Dagiti Kararag ti Pammati
No agkararagtayo a sipapammati, agbalintayo a napateg a paset ti aramid ti Apo iti panangisaganana iti lubong iti Maikadua a Yaayna.
Nasungbatan ti kararag ni Elder Maynes iti rugi daytoy umuna a sesion ti sapasapa a komperensia. Maawattayo ti pammaregta babaen ti nakaskasdaaw a mensahe ken napintas a musika. Mangrugin a matungpal ti kari ni Presidente Russell M. Nelson nga agbalin daytoy a komperensia a nakallalagip.
Intuyang ni Presidente Nelson daytoy a tawen a “panangrambak iti maika-200 a tawen manipud idi nagparang ti Dios Ama ken ti Ipatpategna nga Anak, ni Jesucristo, ken ni Joseph Smith iti maysa a parmata.” Awisennatayo ni Presidente Nelson a mangplano a mangisagana iti bagitayo iti daytoy naisangayan a komperensia, a manglagip a kunana a “pammatalged iti pakasaritaan ti Simbaan, ket napateg unay a rebbengenyo.”1
Kas kaniak, mabalin a nangngegyo ti mensahena ket damagenyo iti bagiyo, “Ania ti napateg a maitulongko?” Nalabit a nabasa ken inkararaganyo dagiti napasamak iti Pannakaisubli. Nalabit, nga ad-adda pay ngem idi, a nabasayo dagiti pasamak maipanggep iti sumagmamano a panawen idi yam-ammo ti Dios Ama ti Patpatgenna nga Anak. Nalabit a nabasayo dagiti pagarigan idi nagsao ti Mangisalakan kadagiti annak ti Nailangitan nga Amatayo. Ammok nga inaramidko amin dagita a banag ken adu pay.
Nasarakak dagiti reperensia iti panagbasak iti priesthood ti Dios ken ti panangrugi ti dispensasion. Napakumbabaak a mangamiris a ti panagsaganak para itoy a komperensia ket ti patalged ti bukodko a pakasaritaan. Nariknak ti panagbalbaliw iti pusok. Nariknak ti panagyamanko. Napnekak iti rag-o iti pannakapilik a makiraman itoy a panangrambak iti agdama a Pannakaisubli.
Masirsirmatak a kasta met ti rikna dagiti dadduma, gapu iti naannad a panagsagana, naragrag-o, napnuan namnama, ken determinado nga agserbi iti amin a kabaelan a kasapulan ti Apo.
Dagiti naisangsangayan a pasamak a panagrukbab isu ti panangrugi ti naipadto a maudi a dispensasion, a pangisagsaganaan ti Apo iti Simbaanna ken dagiti taona, dagiti agikut iti naganna, ken umawat Kenkuana. Kas paset ti panagsaganatayo para iti yaayna, itag-aynanto ti tunggal maysa kadatayo tapno marimbawantayo dagiti naespirituan a pannubok ken gundaway a maigidiat kadagiti nakitan a pakasaritaan ditoy a lubong.
idi September 1840, impakdaar ni Propeta Joseph Smith ken dagiti mamagbagana iti Umuna a Panguluen ti sumaganad: “Ti aramid ti Apo kadagitoy maudi nga aldaw, naisangayan ti bilegna ket saan a matukod a panunoten dagiti tao. Narigat nga iladawan dagiti gloriana, ken awan mangrimbaw iti kinadaegna. Isu ti temaa nainaw iti kaunggan dagiti propeta ken maikari a lallaki manipud idi mabukel ti lubong agingga iti simmaruno a kaputotan ken iti agdama a panawen; ket isu ti pudno a dispensasion ti pannakatungpal dagiti panawen nga amin iti babaen ni Jesucristo, iti man langit wenno iti daga, agtitipondanto Kenkuana, ket no naisublinton amin a banag, kas nasao ti amin a nasantuan a propeta manipud idi rugi ti lubong; ta isunto ti pangrugian ti nagloriaan a pannakatungpal dagiti kari dagiti amma, bayat ti pannakaipakita ti bileg ti nagloriaan, ken awan umarpad a bileg ti Kangatuan.”
