iti maysa a kababalin a kangrunaan nga ipokusyonto. Kasapulanyonto ti agkumit iti napateg a panagkagumaan. Saan a dumteng a nalaka ken madagdagus dagitoy a kababalin, ngem babaen ti paraburna umaydanto no ikarigatan a gun-oden.
Dagiti kababalin a kas ken Cristo ket sagut ti naayat nga Ama iti Langit a mangbendision kadatayo ken dagiti adda iti lawlawtayo. Dagiti aramidtayo a manggun-od kadagitoy a kababalin agkasapulanto iti naimpusuan a dawat iti nadiosan a tulongna. No sapulentayo dagitoy a sagut tapno agserbi a nasaysayaat iti dadduma, bendisionannatayo kadagiti panagkagumaantayo. Ti managimbubukod a panangragpat iti sagut manipud iti Dios ket agbanag iti pannakapaay.
Babaen iti nauneg a panangipokus iti maysa a kasapulan a kababalin, no dumur-askayo iti pananggun-od iti dayta a kababalin, magun-od ti dadduma pay a kababalin. Di kadi makapagdur-as iti ayat ken pakumbaba ti maysa a tao nga agpokpokus a siuuneg iti kinaasi? Di kadi makagun-od iti dakdakkel a pasnek ken namnama ti maysa a a tao nga agpokpokus iti panagtulnog? Dagiti napateg a panagkagumaanyo a manggun-od iti maysa a kababalin ket agbalin nga ati a mangpatapaw iti amin a bilog.
Isurat ken Ituloy nga Aramiden
Napateg nga isuratko dagiti padasko ken no ania ti sursuruek bayat ti panangikarigatak nga agbalin a kas Kenkuana. No adalek ti maysa kadagiti kababalinna iti kaunggak, maadalko ti baro a banag iti nasantuan a kasuratan no basaek dagiti pagarigan daytoy a kababalin kadagiti pannursurona, panagministrona, ken dagiti disipulona. Ad-adda a napokpokus pay ti matak iti panangbigbig iti kababalin kadagiti dadduma. Napaliiwko dagiti nasayaat nga indibidual agpada nga iti uneg ken ruar iti Simbaan nga addaan kadagiti kababalin a mangtulad Kenkuana. Nabilegda a pagarigan ti no kasano a maipakita dagita a kababalin kadagiti mortal babaen ti naayat a paraburna.
Tapno makita ti pudno a panagdur-as, nasken nga ituloyyo ti agpasnek. Kas iti panagkasapulan iti panagsagana ti yuuli iti bantay, ken panagibtur ken panagpursigi iti daytoy a yuuli, kasta met nga agkasapulan daytoy a daliasat iti pudno a panagkagumaan ken sakripisio. Ti pudno a Kristianismo, a pangikarigatantayo ti agbalin a kas iti Apotayo, ket kanayon nga agkasapulan iti kasayaatan a panagkagumaantayoi. 16
Ita daytoy ti ababa a ballaag. Ti bilin nga agbalin a kas Kenkuana saan a nairanta a mangiparikna kenka a nagbasolka, saan a maikari, ken saan a maipategt. Ti sibubukel a padastayo dioty a biag ket maipapan iti panagdur-as, panagpadas, pannakaupay, ken panagballigi. Nupay tinarigagayanmi nga agassawa a makapagkidemkami ket arapaapenmi a nakadanonkamin iti tuktok, saan a kasta ti kaipapanan biag.
Nasingpetkayo, maipatpategkayo, ngem saan a kaipapanan dayta a naan-anaykayon. Adda trabaho a maaramid ditoy a biag ken ti sumaruno. Babaen laeng ti nadiosan a tulongna a makapagdur-astayo amin nga agbalin a kas Kenkuana.
Kadagitoy a panawen, “[kasla] arimbangaw ti amin a banag; ken … [kasla] sumallukob ti buteng iti amin a tao,” 17 ti laeng agas, ti kakaisuna a remedio, ket ikarigatan ti agbalin a kas iti Mangisalakan, 18 ti Mannubbot 19 ti amin a sangkataw-an, ti Silaw ti Lubong, 20 ken agsapul Kenkuana a nangipakdaar iti, “Siak ti dalan.” 21
Ammok a ti panagbalin a kas Kenkuana babaen ti nadiosan a tulong ken pigsa ket magun-od nga in-inut. No saan, dinatayo koma inikkan iti daytoy a bilin. 22 Ammok daytoy—iti paset gapu ta makitkitak dagiti kababalinna iti nakaad-adu kadakayo. Paneknekak dagitoy a banag iti nagan ni Jesucristo, amen.