Agkaykaysa iti Panangipatungpal iti Aramid ti Dios
Ti kasamayan a wagas iti panangipatungpal iti nadiosan a potensialtayo ket agtitinnulong, a maparaburan iti bileg ken turay ti priesthood.
Patpatgek a nasisingpet a kakabsatko, pakaragsakak a makaduadakayo. Sadinokayo man a dumdumngeg, idanonko ti arakupko kadagiti kakabsatko a babbai ken naimpusuan a pananglamanok kadakayo kakabsatko a lallaki. Agkaykaysatayo iti aramid ti Apo.
No panunotentayo da Adan ken Eva, masansan a ti umuna a panunotentayo ti napintas a biagda iti Minuyongan ti Eden. Ipapankoa kanayon a nasayaat idi ti tiemposaan unay a napudot ken saan unay a nalam-ek—ken nagadu a naimas a bungbunga ken natnateng a mapurosda a mabalinda a kanen no kayatda. Gapu ta baro a lubong daytoy kadakuada, nagadu dagiti takuatenda, isu a makaay-ayo ti inaldaw bayat ti pannakilangenda kadagiti ayup ken panagsukisokda kadagiti napipintas nga adda iti aglawlawda. Naikkanda pay kadagiti bilbilin nga agtungpal ken addaanda kadagiti nadumaduma a wagas iti panagtulnog kadagita nga annuroten, a nakaigapu iti sumagmammano a panagdanag ken pannakatikaw idi damo. 1 Ngem kadagiti pangngeddengda a nangbaliw iti biagda iti agnanayon, naadalda ti agtinnulong ken nagkaykaysa iti panangipatungpal kadagiti panggep ti Dios para kadakuada—ken para iti amin nga annakna.
Ita iladawanmo daytoy met la nga agassawa iti mortalidad. Nasken nga agbannogda para iti taraonda, imbilangda ti sumagmamano nga ayup a taraonda ken adda dagiti narigat a karit a maparmekda laeng no aginnuman ken agkararagda a dua. Ipapanko nga adda laeng sumagmamano a gundaway nga aggiddiat ti opinionda iti no kasano a sanguenda dagita a karit. Nupay kasta, babaen ti Pannakatnag, naadalda a nasken nga agtignayda iti kaykaysa ken ayat. Iti panagsursuro a naawatda manipud kadagiti nadiosan a pagtaudan, nasuruanda iti plano ti pannakaisalakan ken dagiti prinsipio ti ebanghelio ni Jesucristo a mangaramid iti plano. Gapu ta naawatanda nga agpada ti panggepda iti daga ken agnanayon a panggep a tun-oyenda, nakitada ti pannakapnek ken balligi iti panagsursuro nga agtinnulong nga agbannog iti ayat ken kinalinteg.
Idi nayanak dagiti ubbing kadakuada, sinuruan da Adan ken Eva ti pamiliada iti naadalda manipud kadagiti nailangitan a mensahero. Impamaysada ti panangtulong kadagiti annakda a makaawat ken umawat pay kadagita a prinsipio a mangparagsak kadakuada ditoy a biag, kasta met nga agsagana nga agsubli kadagiti nailangitan a nagannakda kalpasan ti panangpadur-asda kadagiti kabaelanda ken mangpennek iti panagtungpalda iti Dios. Idi agangay, naadal da Adan ken Eva nga agyaman kadagiti agduma a pagpigsaanda ken nagtinnulongda iti agnanayon a napateg nga aramidda. 2
Iti panaglabas dagiti siglo ken milenio, ti panangilawlawag iti naparegta ken agdinnepende a kontibusion dagiti lallaki ken babbai ket nangballikug babaen ti palso nga impormasion ken saan a panagkikinnaawatan. Bayat ti panawen a nagbaetan ti datdatlag a rugi iti Minuyongan ti Eden ken ita, nagballigi ti kabusor iti panggepna a mangbingay kadagiti lallaki ken babbai kadagiti gandatna a mangparmek iti kararuatayo. Ammo ni Lucifer a no madadaelna ti kaykaysa ti lallaki ken babbai, no matikawnatayo iti nadiosan a pategtayo ken pagrebbengan iti katulagan, agballiginto a mangperdi kadagiti pamilia, a napateg a yunit ti kinaagnanayon.
