Naimbag a Pundasion a Maibusor iti Umay a Panawen
Kadagiti umay a tawen, mapalubosantayo kadi a dagitoy a panagdur-as a naaramid tii Templo iti Salt Lake ti mangtignay ken mangparegta kadatayo.
Pakasaritaan ti Templo ti Salt Lake
Subliantayo man ti maysa a nabara a malem ti Hulio 24, 1847 agarup 2:00 p.m. Kalpasan ti makabannog a 111 nga aldaw a panagdaliasat ti umuna a grupo a buklen ti 148 a miembro ti Simbaan a nagpa-Laud, ni Brigham Young nga isu idi ti Presidente ti Korum ti Sangapulo-ket-dua nga Apostol, masakit ken agkakapsut gapu iti mountain fever, simrekda iti Salt Lake Valley.
Malpas ti dua nga aldaw, bayat ti panagpalaingna, indauluan ni Brigham Young ti sumagmamano kadagiti miembro ti Korum dagiti Sangapulo-ket-dua nga Apostol ken ti dadduma pay iti agsuksukisok nga ekspedision. Insurat ni William Clayton: “Agarup tallo-pagkapat ti milia iti amianan ti kampo, simmangpetkami iti napintas a patad a daga, patas ken napintas ti panagbangkirigna iti laud.”1
Bayat ti panangsukimatna ti lugar a kaduana ti grupo, kellaat a nagsardeng ni Brigham Young keet intugkelna ti sarukodna iti daga, ket kinunana, “Ditoyto ti pagtakderan ti Templo ti Diostayo.” Maysa ni Elder Wilford Woodruff kadagiti kakaduana, a nagkuna a ti sasao “dimteng [kenkuana] kas kimat,” ken nangitugkel ti maysa a sanga iti daga a pagilasinan ti paset a namarkaan ti sarukod ni Presidente Young. Napili ti uppat-a-pulo nga ektaria (16 ha) para iti templo, ken naikeddeng a nasken a maipasdek iti siudad ti “kuadrado nga Amianan & Abagatan, daya & laud” a ti templo ket adda iti akin-tengnga a paset ti disso.2
Iti Abril 1851 ti sapasap a komperensia, sangsangkamaysa a binutosan dagiti miembro ti Simbaan a mangkanunong iti singasing a mangipatakder iti maysa a templo “iti nagan ti Apo.”3 Kalpasan ti dua a tawen, idi Pebrero 14, 1853, indaton ni Heber C. Kimball ti disso iti seremonia iti publiko a dinar-ayan ti sumagmamano a ribu a Santo, ken nakali ti daga para iti pundasion ti Templo iti Salt Lake. Kalpasan ti sumagmamano a bulan, idi Abril 6, naikabil dagiti dadakkel a bato a pasuli ti templo ket naidaton babaen kadagiti seremonia a nakairamanan ti color guard ken banda ken maysa a prusision nga indauluan dagiti lider ti Simbaan manipud iti daan a tabernakulo agingga iti disso ti templo, a nakaidatonan dagiti bitla ken kararag iti tunggal maysa kadagiti uppat a bato.4
Iti seremonia ti pannakakali ti daga, nalagip ni Presidente Young a naaddaan isuna ti maysa a parmata idi damona ti bumaddek iti daga bayat ti panangamirisda iti daga, a kinunana, “Ammok [idin], a kas ti pannakaammok ita, a daytoy ti daga a pakabangonan ti templo—adda iti sanguanak.”5
Kalpasan ti sangapulo a tawen, indaton ni Brigham Young ti napadtuan a pannakaawat [insight] iti sapasap a komperensia idi Oktubre 1863: “Kayatko a makita a ti templo ket mabangon iti wagas a makapagpautto agingga iti millennium. Saan laeng a daytoy ti templo nga ipatakdertayonto; addanto ginasut a kastoy a maipatakder ken maidaton iti Apo. Maam-ammonto daytoy a templo kas umuna a templo nga impatakder dagiti Santo ti Ud-udina nga aldaw iti kabambantayan. … Kayatko a dayta a templo … ti maipatakder kas monumento ti pammati, panagregget ken kinagaget dagiti Santo ti Dios iti kabambantayan.”6
Iti panangrebyu iti daytoy a ababa a pakasaritaan, namagsiddaaw kaniak iti kinamammadto ni Brigham Young—umuna, ti panangipanamnamana a ti Templo iti Salt Lake ket mabangon iti wagas a makapagpaut agingga iti Millennium ken maikadua, ti panangipadtona iti panagadu dagiti masakbayan a templo ti sangalubongan, uray pay bilangen dagitoy iti ginasgasut.
