Kasano a Mabendisionan ti Priesthood dagiti Agtutubo
Naikkantayo iti gundaway nga agserbi kas dagiti anghel, tapno ikasaba ti ebanghelio iti amin a kontinente ti daga, ken tulongan dagiti kararua nga umay ken Cristo.
Kakabsat, napalalo ti ragsakko nga agsarita kadakayo itoy naisangsangayan a rabii maipapan iti sagrado a sagut ti priesthood ken ti datdatlag a bilegna a mangbendision kadagiti agtutubo iti daytoy a dispensasion. Ikararagko ta laksid dagiti pagkurangak, tulongannak ti Espiritu nga isuro ti kinapudno.
Pinalagipan ti Umuna a Panguluen dagiti addaan iti Aaronic Priesthood nga “agbibiagkayo iti panawen nga adu dagiti gundaway ken karit—panawen a napasublin ti priesthood. Addaankayo iti turay a mangannong kadagiti ordinansa ti Aaronic Priesthood. Bayat ti nainkararagan ken maikarika a mangusar iti dayta a turay, ad-adda a maparaburamto ti biag dagiti adda iti aglawlawmo.”1 Kas agtutubo a lallaki iti Simbaan, naipalagip pay kadatayo a datayo dagiti “ipatpateg nga annak [a lallaki] ti Dios, ket adda paaramidrna [kadatayo],”2 ket tulongantayo iti aramidna a “mangipatungpal iti di ipapatay ken ti agnanayon a biag ti tao” (Moises 1:39).
Ti priesthood ket ti turay a mangannong kadagiti ordinansa ken katulagan ti ebanghelio ti Mangisalakan kadagiti maikari nga umawat kadagitoy. Babaen dagitoy nga ordinansa ti ebanghelio ken sagrado a katulagan umay dagiti bendision ti Pannubbot ti Mangisalakan a mangtulong a gun-odentayo ti nadiosan a pagtungpalantayo.
Maysa nga agtutubo ni Joseph Smith nga inawagan ti Dios a mangisubli ti ebanghelio ni Jesucristo ken, para iti dayta a panggep, naited ti priesthood nga inusarna a mangbendision ti amin a sangkataw-an. Doktrina ken Katulagan 135 nangted pagarigan iti adu a bendision nga inted ni Joseph kadagiti agtutubo itoy a dispensasion. Mabasatayo: “Ni Joseph Smith … ti ad-adu ti naaramidna, malaksid ken Jesus, iti pannakaisalakan dagiti tao ditoy ubong, ngem iti asino man a tao a nagbiag ditoy. … Inyegna ti Libro ni Mormon … ; inyegna ti pakabuklan ti agnanayon nga ebanghelio … iti uppat a suli ti daga; inyegna dagiti paltiing ken bilin a buklen ti Doktrina ken Katulagan … ; inummongna ti adu a rinibribu a Santo iti Ud-udina nga Aldaw, … ken nangibati iti dayaw ken nagan a saan a mapapatay” (Doktrina ken Katulagan 135:3).
Tapno nasamay nga agserbi kas inaramid ni Joseph, rumbeng a maikaritayo a mangusar iti bileg ti priesthood ti Apo. Bayat ti pannakaipatarus ti Libro ni Mormon, kayat da Joseph ken Oliver Cowdery ti mabuniagan, ngem agkurangda iti umno a turay. Idi Mayo 15, 1829, nagkararagda ket sinarungkaran ida ni Juan Bautista, a nangted kadakuada kadagiti tulbek ken turay ti Aaronic Priesthood, a kunkunana, “Kadakayo padak a katulongan, iti nagan ti Mesias italekko ti Kinasaserdote nga Aaron, a mangiggem kadagiti tulbek iti panangibabaet dagiti anghel, ken ti ebanghelio ti panagbabawi, ken ti panagbuniag babaen ti pannakaipabatok para iti pannakaugas ti basbasol” (Doktrina ken Katulagan 13:1).
Naikkantayo iti gundaway nga agserbi kas dagiti anghel, tapno ikasaba ti ebanghelio iti amin a kontinente ti daga, ken tulongan dagiti kararua nga umay ken Cristo. Daytoy a panagserbi ti mamagkaykaysa iti pannakipagtrabahotayo kada Juan Bautista, Moroni, Joseph Smith, Presidente Nelson, ken dadduma a naanep a katulongan ti Apo.