Pagdasigen ni Satanas kas rmaysa a ramit a mangparnuay iti rikna ti panagbalin a superior ken inferior, mangilemmeng iti agnanayon a kinapudno a dagiti akin-uneg a pagdumaan dagiti lallaki ken babbai ket inted ti Dios ken agpada a maipateg. Ginandatna a mangtagibassit kadagiti kontribusion dagiti babbai iti a agpada pamilia ken iti gimong a sibil, iti kasta mangpabassit iti pangparegta nga impluensiada para iti pagimbagan. Paggepna a tun-oyen nga itandudo ti bileg imbes a mangrambak kadagiti naidumduma a kontribusion dagiti lallaki ken babbai nga agrinnaem ken mangted iti panagkaykaysa.
Iti adu a tawen ken iti sangalubongan, naawan ti naan-anay a pannakaawat iti nadiosan a panagpannuray ken agduma a kontribusion ken pagrebbengan dagiti babbai ken lallaki. Iti adu a kagimongan, agbalin a managtulnog dagiti babbai iti lallaki imbes nga agtinnulong nga agkadua, bumassit dagiti aktibidadda. Mabayag ti naespirituan a panagdur-asda kadagita nalidem a panawen; agpayso, sumlep ti naespirituan a lawag iti panunot ken puso a napno iti tradision.
Ket kalpasanna nagsilnag ti silaw ti naisubli nga ebanghelio iti “ad-adda pay ngem iti raniag ti init” 3 idi nagparang ti Dios Ama ken ti Anakna, ni Jesucristo, iti ubing a Joseph Smith iti agsapa ti kalgaw ti 1820 iti dayta a kakaywan ti New York. Nangrugi dayta a pasamak iti pannakaibukbok ti paltiing manipud iti langit. Maysa kadagiti umuna nga elemento iti sigud a Simbaan ni Cristo a maisubli ket ti turay ti priesthood ti Dios. Iti panagtuloy a maipalgak ti Pannakaisubli, nangrugi a maamiris dagiti babbai ti pateg ken potensial ti panagtinnulong kas agkadua, a napusgan ken naiwanwan itoy sagrado nga Aramidna.
Idi 1842, idi kayat dagiti babbai ti mangrugrugi pay laeng ti Simbaan ti mangbukel iti opisial a grupo a tumulong iti aramid, naparegta ni Presidente Joseph Smith a buklen ida “babaen ti priesthood iti maisurot iti pagtuladan ti priesthood.” 4 Kinunana, “Yawatko kenka ti tulbek iti nagan ti Dios …—daytoy ti rugi dagiti nasaysayaat nga aldaw.” 5 Idinto a nayawat dayta a tulbek, dagiti gundaway iti edukasion, potika, ken ekonomia para kadagiti babbai ket nangrugi nga in-inut a dimmur-as iti sangalubongan. 6
Daytoy baro a gunglo dagiti babbai ti Simbaan, a naawagan iti Relief Society, ket saan a maipada iti dadduma pay a gimong dagiti babbai ti aldaw gapu ta impasdek daytoy ti maysa a propeta a nagtignay nga addaan turay ti priesthood a mangted turay, sagrado a pagrebbengan, ken opisial a saad kadagiti babbai iti uneg ti Simbaan, a saan a naisina iti daytoy. 7
Manipud iti aldaw ni Propeta Joseph Smith agingga iti aldawtayo, ti agtultuloy a pannakaisubli ti amin a banag ti nangyeg iti pannakailawlawag iti panagkasapulan iti turay ken bileg ti priesthood iti panangtulong iti agpada a lallaki ken babbai a mangipatungpal kadagiti nadiosan a naidutok a pagrebbenganda. Itay kallabes nasuruankami a dagiti babbai a na-set apart iti babaen iti direksion ti maysa nga agig-iggem iti tulbek ket agtrabaho iti turay ti priesthood kadagiti takemda. 8
Idi Oktubre 2019, insuro ni Presidente Russell M. Nelson a dagiti babbai a na-endow iti templo ket addaan iti bileg ti priesthood iti biagda ken iti pagtaenganda bayat ti panagtungpalda kadagiti sagrado a katulagan nga inaramidda iti Dios. 9 Inlawlawagna a “sisasagana met ti langit kadagiti babbai a natalugadingan iti bileg ti Dios a maibukbukbok manipud iti katulaganda iti priesthood a kas kadagiti lallaki nga addaan iti priesthood.” Ket inallukoyna ti tunggal babai nga “umasideg iti bileg ti Mangisalakan a tumulong iti pamiliayo ken dadduma pay nga ipatpategyo.” 10
Ania ti kaipapanan dayta kadatayo? Kasano a ti pannakaawat iti turay ken bileg ti priesthood ti ket mamagbaliw iti biagtayo? Maysa kadagiti tulbek tapno maawatan a no agtinnulong dagiti babbai ken lallaki, adu dagiti maileppastayo ngem no agtrabahoyo a dakdakayo. 11 Agsinnaranaytayo kadagiti akemtayo imbes a agsisinatayo. Nupay saan a naordenan dagiti babbai iti takem ti priesthood, kas immuna a naibaga naparaburan dagiti babbai iti bileg ti priesthood bayat ti panagtungpalda kadagiti katulaganda, ket agtrabahoda nga addaan iti turay ti priesthood no ma-set apartda iti maysa a takem.
