Kaunggan iti Pusotayo

Ni Douglas D. Holmes

Na-release itay Nabiit nga Umuna a Mamagbaga iti Sapasap a Panguluen ti Young Men

Tultulongannatayo ti Apo—amintayo—a mangipauneg iti ebangheliona iti pusotayo.

Kakabsat,, anian a nadayag a panawen a pagbibiagantayo. Bayat ti panangrambaktayo iti rugi ti Pannakaisubli, daytoy pay ti umno a panangrambak iti agdama a Pannakaisubli a masaksaksiantayo. Makipagragsakak kadakayo itoy nga aldaw.¹ Itultuloy ti Apo, babaen dagiti propetana, nga ikabil ti amin a kasapulan a mangtulong kadatayo nga agsagana nga umawat Kenkuana.²

Maysa kadagita a kasapulan ket ti baro nga inisiatibo ti Ubbing ken Agtutubo. Adu kadakayo ti pamiliar iti empasis daytoy a programa iti panagset iti goals, baro nga emblem ti panagkameng, ken dagiti komperensia ti Para iti Pigsa dagiti Agtutubo. Ngem nasken a ditay palingdan ti panangkitatayo kadagiti prinsipio a binangon ti programa ken ti panggepda: mangtulong a mangipauneg ti ebanghelio ni Jesucristo iti puso dagiti ubbing ken agtutubotayo.³

Patiek a no makitatayo a nalawlawag dagitoy a prinsipio, mabigbigtayo daytoy nga ad-adda pay a programa para kadagiti miembro nga agtawen iti 8 agingga 18. Makitatayto no kasano a tultulongannatayo ti Apo—amintayo—nga ad-adda a mangipauneg ti ebangheliona iti puspusotayo. Ikararagko a tulongannatayo ti Espiritu Santo nga agsisinnuro.

Dagiti Linnangen—“Kaduaen Ida”⁴

Ti umuna a prinsipio ket dagiti linnangen. Gapu ta gagangay a paset ida ti Simbaan ni Jesucristo, no dadduma malipatantayo ti kinapateg dagiti pannakilangen iti madama a panagdaliasattayo ken ni Cristo. Saan a manamnama kadatayo a mangsapul wenno magnatayo nga agmaymaysa iti dana ti katulagan. Kasapulantayo ti ayat ken tulong dagiti nagannak, dadduma pay a miembro ti pamilia, gagayyem, ken lider a magmagna met iti dana ti katulagan.

Ikkan iti oras dagitoy a kita ti linnangen. Oras tapno agkakadua. Oras nga agkatawa, agay-ayam, agsursuro ken agserbi. Oras a mangbigbig iti interes ken karit ti tunggal maysa. Oras nga agbalin nga open ken napudno iti tunggal maysa bayat ti agkaykaysa a panagkagumaantayo nga agsingsingpet. Dagitoy a linnangen ti maysa kadagiti kangrunaan a panggep ti panaguummong kas pamilia, korum, klase, ken kongregasion. Dagitoy ti pundasion para iti nasamay a ministering.⁵

Inikkannatayo ni Elder Dale G. Renlund iti maysa a tulbek iti panangpadur-as kadagitoy a linnangen idi kinunana: “ Tapno nasamay a mapagserbiantayo dagiti dadduma nasken a makitatayo ida … babaen dagiti mata ti Nailangitan nga Ama. Iti kastoy laeng a marugiantayo a maawatan ti pudno a pateg ti kararua. Iti kastoy laeng a maawatantayo ti ayat ti Nailangitan nga Ama para iti amin nga annakna.”⁶

