Ti Pammaneknek ti Propeta a ni Joseph Smith

Dagitoy ti bukod a balikas ni Propeta Joseph Smith maipapan iti yaay ti Libro ni Mormon:

“Iti rabii ti … maikaduapulo-ket-maysa ti Septiembre [1823] … impaayko ti bagik iti kararag ken araraw iti Mannakabalin a Dios. …

“Bayat ti yaawagko iti Dios, natakuatak ti lawag nga agan-anaraar iti siledko, a nagtultuloy a rimmaniag agingga a nalawlawagen ti siled ngem iti tengnga ti aldaw, sa kellaat a nagparang ti maysa a personahe iti abay ti katrek, a nakatakder iti angin, gapu ta saan a naisagid dagiti dapanna ti datar.

“Nakasuot iti nalawa a roba a naisangsangayan unay ti kinapurawna. Maysa daytoy a kinapuraw a nalablabes ngem iti aniaman a naindagaan a nakitakon; wenno saanko patien nga adda ti mabalin a maaramid iti daga nga agparang a kasta unay ti kinapuraw ken kinaraniag. Awan ti abbong dagiti imana, kasta met dagiti takiagna, a ngatuen bassit ti pungo-pungoanna, ket, kasta met nga awan abbong dagiti dapanna, a kas kadagiti sakana, iti ngatuen bassit ti palaypalayna. Agpaparang met ti ulo ken ti tengngedna. Nakitak nga awan ti sabali nga aruatenna malaksid ti roba, gapu ta silulukat daytoy, ket makitak ti barukongna.

“Saan la a ti robana ti kasta unay ti kinapurawna, ngem nadayag ti pakabuklan ti personahena a saan a mailadawan, ket pudno a kasla iti kimat ti langana. Kasta unay ti kinalawag ti siled, ngem saan unay a naraniag a kas iti nangbalkot iti bagina. Iti umuna panangkitak kenkuana, nagbutengak; ngem saan a nagbayag napukaw ti butengko.

“Inawagannak iti naganko, ket kinunana kaniak nga isu ti mensahero manipud iti imatang ti Dios nga imbaonna kaniak, ket Moroni ti naganna; nga adda paaramid ti Dios kaniak; ket agpadanto a naimbag ken dakes ti maisaoda iti naganko kadagiti amin a nasion, puli, ken pagsasao, wenno nasken nga agpadanto a naimbag ken dakes ti sawen ti amin a tao.

“Kinunana nga adda libro a naidulin, a naisurat kadagiti balitok a pinanid, a naglaon iti salaysay dagiti immuna a nagindeg iti daytoy a kontinente, ken ti puon a nagtaudanda. Kinunana pay a linaonna daytoy ti pakabuklan ti agnanayon nga Ebanghelio, kas inyawat ti Mangisalakan kadagiti nagkauna a nagindeg;

“Kasta met, nga adda dua a bato iti pirak a bai—ket kadagitoy a bato, a naikapet iti kalasag, ti mangbukel iti maaw-awagan iti Urim ken Thummim—a naidulin agraman kadagiti pinanid; ket ti panangtagikua ken panangaramat dagitoy a bato isu ti nangbukel kadagiti ‘mammadto’ iti nagkauna wenno immuna a panawen; ken insagana ida ti Dios para iti panggep a pannakaipatarus ti libro. …

“Ket imbagana manen kaniak, nga inton maalak dagiti pinanid a nasaona—gapu ta saan pay a natungpal ti panawen a maalada—nasken a saanko nga ipakita dagitoy iti asinoman a tao; kasta met ti kalasag agraman ti Urim ken Thummim; kadagidiay laeng maibilin kaniak ti pangipakitaak; no ipakitak iti asinoman madadaelakto. Bayat ti pannakisasaona kaniak maipanggep kadagiti pinanid, naipalgak ti sirmata iti panunotko ket nakitak ti lugar a nakaidulinan dagiti pinanid, ket nakalawlawag ken naisalsalumina isu a mailasinko manen ti lugar idi sinarungkarak daytoy.

“Kalpasan daytoy a pannakisao, nakitak ti lawag iti siled a napardas a nangbalkot iti tao a nakisarsarita kaniak, ket nagtultuloy a kasta agingga a simmipnget manen ti siled, malaksid ti nangbalkot kenkuana; idi, kellaat a nakitak, a kasla, naglukat a pagnaan a kumamang iti langit, ket nagpangato agingga a namimpinsan a nagpukaw, ket nabati ti siled a kas met laeng iti sigud sakbay a nagparang daytoy nailangitan a lawag.

