Maysa a Naisangsangayan a Natan-okan a Takem

Ni Joy D. Jones

Sapasap a Presidente ti Primary

Kas babbai nga addaan iti pammati, magun-odtayo dagiti pagbatayan ti kinapudno manipud kadagiti padas ni Propeta Joseph a mangipaay kadagiti nalawag a pannakaammo iti yaawattayo ti bukodtayo a paltiing.

Agyamanak a mangipamaysa iti saritak ita maipapan kadagiti agtultuloy nga akem dagiti babbai iti Pannakaisubli. Nalawag nga iti intero a pakasaritaan addaan iti naisangsangayan ti lugar dagiti babbai iti plano ti Nailangitan nga Amatayo. Insuro ni Presidente Nelson, “Imposible a marukod ti impluensia nga … adda kadagiti babbai, saan laeng kadagiti pamilia ngem iti pay Simbaan ti Apo, kas assawa, inna, ken lelong ken lelang; kas kakabsat a babbai ken iikit; kas mannursuro ken lider; ken nangnangruna kas ulidan ken napudno a mangsalsalaknib iti pammati.” ¹

Iti nagkauna a Relief Society iti Nauvoo, 178 a tawen ti napalabas, binalakadan ni Propeta Joseph Smith dagiti kakabsat a babbai nga “agbiag a maitunos iti pribilehio[da].” ² Isursuronatayo ita dagiti pagwadanda. Nagkaykaysada a nangsurot iti timek ti propeta ken nagbiagda nga addaan iti natibker a pammati ken ni Jesuscristo bayat ti panangtulongda a a mangbangon ti pundasion a pagtaktakderantayo ita. Kakabsat, batangtayo met ita. Addaantayo iti nasantuan a nakaibaonantayo manipud iti Apo, ket napateg unay dagiti napudno, naidumduma a kontribusiontayo.

Inlawlawag ni Presidente Spencer W. Kimball: “Ti panagbalin a nalinteg a babai kabayatan dagiti maudi a panawen ditoy daga, sakbay ti maikadua a yaay ti Mangisalakantayo, ket maysa a naisangsangayan a natan-ok a takem. Ti pigsa ken impluensia ti nalinteg a babai ita ket mabalin a maminsangapulo iti bilegna kadagiti nataltalna a panawen.” ³

Kasta met nga impalawag ni Presidente Nelson: “Agpakaasiak kadagiti kakabsatko a babbai [iti] Simbaan … nga agtuloy a dumur-as! Akmenyo ti rumbeng ken kasapulan a lugar iti pagtaenganyo, iti komunidadyo, ken iti pagarian ti Dios—nga ad-adda pay ngem iti inaramidyo idi.” ⁴

Itay kallabes, naaddaanak iti pribilehio, a kaduak ti maysa a grupo dagiti ubbing ti Primary, a makipagkita ken ni Presidente Russell M. Nelson iti replika ti pagtaengan ti pamilia Smith iti Palmyra, New York. Agdengngeg bayat ti panangisurona kadagiti ubbing no ania ti aramindenda tapno umaddang a dumur-as.

Sister Jones: “Magagaranak a mangammo no adda kayatyo a saludsoden ken ni Presidente Nelson. Nakatugawkayo ditoy a kadua ti propeta. Adda kadi kayatyo a saludsoden iti propeta? Wen, Pearl.”

Pearl: “Narigat kadi ti agbalin a propeta? Adu ti ar-aramidem?

Presidente Nelson: “Siempre narigat dayta. Narigat ti amin no maipanggep iti panagbalin nga ad-adda a kas iti Mangisalakan. Kas pagarigan, idi kayat ti Dios nga ited ti Sangapulo a Bilin ken ni Moises, sadino ti nangibagaanna ken ni Moises a papananna? Idiay tuktok ti bantay, iti tuktok ti Bantay Sinai. Isu nga immuli ni Moises iti tuktok dayta a bantay tapno alaenna ti Sangapulo a Bilin. Ita, maisao koma ti Nailangitan nga Ama, ‘Moises, rugiam idiay, ket rugiakto ditoy, ket sabtenkanto iti tengnga.’ Saan, magustuan ti Dios iti aramid, gapu ta ti aramid mangyeg ti gunggona a di sumangbay no awan daytoy. Kas pagarigan, nagadal ka kadi nga agpiano?”

Ubbing: “Wen.”

Pearl: “agad-adalak nga agbiolin.”

Presidente Nelson: “Ket agpraktiska kadi?”

Ubbing: “Wen.”

