Pananglukat kadagiti Langit para iti Tulong
Aramatentayo koma ti pammatitayo ken ni Apo Jesucristo!
Anian a naidumduma ken nakaskasdaaw a sesion daytoy! Agyamanak kadakayo, Laudy ken Enzo. Imbagianyo a nasayaat dagiti nadayag nga agtutubo a babbai ken agtutubo a lallaki ti Simbaan.
Patpatgek a kakabsatko, adu ti nangngegantayo ita maipapan ti Pannakaisubli ti Simbaan—ti mismo a Simbaan nga impasdek ti Mangisalakantayo, ni Jesucristo bayat ti panagserbina iti daga. Nangrugi dayta a parmata 200 a tawen ti naglabas idi nagparang ti Dios Ama ken ti Anakna, ni Jesucristo iti ubing a Joseph Smith.
Sangapulo a tawen kalpasan daytoy a parmata, naawagan ni Propeta Joseph Smith ken lima a dadduma pay kas agbuangbuangay a miembro ti naisubli a Simbaan ti Apo.
Manipud iti dayta a bassit a grupo a nagummong idi Abril 6, 1830, dimteng ti sangalubongan nga organisasion ti nasurok a 16 milion a miembro. Ti nasayaat nga ipatungpal ti Simbaan iti intero a lubong a mangpalag-an iti sagabaen ti tao ken mangparegta ti tao ket nasaknap. Ngem umuna a panggepna ti mangtulong iti lallaki, babbai, ken pamilia a mangsurot iti Apo Jesucristo, agtungpal iti bilin, ken maikari iti kaindaklan iti amin a bendision—ti agnanayon a biag iti Dios ken dagiti patpatgenda.
Iti panangrambaktayo iti pasamak a nangrugi ti Pannakaisubli, napateg a lagipen a bayat ti panagdayawtayo ken Joseph Smith kas propeta ti Dios, saan a simbaan ni Joseph Smith daytoy, wenno simbaan ni Mormon. Daytoy ti Simbaan ni Jesucristo. Impaulogna ti nasken a pannakaawag ti Simbaanna: “Ta kastoyto ti pannakaawag ti simbaanko kadagiti ud-udina nga aldaw, nga isu Ti Simbaan ni Jesucristo dagiti Santo iti Ud-udina nga Aldaw.”
Itay nabiit imbagak maipapan iti kasapulan a panagatur iti wagas nga ibasarmi iti nagan ti Simbaan. Manipud dayta a kanilo, adun ti naaramid tapno maipatungpal daytoy a pannakaatur. Agyamanak ken ni Presidente M. Russell Ballard ken ti intero a Korum ti Sangapulo-ket-dua nga Apostol, nga adun ti inaramidda a nangiturong kadagitoy a panagkagumaan kasta met a mainaig iti sabali nga inisiatibo nga ipakaammok itoy a sardam.
Dagiti lider ken department ti Simbaan, mainaig nga entidad, ken minilion a miembro—ken dadduma pay—usarenda itan ti husto a nagan ti Simbaan. Nabalbaliwan ti opisial nga style guide ti Simbaan. Principal website ti Simbaan itan ti ChurchofJesusChrist.org. Napabaro dagiti adres para iti email, domain name, ken social media channel. Ti ipatpategtayo a koro ket “Tabernacle Choir iti Temple Square” itan.
Nagkagumaankami kadagitoy nga aramid gapu ta no ikkatentayo ti nagan ti Apo iti nagan ti Simbaanna , baybay-antayo a mangikkat Kenkuana kas kangrunaan a pokus ti panagdaydayawtayo ken ti biagtayo. No awatentayo ti nagan ti Mangisalakan kadatayo iti panagbuniag, nagkumittayo nga agsaksi, babaen ti pampanunot ken tignaytayo, a ni Jesus ti Cristo.
Patpatgek a kakabsatko, ikarik kadakayo a no “aramidentayo ti amin a kabaelantayo a mangisubli iti umno a nagan ti Simbaan ti Apo,” Isu “ibukboknanto ti bileg ken paraburna iti ulo dagiti Santo iti Ud-udina nga Aldaw kadagiti wagas a ditayo pay nakita.” Pinabarok daytan a kari ita.
Tapno matulongantayo a manglagip Kenkuana ken mangbigbig iti Ti Simbaan ni Jesucristo dagiti Santo iti Ud-udina nga Aldaw kas Simbaan ti Apo, naay-ayokami a mangyam-ammo iti simbolo a mangiiladawan iti kangrunaan a lugar ni Jesucristo iti Simbaanna.
Iraman daytoy a simbolo ti nagan ti Simbaan a linaon ti uneg ti panuli. Ni Jesucrisito ti panuli a bato.
Iti sentro ti simbolo ket panangibagi ti marmol nga estatua ni Christus. Iladawanna ti nagungar, sibibiag nga Apo a mangdandanon nga umarakup iti amin nga umasideg Kenkuana.
Kas naisimbolo, agtaktakder ni Jesucristo iti babaen ti arko. Ipalagip ti arko kadatayo ti nagungar a Mangisalakan a rumrumuar iti tanem iti maikatlo nga aldaw kalpasan ti Pannakailansana iti krus.
