Umuna ngem Datayo
Iturturong ti Apo ti Pannakaisubli ti ebanghlio ken ti Simbaanna. Naan-anay nga ammona ti masakbayan. Awisennakayo nga agtrabaho.
Patpatgek a kakabsatko, agyamanak a makaduakayo iti daytoy a komperensia ti Ti Simbaan ni Jesucristo dagiti Santo iti Ud-udina nga Aldaw. Iti awisna a mangutob iti wagas a bendisionannatayo ken dagiti patpatgentayo ti Pannakaisubli ti Apo iti Simbaanna itoy a dispensasion, inkari ni Presidente Russell M. Nelson a di laeng nakallalagip ti padastayo ngem di pay malipatan.
Nakallalagip ti padasko, kas panagkunak a kastakayo met. Saanto man a malipatan daytoy ket depende iti tunggal maysa kadatayo. Napateg dayta kaniak gapu ta nangbaliw kaniak ti padas ti panagsagana itoy a komperensia iti wagas a kayatko nga agpaut. Ilawlawagko man.
Ti panagsaganak intulodnak iti rekord iti maysa a pasamak iti Pannakaisubli. Namin-adun a binasak daytoy, ngem kanayon a report daytoy ti napateg a miting a pakairamanan ni Joseph Smith, ti propeta ti Pannakaisubli. Ngem ita nakitak ti pakaammuan ti panangidaulo ti Apo kadatayo, dagiti disipulona, iti Simbaanna. Nakitak ti kaipapanan ti panangidaulo kadatayo ti Mangisalakan ti lubong, ti Namarsua—a makaammo ti amin, napalabas, agdama, ken masakbayan. Suruannatayo iti kada addang ken iwanwannatayo, di mangpilpilit.
Ti miting nga ilawlawagko ket napateg a kanito iti Pannakaisubli. Miting ti aldaw ti Sabbath a naangay idi Abril 3, 1836, iti Kirtland Temple iti Ohio, pito nga aldaw kalpasan a naidaton daytoy. Inladawan ni Joseph Smith daytoy naindaklan a kanito iti pakasaritaan ti lubong iti simple a wagas. Adu iti pakaammuanna ti nairekord iti benneg 110 ti Doktrina ken Katulagan:
“Iti malem, tinarabayko dagiti dadduma a Presidente a nagiwaras iti Pangrabii ti Apo iti Simbaan, a naawat manipud kadagiti Sangapulo-ket-dua, nga addaan iti gundaway a mangiturong iti sagrado a lamisaan iti daytoy nga aldaw. Kalpasan ti pannakaipaay daytoy a serbisio kadagiti kabsatko, nagtugawak iti pulpito, a nakababa dagiti belo, ket nagdumogak, a kaduak ni Oliver Cowdery, iti napasnek ken naulimek a kararag. Kalpasan ti kararagmi, naluktan ti sumaganad a parmata kadakami.”1
”Nawaknit ti belo manipud iti panunotmi, ket naluktan dagiti mata ti pannakaawatmi.
”Nakitami ti Apo nga agtaktakder iti abay ti paradipad ti pulpito, iti sangomi; ket nayaplag iti sakaananna ti aramid a puro a balitok, a natangken nga amarilio ti marisna.
”Kasla dumardarang nga apuy dagiti matana; puraw ti buokna a kas iti puro a niebe; naranraniag ti rupana ngem iti init; ket ti timekna kas iti anasaas ti dakkel a danum, a kas iti timek ni Jehova, a nagkuna:
”Siak ti umuna ken maudi; siak ti nagbiag, siak ti napapatay; siak ti mangibabaet kadakayo iti Ama.
”Adtoy, napakawankayon kadagiti basolyo; nadaluskayo iti imatangko; ngarud, yangadyo dagiti uloyo ket agrag-okayo.
”Agrag-o koma ti puspuso dagiti kabsatyo, ken agrag-o koma ti puspuso dagiti amin a taok, a nangbangon, iti amin a kabaelanda, iti daytoy a balay a nainagan kaniak.
