Maysa a Sibibiag a Saksi ti Sibibiag A Cristo
Ti kangrunaan a mensahe ti Libro ni Mormon isu ti pannakaisubli ti pudno a pannakaammo ti napateg ti akem ni Jesucristo iti pannakaisalakan ken pannakaitan-ok ti sangkataw-an.
Iti maysa a nalawag nga aldaw iti kalgaw ti 2017, nangrugi idin ti open house para iti Templo ti Paris France idi adda maysa a tour guide nga inasitgan ti lalaki analadingit ti rupana. Imbagana nga agnaed iti abay ti templo ket inannugotna a nagbalin nga aktibo a aumupsupiat iti pannakaipatakder daytoy. Insaritana a maysa nga aldaw a mingmingminganna iti tawati aparmentna, binuyana ti dakkel a crane a nangibaba ti estatua ni Jesus manipud iti ngato ket nainnayad a naikabil daytoy iti arubayan ti templo. Inpalawag ti lalaki a daytoy a padasna ti naan-anay a nangpabaliw ti kaririknana iti Simbaantayo. Naamirisna a pasurotnatayo ni Jesucristo ket dimmawat iti pammakawanmi para iti immuna a naaramidanna a madi.
Ti estatua ti Christus, a nangpapintas iti arubayan ti Templo ti Paris ken dagiti dadduma a sanikua ti SImbaan, ket mangipaneknek ti panagayattayo iti Mangisalakan. Ti orihinal a marmol nga estatua ket aramid ti maysa a Danish artist ni Bertel Thorvaldsen, a nangikitikit idi 1820—kapada a tawen ti Umuna a Parmata Maisupsupadi ti estatua kadagiti dadduma nga aramid ti arte iti dayta a panawen, a mangipakita ti panagrigrigat ni Cristo iti krus. Ipakita ti aramid ni Thorvaldsen ti sibibiag a Cristo, a nagballigi a nangparmek iti patay ken, iti silulukat a takiag, awisenna amin nga umasideg Kenkuana. Dagiti laeng lamma ti lansa kadagiti ima ken sakana ken sugat iti bakrangna ti mangipaneknek iti saem nga inibturanna tapno maisalakan ti sangkataw-an.
Nalabit ti maysa a rason kadatayo kas miembro iti Ti Simbaan ni Jesucristo dagiti Santo iti Ud-udina nga Aldaw nga ipatpategtayo daytoy nga estatua agsipud ta maipalagip kadatayo ti panangiladawan iti Libro ni Mormon ti panagparang ti Mangisalakan iti kontinente ti America:
“Ket adtoy,nakitada ti maysa Lalaki a bumabbaba manipud iti langit; ket nagkawes iti puraw a roba; ket immay bimmaba ket nagtakder iti nagbabaetanda. …
“Ket napasamak nga inyawatna dagiti imana ket nagsao kadagiti tao, a kunkunana:
“Adtoy, siak ni Jesucristo, …
“… Ket imminumak iti dayta napait a kopa nga inted ti Ama kaniak, ket dinayawko ti Ama iti panangbaklayko iti basol ti lubong.”1
Ket inawisna ti tunggal lalaki, babai, ken ubing nga umasideg tapno maidapadap dagiti imada iti bakrangna ken riknaenda dagiti lamma ti lansa kadagiti ima ken sakana, tapno makaawat iti bukod a saksi nga Isuna ngarud ti nabayag a naur-uray a Mesias.2
Daytoy nagloriaan a pasamak ti kapatgan iti Libro ni Mormon. Ti dagup dagiti “naimbag a damag” ti ebanghelio makita iti daytoy nga imahe ti Mangisalakan, a siaayat nga iyawatna ti “takiag ti kaasi”3 a mangawis iti tunggal tao nga umasideg Kenkuana ken umawat kadagiti bendision ti Pannubbotna.