Pamiliar daytoy a simbolo iti adu, kas nabayagen a nabigbigtayo ti naisubli nga ebanghelio iti siibibiag, nagungar a Cristo.
Mausar itan ti simbolo kas visual identifyer iti opisial a literatura, damdamag, ken pasken ti Simbaan. Ipalagipna iti amin a daytoy ti Simbaan ti Mangisalakan ken kas miembro ti Simbaanna, maisentro ken Jesucristo ken ti ebangheliona.
Ita, patpatgek a kakabsatko, Domingo Ramos inton bigat, kas iti nalawag nga insuro ni Elder Gong. Kalpasanna sumrektayo iti daytoy a naisangsangayan a mangpasangbay iti Paskua ti Panagungar. Kas pasurot ni Jesucristo, nga agbibiag iti aldaw a ti COVID-19 pandemic a nangparigat iti lubong, ditayo agsao laeng ken Cristo wenno ikasaba ni Cristo wenno mangusar iti simbolo a mangibagi ken Cristo.
Aramatentayo koma ti pammatitayo ken ni Apo Jesucristo!
Kas ammoyo, tungpalen dagiti miembro ti Simbaan ti linteg ti panagayuno maysa nga aldaw ti makabulan.
Nagkauna ti doktrina ti panagayuno. Inaramid idin daytoy dagiti bannuar iti biblia kadagiti nagkauna nga aldaw. Da Moises, David, Ezra, Nehemias, Esther, Isaias, Daniel, Joel, ken adu a dadduma pay ti nagayuno ken nagikasaba iti panagayuno. Babaen ti sinurat ni Isaias, kinuna ti Apo: “ Di kadi daytoy ti panagayuno a pinilik? mangwarwar iti pamungo ti kinadangkes, mangikkat kadagiti dagensen, ken mawayawayaan dagiti agrigrigat?”
Binallaagan ni Apostol Pablo dagiti Santo iti Corinto nga “agayuno ken agkararag.” Impakdaar ti Apo Mismo a dagiti banag “di rummuar no di gapu iti panagkararag ken panagayuno.”
Kinunak itay nabiit iti social media video a “kas doktor ken surgeon, dakkel ti panagdayawko kadagiti propesional iti mediko, sientista, ken amin nga agtartrabaho iti agpatnag ken agmalem tapno lapdan ti panagwaras ti COVID-19.”
Ita kas Presidente ti Ti Simbaan ni Jesucristo dagiti Santo iti Ud-udina nga Aldaw ken Apostol ni Jesucristo, ammok a ti Dios “adda kenkuana amin a bileg, amin a nainsiriban; ken amin a pannakaawat; matukodna amin a banag, ket manangngaasi a Nabiag, uray pay iti pannakaisalakan, kadagiti agbabawi ken mamati iti naganna.”
Bayat dagiti panawen ti nalaus a rigat, no ti sakit agbalin a pandemic, ti kangrunaan a banag nga aramidentayo ket umawag iti Nailangitan nga Amatayo ken ti Anakna—ti Apo a Mangngagas—a mangipakita iti datdatlag a bilegda a mangbendision kadagiti tao ti daga.
Iti mensahek iti video, inawisko ti amin a makikaysa iti panagayuno iti Domingo, Marso 29, 2020. Mabalin nga adu kadakayo ti nakabuyan iti video ken nakipagayuno. Mabalin nga adda dagiti saan. Ita kasapulantayo pay laeng ti tulong ti Dios.
Ngarud ita, ay-ayatek a kakabsatko, iti espiritu dagiti annak ni Mosiah, a nangted iti biagda iti adu a panagayuno ken panagkararag, ken kas paset ti Abril 2020 a sapasap a komperensiatayo, umaw-awagak iti maysa pay a sangalubongan a panagayuno. Para iti amin no ipalubos ti salun-atda, agayuno, agkararag, ken agkaykaysatayo manen iti pammati. Idawdawattayo koma ti gin-awa iti daytoy sangalubongan a pandemic.
Awisek ti amin, agraman dagiti ditayo kapammati, nga agayuno ken agkararag inton Biernes Santo, Abril 10, tapno mapengdan ti agdama a pandemic, masaluadan dagiti agay-aywan, mapapigsa ti ekonomia, ken abalin a normal ti biag.
Kasano nga agayunotayo? Naipaugali ti dua a pannangan wenno iti uneg ti 24 nga oras. Ngem no ikeddengyo no ania ti maibilang a sakripisio kadakayo, kas malagipyo ti dakkel a sakripisio nga inaramid ti Apo kadakayo. Agkaykaysatayo koma iti panangidawat iti pannakapaimbag iti intero a lubong.
Ti Biernes Santo ti nasayaat nga aldaw a dumngeg ti Nailangitan nga Ama ken ti Anakna kadatayo!
Patpatgek a kakabsat, yebkasko ti nalaus a panagayatko kadakayo, a buyogan ti pammaneknekko iti nadiosan nga aramid a nakairamanantayo. Daytoy ti Ti Simbaan ni Jesucristo dagiti Santo iti Ud-udina nga Aldaw. Isu ti ulo ken iturongna ti amin nga aramidentayo. Ammok a patgannanto dagiti dawat dagiti taona. Ipaneknekko iti sagrado a nagan ni Jesucristo, amen.