Panglukat a Mensahe
Nasken a kalikagumantayo, iti tunggal wagas a kabaelantayo, a dumngeg ken ni Jesucristo, nga agsao kadatayo babaen ti bileg ken panagserbi ti Espiritu Santo.
Patpatgek a kakabsatko, bayat ti panangkablaawmi kadakayo iti daytoy napnuan pakasaritaan a sapasap a komperensia ti Abril 2020 ti Ti Simbaan ni Jesucristo dagiti Santo iti Ud-udina nga Aldaw, nga ammoyon ti gapuna, agtakderak iti sangoyo iti awan nagyanna nga awditorium!
Diak unay ammo, idi inkarik kadakayo iti sapasap a komperensia ti Oktubre 2019 a “nakallalagip” ken “saan a malipatan” daytoy a komperensia ti Abril, a ti panagsaritak iti sanguanan ti kongregasion a buklen ti nakurkurang a 10 a tao ket mamangbalin a nakallalagip ken saan a malipatan daytoy a komperensia para kaniak! Ngem ammoyo a makiramramankayo babaen ti electronic transmission, ken ti napintas a panagkanta ti koro iti “It Is Well with My Soul,” ket mangyeg iti dakkel a liwliwa iti kararuak.
Kas ammoyo, naiget a limitado ti idadar-ay iti daytoy a sapasap a komperensia iti panagkagumaanmi nga agbalin a nasayaat a makipagili ken mangaramid ti amin a kabaelanmi a manglapped iti panagwaras ti COVID-19. Nagdakkel ti epekto daytoy a virus iti sangalubongan. Daytoy pay ti nangbaliw kadagiti mitingtayo iti Simbaan, serbisio iti missionary, ken aramid iti templo iti apagkanito.
Nupay mainaig dagiti agdama a panagiget iti makaakar a virus, nalablabes nga amang dagiti pannubok ti biag ngem daytoy pandemic. Dagiti masakbayan a pannubok ket mabalin a bunga ti aksidente, didigra, wenno di ninamnama a personal a pagsakitan ti ulo.
Kasano a mkaibturtayo kadagiti kasta a pannubok? Imbaga ti Apo kadatayo a “no nakasaganakayo saankayo nga agbuteng.”1 Siempre, mabalintayo nga agurnong iti taraon, danum, ken kuarta. Ngem napateg a punnuentayo ti bukod a naespirituan a pagurnongantayo iti pammati, kinapudno, ken pammaneknek.
Ti kangrunaan a dawattayo iti biag ket ti agsagana a sumabat iti Namarsuatayo. Aramidentayo daytoy babaen ti inaldaw a panagkagumaan nga agbalin nga ad-adda a kas iti Mangisalakantayo, a ni Jesucristo.2 Ket aramidentayo dayta no inaldaw nga agbabawitayo ken umawat iti pangdalus, pangpaimbag, ken pangpapigsa a bilegna. Kalpasanna mariknatayo ti naunday a talna ken rag-o, bayat dagiti narigat a panawen. Daytoy a mismo no apay a naggagar ti Apo a pagtakderennatayo kadagiti nasantuan a lugar ket “di aggaraw.”3
Daytoy a tawen, rambakantayo ti maika-200 nga anibersario ti maysa kadagiti kapapatgan a pasamak iti pakasaritaan ti lubong—ti panagparang ti Dios Ama ken ti Patpatgenna nga Anak, ni Jesucristo, ken ni Joseph Smith. Iti dayta maysa a parmata, intudo ti Dios Ama ni Jesucristo ket kinunana: “Daytoy ti Ay-ayatek nga Anakko. Dumngegkayo Kenkuana!”4
Dayta a balakad a naited ken ni Joseph ket para iti tunggal maysa kadatayo. Nasken a kalikagumantayo, iti tunggal wagas a kabaelantayo, a dumngeg ken ni Jesucristo, nga agsao kadatayo babaen ti bileg ken panagserbi ti Espiritu Santo.
Panggep daytoy ken tunggal sapasap a komperensia a tulongannatayo a dumngeg Kenkuana. Nagkararagkami, ken awisendakayo nga agkararag, ta addanto koma ti Espiritu ti Apo kadatayo iti kasta a kinawadwad tapno mangngeganyo dagiti mensahe ti Mangisalakan a naisangsangayan para kadakayo—dagiti mensahe a mangyegto iti talna iti kararuayo. Dagiti mensahe a mangpaimbagto iti nasneban a pusoyo. Dagiti mensahe a manglawagto iti panunotyo. Dagiti mensahe a mangtulongto kadakayo a mangammo iti aramidenyo bayat ti panagtuloyyo kadagitoy a panawen ti rigat ken pannubok.
Ikararagko nga agbalin koma a nakallalagip ken saan a malipatan daytoy a komperensia gapu kadagiti mensahe a denggenyo, dagiti naidumduma a pakaammo a maaramidto, ken dagiti padas a pakaawisanyonto a makiraman.
Kas pagarigan, iti gibus ti sesion iti bigat ti Domingo, agkaykaysatayonto iti solemn assembly iti sangalubongan no idauluankayonto iti sagrado a Panangipukkaw iti Hosanna. Ikararagko nga agbalinto a naespirituan a tampok kadakayo iti panangipeksatayo iti sangalubongan a kaykaysa ti nalaus a panagyamantayo iti Dios Ama ken ti Ay-ayatenna nga Anak babaen ti panangdayaw Kadakuada iti kastoy a naidumduma a wagas.
Para iti daytoy sagrado a padas, usarentayo dagiti nadalus a puraw a panio. Ngem no awan ti panioyo, mabalinyo nga ipayapay lattan ti imayo. Iti gibus ti Panangipukkaw iti Hosanna, makigiddanto ti kongregasion iti koro iti panagkanta iti “The Spirit of God.”5
Patpatgek a kakabsatko, nadayagto daytoy a komperensia. Agbalinto a naisangsangayan daytoy a tawen no agpokustayo iti Mangisalakan ken iti naisubli nga ebangheliona. Dagiti kapatgan a manayon nga epekto daytoy napnuan pakasaritaan a komperensia ket agbalinto no agbalbaliw ti pusotayo ken ruigantayo ti tungpal biag a dawat a dumngeg Kenkuana.
Kablaawandakayo iti sapasap a komperensia ti Abril 2020! Ammok a maseknan kadatayo ti Dios, ti Nailangitan nga Amatayo ken ti Anakna, ni Jesucristo. Kaduaendatayo iti intero a pasken daytoy dua a nagloriaan nga aldaw bayat ti panagkalikagumtayo nga umas-asideg Kadakuada ken agdayaw Kadakuada. Iti sagrado a nagan ni Jesucristo, amen.