Iti napintas nga aldaw ti Agosto, adda gundawayko a kinasango ni Presidente Russell M. Nelson iti nabangon manen a balay da Joseph ken Emma Smith iti Harmony, Pennsylvania, asideg ti nakaisublian ti Aaronic Priesthood kadagitoy ud-udina nga aldaw. Iti panagsaritami, imbaga ni Presidente Nelson maipapan iti napateg a papel nga nga ak-akmem dagiti babbai iti Pannakaisubli.
Presidente Nelson: “Maysa kadagiti napateg nga aspeto a maipalagip kaniak no mapanak iti disso ti pannakaisubli ti priesthood ket ti napateg a papel nga akmen dagti babbai iti Pannakaisubli.
“Idi damo nga ipatarus ni Joseph ti Libro ni Mormon, asino ti nagsurat? Bueno, nagsurat bassit, ngem bassit laeng. Nagsurat ni Emma.
“Ket kalpasanna napanunotko a napan ni Joseph iti kakaywan tapno agkararag iti asideg ti balayda iti Palmyra, New York. Sadino’t napananna? Napan iti Sagrado a Kakaywan. Apay a napan sadiay? Gapu ta idiay ti napanan tni Nanangna idi tinarigagayanna ti agkararag.
“Dagita laeng ti dua a babbai nga addaan iti kangrunaan nga akem iti pannakaisubli ti priesthood ken iti Pannakaisubli ti Simbaan. Awan duadua, makunatayo a napateg dagiti assawatayo ita kas iti kapategda idi. Siempre, napategda.”
Kas kada Emma ken Lucy ken Joseph, datayo ti kasamayan no natallugodtayo nga agsursuro manipud iti tunggal maysa ken agkaykaysa iti panggeptayo a tun-oyen nga agbalin a disipulo ni Jesucristo ken tumulong kadagiti dadduma iti pannagna iti dayta a dana.
Nasuruantayo a “ ti priesthood mangbendision iti biag dagiti annak ti Dios iti di mabilang a wagas. … Kadagiti takem iti [Simbaan], ordinansa iti templo, relasion iti pamilia, ken naulimek, saggaysa a panagministro, agtultuloy a dumur-as nga addaan iti bileg ti priesthood dagiti babbai ken lallaki a Santo iti Ud-udina nga Aldaw. Daytoy a panagtitinnulong dagiti lallaki ken babbai iti panangipatungpal iti aramid ti Dios babaen iti bilegna ket napateg iti ebanghelio ni Jesucristo a naisubli babaen ken ni Propeta Joseph Smith.” 12
Napateg ti panagkaykaysa iti nadiosan nga aramid nga addaan pribilehio ken nakaawagantayo, ngem saan laeng a mapasamak daytoy. Kasapulan ti aramid ken oras tapno pudno aggiinnuman—tapno adinnengngeg, maawatan ti pannirigan ti tunggal maysa, ken agbibinnuray iti padas—ngem agbanag ti proseso iti naregregta a pangngeddeng. Iti man pagtaengan wenno kadagiti pagrebbengan iti Simbaan, ti kasamayan a wagas a pangipatungpal iti nadiosan a potensial ket agtitinnulong, a maparaburan iti bileg ken turay ti priesthood kadagiti agduduma ngem agsinnaranay kadagiti pagrebbengantayo.
Ania ti kayarigan dayta a pannakikadua iti biag dagiti natulagan a babbai ita? Iburayko man ti maysa a pagarigan.
Naidumduma ti panagkadua da Alison ken John. Agluganda iti maysa a bisikleta a pagluganan ti dua tapno makilumba iti asideg ken adayo. Tapno naballigian a makisalisal iti dayta a bisikleta, nasken nga agtunos ti dua a nakalugan. Nasken a nakasadagda iti maymaysa a direksion iti husto nga oras. Dida mabalin ti agdinnominante, ngem nasken nga agsaritada a nalawag a mangaramid iti parteda. Adda kontrol ti captain iti sango, no kaano nga ipreno ken kaano a tumakder. Nasken ti honero, iti likud, a mangikaso no ania ti maaramid ken nakasagana a mangted iti nayon a pigsa no kaano a yalistoda no adayo pay wenno yinnayadda no asidegen unay iti dadduma pay a siklista. Nasken nga agtinnulongda tapno agballigi ket matun-oyda ti paggepda.
