Ti Melchizedek Priesthood ken dagiti Tulbek
Iti Simbaan maaramat ti turay ti priesthood maaramat babaen ti direksion ti lider ti priesthood nga agiggem kadagiti tulbek dayta a priesthood.
Pinilik a saritaen maipapan iti priesthood ti Dios, ti topiko nga insaon ti immun-una a tallo a nagsarita a nangisuro kadatayo no kasano a bendisionan ti priesthood ti biag dagiti babbai, babbalasitang, ken.
Ti priesthood ket nadiosan a bileg ken turay a naitalek a mausar iti aramid ti Dios para iti pagimbagan ti amin nga annakna. Ti priesthood ket saan a dagiti naordenan iti saad ti priesthood wenno dagiti mangaramat iti turayna. Dagiti lallaki nga addaan iti priesthood ket saan a priesthood. Idinto a ditayo koma tukoyen dagiti naordenan a lallaki kas ti priesthood, maitutop a tukoyentayo ida kas addaan iti priesthood.
The bileg ti priesthood ket agpada nga adda iti Simbaan ken iti organisasion ti pamilia. Ti bileg ti priesthood ken ti turay ti priesthood ket aggidiat iti rebbenganda iti Simbaan ngem iti aramidenda iti pamilia. Amin daytoy ket mayannurot kadagiti prinsipio nga impasdek ti Apo. Ti panggep ti plano ti Dios ket mangiturong kadagiti annakna iti agnanayon a biag. Napateg dagiti mortal a pamilia iti dayta a plano. Adda Simbaan a mangted ti doktrina, ti turay, ken dagiti ordinansa a kasapulan a mangpatalinaed kadagiti relasion ti pamilia iti kinaagnanayon. Ngarud, adda iti organisasion ti pamilia ken ti Simbaan ni Jesucristo iti panagtitinnulong ti tunggal maysa iti pannakapapigsa ti relasion. Dagiti bendision ti priesthood—kas ti pakabuklan ti ebanghelio, ken dagiti ordinansa ti panagbuniag, kumpirmasion, ken yaawat iti sagut ti Espiritu Santo, ti endowment iti templo, ken agnanayon a kallaysa—adda dagitoy a magun-od dagiti lallaki ken babbai.1
Ti priesthood a saritaentayo ditoy ket ti Melchizedek Priesthood, naisubli iti rugi ti Pannakaisubli ti ebanghelio. Da Joseph Smith ken Oliver Cowdery ket inordenan da Pedro, Santiago, ken Juan, a nangipakdaar iti bagida “kas agiggem kadagiti tulbek ti pagarian, ken ti dispensasion ti pannakatungpal dagiti panawen” (Doktrina ken Katulagan 128:20). Inawat dagitoy a senior Apostol dayta a turay manipud iti Mangisalakan Mismo. Amin a dadduma pay a turay wenno saad iti priesthood ket nayon iti Melchizedek Priesthood (kitaen iti Doktrina ken Katulagan 107:5), gapu ta “iggemna ti karbengan ti panguluen, ket addaan iti bileg ken panangituray iti amin a pagakeman iti simbaan iti amin a tawen iti lubong” (Doktrina ken Katulagan 107:8).
Iti Simbaan ti turay ti dakdakkel a priesthood, ti Melchizedek Priesthood, ken ti basbassit wenno ti Aaronic Priesthood ket maaramat babaen ti direksion ti lider ti priesthood, kas iti bishop wenno presidente, nga agiggem kadagiti tulbek ti priesthood. Tapno maawatan ti panangaramat iti turay ti priesthood iti Simbaan, nasken a maawatantayo ti prinsipio dagiti tulbek ti priesthood.
Dagiti tulbek ti Melchizedek Priesthood ti pagarian ket intalek da Pedro, Santiago, ken Juan ngem saan a nangkumpleto iti pannakaisubli dagiti tulbek ti priesthood. Dimteng iti agangay ti dadduma paya tulbek ti priesthood. Kalpasan ti dedikasion ti umuna a templo iti daytoy a dispensasion iti Kirtland, Ohio, tallo a propeta—insubli da Moises, Elias, ken Elijah—“dagiti tulbek daytoy a dispensasion,” agraman dagiti tulbek maipanggep iti panangummong iti Israel ken ti aramid dagiti templo ti Apo (kitaen iti Doktrina ken Katulagan 110), kas impetteng unay nga inladawan ni Presidente Eyring.
Ti ammo unay a pagarigan ti rebbengen dagiti tulbek ket ti panangannong kadagiti ordinansa iti priesthood. Ti ordinansa ket maysa a napasnek nga aramid a mangisimbolo iti panagaramid kadagiti katulagan ken ti maikari a bendision. Iti Simbaan maannong ti amin nga ordinansa babaen ti panangituray ti lider ti priesthood nga agiggem kadagiti tulbek para iti dayta nga ordinansa.
