Ababa a Panangilawlawag Maipapan iti Libro Ni Mormon

Maysa a nasagraduan a kasuratan dagiti umili iti nagkauna nga Amerika ken naikitikit kadagiti pinanid a metal ti Libro ni Mormon. Mairaman iti sumaganad dagiti naggapuan a nakaummongan daytoy a kasuratan:

1. Dagiti Pinanid ni Nephi, a dua a kita: ti babassit a pinanid ken dadakkel a pinanid. Ad-adda a naipamaysa ti immuna kadagiti naespirituan a bambanag ken ti ministerio ken pannursuro dagiti propeta; idinto a ti naud-udi kaaduan a nilaonna iti ad-adu a nailubongan a pakasaritaan dagiti tattao a naseknan (1 Nephi 9:2–4). Nainayon met dagiti kangrunaan a naespirituan ken napateg a bambanag iti dadakkel a pinanid.

2. Dagiti Pinanid ni Mormon, a nanglaon iti inyababa ni Mormon manipud kadagiti dadakkel a pinanid ni Nephi, nga addaan iti adu a pannakailawlawag. Linaon pay dagitoy a pinanid ti pannakaituloy ni Mormon ti historia ken dagiti innayon ti anakna a ni Moroni.

3. Dagiti Pinanid ni Ether, a mangiladawan ti pakasaritaan dagiti Jaredita. Inyababa ni Moroni daytoy a kasuratan, a nangilukonanna dagiti bukodna a palawag ken nanginayonanna ti kasuratan iti sapasap a pakasaritaan babaen ti paulo a “Libro ni Ether.”

4. Dagiti Pinanid a Gambang nga inkuyog dagiti tattao ni Lehi manipud iti Jerusalem idi 600 B.C. Naglaon dagitoy “dagiti lima a libro ni Moises,…ken kasta met ti kasuratan dagiti Hudio manipud idi punganay, … agingga iti panangrugi ti panagturay ni Sedekias, ari ti Judah; ken kasta met dagiti padto dagiti nasantuan a propeta” (1 Nephi 5:11–13). Adu a balikas ti naadaw manipud kadagitoy a pinanid, a mangdakamat ken ni Isaias ken dagiti dadduma a propeta iti biblia ken dagiti saan a nadakamat a propeta iti biblia, nga agparang iti Libro ni Mormon.

Addaan ti Libro ni Mormon iti sangapulo ket lima a kangrunaan a paset wenno pannakagudgudua, a maammuan malaksid iti maysa, a kas libro, gagangay a matudingan babaen ti nagan ti kangrunaan a nangisurat. Maysa a patarus manipud kadagiti babassit a pinanid ni Nephi ti umuna a paset (ti umuna nga innem a libro, nga agpatingga iti Omni). Nailukon iti nagbaetan ti Libro ni Omni ken Mosiah ti naawagan a Dagiti Balikas ni Mormon. Pagsilpuenna daytoy a nailukon a kasuratan a naikitikit kadagiti babassit a pinanid iti nayababa ni Mormon a dadakkel a pinanid.

Ti kaatiddogan a paset, manipud iti Mosiah agingga iti Mormon kapitulo 7, ti maysa a patarus ni Mormon iti panangyababa kadagiti dadakkel a pinanid ni Nephi. Inkitikit ti anak ni Mormon a ni Moroni ti panggibus a paset, manipud iti Mormon kapitulo 8, agingga iti gibus ti libro, ket kalpasan ti panangileppasna iti kasuratan ti biag ti amana, inaramidna ti panangyababa ti kasuratan dagiti Jaredita (kas Libro ni Ether) ken kamaudiananna innayonna dagiti paset a naawagan a kas Libro ni Moroni.

Iti wenno agarup tawen B.C. 421, ni Moroni, ti maudi kadagiti Nephita a propeta a mannurat iti pakasaritaan, sinerraanna ti sagrado a kasuratan ket inlemmengna babaen iti Apo, a mairuarto iti ud-udina nga aldaw kas iti impadto ti timek ti Dios babaen kadagiti nagkauna a propetana. Idi A.D. 1823, sinarungkaran daytoy met laeng a Moroni, a maysa a nagungar a personahe, ni Propeta Joseph Smith ket inyawatna kenkuana dagiti nakitikitan a pinanid.

Maipapan iti daytoy nga edision: Naggapu manipud kadagiti pinanid ken paset iti sagrado a kasuratan ti orihinal a panid ti paulo, sakbay iti panid ti linaon. Dagiti pakauna a saan a naisurat iti italiko kas iti 1 Nephi ken sakbay ti Mosiah kapitulo 9, karamanda met ti sagrado a kasuratan. Saan a paset iti orihinal a kasuratan dagiti pakauna a naisurat iti italiko, kas iti paulo ti kapitulo, ngem ketdi nairaman a katulongan iti panagadal a para iti nanam-ay a panagbasa.

Nagtultuloy dagiti sumagmamano a riro iti linaon iti napalabas nga edision ti Libro ni Mormon a naipablaak iti Ingles. Naglaon iti daytoy nga edision ti pannakaatur a mabalin a maitutop tapno maipaay ti banag a maitunos kadagiti saan pay a naipablaak a manuskrito ken dagiti immun-una nga edision nga inurnos ni Propeta Joseph Smith.