Sagut ti panangkitatayo iti dadduma kas panagkita ti Dios. Awisek ti amin kadatayo a mangsapul ken manggun-od iti daytoy a sagut. No kumita dagiti matatayo,⁷ matulongantayo ti dadduma a mangkita iti bagida kas panangkita ti Dios.⁸ Inyunay-unay ni Presidente Henry B. Eyring ti bileg daytoy idi kinunana: “No anianto ti kapatgan ket ti masursuro [kadakayo] dagiti [dadduma] maipapan iti pudno a kinasiasinoda ken ti pudno a pakapagbalinanda. Panagkunak didanto masursuro unay daytoy manipud kadagiti lektura. Maaladanto daytoy manipud iti rikna ti kinasiasinoyo, iti panagkunayo no asinoda, ken no ania iti panagkunayo a mabalin a pagbalinanda.”⁹ Ti panangtulong iti dadduma nga umawat iti pudno a kinasiasino ken panggepda ket maysa kadagiti kaindaklanan a sagut a maitedtayo.¹⁰ Ti panangkita iti dadduma ken iti bagbagitayo kas iti panamagrereppeng ti Dios kadagiti puspusotayo “iti panagkaykaysa ken ayat.”

Gapu iti adu nga agtultuloy a puersa ti lubong a mangguyod kadatayo, kasapulantayo ti pigsa nga agtaud iti naayat a linnangen. No agplanotayo kadagiti aktibidad, miting, ken dadduma pay a panagtitipon, laglagipentayo a panggep dagitoy a pangtititpon ti mangbangon iti naayat a linnangen a mamagkaykaysa kadatayo ken mangtulong nga ad-adda a mangipauneg iti ebanghelio ni Jesucristo iti puspusotayo.¹²

Paltiing, Karbengan nga Agpili, ken Panagbabawi—”Ikonekta Ida iti Langit”¹³

Siempre, saan nga umdas a mabegkes laeng a sangkamaysa. Adu dagiti grupo ken timpuyog a manggun-od iti kaykaysa iti nadumaduma a gapu. Ngem ti kaykaysa a kalikagumantayo a gun-den ket ti makikaykaysa ken Cristo, ikonektatayo ti bagitayo Kenkuana.¹⁴ Tapno maikonekta dagiti pusotayo iti langit, kasapulantayo dagiti bukod a naespirituan a padpadas, kas iti nalawag nga insao laeng ni Elder Andersen kadatayo.¹⁵ Umay dagita a padas bayat ti panangidanon ti Espiritu Santo iti balikas ken ayat ti Dios iti panunot ken pusotayo.¹⁶

Umay daytoy a paltiing babaen dagiti nasantuan a kasuratan, nangnangruna iti Libro ni Mormon; babaen dagiti naparegta a balikas dagiti sibibiag a propeta ken dadduma pay a napudno a disipulo; ken babaen ti naalumamay, bassit a timek.¹⁷ Dagitoy a balikas ket ad-adda pay ngem iti pluma iti maysa a panid, dagiti uni ti dalluyon iti lapayagtayo, wenno dagiti panunot iti isiptayo, wenno dagiti rikna iti puspusotayo. Naespirituan a bileg ti balikas ti Dios.¹⁸ Daytoy ti kinapudno ken silaw.¹⁹ Kastoy a dumngegtayo Kenkuana! Daytoy ti mangrugi ken mangnayon iti pammatitayo ken ni Cristo ken mangted tarigagay kadatayo nga agbalin nga ad-adda kas iti Mangisalakan—dayta ti, panagbabawi ken pannagna iti dana ti katulagan.²⁰

Itay naglabas nga Abril, tinulongannatayo ni Presidente Russell M. Nelson nga umawat iti kangrunaan nga akem ti panagbabawi ditoy naipalgak a panagdaliasat.²¹. Kinunana: “No pilientayo ti agbabawi, pilientayo ti agbalbaliw! Palugodantayo ti Mangisalakan a balbaliwannatayo nga agbalin a kasayaatan iti bagitayo. … Pilientayo ti agbalin nga ad-adda kas ken ni Jesucristo!”²² Daytoy a proseso ti panagbalbaliw, babaen ti balikas ti Dios, ti mangikonekta kadatayo iti langit.