Presidente Nelson: “Ania ti mapasamak no saanka nga agpraktis?”

Pearl: “Malipatam.”

Presidente Nelson: “Wen, saanka a dumur-as, agdur-aska kadi? Isu a wen ti sungbatna, Pearl. Masapul ti kagumaan, kinagaget, panagadal, ken awan pagpatinggaanna. Nasayaat dayta! Nasayaat dayta, gapu ta kanayon ti panagdur-astayo. Uray pay iti sumaruno a biag ket agdur-astayo.”

Ti sungbat ni Presidente Nelson kadagitoy a napateg nga ubbing ket pakairamanan ti tunggal maysa kadatayo. Ay-ayaten ti Dios ti agkagumaan, ken mangyeg ti bendision ti agkagumaan. Agtultuloytayo nga agpraktis. Kankanayontayo nga agdur-as no agkagumaantayo a suruten ti Apo. ⁵ Saanna a namnamaen ti kinanaan-anay ita. Agtultuloytayo a sumang-at iti personal a Bantay ti Sinaitayo. Kas kadagiti naglabas a panawen, ti panagdaliasattayo, kinapudnona, kasapulan ti panagkagumaan, aramid, ken adal, ngem ti panagkumittayo ket mangipaay kadagiti agnanayon a parabur. ⁶

Ania kadi pay ti masursurotayo manipud ken ni Propeta Joseph Smith ken iti Umuna a Parmata maipapan iti panagkagumaan, kinagaget, ken panagadal? Makaited kadatayo ti Umuna a Parmata iti pagturongan iti naisangsangayan, agtultuloy nga akemtayo akemtayo ? Kas matalek a babbai, magun-odtayo dagiti pagbatayan ti kinapudno manipud kadagiti padas ni Propeta Joseph a mangipaay ti pannakaawattayo ti bukodtayo a paltiing. Kas pagarigan:

Agtrabahotayo iti naririgat a kasasaad.
Kitaentayo dagiti nasantuan a kasuratan tapno makaawat iti kinasirib nga agtignay.
Ipakitatayo ti pammati ken panagtalektayo iti Dios.
Usarentayo ti bilegtayo nga agpakaasi iti Dios a mangtulong kadatayo nga iwaksi ti impluensia ti kabusor.
Idatontayo dagiti tarigagay ti puspusotayo iti Dios.
Agpokustayo iti silawna a mangtartarabay kadagiti pilitayo iti biag ken agtalinaed kadatayo no umasidegtayo Kenkuana.
Mabigbigtayo nga ammona ti tunggal maysa kadatayo babaen iti nagantayo ket addaantayo iti akem a mangiipatungpal. ⁷

Mainayon pay, insubli ni Joseph Smith ti pannakaammo nga addaantayo iti nadiosan a kabaelan ken agnanayon a kinapateg. Gapu iti dayta a relasion iti Nailangitan nga Amatayo, patiek nga Isu mangnamnama a makaawattayo ti paltiing manipud Kenkuana.

Binilin ti Apo ni Emma Smith nga “awaten ti Espiritu Santo,” agsursuro ti adu, “iwaksi dagiti banag a nainlubongan, … sapulen dagiti banag a nasaysayaat,” ken “kumpet kadagiti katulagan[na]” iti Dios. ⁸ Napateg ti panagsursuro iti panagdur-as, nangnangruna a kas iti kanayon a panangkadkadua ti Espiritu Santo isurona kadatayo no ania ti kasapulan nga iwaksitayo—kayatna a sawen ti makalapped kadatayo wenno mangitantan iti panagdur-astayo.

Kinuna ni Presidente Russell M. Nelson: “Ipakaasik kadakayo a padur-asenyo koma ti naespirituan a kabaelanyo nga umawat iti paltiing.” ⁹ Agtultuloy kaniak dagiti balikas ti propetatayo no pampanunotek ti kabaelan dagiti babbai nga agtuloy a dumur-as. Agpakaasi Isuna kadatayo, a para kaniak daytoy ti priooridad. Isursuronatayo no kasano ti naespirituan nga agbiag iti managbasol a lubong babaen iti panangawat ken panagtignay iti paltiing. ¹⁰ No aramidentayo daytoy, panangraem ken panangtungpal ti bilin ti Dios, maikari kadatayo, uray ken ni Emma Smith, “ti korona ti kinalinteg.” ¹¹ Insuro ni Propeta Joseph Smith ti kinapateg ti pannakaammo a ti dana a kalkalikagumantayo iti daytoy a biag ket anamongan ti Dios. No awan dayta a pannakaammo, “ditayonto mabannog iti panunot[tayo] ken natalimudaw.” ¹²