Gagangay unay a ti ordinansa ket annongen dagiti tao a naordenan iti saad ti priesthood nga agakem babaen ti direksion ti maysa nga agiggem kadagiti tulbek ti priesthood. Kas pagarigan, dagiti addaan iti agduduma a saad ti Aaronic Priesthood ti mangannong iti ordinansa ti sakramento babaen dagiti tulbek ken direksion ti bishop, nga agiggem kadagiti tulbek ti Aaronic Priesthood. Maaramat ti isu met la a prinsipio kadagiti ordinansa ti priesthood a pangannongan dagiti babbai iti templo. Nupay awanan dagiti babbai iti saad iti priesthood, annongenda dagiti sagrado nga ordinansa iti templo, babaen ti panangituray ti presidente ti templo, nga agannong kadagiti tulbek kadagiti ordinansa ti templo.
Sabali pay a pagarigan ti turay ti priesthood babaen ti direksion ti maysa nga agiggem kadagiti tulbek ket dagiti pannursuro dagiti lallaki ken babbai a naawagan a mangisuro iti ebanghelio, kadagiti man klase iti home wardda wenno iti mision. Dadduma pay a pagarigan ket dagiti addaan iti saad iti panangidaulo iti ward ken mangusar iti turay ti priesthood iti panangidauloda babaen ti gapu ti takemda ken babaen ti pannaka-set apart ken direksion ti lider ti priesthood nga agiggem kadagiti tulbek iti ward ken stake. Kastoy ti pakaaramatan ti turay ken bileg ti priesthood ken masagrap iti Ti Simbaan ni Jesucristo dagiti Santo iti Ud-udina nga Aldaw.2
Maaramat pay ti turay ti priesthood ken maragpat dagiti bendisionna kadagiti pamilia dagiti Santo iti Ud-udina nga Aldaw. Babaen dagiti pamilia kayatko a sawen ti lalaki ken babai nga addaan iti priesthood a nagkallaysa ken ti annakda. Inramanko pay dagiti pagdudumaan dagiti napintas a relasion kas iti gapu ti patay wenno diborsio.
Ti prinsipio a maaramat laeng iti turay ti priesthood babaen ti panangiturong ti maysa nga agig-iggem kadagiti tulbek para iti dayta a pagrebbengan ket napateg iti Simbaan, ngem saan a mayaplikar iti pamilia. Kas pagarigan, idauluan ti ama nga addaan iti priesthood ti pamiliana babaen ti turay ti priesthood nga iggemna. Dinan kasapulan ti direksion wenno anamong ii maysa nga agig-iggen kadagiti tulbek ti priesthood tapno mangannong iti agduduma a pagrebbengan ti pamiliana. Iraman dagitoy ti mangbalakad iti miembro ti pamiliana, mangangay iti miting ti pamilia, mangted bendision ti priesthood iti asawa ken annakna, wenno mangted bendision a pangagas iti miembro ti pamilia wenno dadduma pay.3 Isuro dagiti awtoridad ti Simbaan dagiti miembro ti pamilia ngem dida iturong ti panangusar iti turay ti priesthood iti pamilia.
Mausar ti isu met la a prinsipio no awan ti ama ket ti ina ti lider ti pamilia. Idauluan ti ina ti pagtaenganna ken isu ti ramit iti panangyeg iti bileg ken bendision ti priesthood iti pamiliana babaen ti endowment ken panangilantip iti templo. Idinto nga awan turay ti ina a mangted kadagiti bendision ti priesthood a mabalin nga ited laeng ti tao nga addaan iti saad iti priesthood, makaannong isuna iti amin a dadduma pay a pagrebbengan ti panangidaulo ti pamilia. Iti panangaramid daytoy, aramatenna ti bileg ti priesthood para iti pagimbagan dagiti annak nga idauluanna iti saadna a mangidaulo iti pamilia.4
No padakkelen dagiti amma ti priesthoodda iti bukodda a pamilia, makatulong daytoy a mangpadur-as iti mision ti Simbaan kas iti ania man a banag a maaramidda. Nasken dagiti amma nga adddan iti Melchizedec Priesthood nga aramatenda ti turayda “babaen ti panangguyugoy, naunday a panagitured, kinaanus ken kinaemma, ken di aginkukuna nga ayat” (Doktrina ken Katulagan 121:41). Dayta nangato a pagrukodan iti panangaramat iti amin a turay ti priesthood ket kapatgan iti pamilia. Nasken dagiti addaan iti priesthood nga agtungpal iti bilin tapno maaddaanda iti bileg ti priesthood a mangbendision kadagiti miembro ti pamiliada. Nasken a mangpadur-asda iti naayat a relasion iti pamilia tapno tarigagayanto dagiti miembro ti pamilia ti agpabendision kadakuada. Nasken a yallukoy dagiti nagannak ti ad-adu pay a bendision ti priesthood iti pamilia.5
Kadagitoy a miting ti komperensia, no agkalikagumtayo iti apagbiit a pagkamangan manipud kadagiti pakaseknantayo iti makadadael a pandemic, nasuruantayo kadagiti naindaklan a prinsipio ti kinaagnanayon. Allukoyek ti tunggal maysa kadatayo nga “ipamaysa” ti matatayo nga umawat kadagitoy a kinapudno ti kinaagnanayon tapno “nalawagto” ti bagitayo (3 Nephi 13:22).
