Kasano a Mabendisionan ti Priesthood dagiti Agtutubo
Babaen ti priesthood, maitag-aytayo. Mangted ti priesthood iti lawag iti lubongtayo.
Maragsakanak nga adda ditoy. Idi damo a maammuak nga adda gundawayko nga agsarita ditoy ita, naragsakanak unay ngem kasta met a napakumbabaak unay. Adu a kanito ti inusarko a nangpanunot iti ipaayko, ket sapay koma a ti Espiritu ti mangidanon kadakayo a mismo babaen iti mensahek.
Iti Libro ni Mormon, sinaggaysa ni Lehi a binendisionan dagiti annakna sakbay a pimmusay a nakatulonga kadakuada a nangtakuat iti pigsada ken agnanayon a kabaelanda. Siak ti buridek kadagiti walo nga agkakabsat, ket iti napalabas a tawen sisiak ti ubing a nabati iti pagtaenganmi iti umuna a gundaway. Iti kaadayo dagiti kakabsatko wenno iti kanayon a kaadda ti maysa a tao kasarsaritak ket narigat unay kaniak. Adda dagiti rabii a nakariknaak iti nalaus a liday. Agyamanak kadagiti dadakkelko, a nangipaay iti amin a kabaelanda a tumulong kaniak. Pagarigan daytoy idi indiaya ni tatang ti mangted kaniak iti bendision ti priesthood a pammaregta bayat dagiti mapannubok a kanito. Kalpasan ti pammendisionna, awan dagiti nabaliwan a dagus, ngem nakariknaak iti talna ken ayat manipud iti Nailangitan nga Amak ken manipud ken ni tatang. Nagasatak unay ti kaadda ti maikari nga ama a makaited kadagiti bendision ti priesthood iti kanito a kasapulak ken tumulong kaniak a mangkita kadagiti pagpigsaak ken agnanayon a paglaingak, kas iti inaramid ni Lehi idi binendisionanna dagiti annakna.
Iti baet dagiti kasasaadyo, kanayon a maaddaankayo iti wagas dagiti bendision ti priesthood. Babaen dagiti miembro ti pamilia, gagayyem, dagiti ministering brother, lider ti priesthood, ken ti Nailangitan nga Ama a pulos a di mangbaybay-anto kadakayo, maawatyo dagiti bendision ti priesthood. Kinuna ni Elder Neil L. Andersen: “Agnanayon a nabilbileg ti bendision ti priesthood ngem ti maysa a maidawat a mangted iti sagut. … Iti pannakaikaritayo, dagiti ordinansa ti priesthood ti mangparang-ay iti biagtayo.”1
Dikay agpangadua a dumawat iti bendision no masapulyo ti nayon a pangiwanwan. Kadagiti narigat a kanitotayo a kasapulantayo ti kangrunaan a tulong ti Espiritu. Awan ti naan-anay, ket mapadasantayo amin ti agrigat. Sumagmamano kadatayo ti agsagaba iti panagduadua, depresion, adiksion, wenno makarikna iti panagkurkurang. Makatulong ti bendision ti priesthood a mangparmek kadagitoy a pannubok ken umawat iti kappia bayat ti panagtultuloytayo iti masakbayan. Sapay koma ta ipasnektayo ti agbiag a maikari nga umawat kadagitoy a bendision.
Sabali pay a pakabendisionan ti priesthood kadatayo ket babaen ti bendision ti patriarka. Nasursurok ti mangtaliaw iti bendisionko iti patriarka no makariknaak iti liday wenno leddaang. Makatulong ti bendisionko a mangkita iti kabaelak ken ti naipangruna a plano ti Dios kaniak. Liwliwaennak ken tulongannak a mangkita iti labes ti panirigak ditoy daga. Ipalagipna dagiti sagut ken bendision a maawatkonto no agbiagak a maikari. Tulongannak pay a manglagip ken mangrikna a sitatalna a sungbatan ti Dios ken luktannanto ti ridaw para kaniak iti umno a kanito no kasapulak unay.
Tumulong ti bendision ti patriarka a mangisagana kadatayo nga agsubli a makipagnaed iti Naillangitan nga Amatayo. Ammok nga aggapu ti bendision ti patriarka iti Dios ken makatulong kadatayo a mamagbalin kadagiti pagkapsutantayo a pagpigsaantayo. Saan a mensahe dagitoy manipud kadagiti mammalad; ibaga dagitoy a bendision no ania ti masapul a denggentayo. Kaarngida ti Liahona para iti tunggal maysa kadatayo. No ipangrunatayo nga umauna ti Dios ket mamatitayo Kenkuana, ilikliknatayonto iti bukodtayo a let-ang.
Kas iti panangbendision ti Dios ken ni Joseph Smith babaen iti priesthood tapno maisubli dagiti bendision ti ebanghelio, maaawattayo met dagiti bendision ti ebanghelio iti biagtayo babaen ti priesthood. Linawas a maikkantayo iti gundaway ken panawen a makiraman iti sakramento. Babaen daytoy ordinansa ti priesthood, maaddaantayo iti Espiritu a kanayon a tarabaytayo, a mangdalus ken mangpatarnaw kadakayo. No mariknatayo a masapul a pukawentayo ti banag iti biagtayo, umasidegtayo kadagiti matalek a lider a makatulong a mangiturong kadakayo iti umno a dalan. Matulongannakayo dagiti lideryo a maaddaan iti naan-anay a bileg ti Pannubbot ni Jesucristo.
Agyamantayo iti priesthood, ta maawattayo met dagiti bendision ti ordinansa ti templo. Manipud idi mabalinkon ti sumrek iti templo, inaramidko daytoy a panggepko a tun-oyen ken ipangrunak ti kanayon a dumar-ay. Babaen ti panangilatangko iti oras ken napateg a sakripisio a mayasideg iti Nailangitan nga Amak iti nasantuan a balayna, nabendisionanak nga umawat iti paltiing ken parikna a talaga a nakatulong kaniak iti unos ti panagbiagko.
Babaen ti priesthood, maitag-aytayo. Mangted ti priesthood iti lawag iti lubongtayo. Kinuna ni Elder Robert D. Hales: “No awan ti bileg ti priesthood, ‘awan serserbi ti daga’ (kitaen iti D&K 2:1–3). Awan koma ti lawag, awan namnama—-sipnget laeng.“2
Idirdir-inatayo ti Dios. Kayatnatayo nga agsubli Kenkuana. Am-ammonatayo a mismo. Am-ammonakayo. Ay-ayatennatayo. Kanayon a maseknan kadatayo ket bendisionannatayo uray no ipagaruptayo a ditayo maikari. Ammona ti kasapulantayo ken no kaano a masapultayo daytoy.
“Agdawatkayo, ket maitedto kadakayo; agsapulkayo, ket masapulanyonto; agtuktokkayo, ket malukatankayto:
“Ta siasino man nga agdawat, makaawat; ket ti agsapul, makasarak; ket isu nga agtuktok, mailukatanto” (Mateo 7:7–8).
No awan pay ti pammaneknekyo maipanggep iti priesthood, allukoyenkayo nga agkararag ket dawatenyo a maammuanyo ti bilegna, sa agbasakayo iti nasantuan a kasuratan tapno mangngegyo dagiti balikas ti Dios. Ammok a no ipasnektayo a padasen ti bileg ti priesthood ti Dios iti biagtayo, mabendisionantayonto. Iti nagan ni Jesucristo, amen.