Intuloyda nga insao: “Mariknatayo a sisasaganatayo nga agtuloy ken mamagkaykaysa iti kabaelantayo para iti pannakabangon ti Pagarian, ken mangbukel iti pannakaipatungpal ken gloria ti Priesthood. Napateg unay ti aramid a maipatungpal iti ud-udina nga aldaw, ket masapul ti kired, kabaelan, talento, ken kabaelan dagiti Santo tapno agsaknapto ti gloria ken tan-ok nga inladawan ni propeta [Daniel] [kitaen iti Daniel 2:34–35, 44–45]; ken kasapulanto ti panangimutektek dagiti Santo, a mangtungpal kadagiti aramid a nabileg ken nadaeg.”2
Adu ti di pay naipalgak kadagiti annuroten no ania ti aramidentayto ken kaano nga aramidentayto iti pannakaipalgak ti Pannakaisubli. Ngem ammo ti Umuna a Panguluen ken dagidi nagkauna nga aldaw ti rukod ti aramid ti Apo nga insaganana para kadatayo. Dagitoy ti sumagmamano a pagarigan nga ammotayo a mapasamakto:
Babaen dagiti Santona, idiayanto ti Apo ti sagut ti ebangheliona “iti amin a pagilian, kakabsat, pagsasao, ken tattao.”3 Agtultuloy ti teknolohia ken milagro a tumulong—kas iti indibidual a “mangngalap kadagiti tao”4 nga aagserbi nga addaan bileg ken agtultuloy a pammati a mangiturong.
Datayo kas tao ket agtultuloy nga agkaykaysa iti baet ti saan a panagkikinnaawatan. Agtitipontayo iti nabileg nga espiritu kas grupo ken pamilia a napno iti lawag ti ebanghelio.
Uray pay ti di mamatpati a lubong ket bigbigendanto ti Ti Simbaan ni Jesucristo dagiti Santo iti Ud-udina nga Aldaw ket maamirisdanto ti bileg ti Dios. Dagiti napudno ken natured a disipulo didanto agbuteng, napakumbaba, ken awatendanto a nga awan duadua ti nagan ni Jesucristo iti inaldaw a panagbiagda.
Kasanonto, ngarud, a makiramantayo amin iti daytoy nga aramid a napnuan bileg ken daeg? Insuro kadatayo ni Presidente Nelson no kasano ti dumur-as iti naespirituan a bileg. No awatentayo ti panagbabawi a naragsak a gundaway gapu iti dumurdur-as a pammatitayo a ni Jesus ti Cristo, no maawatan ken mamatitayo a denggen ti Nailangitan nga Ama ti tunggal kararagtayo, no ipamaysatayo ti agtungpal ken mangaramid kadagiti bilin iti bilegtayo nga umawat iti agtultuloy a paltiing. Mabalin a Espiritu Santo ti kanayon a kaduatayo. Agtalinaedto kadatayo ti lawag uray no nalildem ti lubong iti aglawlawtayo.
Ni Joseph Smith ti pagwadan no kasano nga idur-as ti bileg a naespirituan. Impakitana kadatayo a ti kararag ti pammati ti tulbek ti paltiing ti Dios. Nagkararag a sipapammati, a sungbatanto ti Dios Ama ti kararagna. Nagkararag a sipapammati, a namati a ni laeng Jesucristo ti makawaywaya iti basol a marikriknana. Ken nagkararag a sipapammati, namati a masarakanna ti pudno a Simbaan ni Jesucristo a makagun-od iti dayta a panakapakawan.
Iti unos ti panagministrona kas propeta, nagkararag ni Joseph Smith a sipapammati a manggun-od iti agtultuloy a paltiing. Iti isasangotayo iti adu a pannubok ken dagiti pasungaden pay, masapul met a surotentayo ti kasta nga aramid. Kinuna ni Presidente Brigham Young, “Awan ti ammok a sabali nga aramiden dagiti Santo iti Ud-udina nga Aldaw no di ti napasnek a panagkararagda iti Dios a mangiwanwan kadagiti taona.”5
Dagitoy a balikas iti kararag ti sakramento ti mangiladawan iti inaldaw a panagbiagtayo: “Kanayon a manglaglagip kenkuana.” Ti “Kenkuana” itudona ni Jesucristo. Dagiti sumaruno a balikas, “ken tungpalen dagiti bilinna,’ ikalikagumna ti pananglaglagip Kenkuana.6 Iti kanayon a pananglagiptayo ken ni Jesucristo, naulimek nga ikararagtayo, “Ania ti paaramidna kaniak?”
Dayta a kararag, a maidaton iti pammati ken ni Jesucristo, agpaay iti daytoy a dispensasion. Ket ipamaysatayo kas rebbengen ti tunggal maysa kadatayo itiagtultuloy a pannakaipalgakna. Nasapulak, kas kadakayo, ti nakaskasdaaw a pagarigan ti kasta a kararag.
Umuna, ni Joseph Smith. Nagdamag a sipapammati a kasla ubing no ania ti paaramid ti Apo kenkuana. Ti sungbatna ti nangbaliw iti pakasaritaan ti lubong.
Para kaniak, ti napateg nga adal nagtaud iti sungbat ni Joseph ken ni Satanas bayat ti panagkararagna.