Pannakatarimaan ti Templo iti Salt Lake
Kas ken ni Brigham Young, siaannad nga aywanan dagiti agdama a propetatayo ti Templo iti Salt Lake ken amin a dadduma pay. Ti panaglabas dagiti tawen, ti Umuna a Panguluen— sagpaminsan a—binalbalakadanda ti Presiding Bishopric tapno mapennek a nalagda ti pundasion ti Templo iti Salt Lake. Idi nagserbiak iti Presiding Bishopric, iti dawat ti Umuna a Panguluen, inamirismi ti amin a pasilidad ti Templo iti Salt Lake, agraman ti ebaluasion kadagiti moderno a disenio a seismiko ken teknik iti konstruksion.
Dagitoy ti paset ti panangamisir a naited a dagus iti Umuna a Panguluen: “Iti disenio ken konstrusion ti Templo iti Salt Lake, nausar ti kalaingan nga inhinierio, kalaingan a trabahador, dagiti materiales iti konstruksion, alikamen, ken daddumapay a resources nga adda iti dayta a panawen. Manipud iti pannakaidatonna idi 1893, natibker a napatakder ti templo ken nagserbi a kas parola ti pammati [ken] namnama ken silaw kadagiti tao. Dakkel a panagannad ti naaramid iti pannakausar, pannakadalus, ken ti panangpatalinaed ti templo iti nasayaat a kasasaad. Ti granite iti ruar ken ti floor joists iti uneg ken ti support beams ket addada ti nasayaat a kondision. Ipatalged dagiti nabiit pay a panagadal a ti napili ni Brigham Young a lugar para iti templo ket napintas ti dagana ken nasayaat ti kalidad ti pannakasedsedna.”7
Nalpas ti panangamiris a kasapulan dagiti gagangay a pannakatarimaan ken pannakapapintas tapno mapabaro ken mapasayaat ti templo, mairaman dagiti ruar ken rabaw ti daga, dagiti daan a utility system, lugar a pagbuniagan. Nupay kasta, nairekomenda pay ti panangibilang iti nagsina, nakomkomprehensibo a seismic upgrade mangrugi iti pundasion ti templo iti agpangato.
Ti Pundasion ti Templo
No malagipyo, mismo a ni Presidente Brigham Young titimmulong iti pannakaaramid ti immuna a pundasion ti templo, a nagserbi a nasayaat iti templo manipud iti pannakalpasna 127 a tawenen ti napalabas. Ti baro a naisingasing a seismic upgrade package para iti templo ket agusar ti base isolation technology, a saan idi a naparmata r ti pannakaipatakderna. Daytoy ti maibilang a kabaruanan, kamodernuan nga inhinero para ti salaknib iti ginggined.
Daytoy a teknolohia, a napasayaat iti nabiit, nangrugi iti mismo a pundasion ti templo, a nangted ti dakkel a depensa manipud iti pannakadadael gapu iti ginggined. Iti kaipapananna, daytoy ti mangpabileg iti templo tapno agtakder a sititibker, uray pay no ti daga ken ti aglawlaw daytoy ket maipasango iti napigsa a ginggined.
Ti pannakatarimaan ti templo a mangusar iti kastoy a teknolohia ket impakaammo ti Umuna a Panguluen iti napalabas a tawen. Babaen ti panagiturong ti Presiding Bishopric, nangrugi ti konstruksion sumagmamano a bulanen ti napalabas, idi Enero 2020. Mapattapatta a malpas daytoy iti uneg ti uppat a tawen.
Panangipanamnama iti Bukod a Pundasion
Bayat ti panangpampanunotko ti sumaruno nga uppat a tawen iti biag daytoy napintas, natakneng, natan-ok, ken makaregta a Templo iti Salt Lake, ad-adda a masirmatak a daytoy ti panawen a panangpabaro a imbes a panangserra! Umasping iti dayta, mabalin a damagentayo iti bagbagitayo, “Kasano a ti panangpabaro iti Templo iti Salt Lake mangparegta kadatayo a maipasango iti bukodtayo a naespirituan a panangpabaro, panangbangon manen, pannakayanank manen, pannakaparegta, wenno pannakaisubli?”
Ibutaktak ti bukod a panangamiris a datayo ken dagiti pamiliatayo ket magunggonaan manipud iti panangaramidtayo kadagiti kasapulan a trabaho a panangmentinir ken panangtarimaan, uray pay iti maysa a seismic upgrade! Mabalintayo a rugian daytoy a proseso babaen ti panagdamag iti:
Ania ti langa ti pundasionko?
“Ania ti mangbukel kadagiti napuskol-didingna, nalagda, natibker a panuli a batbato a paset ti bukodko a pundasion, a pagpannurayan ti pammaneknekko?”
“Ania dagiti elememto iti pundasion ti naespirituan ken emosional a kababalinko a mangpalubos kaniak ken iti pamiliak nga agtalinaed a natibker ken saan a magaraw, a makaibtur kadagiti ginggined nga awan duadua a dumteng iti biagtayo?”