Adda iti awis ti Presidente Nelson nga agbabawi ket ti prinsipio ti karbengan nga agpili. Nasken a pilientayo ti agbabawi para iti bagbagitayo. Saan a maipilit ti ebanghelio iti puspusotayo. Kas kuna ni Elder Renlund, “Panggep a tun-oyen ti Amatayo iti Langit iti panagbalin a nagannak ket ti saan a panangpaaramid kadagiti annakna ti umno; daytoy ket pagpilienna ida nga agaramid iti umno.”²³

Kadagiti programa a sinukatan ti Ubbing ken Agtutubo nasurok a 500 nga agduduma a kasapulan a maileppas tapno maawat ti agduduma a pammigbig.²⁴ Ita, maysa laeng ti kasapulan. Daytoy ti awis a pumili nga agbalin nga ad-adda a kas iti Mangisalakan. Aramidentayo daytoy babaen ti panangawat iti balikas ti Dios babaen ti Espiritu Santo ken panangpalugod ken ni Cristo a mangbalbaliw kadatayo nga agbalin a kasayaatan iti bagitayo.

Ad-adda pay daytoy ngem iti aramaten iti panangituding iti panggep a tun-oyen [goal setting] wenno panangpadur-as iti bukod a bagi. Dagiti panggep a tun-oyen [goal] ket gagangay a ramit a mangtulong kadatayo a kumonekta ti langit babaen ti paltiing, karbengan a pumili, ken panagbabawi—nga umasideg ken ni Cristo ken umawat iti ebangheliona nga ipauneg nga ad-adda pay iti puspusotayo.

Pannakiiraman ken Sakripisio—“Pangidauluen Ida”²⁵

Kamaudiananna, tapno maipauneg iti puspusotayo ti ebanghelio ni Jesucristo nasken a makiramantayo—itedtayo ti oras ken talentotayo, agsakripisiotayo para iti daytoy.²⁶ Kayattayo amin ti agbiag a napudnuan ken addaan kaipapanan, ket pudno daytoy nangnangruna pay iti tumantanor a kaputotan. Agtarigagayda iti panggep.

Ti ebanghelio ni Jesucristo ti kaindaklanan a panggep iti lubong. Kinuna ni President Ezra Taft Benson: “Binilinnatayo ti Dios a mangikasaba itoy ebanghelio iti amin a lubong. Dayta ti panggep a mamagkaykaysa kadatayo ita. Ti laeng ebanghelio ti mangispalto iti lubong manipud iti kalamidad iti mismo a pannakadadaelna. Ti laeng ebanghelio ti mamagkaykaysa kadagiti lallaki [ken babbai] iti amin a puli ken nasionalidad babaen iti talna. Ti laeng ebanghelio ti mangyeg iti rag-o, ragsak, ken pannakaisalakan iti pamilia ti sangkataw-an.”²⁷

Kinuna ni Elder David A. Bednar, “No pabilgentayo dagiti agtutubo babaen iti panangawis ken panangpalugod kadakuada nga agtignay, dumur-asto ti Simbaan kadagiti namilagruan a wagas.”²⁷ Masansan a ditayo inawis ken pinalugodan nga agsakripiso dagiti agtutubo iti daytoy dakkel a panggep ni Cristo. Napaliiw ni Elder Neal A. Maxwell, “No matalipupos unay dagiti agtutubo[tayo] iti aramid ti Apo nalabit a matalipupos met ida ti lubong.”²⁹

Agpokus ti programa nga Ubbing ken Agtutubo iti panangpabileg kadagiti agtutubo. Pilienda dagiti bukodda a panggep a tun-oyen [goal]. Maipuesto dagiti panguluen ti korum ken klase iti umno nga akemda. Ti ward youth council, kas iti ward council, ket agpokus iti aramid ti pannakaisalakan ken pannakaitan-ok.³⁰ Rugian dagiti korum ken klase ti mitingda babaen ti panagiinnuman maipapan no kasano nga aramiden ti inted ti Dios nga aramid kadakuada.³¹