”Ta adtoy, inawatko daytoy a balay, ket addanto ditoy ti naganko; ket agpakitaakto kadagiti taok a siaasi iti daytoy a balay.
”Wen, agparangakto kadagiti katulongak, ket kasaokto ida iti timekko, no agtungpal dagiti taok kadagiti bilinko, ken saanda a rugrugitan daytoy nasantuan a balay.
”Wen agrag-onto unay ti puspuso dagiti rinibu ken pinullo a ribu a gapu kadagiti bendision a maibukbokto, ken ti talugading a nakatalugadingan dagiti katulongak iti daytoy a balay.
”Ket agsaknapto kadagiti ganggannaet a daga ti kinalatak daytoy a balay; ket daytoy ti pangrugian ti bendision a maibukbokto kadagiti ulo dagiti taok. Pudno a kasta. Amen.
”Kalpasan ti panagrikep daytoy a parmata, naglukat manen ti langit iti imatangmi; ket nagparang ni Moises kadakami, ket intalekna kadakami dagiti tulbek ti panaguummong ti Israel manipud iti uppat a paset ti daga, ken ti pannakaiturong dagiti sangapulo a tribu manipud iti daga iti amianan.
”Kalpasan daytoy, nagparang ni Elias, ket intalekna ti dispensasion ti ebanghelio ni Abraham, a kinunana a babaen kadakami ken dagiti bukelmi nasken a mabendisionanto amin a kaputotan a sumarsaruno kadakami.
”Kalpasan ti panagrikep daytoy a parmata, sabali pay a naindaklan ken napnuan dayag a parmata ti nagburak kadakami; ta ni Propeta Elias, a naipan iti langit a di nakapadas a matay, nagtakder iti sangomi, ket kinunana:
”Adtoy, dimtengen ti naan-anay a panawen, a nagtaud a mismo iti ngiwat ni Malakias—a mangipaneknek a nasken a maipatulod ni [Propeta Elias], sakbay ti yaay ti naindaklan ken nakaam-amak nga aldaw ti Apo—
”A mangisubli iti puspuso dagiti amma kadagiti annak; ken dagiti annak kadagiti amma, no saan masaplit ti sibubukel a lubong iti lunod—
”Ngarud, naitalek kadagiti imayo dagiti tulbek daytoy a dispensasion; ket babaen daytoy maammuanyo koma nga asidegen ti naindaklan ken nakaam-amak nga aldaw ti Apo, nga addan kadagiti ridaw.”2
Ita, nabasak namin-adu dayta a pakasaritaan. Impatalged ti Espiritu Santo kaniak a pudno ti pakasaritaa. Ngem idi inadal ken nagsaganak para itoy a komperensia, nakitak a nalawlawag ti bileg ti Apo a mangiwanwan kadagiti disipulona iti aramidna.