Dagiti pasamak, a kas iti ginggined, ket masansan a narigat a maipadles ken dumtengda iti nadumaduma a kinapigsa—a mangted kadagiti saludsod wenno panagduadua, a maipaspasango iti tuok wenno rigat, a mangar-aramid kadagiti bukod a pakasakitan kadagiti lider ti Simbaan, miembro, doktrina, wenno annuroten. Ti kasayaatan a depensa maibusor kadagitoy a kinaulbod iti naespirituan a pundasiontayo.
Ania koma dagiti naespirituan a panuli a bato iti bukodtayo a biag ken iti pamiliatayo? Mabalin a dagiti simple, nabatad, ken napateg a pagbatayan ti panagbiag ti ebanghelio—sangapamiliaan a panagkararag, panagadal ti nasantuan a kasuratan, a pakairamanan ti Libro ni Mormon; idadar-ay iti templo; ken panagsursuro iti ebanghelio babaen iti Umaykayo, Sumurot Kaniak ken home evening. Dagiti dadduma pay a resource a mangpapigsa ti naespirituan a pundasionyo a pakairamanan dagiti Pagannurotan ti Pammati, ti waragawag ti kaamaan, ken ti “Ti Sibibiag a Cristo.”
Para kaniak, dagiti pagbatayan nga adda kadagiti saludsod a nailawlawag iti panangala ti temple recommend ket agserbi a napigsa a pagbasaran ti naespirituan a pundasion—nangnangruna dagiti umuna nga uppat a saludsod. Makitak ida kas naespirituan a panuli a batbato.
Awan duadua a pamiliartayo kadagitoy a saludsod, kas sinaggaysa nga imbasa kadatayo ni Presidente Russell M. Nelson iti napalabas a sapasap a komperensia.
-
Adda kadi pammatim ken pammaneknekmo iti Dios, ti Agnanayon nga Ama; iti Anakna, ni Jesucristo; ken iti Espiritu Santo?
-
Adda kadi pammaneknekmo iti Pannubbot ni Jesucristo ken iti akemna a kas Mangisalakan ken Mannubbotmo?
-
Adda kadi pammaneknekmo iti Pannakaisubli ti ebanghelio ni Jesucristo?
-
Kankanunongam kadi ti Presidente ti Ti Simbaan ni Jesucristo dagiti Santo iti Ud-udina nga Aldaw a kas propeta, mammadto, ken mammaltiing ken kas kakaisuna a tao iti daga nga addaan iti karbengan a mangaramat iti amin a tulbek ti priesthood?8
Makitayo kadi no kasano nga ibilangyo dagitoy a saludsod kas napateg a paset iti bukodyo a pundasion a makatulong kadakayo a mangbangonr ken mangpatibker iti daytoy? Insuro ni Pablo kadagiti taga Efeso ti maysa a simbaan a “nabangon iti pundasion dagiti apostol ken propeta, ket ni Jesucristo a mismo ti kangrunaan a panuli; a mamagkakamang a sangkamaysa iti intero a pasdek a mangparang-a iti maysa a nasantuan a templo iti Apo.”9
Maysa kadagiti karagsakan a paset ti biagko ket ti pannakaam-ammok kadagiti pinaregta dagiti miembro ti Simbaan iti intero a lubong a sibibiag a pagulidanan ti pammati ken ni Jesucristo ken ti ebangheliona. Addaanda kadagiti natibker a bukod a pundasion a mangipalubos kadakuada nga agibtur kadagiti ginggined a mangriribuk iti biagda nga addaan pannakaawat, ken nauneg, agtultuloy a kinaragsak.
Tapno maipakita daytoy iti naperpersonal a lebel, itay kallabes nagsaritaak iti maysa a pumpon ti maysa a napintas, naubing nga asawa ken ina (a gayyem met ti pamiliami). Isuna ket maysa nga agay-ayam ti soccer idi naam-ammo ken inkallaysana ti estudiante iti kinadentista nga asawana. Naparaburanda iti maysa a napintas, ken nasaririt nga anak a babai. Sinarangetna dagiti nadumaduma a klase cancer iti uneg ti innem a mapannubok a tawen. Iti laksid dagiti emosional ken pisikal a dadagsen a napadasanna, nagtalek isunai ti managayat a Nailangitan nga Amana ken masansan a nadakamat kadagiti mangsursurot kenkuana iti social media iti pagsasaona a: “Ti Dios adda kadagiti detalyena.”
