Ti Pammaneknek Dagiti Tallo a Saksi

Maipakaammo iti amin a pagilian, puli, pagsasao, ken tattao, a pakaidanonanto daytoy nga aramid: A dakami, babaen iti parabur ti Dios Ama, ken ti Apotayo a ni Jesucristo, nakitami dagiti pinanid a naglaon kadagitoy a kasuratan, nga isu ti kasuratan dagiti tattao ni Nephi, ken kasta met dagiti Lamanita, dagiti kakabsatda, ken kasta met dagiti tattao ni Jared, a naggapu manipud iti nasao a torre. Ken kasta met nga ammomi a dagitoy ti naipatarus babaen ti sagut ken pannakabalin ti Dios, ta ti timekna ti nangipakdaar kadakami; isu nga ammomi a sitatalged a pudno daytoy nga aramid. Kasta met a paneknekanmi a nakitami dagiti naikitikit iti pinanid; ken naipakita dagitoy kadakami babaen ti pannakabalin ti Dios, ket saan a ti tao. Ket ipakdaarmi iti nasimbeng a sao, a bimmaba ti anghel ti Dios manipud iti langit, ket intugotna ken indatagna iti imatangmi, a naimatangan ken nakitami dagiti pinanid, ken dagiti naikitikit kadagitoy; ket ammomi a gapu iti parabur ti Dios Ama, ken ti Apotayo a ni Jesucristo, a naimatangan ken paneknekanmi a pudno dagitoy a bambanag. Ken nakaskasdaaw daytoy iti imatangmi. Nupay kasta, imbilin kadakami ti timek ti Apo a masapul a dakami ti mangpaneknek iti daytoy; gapuna, tapno agtungpalkami kadagiti bilin ti Dios, paneknekanmi dagitoy a bambanag. Ket ammomi a no napudnokami ken ni Cristo, maikkat kadagiti kawesmi ti basol ti amin a tattao, ket maibilang nga awan mulitna iti pangukoman ni Cristo, ket makipagnaedkaminto kenkuana iti agnanayon idiay langit. Ket agpaay ti dayaw iti Ama, ken iti Anak, ken iti Espiritu Santo, a maysa a Dios. Amen.