Ammok babaen ti padasko a kayat ni Satanas ken dagiti pasurotna a mariknatayo a di nasken nga agkararagtayo. Idi impasnek ni Joseph Smith iti amin a pigsana nga umawag iti Dios nga isalakanna manipud iti bileg a mangpadas a mangpungo kenkuana, nasungbatan ti kararagna ket nagparang ti Nailangitan nga Ama ken ni Jesucristo.
Pinanggep ni Satanas a lappedan ti pannakairugi ti Pannakaisubli gapu ta napateg unay ti kararag ni Joseph. Basbassit ti akemtayo iti agdama a Pannakaisubli. Ngem padpadasen ti kabusor ti Pannakaisubli a lappedan ti panagkararagtayo. Ti pagwadan ti pammati ken determinasion ni Joseph ti mangpatpatibker kadatayo. Daytoy ti maysa kadagiti adu a gapu no apay a nairaman iti kararagko ti panagyamanko iti Nailangitan nga Ama para ken ni Propeta Joseph.
Ni Enos iti Libro ni Libro ti maysa pay a modelo iti kararagko iti pammati iti panangaramidko iti rebbengek iti pannakaituloy ti Pannakaisubli. Ania man ti pagrebbenganyo, maaramidyo isuna a bukod a mannursuroyo.
Kas ken Joseph, nagkararag ni Enos a sipapammati. Inladawanna ti padasna iti kastoy:
“Ket nabisinan ti kararuak; ket nagparintumengak iti sango ti Namarsua. Ket indawatko a sipapasnek ken sipapakumbaba; ket immawagak kenkuana iti nagmalem; wen, agingga a dimteng ti rabii a nagdawdawatak pay laeng tapno dumanon ti timekko iti langit.
“Ket adda timek nga immay kaniak, a nagkuna: Enos, napakawanen dagiti basolmo, ket mabendisionanka.
“Ket siak, ni Enos, ammok a saan nga agulbod ti Dios; gapuna, napukaw ti manidsidir a basolko.
“Ket kinunak: Apo, kasano a naaramid?
“Ket kinunana kaniak: Gapu iti pammatim ken ni Cristo, a dimo pay idi nangngeg ken nakita. Ket adu a tawen ti limmabas sakbay nga imparangna ti bagina iti lasag; gapuna, mapanka, ta binukelnaka ti pammatim.”7
Ti adal a nangbendision kaniak ti linaon dagitoy a balikas: “Gapu iti pammatim ken ni Cristo, a dimo pay nangnangngeg ken nakitkita.”
Namati ni Joseph ken ni Cristo a mapan iti kakaywan ken tapno ikararagna pay ti pannakawayawayana iti bileg ni Satanas. Dina pay nakitkita ti Ama ken ti Anak, ngem nagkararag a sipapammati.
Insuronak ti padas ni Enos iti umarngi nga adal. No agkararagak a sipapammati, ti Mangisalakan ti mangibabaet kaniak iti Ama ket mariknak a dumanon ti kararagko iti langit. Dumteng dagiti sungbat. Naawat dagiti bendision. Adda kappia ken rag-o iti baet ti rigat.
Malagipko idi, kas kabaruan a miembro ti Korum ti Sangapulo-ket-dua nga Apostol, nagparintumengkami ken ni Elder David B. Haight. Ti tawenko ita ti tawenna idi, addaan kadagiti pannubok kas kaniak ita. Malagipko ti timekna bayat ti panagkararagna. Diak nagmulagat a kumita, ngem ayugna ti kasla umis-isem. Nakisarita iti Nailangitan nga Ama a naragsak ti timekna.
Nangngegko iti nakemko ti ragsakna idi kinunana, “Iti nagan ni Jesucristo.” Ti awengna kaniak kasla narikna ni Elder Haight nga ipampaneknek ti Mangisalakan iti dayta a kanito ti mensahe nga inkararagna iti Ama. Ket awan duaduak a naawat a siiisem.
Dumar-as ti kabaelantayo a mangted iti napateg a kontribusion iti nakaskasdaaw a pannakaituloy ti Pannakaisubli bayat ti panagdur-as ti pammatitayo ken ni Jesucristo kas Mangisalakantayo ken ti Nailangitan nga Ama kas Amatayo. No agkararagtayo a sipapammati, agbalintayo a napateg a paset ti aramid ti Apo iti panangisaganana iti lubong iti Maikadua a Yaayna. Ikararagko a masarakantayo ti rag-o iti panangaramidtayo iti paaramidna.
Ipaneknekko a sibibiag ni Jesucristo. Daytoy ti Simbaan ken pagarianna iti daga. Ni Joseph Smith ti propeta ti Pannakaisubli. Ni Presidente Russell M. Nelson ti propeta ti Apo ditoy daga ita. Iggemna ti amin a tulbek ti priesthood iti Ti Simbaan ni Jesucristo dagiti Santo iti Ud-udina nga Aldaw. Iti nagan ni Jesucristo, amen.