Iti maysa kadagiti impostna iti social media insuratna nga adda maysa a nagdamag kenkuana, “Kasano nga addaanka pay laeng iti pammati iti laksid dagiti amin a parikut a naipalawlaw kenka?” Sititbker a sinungbatanna dagitoy a balikas: “Gapu ta pammati ti tumultulong kaniak nga agballigi kadagitoy a pannubok. Saanna kayat a sawen a no addaanka ti pammati awanen mapasamak a dakes. Ti kaadda ti pammati ti mangpalubos kaniak a mamati nga addanto manen lawag. Ket agbalinto dayta a lawag naranraniag gapu ta nagnaakon iti kasipngetan. Numan pay adun ti nasaksiak a kinasipnget iti adu a tawen, ad-adu pay laeng ti nakitak a lawag. Nakitakon dagiti milagro. Nariknakon dagiti anghel. Naammuak a binagbagkatnak ti Nailangitan nga Amak. Awan kadagita ti nakapadasn a nalaka ti biag. Mabalin a di ammo ti masakbayan daytoy a biag, ngem saan ti pammatik. No piliek ti saan a maaddan iti pammati piliek ngarud ti magna iti kasipngetan. No awan ti pammati, kinasipnget laeng ti amin a nabati.”11
Ti napigsa a pammaneknekna ti pammati ken ni Apo Jesucristo—kadagiti balikas ken aramidna—ket makaparegta kadagiti dadduma. Numan pay ti bagina ket nakapsut, intag-ayna ti dadduma tapno ad-adda a pumigsa.
Mapampanunotko dagiti adu a dadduma pay a miembro ti Simbaan, dagiti mannakigubat a kas itoy kabsat a babai, nga inaldaw a magmagna iti pammati, nga agkagkagumaannga agbalin a napudno ken napasnek a disipulo ti Mangisalakantayo, ni Jesucristo. Masursuroda maipapan ken Cristo. Ikasabada ni Cristo. Ikagumaanda a tuladen Isuna. Uray no maipasango dagiti aldaw ti biagda iti natibker wenno naruka a daga, natibker ken di matuang ti naespirituan a pundasionda.
Dagitoy dagiti naanep a kararua a makaawat iti naun-uneg a kaipapanan dagiti balikas ti kanta “How firm a foundation, ye Saints of the Lord” ken “who unto the Savior for refuge have fled.”11 Saan a matukod ti panagyamanko ta makaduak dagiti nangisagana iti naespirituan a pundasion a maiparbeng iti awag a dagiti Santo ken isuda a napigsa ken natibker a sumaranget kadagiti riribuk ti biag.
Panagkunak diak maibaga ti kinapateg ti kasta a pundasion iti bukodtayo a biag. Uray no ubbingda pay, masuruan dagiti ubbingtayo iti Primary bayat ti panagkantada iti daytoy mismo a kinapudno:
Nangbangon ti masirib a tao iti balayna iti rabaw ti bato,
Ket immay ti tudo. …
Ket immay ti tudo, ket immay ti layus,
Ket saan a narba ti balay iti rabaw ti bato.13
Ti nasantuan a kasuratan ti mangpatibker iti daytoy a doktrina ti pundasion. Insuro ti Mangisalakan kadagiti tao ti America:
“Ket no kanayonto nga aramidenyo dagitoy a banag nagasatkayo, gapu ta naipatakderkayo iti batok.
“Ngem siasino man kadakayo ti agaramidto iti ad-adu wenno basbassit ngem iti daytoy saan a naipatakder iti rabaw ti batok, ngem naipatakder iti rabaw ti kadaratan; ket inton agtudo, ken aglayus, ken agangin iti napigsa, a mangsagsag kadagitoy, matumbadanto.”13
Daytoy ti napudno a namnama dagiti lider ti Simbaan a dagitoy a pannakatarimaan ti Templo iti Salt Lake ti makatulongto iti pannakatungpal ti tarigagay ni Brigham Young a makakita “a ti templo ket mabangon iti wagas a makapagibtur agingga iti millennium.” Kadagiti umay a tawen, mapalubosantayo kadi a dagitoy a pannakapasayaat a naaramid iti Templo iti Salt Lake a mangtignay ken mangparegta kadatayo, kas indibidual ken pamilia, tapno datayo met—a maipada—ket “mabangonto iti wagas a makapagpaut agingga iti millennium.”
Aramidentayto dayta bayat ti panangipatungpaltayo iti bilin ni Apostol Pablo nga “[agurnongdanto] para iti [bagbagida] ti natibker a pundasion iti masakbayan, tapno maragpat[tayo] ti agnanayon a biag.”14 Ikarkararagko nga agbalinto a sigurado ken natibker ti naespirituan a pundasiontayo, a ti pammaneknektayo ti Pannubbot ni Jesucristo ken ti akemna kas Mangisalakan ken Mannubbottayo ti agbalinto a kangrunaan a panulitayo a bato a paneknekak iti naganna, kas ken ni Jesucristo, amen.