Panagtultuloy a Dumur-as
Agtalinaed nga agtultuloy a dumur-as ti aramid ti Apo.
Patpatgek a kakabsatko, pakaragsakak a makaduakayo bayat ti panangrugitayo iti maika-190 a Semiannual a Sapasap a Komperensia ti Ti Simbaan ni Jesucristo dagiti Santo iti Ud-udina nga Aldaw. Magustuak a kaduaenkayo iti pagtaenganyo wenno sadinokayo man, tapno dumngeg iti mensahe dagiti propeta, mammadto, ken mammaltiing ken dadduma pay a lider iti Simbaan.
Agyamantayo iti teknolohia a mangikonekta kadatayo kas maysa a sangalubongan nga ummong dagiti disipulo ni Jesucristo. Ti sapasap a komperensia itay Abril binuya ti ad-adu a tao ngem iti ania man a komperensia nga immun-una, ket namnamaenmi a mapasamakto manen dayta.
Iti naglabas a sumagmamano a bulan, ti global pandemic, uram iti kabakiran, ken dadduma pay a didigra ti naan-anay a namagbalbaliw iti biag. Makipagladingitak kadakayo a nakapukaw iti ipatpateg iti daytoy a panawen. Ken Ikararagak ti amin dagiti agdama nga agsagsagaba.
Ngem, agtalinaed nga agtultuloy a dumur-as ti aramid ti Apo. Iti baet ti social distancing, face masks, ken Zoom meetings, naadaltayo nga aramiden ti sumagmamano a banag a sabali ken nasamsamay pay. Makaisangbay dagiti karkarna a panawen iti karkarna a gunggona.
Managparnuay, naregget, ken nakaskasdaaw dagiti misionario ken mission lidertayo. Nupay nasken nga agsapul ti kaaduan a misionario kadagiti baro, napartuat a wagas iti panagtrabahoda, adu a mision ti nagreport iti ad-adu pay a panangisuro ngem idi.
Nasken nga iserratayo dagiti templo iti saan a nabayag, ken naitantan biit ti dadduma pay a proyekto, ngem itan agtultuloy a dumur-as ti amin. Iti tawen 2020, addaantayo iti nakali a daga para iti 20 a baro a templo!
Napardas ti immaduan ti aramid iti family hitory. Nabuangay ti adu a baro a ward ken stake. Ken napatgantayo a mangireport a ti Simbaan nakaipaay iti tulong a humanitarian para iti pandemia iti 882 a proyekto iti 150 a pagilian.
Immadu ti panagadal iti ebanghelio iti adu a pagtaengan a nagbunga iti napigpigsa a pammaneknek ken linnangen ti pamilia. Insurat ti maysa nga ina: “Mariknami nga as-asidegkami nga amang kadagiti annak ken appokomi itan nga aguummongkami iti Zoom iti Domingo. Adda batang ti tunggal maysa a mangted iti kapanunotanda iti Umaykayo, Sumurot Kaniak. Nagbaliw ti kararag kadagiti miembro ti pamiliami gapu ta ad-adda a maawatanmi no ania ti kasapulanda.”
Ikararagko nga usarentayo daytoy naidumduma a panawen a dumur-as a naespirituan. Addatayo ditoy daga tapno masubok, tapno kitaen no pilientayo a suroten ni Jesucristo, tapno masansan nga agbabawi, ken agsurusuro, ken dumur-as. Tarigagay dagiti espiritutayo a dumur-as. Aramidentayo dayta a kasayaatan babaen ti panagtalinaed a natibker iti dana ti katulagan.
Kinapudnona, ay-ayatennatayo ti Nailangitan nga Amatayo ken ti Anakna, ni Jesucristo! Maseknanda kadatayo! Bambantayandatayo ken dagiti nasantuan nga anghelda. 1 Ammok a pudno dayta.
No aguummongtayo a dumngeg iti balikas a pinaregta ti Apo nga isao dagiti katulonganna, awisenkayo a mangutob iti kari nga inaramid ti Apo. Kinunana nga “asino man a kumpet iti balikas ti Dios, a naalisto ken nabileg, a mamagsina amin a panangballaibo … ken dagiti panangallilaw ti sairo, ken mangiturong iti [disipulo] ni Cristo iti nailet ken akikid a dana.” 2
Ikararagko a pilienyo ti kumpet iti balikas ti Dios kas naipakdaar kabayatan daytoy sapasap a komperensia. Ket ikarargko a mariknayo koma ti naan-anay nga ayat ti Apo para kadakayo, 3 iti sagrado a nagan ni Jesucristo, amen.