Pito a tawen sakbay nga inkumit ni Moises ken ni Joseph dagiti tulbek ti panaguummong ti Israel iti Kirtland Temple, “naadal ni Joseph manipud iti panid ti paulo ti Libro ni Mormon a ti panggepna ‘ipakita iti natda ti balay ti Israel … tapno ammoda dagiti katulagan ti Apo, tapno saanda a mabaybay-an iti agnanayon.’ Idi 1831, imbaga ti Apo ken ni Joseph a mangrugi ti panaguummong ti Israel iti Kirtland, ‘ket manipud dita [Kirtland], asino man a pagayatak mapan iti amin a pagilian … ta maisalakanto ti Israel, ket idauluakto ida.’”3
Nupay kasapulan ti aramid ti missionary a mangummong iti Israel, pinaregta ti Apo dagiti liderna a mangisuro iti Sangapulo-ket-dua, a nagbalin a dagiti sumagmamano a nagkauna a missionarytayo, “Laglagipen, saankayo a mapan iti dadduma a nasion, agingga a diyo maawat ti endowmentyo.”4
Kasla napateg ti Kirtland Temple iti tunggal addang iti plano ti Apo gapu iti dua a rason: Umuna, naguray ni Moises agingga a nalpas ti templo tapno maisubli dagiti tulbek ti panangummong iti Israel. Ken maikadua, insuro ni Presidente Joseph Fielding Smith a “binilin ti Apo dagiti Santo a mangbangon iti templo [ti Kirtland Temple] a pangipalgakanna kadagiti tulbek ti turay ken pakaitedan ti endowment dagiti apostol ken pagsaganaanda a mangpukis iti bangkagna iti maudi a gundaway.”5 Nupay saan a naaramid ti temple endowment kas ammotayo ita iti Kirtland Temple, kas panangipatungpal iti padto, nangrugi tdagiti pangisagana nga ordinansa iti templo a mayam-ammo idiay kasta met ti panangibukbok kadagiti naespirituan a parangarang a mangisagana kadagiti naawagan iti mision nga addaan naikari nga endowment iti “bileg manipud ngato”6 a nangiturong iti dakkel a panaguummong babaen ti serbisio ti missionary.
Kalpasan a naikumit dagiti tulbek ti panaguummong ti Israel ken ni Joseph, pinaregta ti Apo ti Propeta a mangibaon kadagiti miembro ti Sangapulo-ket-dua iti mision. Kas inadalko, naawatak nga insagana ti Apo iti detalye ti wagas a makapan ti Sangapulo-ket-dua kadagiti mision iti sabali a pagilian a nakasaganan dagiti tao a mamati ken mangtulong kadakuada. Di nagbayag, rinibu ti mayeg iti naisubli a Simbaan ti Apo babaen kadakuada.
Segun kadagiti rekordmi, mapattapata nga adda 7,500 agingga ti 8,000 ti nabuniagan bayat ti dua a mision ti Sangapulo-ket-dua iti British Isles. Daytoy ti nangipan iti pundasion iti aramid ti missionary iti Europa. Iti gibus ti maika-19 a siglo, naguummong ti sumagmamano a 90,000 iti America, a kaaduanna kadagitoy ti naggapu iti British Isles ken Scandinavia.7 Pinaregta ti Apo ni Joseph ken dagiti napudno a missionary a nagtrabaho a manggun-od iti apit, iti dayta a panawen a kasla dida kabaelan. Ngem ti Apo, iti naan-anay a sirmata ken panangisaganana, inaramidna daytoy a posible.
Malagipyo ti simple ken dumani kasla daniw a pagsasao manipud iti maika 110 a benneg ti Doktrina ken Katulagan:
”Adtoy, dimtengen ti naan-anay a panawen, a nagtaud a mismo iti ngiwat ni Malakias—a mangipaneknek a nasken a maipatulod ni [Propeta Elias], sakbay ti yaay ti naindaklan ken nakaam-amak nga aldaw ti Apo—
”A mangisubli iti puspuso dagiti amma kadagiti annak, ken dagiti annak kadagiti amma, no saan masaplit ti sibubukel a lubong iti lunod—
“Ngarud, naitalek kadagiti imayo dagiti tulbek daytoy a dispensasion; ket babaen daytoy maammuanyo koma nga asidegen ti naindaklan ken nakaam-amak nga aldaw ti Apo, nga addan kadagiti ridaw.”8
Paneknekak a nakita ti Apo iti masakbayan ken no kasano nga idauluannatayo a mangtulong Kenkuana a mangileppas kadagiti panggepna kadagiti maudi nga aldaw.
Bayat ti panagserbik iti Presiding Bishopric adun a tawen ti naglabas, nabilinak a mangkita iti disenio ken ti development group a nangpartuat iti ninagananmi iti FamilySearch. Naannadak a mangisao nga “inmatonak” ti pannakapartuatna, imbes a kunaek ti “inturongko” daytoy. Pinanawan ti adu a nalalaing a tao dagiti trabahoda ket immayda nangbangon iti kayat ti Apo.
