Ti Pannakaisubli ti Pakabuklan ti Ebanghelio ni Jesucristo

Sipapasnek nga iwaragawagmi nga ay-ayaten ti Dios dagiti annakna iti tunggal pagilian iti lubong. Inikkannatayo ti Dios Ama iti nadiosan a pannakayanak, ti awan kaaspingna a biag, ken ti awan patinggana a pangsubbot a sakripisio ti Ay-ayatenna nga Anak, a ni Jesucristo. Babaen ti pannakabalin ti Ama, nagungar manen ni Jesus ket nagballigi ken patay. Isu ti Mangisalakantayo, ti Pagwadantayo, ken ti Mannubbottayo.

Dua gasut a tawenen ti napalabas, iti maysa a napintas nga agsapa ti panagsusulbod idi 1820, ti ubing a ni Joseph Smith, nga agsapsapul iti pannakaammo no ania a simbaan ti pakikamenganna, ket napan iti kakaywan iti asideg ti pagtaenganna iti amianan a paset ti estado ti New York, USA, tapno agkararag. Addaan kadagiti saludsod maipanggep iti pannakaisalakan ti kararuana ken nagtalek a ti Dios ti mangtarabay kenkuana.

Sipapakumbaba nga, ipakdaarmi a kas sungbat iti kararagna, nagparang ti Dios Ama ken ti Anakna, a ni Jesucristo, ken ni Joseph ket nangrugi iti “pannakaisubli dagiti amin a banag” (Dagiti Aramid 3:21) kas naipadto iti Biblia. Iti daytoy a parmata, naammuanna a kalpasan ti ipapatay dagiti sigud nga Apostol, napukaw iti daga ti Simbaan ni Cristo iti Baro a Tulag. Agbalinto ni Joseph a ramit iti pannakaisubli daytoy.

Pasingkedanmi a babaen ti panangiturong ti Ama ken ti Anak, immay dagiti nailangitan a mensahero a nangbilin ken ni Joseph a mangipasdek manen iti Simbaan ni Jesucristo. Insubli ti nagungar a ni Juan Bautista ti turay a mangbuniag babaen ti pannakaipabatok para iti pannakaugas ti basbasol. Tallo kadagiti sigud a sangapulo-ket-dua nga Apostol—da Pedro, Santiago, ken Juan—ti nangisubli iti kinaapostol ken dagiti tulbek ti turay ti priesthood. Immay met dagiti dadduma pay, agraman ken ni Elias, a nangisubli iti turay a mamagkaykaysa kadagiti pamilia iti agnanayon iti awan patinggana a pagnanaigan a mangparmek iti patay.

Paneknekanmi pay a naikkan ni Joseph Smith iti sagut ken bileg ti Dios a mangipatarus iti maysa a nagkauna a kasuratan: ti Libro ti Mormon—Mainayon a Pammaneknek ken ni Jesucristo. Mairaman kadagiti panid iti daytoy sagrado a teksto ti maysa a pakaammuan ti personal a panagministro ni Jesucristo kadagiti tao iti Deppaarna iti Laud kalpasan laeng ti Panagungarna. Daytoy ti mangisuro iti panggep ti biag ken mangilawlawag iti doktrina ni Cristo, nga isu ti kangrunaan iti dayta a panggep. Kas maysa a kadua ti nasantuan a kasuratan iti Biblia, paneknekan ti Libro ni Mormon nga amin a tattao ket lallaki ken babbai nga annak ti managayat nga Ama iti Langit, nga addaan Isuna iti nadiosan a plano para iti biagtayo, ken ti Anakna, a ni Jesucristo, ket agsarita iti agdama a kas idi nagkauna a panawen.

Ipakdaarmi a ti Ti Simbaan ni Jesucristo dagiti Santo iti Ud-udina nga Aldaw, a nabuangay idi Abril 6, 1830, ti naisubli a Simbaan ni Cristo iti Baro a Tulag. Sititibker a nakabatay daytoy a Simbaan iti naan-anay a biag ti kangrunaan a panulina a bato, a ni Jesucristo, ken iti awan patinggana a Pannubbot ken literal a Panagungarna. Nangawag manen ni Jesucristo kadagiti Apostol ken nangted kadakuada iti turay ti priesthood. Awisennatayo amin nga umasideg Kenkuana ken iti Simbaanna, tapno umawat iti Espiritu Santo, dagiti ordinansa ti pannakaisalakan, ken tapno manggun-od iti napaut a rag-o.

Dua gasut a tawenen ti napalabas manipud pay idi inrugi ti Dios Ama ken ti Ay-ayatenna nga Anakna, ni Jesucristo daytoy a Pannakaisubli. Minilmilion a tattao iti intero a lubong ti nangawat iti pannakaammo maipapan kadagitoy a naipadto a paspasamak.

Siraragsak nga ipakdaarmi a dumurdur-asen ti naikari a Pannakaisubli babaen ti agtultuloy a paltiing. Ti daga saanton a kas iti sigud, agsipud ta ti Dios “pagkaykaysaennanto dagiti amin a bambanag ken ni Cristo” (Taga-Efeso 1:10).

Addaan iti panagraem ken panagyaman, dakami kas Apostolna awisenmi ti amin a mangammo—a kas iti panangammomi—a silulukat dagiti langit. Pasingkedanmi nga ipakpakaammon ti Dios ti pagayatanna kadagiti patpatgenna nga annak a lallaki ken babbai. Paneknekanmi a dagiti asino man a nainkararagan a mangadal iti mensahe ti Pannakaisubli ken agtignay a sipapammati ket mabendisionandanto a manggun-od iti bukodda a pammaneknek iti kinadiosanna ken ti panggepna a mangisagana iti lubong para iti naikari a Maikadua a Yaay ti Apo ken Mangisalakantayo, a ni Jesucristo.