“Nagiddaak a nangpampanunot iti naisalsalumina a buya, ken masmasdaaw iti kasta unay iti imbaga kaniak daytoy karkarna a mensahero; idi, bayat ti panagpampanunotko, kellaat a naduktalak a mangrugi manen nga aglawag ti siledko, ket iti apagdarikmat, a kasla iti sigud, adda manen ti nailangitan a mensahero iti abay ti iddak.

“Inrugina, ket insalaysayna manen dagiti isu met laeng a bambanag nga inaramidna iti immuna nga isasarungkarna, nga awan ti uray bassit a nagdumaanda; sa kalpasanna, imbagana kaniak ti naindaklan a panangukom a mapasamakto ditoy daga, ti nakaam-amak a panagsaknap ti bisin, ranget, ken angol; ket dagitoy a naladingit a pannakaukom mapasamakto ditoy daga iti daytoy a kaputotan. Kalpasan ti panangisalaysayna kadagitoy a bambanag, nagpangato manen isuna a kas inaramidna iti immuna.

“Iti daytoy a kanito, nadagsen ti panagsaad dagitoy a pasamak iti panunuotko, ket awan ti umapay a turog kaniak, ket nagiddaak a masmasdaaw kadagiti agpadpada a nakita ken nangngegak. Ngem anian a siddaawko idi makitak manen ti isu met la a mensahero iti abay ti iddak, ket nangngegko nga insalaysayna wenno inulitna manen kaniak dagiti isu met laeng a bambanag a kas iti immuna; ket innayonna nga agannadak, imbagana kaniak a padasennakto kano a sulisogen ni Satanas (a gapu iti napanglaw a kasasaad ti pamilia ti amak), a mangala kadagiti pinanid iti gagem a bumaknang. Imparitna kaniak daytoy, a kinunana a masapul nga awan ti sabali a gandatko iti panangalak kadagiti pinanid no di ti pakaidayawan ti Dios, ken masapul a saanak a maawis iti sabali a gagem malaksid ti panangipasdek iti pagarianna; ta no saan diak maala ida.

“Kalpasan daytoy maikatlo nga isasarungkar, nagpangato manen isuna iti langit a kas idi, ket nabatiak manen a mangut-utob iti kinakarkarna a napadasak; kalpasan unay ti maikatlo a panagpangato ti nailangitan a mensahero manipud iti ayanko, nagtaraok ti kawitan, ket naammuak a parbangonen, a kaipapananna a nagpatnagkami a nagsarsarita.

“Bimmangonak iti iddak kalpasanna, ket, kas iti nakairuamak, sinangok dagiti nasken nga aramidek iti dayta nga aldaw; ngem, iti panangpadasko nga agtrabaho a kas iti napalpalabas, naduktalak a naugotanak iti pigsa ket saanak a makapagtrabaho. Ti amak, nga agtartrabaho iti sibayko, nadlawna a madi ti riknak, ket pinagawidnak. Rinugiak ti nagna nga agawid; ngem, iti iruruarko iti alad ti talon nga ayanmi, napukaw a namimpinsan ti pigsak, ket nadalupoak iti daga, ket iti apagkanito naawananak iti puot.

“Immuna a nalagipko ti timek a nakisao kaniak, nga aw-awagannak iti naganko. Timmangadak, ket nakitak ti isu met la a mensahero a nakatakder iti ngatuen ti ulok, a nalikmut iti lawag a kas idi damo. Inulitna manen kaniak ti amin nga imbagana iti napalabas a rabii, ket imbilinna a mapanak iti amak ket ibagak kenkuana ti parmata ken dagiti bilin a naawatko.

“Nagtungpalak; nagsubliak iti amak iti talon, ket inulitko kenkuana ti amin a banag. Imbagana kaniak a naggapu daytoy iti Dios, ket imbagana a mapanak ken aramidek ti imbilin kaniak ti mensahero. Pimmanawak iti talon, ket napanak iti lugar nga imbaga ti mensahero a nakaidulinan dagiti pinanid; ket gapu iti kinalawag ti parmata a naited kaniak maipapan kadaytoy, nailasinko a dagus ti lugar apaman a nakadanonak idiay.