Ti kangrunaan a mensahe ti Libro ni Mormon isu ti pannakaisubli ti pudno a pannakaammo ti napateg ti akem ni Jesucristo iti pannakaisalakan ken pannakaitan-ok ti sangkataw-an. Daytoy a tema agaweng manipud iti pakauna a panid agingga kadagiti maudi a balikas iti maudi a kapitulo. Kadagiti siglo ti ikakalilis iti kinapudno ken espiritual a pannakatikaw, ti naun-uneg a kaipapanan ti inaramid ni Cristo iti Getsemani ken Golgota ket napukaw ken nadadael. Kasta la unay ti ragsak a narikna ni Joseph Smith, bayat ti panangipatarusna iti 1 Nephi, naduktalanna ti datdatlag a kari: “Dagitoy maudi a kasuratan [ti Libro ni Mormon] … ti mangpatibkerto iti kinapudno ti immuna [ti Biblia] … ket ipakaammodanto dagiti nadalus ken napateg a banag a naala kadakuada; ken maipakaammonto kadagiti amin a kakabsat, pagsasao, ken tattao, a ti Kordero ti Dios ti Anak ti Agnanayon nga Ama, ken ti Mangisalakan iti lubong; a nasken nga umasideg amin kenkuana dagiti tao, wenno saandanto a maisalakan.”4
Masapulan iti intero a Libro ni Mormon dagiti nalawag ken napateg a kinapudno maipanggep iti Pannubot ti Mangisalakan. Iti panangilistak kadagitoy sumagmamano a kinapudno, awisenkayo a mangutob no kasano a nabaliwan wenno mabalin a mabaliwan ti biagyo.
-
Maysa nga awan bayadna a sagut ti Pannubbot ni Jesucristo a maidiaya iti amin nga asino man nga adda a nagbiag, nga agdama nga agbibiag, ken isu ngaagbiagto iti daga.5
-
Kas nayon iti panangibaklay iti dagensen dagiti basoltayo, inako ni Cristo iti bagbagina dagiti leddaang, rigrigat, saksakit, ken amin a sagabaen a nakaiparsuaan iti mortal a kasasaad ti tao. Awan ti ladingit, saem, wenno liday a saanna a sinagaba para kadatayo.6
-
Palubosannatayo ti pangsubbot a sakripisio ti Mangisalakan a maparmek dagiti negatibo a nagbanagan ti Pannakatnag ni Adan, agraman ti pisikal nga ipapatay. Gapu ken ni Cristo, amin nga annak ti Dios a nayanak iti daytoy a daga, iti baet ti kinalintegda, ket makapadasdanto iti panagtipon manen dagiti kararua ken bagida babaen iti bileg ti Panagungar7 ket agsublidanto Kenkuana tapno “maukom babaen kadagiti aramid[da].”8
-
Maigidiat, ti panangawat kadagiti pakabuklan dagiti bendision ti Pannubot ti Mangisalakan ket agsaad iti kinapasnektayo9 iti panagbiag iti “doktrina ni Cristo.”10 Iti tagtagainepna, nakita ni Lehi ti “nailet ken akikid a dalan”11 nga agturong iti kayo ti biag. Ti bungana, a mangibagi ti ayat ti Dios a kas pannakayebkas dagiti napintas a bendision ti Pannubot ni Cristo, “ket ti kapatgan ken kangrunaan a makaay-ayo … [ket] daytoy ti kaindaklanan iti amin a sagut ti Dios.”12 Tapno magun-od daytoy a bunga, masapul nga aramatentayo ti pammatitayo ken ni Jesucristo, agbabawi, “ipangag iti balikas ti Dios,”13 awaten dagiti napateg nga ordinansa, ken tungpalen dagiti sagrado a katulagan agingga iti gibus ti biagtayo.14
-
Babaen ti Pannubotna, saan laeng a dalusan ni Jesucristo dagiti basoltayo, ngem itdenna pay ti makaparegta a bileg a mabalin a “[mangikkat] ti nailubongan a kinatao dagiti disipulona,”15 ken panagdur-as iti “tunggal binatog,”16 ken panagdur-as iti kinasanto17 tapno maysa nga aldaw makapagbalindanto a naan-anay a tattao iti ladawan ni Cristo,18 maikari a makipagnaed manen iti Dios19 ken agtawid iti amin a parabur ti pagarian ti langit.20