Nangituding ti Umuna a Panguluen iti panggep a tun-oyen a mangpabassit iti pannakaulit dagiti ordinansa. Dakkel a pakaseknanda ti saantayo a pannakaammo no nalpasen a naaramid dagiti ordinansa ti maysa a tao. Tawtawen—wenno kasla adu a tawtawen—dinamag kaniak ti Umuna a Panguluen, “Kaanonto a maaramidmo daytoy?”
Babaen ti kararag, kinapasnek, ken bukod a sakripisio dagiti tao nga addaan kabaelan, naileppas ti aramid. Dimteng daytoy iti tunggal addang. Immuna a naaramid ti FamilySearch a user-friendly para kadagiti saan a komportable kadagiti kompiuter. Immay ti adu pay a pannakabaliw, ket ammok nga agtultuloy pay, gapu ta no irugimi a risuten ti maysa a naparegta a problema, nakasagana para iti adu pay a paltiing para kadagiti panagdur-as a saan a madlaw. Uray ita, agbalbalinen ti FamilySearch a kasapulan ti Apo a kas paset ti Pannakaisublina—ken saan laeng a panangliklik iti pannakaulit dagiti ordinansa.
Palubosannatayo ti Apo a sumayaat tapno makatulong iti tattao a manggun-od iti rikna ti panangammo ken ayat kadagiti kapuonanda ken mangileppas kadagiti ordinansa iti templo para kadakuada. Ita, kas ammo ti Apo a mapasamak, agbalinen dagiti agtutubo a mannursuro iti computer kadagiti nagannakda ken miembro ti ward. Nakasarak ti amin iti rag-o itoy a serbisio.
Ti espiritu ni Elijah balbaliwanna ti puspuso dagiti ubbing ken nataengan, annak ken nagannak, appoko ken lelang wenno lelong. Siraragsak a yiskediulto manen dagiti templo dagiti gundaway iti panangbuniag ken dadduma pay a sagrado nga ordinansa. Dumakdakkel ti tarigagay nga agserbi kadagiti kapuonantayo ken ti begkes dagiti nagannak ken annak.
Nakita ti Apo daytoy nga umay ti amin. Nagplano para itoy, in-inut, kas inaramidna iti dadduma a panagbaliw iti Simbaanna. Pinatanor ken insaganana dagiti napudno a tao a mangpili nga agaramid kadagiti narigat a bambanag. Kanayon a naanus a tumulong kadatayo nga agsursuro iti “tunggal binatog, tunggal annuroten, bassit ditoy ken bassit idiay.”9 Natibker isuna iti panagoras ken iti panagsasaganad dagiti panggepna, ngem ipasiguradona a mangyeg a masansan kadagiti bendision a ditayo nakita idi damo.
Gibusak babaen ti panangipeksak iti panagyamanko iti Apo—Isu a nangparegta ken ni Presidente Nelson a mangawis kaniak nga agsakripisio nga agsagana para itoy a komperensia. Nangyeg iti bendision ti tunggal oras ken tunggal kararag bayat ti panagsaganak.
Awisenkayo amin a dumngeg iti daytoy mensahe wenno agbasa kadagitoy a balikas tapno mamati a ti Apo ti mangidadaulo iti Pannakaisubli ti ebangheliona ken Simbaanna. Umuna ngem datayo. Naan-anay nga ammona ti masakbayan. Awisennakayo nga agtrabaho. Kaduaennakayo iti daytoy. Nakapuesto ti plano para iti serbisioyo. Ket no agsakripisiokayo, mariknayonyo ti rag-o bayat ti panangtulongyo iti dadduma nga agsagana para iti yaayna.
Paneknekak kadakayo a a sibibiag ti Dios Ama. Ni Jesus ti Cristo. Daytoy ti Simbaanna. Am-ammo ken ay-ayatennakayo. Iwanwannakayo. Insaganana ti Dios ti wagas para kadakayo. Iti sagrado a nagan ni Jesucristo, amen.