Iti daytoy a komperensia, mangngeggantayo dagiti kinapudno a mangparegta kadatayo nga agbalbaliw, agsayaat, ken mangpatarnaw iti biagtayo. Babaen ti personal a paltiing, mabalintayo a lapdan ti aw-awagan ti sumagmamano a “malapunos a sapasap a komperensia”—a no pumanawtayo a determinado nga aramiden daytoy amin itan. Agusar dagiti babbai iti adu a kallugong, ngem imposible, ken saan a kasapulan, a mammaminsanda nga usaren dagitoy. Tulongannatayo ti Espiritu a mangeddeng no ania ti ipokus nga aramiden ita. ¹³

Makatulong kadatayo ti naayat nga impluensia ti Apo babaen iti Espiritu Santo tapn maammuantayo ti priooridadna para iti panagdur-astayo. Iturong ti panagtungpal ti bukod a paltiing iti bukodl a panagdur-as. ¹⁴ Dumngeg ken agtignaytayo. ¹⁵ Kinuna ti Apo, “Agdawatkayo iti Ama iti naganko nga addaan iti pammati, a mamati nga umawatkayonto, ken magun-odyonto ti Espiritu Santo, a mangipakita iti amin a banag a maikanada.” ¹⁶ Agtultuloy nga akemtayo nga umawat iti agtultuloy a paltiing.

No magun-odtayo ti dakdakkel nga addang ti kinalaing a mangobra iti daytoy, makaawattayto iti ad-adu a bileg iti kadagiti akemtayo nga agserbi ken ipatungpal ti aramid ti pannakaisalakan ken pakaitan-okan—a pudno nga “iwaksi dagiti banag a nainlubongan, ken sapulen dagiti banag a nasaysayaat.” ¹⁷ Mabalin a nasamsamay a maparegtatayo ti tumantanor a heherasiontayo nga aramiden ti isu met laeng.

Kakabsat, sapulentayo amin ti bileg ti Dios iti panagbiagtayo. ¹⁸ Addaan iti napintas a panagtitinnulong dagiti babbai ken lallaki iti panangipatungpal ti aramid ti Dios ita. Magun-odantayo ti bileg ti priesthood babaen kadagiti katulagan, nga immuna a naaramid iti danum ti panagbuniag ken kalpasanna iti uneg ti diding dagiti nasantuan a templo. ¹⁹ Insuro kadatayo ni Presidente Nelson, “Tunggal babai ken lalaki a makitulag iti Dios ket agtungpal kadagita a katulagan, ken maikari a makiraman kadagiti ordinansa ti priesthood, ket maikarida unay iti bileg ti Dios.” ²⁰

Personal nga akuek ita kas maysa a babai a diak nasapsapa a nabigbig iti biagko, a magun-odko babaen dagiti katulagak, ti bileg ti priesthood. ²¹ Kakabsatko a babbai, ikarkararagko a bigbigen ken ipategtayonyo ti bileg ti priesthood no “kumpet[tayo] kadagiti katulagantayo,” ²² arakupentayo dagiti kinapudno dagiti nasantuan a kasuratan, ken denggentayo dagiti balikas dagiti sibibiag a propetatayo.

Situtured nga ipakdaartayo ti debosiontayo iti Nailagitan nga Amatayo ken Mangisalakantayo, “nga addaan iti natibker a pammati kenkuana, a naan-anay nga agpannuray kenkuana a mannakabalin a mangisalakan.” ²³ Sirarag-otayo a mangtuloy daytoy a panagdaliasat iti kangatuan a naespirituan a potensial ken mangtulong kadagiti adda iti aglawlawtayo nga aramidenda met ti kasta babaen iti ayat, panangserbi, ken panangaasi.

Impalagip kadatayo ni Elder James E. Talmage, “Ti kaindaklanan a kampeon ti babai ken kinababai ket isu ni Jesus a Cristo.” ²⁴ Iti maudi a pananganag iti agtultuloy nga akem dagiti babbai iti Pannakaisubli, ken para kadatayo amin, ania nga akem ti kangrunaan? Paneknekak a daytoy ti dumngeg Kenkuana, ²⁵ sumurot Kenkuana, ²⁶ agtalek Kenkuna, ²⁷ ken agbalin a nayon ti ayatna. ²⁸ Ammok a sibibiag Isuna. ²⁹ Iti sagrado a nagan ni Jesucristo, amen.