Iti kaskasabana kadagiti ummong a nairekord iti Biblia ken iti Libro ni Mormon, insuro ti Mangisalakan a mapno ti mortal a bagitayo iti lawag wenno mapno iti sipnget. Siempre, kayattayo ti mapno iti lawag, ken sinuruannatayo ti Mangisalakan no kasano a mabalintayo a pasamaken daytoy. Nasken a denggentayo dagiti mensahe maipapan kadagiti kinapudno ti kinaagnanayon. Inusarna ti matatayo a pagarigan, a pangalaantayo iti lawag para iti bagitayo. No “maipamaysa ti matatayo”—iti sabali a sao, no ipamaysatayo ti yaawat iti agnanayon a lawag ken pannakaawat—inlawlawagna, “mapno ti sibubukel a bagiyo iti lawag” (Mateo 6:22; 3 Nephi 13:22). No maipamaysa ti “matatayo iti dakes”—no sapulentayo ti dakes ken ipaunegtayo iti bagitayo—imballaagna, “nasipngetto ti sibubukel a bagiyo” (3 Nephi 13:22). Iti sabali a sao, agpannuray ti lawag wenno sipnget iti bagitayo iti panagkitatayo—wenno umawat—iti agnanayon a kinapudno a naisuro.
Surotentayo koma ti awis ti Mangisalakan a mangawat iti kinapudno ti kinaagnanayon. Ikarina a naayat ti Ama iti Langit nga isuro ti amin ti kinapudno a kalikagumanda (kitaen iti 3 Nephi 14:8). No tarigagayantayo daytoy ken ipamaysa ti matatayo nga umawat, ikari ti Mangisalakan a dagiti kipapudno ti kinaagnanayon “malukatanto” kadatayo (kitaen iti 3 Nephi 14:7–8).
Kasupadina, aggagar ni Satanas a mangtikaw iti panunottayo wenno yaw-awannatayo kadagiti napateg a banag kas kadagiti panangimaton iti priesthood ti Dios. Binallaagannatayo ti Mangisalakan iti kakasta a “sinsinan a propeta, nga umay kadakayo a nakakawes a kasla karnero, ngem iti uneg loboda a narawet” (3 Nephi 14:15). Inikkannatayo iti kastoy a pannubok a mangtulong kadatayo a pumili iti kinapudno iti agduduma a sursuro a mangtikaw kadatayo: “Mailasinyo ida kadagiti bungada,” insurona (3 Nephi 14:16). “Ti nasayaat a kayo saan a mabalin nga agbunga iti dakes, wenno ti rinuker a kayo [mabalin nga] agbunga iti nasayaat” (bersikulo 18). Ngarud, nasken a kitaentayo dagiti resulta—”dagiti bunga”—dagiti prinsipio a maisuro ken dagiti propeta a mangisuro kadakuada. Dayta ti kapintasan a sungbat iti adu a suppiat a mangngegtayo a maibusor iti Simbaan ken dagiti doktrina ken annuroten ken panangidaulona. Suroten ti pannubok nga inted ti Apo. Kitaen dagiti bunga—dagiti resulta.
No panunotentayo dagiti bunga ti ebanghelio ken ti naisubli a Simbaan ni Jesucristo, agrag-otayo no kasano ti Simbaan, iti biag dagiti miembrona, a dimmur-as manipud kadagiti lokal a kongregasion iti Intermountain West a nagindegan ti nasurok a16 milion a miembrona kadagiti nasion malaksid iti Estados Unidos. Iti dayta a panagdur-as, nariknami ti panagdakkel iti kapasidad ti Simbaan a mangtulong kadagiti miembrona. Tumulongkami a matungpal dagiti bilin, a maipatungpal dagiti pagrebbengan a mangikasaba iti naisubli nga ebanghelio, a mangummong iti Israel, ken mangbangon kadagiti templo iti intero a lubong.
Idauluannatayo ti maysa a propeta, ni President Russell M. Nelson, a ti panangidaulona nga inusar ti Apo a manggun-od iti panagdur-as a nariknatayo bayat ti amin a nasurok a dua a tawen ti panangidaulona. Ita maparaburantayo a dumngeg ken ni Presidente Nelson, a mangisuronto kadatayo no kasano a padur-asentayo daytoy naisubli a Simbaan ni Jesucristo kadagitoy mapannubok nga aldaw.
Paneknekak maipapan iti kinapudno dagitoy a banag ket makikaykaysaak kadakayo a mangikararagan iti propetatayo, a sumaruno a denggentayo, iti nagan ni Jesucristo, amen.