Kinuna ni Presidente Nelson kadagiti agtutubo ti Simbaan: “No agpilikayo, no kayatyo, … makapagbalinkayo a dakkel a paset ti maysa a dakkel a banag, maysa a banag a nangayed! … Maibilangkayo kadagiti kalaingan wenno kasingpetan nga imbaon ti Apo ditoy lubong. Adda kabaelanyo nga agbalin a nalalaing ken nasirsirib ken nasamsamaykayo iti lubong ngem iti ania man a naglabas a henerasion!”³² Iti sabali a gundaway, imbaga ni Presidente Nelson kadagiti agtutubo: “Naan-anay nga agtalekak kadakayo. Patpatgenkayo, kasta met a patpatgennakayo ti Apo. Datayo dagiti taona, agtitinnulong iti nasantuan nga aramidna.”³³ Dakayo nga gtutubo, mariknayo kadi ti panagtalek kadakayo ni Presidente Nelson ken no kasano ti kapategyo iti daytoy nga aramid?

Dakayo a nagannak ken adult leader, awisenkayo a mangkita kadagiti agtutubo kas iti ar-aramiden ni President Nelson. No marikna dagiti agtutubo ti ayat ken panagtalekyo, no paregtaen ken suruanyo ida a mangidaulo—sa bay-anyo ida iti wagasda—pagsiddawendakayonto kadagiti nauneg a pannakaawat ken pannakaammoda, kabaelan, ken panagkumitda iti ebanghelio.³⁴ Mariknadanto ti rag-o ti panangpili a makiraman ken agsakripisio para iti panggep ni Cristo. Umun-unegto ti ebangheliona iti puspusoda, ken agtultuloyto ti aramid kadagiti namilagruan a wagas.

Kari ken Pammaneknek

Ikarik, a no agpokustayo kadagitoy a prinsipio—relasion, paltiing, karbengan a pumili, panagbabawi, ken sakripisio—ad-adda nga agpaunegto ti ebanghelio ni Jesucristo iti amin a puspusotayo. Makitatayto ti Pannakaisubli nga agtultuloy iti kangrunaan a panggepna, ti pannakasubbot ti Israel ken ti pannakaipasdek ti Zion³⁵ a pagturayanto ni Cristo kas Ari dagiti ari.

Paneknekak nga ituloy ti Dios nga aramiden ti amin a banag a kasapulan a mangisagana kadagiti taona iti dayta nga aldaw. Makitatayo koma ti imana iti daytoy nagloriaan nga aramid bayat ti panangikarigatantayo nga “umasideg ken ni Cristo, ket agbalin a naan-anay kenkuana.”³⁶ Iti nagan ni Jesucristo, amen.

Dagiti Nagadawan

1. Kitaen iti Doktrina ken Katulagan 45:12. Kinuna ni Presidente Nelson: “Panunoten laeng ti panaggagar ken panagkasapulan iti daytoy: nakitan ti tunggal propeta manipud ken ken Adan ti aldawtayo. Ken iInsarita ti tunggal propeta maipapan iti aldawtayo , inton maummong ti Israel ken maisagananto ti lubong para iti Maikadua a Yaay ti Mangisalakan. Panunotenyo daytoy! Iti amin a tao a nagbiag iti planeta a daga, datayo dagiti makiraman iti daytoy maudi, naindaklan a pasamak. Anian a nagragsaken dayta!” (“Hope of Israel” [worldwide youth devotional, Hunio 3, 2018], HopeofIsrael.ChurchofJesusChrist.org).

   Insuro ni Elder Jeffrey R. Holland:

   “Anian a naames nga aldaw ti agbiag!