“Saan a pangadaywan ti purok ti Manchester, probinsia ti Ontario, New York, nakatakder ti maysa a turod a kalalainganna iti kadakkel, ken ti katayagan iti sangakaarrubaan. Iti akinlaud a paset daytoy a turod, iti saan nga adayo iti tuktok, iti pandag ti panakkelen a bato, adda dagiti pinanid, a naidulin iti kahon a bato. Napuskol daytoy a bato ken nagtimbukel a nagtimburog iti tengnga, ken umingpis iti igidna, isu a makita ti akintengnga a pasetna a pimmissuol iti daga, ngem nagaburan iti daga ti aglawlaw nga igidna.

“Idi naikkatkon ti daga, nakasapulak iti pagsigkat, nga insengngatko iti sirok ti igid ti bato, ket naital-ok daytoy babaen ti bassit a pigsak. Kimmitaak iti uneg, ket nakitak sadiay dagiti pinanid, ti Urim ken Thummim, ken ti kalasag, a kas nasao ti mensahero. Naaramid ti kahon a nagyanan dagitoy iti napidipid a batbato a kasla semento. Adda iti lansad ti kahon adda ti dua a bato a naisunggangat iti kahon, ket naiparabaw kadagitoy dagiti pinanid ken dadduma pay a banag.

“Pinadasko nga iruar ida, ngem imparit ti mensahero, ket naibaga manen a di pay dimteng ti panawen a pannakairuarda, ket di pay mabalin, agingga a mapalabas ti uppat a tawen manipud iti dayta a panawen; ngem imbagana a rumbeng a mapanak iti dayta a lugar iti apagisu a makatawen manipud iti dayta a kanito, ket agkitakami, ket rumbeng nga itultuloyko ti umay agingga iti panawen a mabalinen nga iruar dagiti pinanid.

“Ngarud, kas iti naibilin kaniak, tinawen a napanak, ket nasarakak sadiay iti tunggal isasarungkarko ti isu met laeng a mensahero, ken immawatak iti panangiwanwan ken pannakaammo manipud kenkuana iti tunggal panagsaritami, a sidadayaw iti kayat ti Apo nga aramiden, ken no kasano ken no ania a wagas ti pannakaimaton ti pagarianna iti ud-udina nga aldaw.

“Dimteng ti panawen a pannakaala dagiti pinanid, ti Urim ken Thummim, ken ti kalasag. Iti maikaduapulo ket dua nga aldaw ti Septiembre, sangaribu walo gasut ken duapulo ket pito, nga ipapanko manen iti lugar a nakaidulinanda iti gibus ti sabali a tawen, inyawat ida kaniak ti isu met la a nailangitan a mensahero babaen ti daytoy a pammilin: a siak ti rumbeng a mangaywan kadagitoy; a no baybay-ak ida, wenno gapu iti pannakaliwayko, nasken a maisinaak; ngem no aramatek ti amin a kabaelak a mangitalimeng kadagitoy, agingga nga alaen ida ti mensahero, nasken a masalaknibanda.

“Naammuak ti gapuna idi agangay no apay a naawatko ti kasta a nainget a pammilin a panangitalimengko kadakuada, ken no apay a kinuna ti mensahero a no naaramidkon ti nasken nga aramidek, alaennanto ida. Ta apaman laeng a naammuan ti kaaddada kaniak, adun ti napinget a mangagaw dagitoy kaniak. Adu a pamuspusan ti naaramat para iti dayta a gagem. Nagbalin a naulpit ken nakaro ti pannakaparparigatko ngem iti naglabas, ket nagtultuloy ti adu nga agsipsiput a mangala kadagitoy manipud kaniak agingga iti mabalin. Ngem babaen ti sirib ti Dios, nagtalinaedda a natalged kadagiti imak, agingga a natungpalko babaen kadagitoy ti naikeddeng nga aramidek. Ket, babaen ti tulag, innala ida ti mensahero, inyawatko ida kenkuana; ket addada iti aywanna agingga ita, iti maikadua nga aldaw ti Mayo, sangaribu walo gasut ken tallopulo ket walo.”

Para iti kompleto a salaysay, kitaen iti Joseph Smith—Pakasaritaan iti Perlas a Kapatgan.

Ti nagkauna a kasuratan a nayeg ditoy daga, a kas timek dagiti tattao nga agsasao manipud iti tapok, ken naipatarus iti agdama a pagsasao babaen ti sagut ken pannakabalin ti Dios kas ti panangsaksi babaen ti Nadibinuan a pammalubos, immuna a naipablaak iti Ingles idi tawen 1830 a kas The Book of Mormon.