Inlawlawag ni Alison: “Iti umuna, kuna no kua ti tao iti saad a captain ti ‘Tumakder’ no nasken a tumakderkami ken ‘Agpreno’ no nasken nga agsardengkami nga agpedal. Kalpasanna, maadal nga ibaga ti tao a honero kaniak no asidegen a tumakder wenno agpreno ti captain, ken awan ti nasken nga isao. Naadalmi nga agtinnulongkami iti aramidenmi ket maibagami no agkarigatan ti maysa kadakami ket [kalpasanna] padasenmi ti agsinnaranay. Maipapan daytoy iti panagtalek ken panagtinnulong iti aramid.” 13
Nagkaykaysa da John ken Allison di laeng ti panagpedalda iti bisikletada, ngem nagkaykaysada iti panagdennada kas agassawa. Nagtarigagayda iti ragsak iti maysa ngem iti bukodda; kinitada ti pagimbagan ti tunggal maysa ken nagtinnulongda a mangparmek iti pagkapsutan ti tunggal maysa. Agsinnublatda a mangidaulo ken agtinnulongda no agkarigatan ti maysa kadakuada. Agpinnategda iti tulong ken agsapulda iti nasaysayaat a sungbat iti karitda no agkaduada kadagiti talento ken pamataudanda. Pudno a nabegkesda babaen ti ayat a kas ken ni Cristo.
Ti panagbalin a a natuntunos iti nadiosan a pagtuladan ti panagtinnulong iti panagkaykaysa ket napateg itoy nga aldaw ti mensahe a “siak ti umuna” a naipalawlaw kadatayo. Addaan dagiti babbai kadagiti naisangsangayan, nadiosan a sagut 14 ken naikkan iti naidumduma a pagrebbengan, ngem dagita ket saan nga ad-adda—wenno nakurkurang—ti pategda ngem kadagiti sagut ken pagrebbengan dagiti lallaki. Amin ket naisangrat ken kasapulan a mangisangbay iti nadiosan a plano ti Nailangitan nga Ama a mangted iti tunggal maysa kadagiti annakna ti kapintasan a gundaway a mangipatungpal iti nadiosan a potensialna.
Ita, “kasapulantayo dagiti babbai a natured ken adda pannirigan ni Inatayo nga Eva” 15 a makikaysa iti kakabsatda a lallaki iti panangyeg kadagiti kararua ken Cristo. 16 Agbalin koma dagiti lallaki a pudno a kadua imbes nga ipapan a responsableda laeng wenno “aginkakano” a kadua idinto nga ad-adu ti aramiden ti babbai. Nasken a naayat dagiti babbai nga “umaddang [ken] alaenda ti umisu ken kasapulan a lugarda” 17 kas kadua imbes a panunoten a nasken nga aramidenda mismo daytoy wenno agurayda a maibaga no ania ti aramidenda. 18
Ti panangkita kadagiti babbai kas napateg a makiramraman ket saan a maipapan ti panangparnuay iti “panagpada” ngem maipapan iti pannakaawat iti kinapudno ti doktrina. Imbes a panangipasdek iti maysa a programa tapno matungpal dayta, makapagtitinnulongtayo a mangipateg kadagiti babbai kas iti ar-aramiden ti Dios: kas napateg nga agkadua iti aramid ti pannakaisalakan ken pannakaitan-ok.
Nakasaganatayo kadin? Ikarigatantayto kadi a rimbawan ti bayas ti kultura ket awatentayo dagiti nadiosan a pagtuladan ken kannawidan maibatay iti pundasion ti doktrina? Awisennatayo ni Presidente Russell M. Nelson nga “agkikibintayo a magna itoy sagrado nga aramid… [a] tumulong a mangisagana iti lubong para iti Maikadua a Yaay ti Apo.” 19 No aramidentayo, maadaltayo nga ipateg dagiti tulong ti tunggal tao ken mangnayon iti kinasamay a pangtungpalantayo kadagiti nadiosan nga akemtayo. Mariknatayto ti dakdakkel a rag-o ngem iti napadasantayo.
Mapilitayo koma ti agbalin a nakaykaysa iti naparegta a wagas ti Apo a tumulong iti aramidna nga agpatuloy. Iti nagan ti patpatgentayo a Mangisalakan, a ni Jesucristo, amen.