Maysa pay a makaliwliwa a kinapudo a naglaon iti Libro ni Mormon ket , uray no awan patinggana ken sangalubongan ti maimpluwensiaanna, ti Pannubot ti Apo ket naisangsangayan a personal a sagut, a maibagay iti tunggal maysa.21 Kas iti panangawis ni Jesus iti tunggal maysa kadagiti Nephite a disipulona tapno riknaenda dagiti sugatna, natay Isuna para iti tunggal maysa kadatayo, a kasla sika wenno siak laeng ti tao iti daga. Personal nga awisennatayo nga umasideg Kenkuana ken gun-oden dagiti datdatlag a bendision ti Pannubbotna.22
Agbalin pay a napudpudno ti personal a saguday ti Pannubot ni Cristo no ibilangtayo dagiti naisangsangayan a pagulidanan dagiti lallaki ken babbai iti Libro ni Mormon. Mairaman kadagitoy da Enos, Alma, Zeezrom, Ari Lamoni ken ti asawana, ken dagiti tattao ni Ari Benjamin. Dagiti estoria ti kumbersion ken nabileg a pammaneknekda ket makaited iti sibibiag a saksi no kasano a dagiti puso ken biagtayo mabalin nga agbaliw babaen iti awan patinggana a kinaimbag ken asi ti Dios.23
Diinamag ni propeta Alma kadagiti taona daytoy nabara a saludsod. Kinunana: “No nakariknakayo iti panagbalbaliw iti pusoyo, ken no naaddaankayo iti rikna a nangkanta iti kanta ti manangsubbot nga ayat, kayatko a saludsoden, mariknayo kadi ita?”24 Napateg daytoy a saludsod ita, gapu ta kas disipulo ti Apo, kasapulantayo ti manangsubbot a bilegna a mangkadkadua kadatayo, mangguyugoy kadatayo, ken mangbalbaliw kadatayo iti tunggal aldaw.
Mabalin a masabalian ti saludsod ni Alma, kaano ti naudi a panawen a nariknam ti nasam-it nga impluwensia ti Pannubbot ti Mangisalakan iti biagmo? Daytoy ket mapasamak no mariknam iti “nain-inaka ken nasamsam-it” a ragsak25 a mangiburay iti pammaneknek iti kaunggam a mapakawan dagiti basolmo, wenno dagiiti nasakit a pannubok agbalin a nalag-an nga ibaklay; wenno mapalukneng ti pusom ken kabaelam nga iyebkas ti pammakawan iti tao a nakapasakit kenka. Wenno mabalin iti tunggal panawen a madlawmo a ti kabaelam nga agayat ken agserbi iti dadduma ket dimmakel wenno ti proseso ti pannakapasanto ket pagbalinennaka a sabali a tao, a maitulad iti pagwadan ti Mangisalakan.26
Iburayko ti saksik a dagitoy amin a padas ket pudno ken pammaneknek a dagiti panagbiag ket mabalin nga agbaliw babaen iti pammati ken ni Jesucristo ken ti Pannubbotna. Ti Libro ni Mormon ti mangilawlawag ken mangpadakkel iti pannakaammotayo iti daytoy nailangitan a sagut. No adalem daytoy a libro, mangngegamto ti timek ti sibibiag a Cristo a mangaw-awis kenka nga umasideg Kenkuana. Ikarik a no awatem daytoy a panangawis ken itulad ti biagmo iti pagulidananna, ti impluwensia ti pannakasubbot ket sumangbayto iti biagmo. Babaen iti bileg ti Espiritu Santo, balbaliwannakanto ti Mangisalakan iti tunggal aldaw “agingga iti naan-anay nga aldaw”27 a mapalubosankanto a kas inpalawagna, “makitamto ti rupak ket maamuamto a Siak.”28 Iti nagan ni Jesucristo, amen.