   “Ti ebanghelio ni Jesucristo ti kapudnuan, ti katalgedan, ti katalkan, ti kapatgan a kinapudno iti daga ken iti langit, ita a panawen ken iti agnanayon. Awan—awan ania man a banag, awan asino man, awan impluensia—a manglappedto iti Simbaan a mangtungpal iti misionna ken mangragpat iti pagtungpalanna a naipakdaar sakbay ti pamuon ti lubong. … Awan ti nasken a pagbutngan maipapan iti masakbayan.

   “Saan a kas iti sabali a panawen sakbaytayo, dinto mapasaran daytoy a dispensasion ti apostasia iti institusion; diakto makita ti panagpukaw dagiti tulbek ti priesthood; diakto sagabaen ti panagsardeng ti paltiing iti timek ti Mannakabalin a Dios. … Anian nga aldaw a pagbiagan!

   “… No diyo nadlaw, mabutengak maipapan iti ud-udina nga aldaw. … Mamatikayo. Bumangonkayo. Agbalinkayo a napudno. Ket aramiden ti kasayaatan ti nadayag nga aldaw a pagbiagantayo!” (Facebook post, Mayo 27, 2015; kitaen met iti “Be Not Afraid, Only Believe” [bitla iti Church Educational System Religious Educators, Peb. 6, 2015], broadcastsChurchofJesusChrist.org).

2. Kitaen iti Juan 1:12.

3. Nabiit kalpasan a naawagankami kas Young Men General Presidency, inlawlawag kadakami ni Presidente Henry B. Eyring dagiti naidumduma a karit ken gundaway a sangsanguen ita dagiti agtutubo ti Simbaan. Binalakadannakami a mangipokus iti bambanag a mangtulong a mangipauneg iti puspusoda ti ebanghelio ni Jesucristo. Dayta a balakad ti nagbalin a silaw kadakami kas Young Men Presidency.

4. Kitaen iti “Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

5. Kitaen iti Mosiah 18:25; Moroni 6:5.

6. Dale G. Renlund, “Through God’s Eyes,” Liahona, Nob. 2015, 94; kitaen met iti Moises 1:4–6.

   Insuro ni Presidente Thomas S. Monson: “Addaantayo iti pagrebbengan a mangkita kadagiti indibidual saan a ti kinasiasinoda ngem ketdi kas iti pakapagbalinanda. Ipakaasik kadakayo a panunotenyo ida iti kastoy a wagas” (“See Others as They May Become” Liahona, Nob. 2012, 70).

   Insuro ni Elder Neal A. Maxwell: “Masansan unay, a ti saan a panagtulnog dagiti agtutubo iti pagrukodan ti Simbaan, wenno ti kasla mangkarkarit a saludsodna, wenno ti naipeksa a duaduana ti mangpadaras a maikkan iti birngasna. Nalabit a kumayakay ken no dadduma, pannakisina dagiti ibungana. Ti pudno nga ayat awan birngasna!” (“Unto the Rising Generation,” Ensign, Apr. 1985, 9).

7. Kitaen iti 2 Ar-ari 6:17.

8. Kinuna ni Stephen L. Richards, kas miembro ti Umuna a Panguluen, “Ti kangatuan a kita ti discernment ket ti managrikna iti dadduma ken ilatak kadakuada dagiti nasaysayaat nga ugalida, ti napintas a kadawyan iti kaungganda” (iti Conference Report, Abr. 1950, 162; iti David A. Bednar, “Quick to Observe,” Ensign, Dis. 2006, 35; Liahona, Dis. 2006, 19). Kitaen met iti 2 Ar-ari 6:17.

9. Henry B. Eyring, “Teaching Is a Moral Act” (bitla iti Brigham Young University, Ago. 27, 1991), 3, speeches.byu.edu; nainayon ti panangyunay-unay; kitaen met iti Henry B. Eyring, “Help Them Aim High,” Liahona, Nob. 2012, 60–67.