Ti serbisiotayo babaen ti priesthoodna mangyeg a sangkamaysa kadagiti napasnek a sumursurot ken agbibiag a nalinteg kadagiti pannursuro ti Apo, nga ammok mismo a mabalin a narigat bayat ti panangsangotayo kadagiti karit dagiti agtutubo. Ngem ti pannakikaykaysa kadagitoy pada a katulongan ti Apo a mangileppas iti aramidna ket mangtulongto a mangpapigsa kadatayo a maibusor kadagiti sulisog ken panangallilaw ti kabusor kadatayo. Makapagbalinka a maysa a parola ti silaw iti amin nga agduadua iti bagbagida. Ti silaw iti kaunggam ket agraniagto a nakalawlawag ta mabendisionanto ti amin a kapulapolmo babaen laeng iti pannakikaduada kenka. Mabalin a narigat no dadduma a lasinen ti kaadda dagiti naespirituan a kaduatayo, ngem agyamanak a mangammo a maysaak a miembro ti napudno a korum ti priesthood, a pakipagtrabahuak tapno dumur-as a naas-asideg ken ni Cristo.
Kaduak dagiti gagayyem ken pamiliatayo, ti Espiritu Santo ti maysa kadagiti napudno ken mapagpannurayan a kaduatayo. Ngem tapno maawis ti kanayon a panangkadkaduana, nasken nga ilkabiltayo dagiti bagitayo kadagiti kasasaad ken lugar a kayat ti Dios a pagyanan. Mabalin a mangrugi daytoy iti bukodtayo a pagtaengan no aramidentayo dagitoy a nasantuan a lugar babaen ti pannakiraman iti inaldaw a panagadal iti nasantuan a kasuratan ken panagkararag kas pamilia ken, napatpateg noagadaltayo nga agmaymaysa kadagiti nasantuan a kasuratan ken agkararag iti bukodtayo.
Nasapsapa iti daytoy a tawen, naikkannak iti naragsak ngem napakumbaba a gundaway a mangtulong iti adingko a ni Oceane, a dumur-as iti dana ti katulagan babaen ti panangawatna iti awis a mabuniagan ken panangtungpal iti maysa kadagiti naidawat a kasapulan a sumrek iti celestial a pagarian. Intantanna ti panagbuniagna iti makabulan, agingga a naordenanak a maysa a priest, a mangted kaniak iti pribilehio a mangannong iti ordinansa, idinto a naikkan met dagiti dadduma a kakabsatko a babbai iti pribilehio nga agtrabaho babaen ti naidutok nga aramiden iti priesthood ken agtakder a kas saksi. Bayat ti panagtakdermi nga agsumbangir iti puente ket nagsagana a tumakdang iti danum, nakitak ti gagarna, a kas kaniak. Ket nariknak ti pannakikaykaysak kenkuana, a mangkitkita nga ar-aramidenna ti umno a desision. Daytoy a gundaway a panangaramat iti priesthood ti namagkasapulan kaniak tapno agbalinak a naan-annad ken diak tagilag-anen ti panagbiag iti ebanghelio. Tapno agsagana, napanak iti templo iti inaldaw iti dayta a lawas, tinulongan ti inak, lelang,ko ken kabsatko a babai, a mangannong kadagiti panagbuniag para kadagiti natay.
Adu ti insuro kaniak daytoy a padas maipapan iti priesthood ken no kasano a maaramatko daytoy a maikariak. Ammok a marikna ti amin a priesthood holder ti isu met laeng a banag a nariknak no surotentayo ti pagwadan ni Nephi a “mapan ket aramiden” (kitaen iti 1 Nephi 3:7). Ditayo mabalin ti agtugaw nga awan ar-aramidenna ket namnamaentayo ti Apo nga usarennatayo iti daytoy naindaklan nga aramidna. Rumbeng a ditayo urayen dagitay makasapul iti tulongtayo; pagrebbengantayo a kas priesthood holder ti mangipagwadan ken agtakder kas saksi ti Dios. No ar-aramidentayo dagiti pangngeddeng a mangpawil kadatayo iti agnanayon a panagdur-astayo, nasken nga agbalbaliwtayo itan. Padasento ni Satanas ti amin a kabaelanna a mangpatalinaed kadatayo iti nailubongan a kasasaad a panagsapsapul kadagiti gagangay a pagragsakan, Ngem ammok a no napasnektayo iti aramid, sapulentayo dagiti mangsuporta kadatayo, ken agbabawitayo iti inaldaw, dinto nakapappapati dagiti ibungana a bendision ket agbalbaliwto nga agnanayon ti panagbiagtayo bayat ti panagtultuloytayo iti dana ti katulagan.
Ammok a daytoy ti pudno a Simbaan ni Jesucristo, nga isu ti Mangisalakantayo ken nangidutok kadagiti tulbek ti priesthood kadagiti Apostolna, a mangusar iti daytoy a mangiwanwan kadatayo, nangnangruna kadagitoy mapannubok nga aldaw, ken mangisagana iti lubong para iti panagsublina.
Ammok a ni Joseph Smith ti propeta ti Pannakaisubli ket ni Presidente Nelson ti sibibiag a propetatayo ita. Awisek ti amin a mangadal iti biag dagitoy naindaklan a priesthood holder ken mangpadur-as iti bagitayo iti inaldaw tapno nakasaganatayo a mangsabat iti Namarsuatayo. Iti nagan ni Jesucristo, amen.