Ti
Libro ni Mormon

Gapuna, daytoy ti pannakayababa ti kasuratan dagiti tattao ni Nephi, ken kasta met dagiti Lamanita—Naisurat para kadagiti Lamanita a natda iti balay ti Israel; ken kasta met para kadagiti Hudio ken Gentil—Naisurat babaen ti pammilin, ken kasta met babaen ti espiritu ti pammadto ken panangipaltiing—Naisurat ken naserraan, ken naidulin iti ayan ti Apo, tapno saanda koma a madadael—A mairuar babaen ti sagut ken pannakabalin ti Dios iti pannakaipatarus daytoy—Naserraan babaen ti ima ni Moroni, ken naidulin babaen ti Apo, a mairuar iti naituding a panawen babaen iti wagas ti Gentil—Babaen ti sagut ti Dios ti pannakaipatarus daytoy.

Maysa a pannakayababa a naala manipud met iti Libro ni Ether, a kasuratan dagiti tattao ni Jared, a naiwaras idi panawen a kinirokiro ti Apo ti pagsasao dagiti tattao, idi mangbangbangonda iti torre a dumanon idiay langit—A mangipakita kadagiti natda iti balay ti Israel no ania a naindaklan a bambanag ti naaramid ti Apo kadagiti am-ammada; ken tapno maammuanda ti katulagan ti Apo, a saanda a naisina nga agnanayon—Kasta met iti pannakaguyugoy dagiti Hudio ken Gentil a ni Jesus isu ti Cristo, ti Agnanayon a Dios, a mangiparparangarang iti bagina kadagiti amin a pagilian—Ket ita, no adda dagiti riro, dagitoy ti nagbiddutan dagiti tattao; gapuna, saanyo a babalawen dagiti banag ti Dios, tapno maibilangkayonto nga awan mulitna iti pangukoman ni Cristo.