10. Kitaen iti Moises 1:6.

11. Mosiah 18:21; kitaen met iti Moises 7:18.

12. “Dagiti babbarito nga addaan iti napigsa, nasayaat a pannakilangen iti pamilia, kapatada, ken lider a [Santo iti Ud-udina nga Aldaw], a mangtulong kadakuada a mangpadur-as iti relasionda iti Nailangitan nga Amada, ket isu dagiti talaga nga agtalinaed nga aktibo. Dagiti naitudo nga elemento iti programa—kas iti Sunday curriculum, YM activity program, dagiti namnamaen iti bukod a panagtun-oy … mabalin a bassit ti epektona a saan nga agpannuray kadagita a linnangen. … ti napateg a saludsod ket saan a naan-anay a naipangruna nga elemento ti programa ket inaipatungpal ngem kasano a makatulongda iti napipintas a linnangen a mangpapigsa iti pakabigbigan ti relihion dagiti babbarito a [Santo iti Ud-udina nga Aldaw] ” (“Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

13. Kitaen iti “Connect Them with Heaven,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

14. Kitaen iti Juan 15:1–5; Juan 17:11; Taga Filipos 4:13; 1 Juan 2:6; Jacob 1:7; Omni 1:26; Moroni 10:32.

15. Napno dagiti nasantuan a kasuratan iti pagarigan daytoy; daytoy ti dua laeng: 1 Nephi 2:16; Enos 1:1–4.

16. Kitaen iti Lucas 24:32; 2 Nephi 33:2; Jacob 3:2; Moroni 8:26; Doktrina ken Katulagan 8:2–3.

17. Kitaen iti 2 Timoteo 3:15–16; Doktrina ken Katulagan 68:3–4; 88:66; 113:10.

18. Kitaen iti 1 Taga Tesalonica 1:5; Alma 26:13; 31:5; Helaman 3:29; 5:17; Doktrina ken Katulagan 21:4–6; 42:61; 43:8–10; 50:17–22; 68:4.

19. Kitaen iti Juan 6:63; 17:17; Alma 5:7; Doktrina ken Katulagan 84:43–45; 88:66; 93:36.

20. Kitaen iti Juan 15:3; 1 Pedro 1:23; Mosiah 1:5; Alma 5:7, 11–13; 32:28, 41–42; 36:26; 62:45; Helaman 14:13.

21. Kitaen iti 2 Nephi 31:19–21; 32:3, 5.

22. Russell M. Nelson, “We Can Do Better and Be Better,” Liahona, Mayo, 2019, 67.

23. Dale G. Renlund, “Choose You This Day,” Liahona, Nob. 2018, 104.

24. Iraman daytoy a pigura dagiti kasapulan ti programa ti Iskawting, nga agingga itay kallabes ket paset ti programa ti aktibidad ti Simbaan para kadagiti ubbing a lallaki, agtutubo a lallaki, nangnangruna iti United States ken Canada. Kadagiti lugar a saan a nakiraman iti Iskawting, nasurok a 200 ti bilang dagiti naidawat a kasapulan. Mainayon pay, naaramid a naidumduma dagiti agduduma a programa iti aktibidad para kadagiti ubbing a lallaki, ubbing a babbai, agtutubo a lallaki, agtutubo a babbai, a mangaramid iti sibubukel a padas nga ad-adda a narikut para kadagiti pamilia.

25. Kitaen iti “Let Them Lead,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

26. Kitaen iti Omni 1:26; 3 Nephi 9:20; 12:19; Doktrina ken Katulagan 64:34. “Ti relihion a saan nga agkasapulan a mangisakripisio iti amin a banag awanan iti bileg nga umdas a mangpaadda iti pammati a kasapulan iti biag ken pannakaisalakan” (Lectures on Faith [1985], 69).

27. Ezra Taft Benson, The Teachings of Ezra Taft Benson (1988), 167; iti Preach My Gospel: A Guide to Missionary Service (2019), 13; kitaen met iti Russell M. Nelson, “Hope of Israel,” HopeofIsrael.ChurchofJesusChrist.org.

28. Meeting with Elder David A. Bednar; kitaen met iti “2020 Temple and Family History Leadership Instruction,” Feb. 27, 2020, ChurchofJesusChrist.org/family-history.

29. Neal A. Maxwell, “Unto the Rising Generation,” 11. Intuloy ni Elder Maxwell: “Iti pagrebbengan, mano a panguluen ti korum ti deacon ken teacher ti buklen laeng ti panangawag iti maysa a tao a mangiruknoy iti kararag wenno mangipasa iti sakramento? Kakabsat, pudno a dagitoy ti naisangayan nga espiritu, ken makaaramidda iti bambanag nga addaan pateg no maikkan iti gundaway!”

30. Kitaen iti General Handbook: Serving in The Church of Jesus Christ of Latter-day Saints, 2.2, ChurchofJesusChrist.org.

31. Sumagmamano a resources ti adda a magun-od iti Gospel Library a mangtulong kadagiti agtutubo a mangidaulo, agraman iti “Quorum and Class Presidency Resources,” “Using Come, Follow Me—For Aaronic Priesthood Quorums and Young Women Classes,” ken iti resources para iti young women and Aaronic Priesthood quorums iti “Ward Callings.”

32. Russell M. Nelson, “Hope of Israel,” HopeofIsrael.ChurchofJesusChrist.org. Bayat daytoy isu met la a debosional, kinuna ni President Nelson: “Inlatang ti Nailangitan nga Amatayo ti adu kadagiti kataknengan nga espirituna—nalabit, makunak, ti kasayaatan a buyotna—para iti daytoy maudi a pasetna. Dagidiay a natakneng nga espiritu—dagidiay a kasayaatan nga agay-ayam, dagidiay a bannuar—ket dakayo!”

33. Russell M. Nelson, panglukat a sarita iti “Children and Youth: A Face to Face Event with Elder Gerrit W. Gong,” Nob. 17, 2019, broadcasts.ChurchofJesusChrist.org.

34. Kinuna ni Presidente Nelson: “Nasken a pangidauluentayo dagiti agtutubotayo, nagruna dagiti naawagan ken na-set apart nga agserbi kadagiti panguluen ti klase ken korum. Nai-delegate kadakuada ti turay ti priesthood. Masursurodanto no kasano ti mangawat iti inspirasion iti panangidaulo iti klase wenno korumda” (iti “Children and Youth Introductory Video Presentation,” Sept. 29, 2019, ChurchofJesusChrist.org).

    Kinuna ni Elder Quentin L. Cook, “Maidawat kadagiti agtutubo nga umawat iti ad-adu pay a pangrebbengan iti ub-ubing a tawenda—nga awan dagiti nagannak ken lider a mangaramid iti kabaelan nga aramiden dagiti agtutubo para iti bagbagida” (“Adjustments to Strengthen Youth,” Liahona, Nob. 2019, 40).

35. Insuro ni Presidente George Q. Cannon taught: “Inlatang ti Dios dagiti espiritu para iti daytoy a dispensasion nga addaan iti tured ken determinasion a mangsango iti lubong, ken ti amin a bileg ti maysa a dakes, makita ken saan a makita, tapno mangipakdaar iti ebanghelio ken mangpatalinaed iti kinapudno ken mangipasdek ken pangbangon iti Zion ti Dios tayo nga awan buteng iti amin a pagbanagan. Imbaonna dagitoy nga espiritu iti daytoy a henerasion a mangikabil iti pundasion ti Zion a dinto pulos maparmek, ken mangpataud iti maysa a bukel nga agbalinto a nalinteg, ken mangdayaw iti Dios, ken mangdayaw Kenkuana iti kangatuan, ken agbalin a managtungpal Kenkuana iti baet ti amin a kasasaad” (“Remarks,” Deseret News, Mayo 31, 1866, 203); kitaen met iti Teachings of Presidents of the Church: Joseph Smith (2007), 186.

36. Moroni 10:32.