Ti Bileg ti Libro ni Mormon iti Kumbersion

Ni Elder Benjamin M. Z. Tai

Ti Pitupulo

Ipaay ti Libro ni Mormon ti naespirituan a nutrision, mangannurot iti plano a tignay, ken mangikonekta kadatayo iti Nasantuan nga Espiritu.

Kalpasan ti panangamiris iti report manipud iti kallabes a pisikal nga eksamen, naadalko a nasken nga agaramidak iti sumagmamano nga estilo ti panagbaliw. Tapno matulongannak, impaannurot ti doktorko ti plano iti nutrision ken ehersisio, a no piliek a suroten, agbalinak a nasalsalun-at a tao.

No naespirituan nga agpaeksamen ti tunggal maysa kadatayo, ania koma ti masursurotayo maipapan iti bagitayo? Ania koma a panagbalbaliw ti ireseta ti naespirituan a mangngagastayo? Tapno agbalintayo iti nasken, kasapulan nga ammotayo no ania ti aramidentayo ken aramidetayo no ania ti ammotayo.

Ni Jesucrsito ti Apo a Mangngagas.¹ Babaen iti Pannubbotna, bedbedanna dagiti sugattayo, awatenna iti Bagina dagiti sakittayo, ken paimbagenna dagiti nasneban a pusotayo.² Babaen ti paraburna, agbalin a napigsa dagiti pagkapsutantayo.³ Awisennatayo a sumurot Kenkuana⁴ babaen ti panagadal iti maipapan Kenkuana, panagdengngeg kadagiti balikasna, ken pannaagna iti kinapakumbaba ti Espirituna.⁵ Inkarina a tulongannatayo⁶ iti daytoy tungpal biag a proseso ti kumbersion, a balbaliwannatayo ken mangyeg iti agnanayon a rag-o.⁷

Inikkannatayo ti Mangisalakan ti Libro ni Mormon kas nabileg nga ramit a mangtulong iti kumbersion. Ipaay ti Libro ni Mormon ti naespirituan a nutrision, mangannurot iti plano a tignay, ken mangikonekta kadatayo iti Nasantuan nga Espiritu. Naisurat para kadatayo,⁸ naglaon daytoy iti balikas ti Dios⁹ iti nalawag ken ibagana ti kinatao, panggep, ken pagtungpalantayo.¹⁰ Kadua ti Biblia, paneknekan ti Libro ni Mormon maipapan ken ni Jesucristo¹¹ ket isurona no kasano a maammuantayo ti kinapudno ken agbalin a kas Kenkuana.

Brother Saw Polo

Agtawen iti 58 ni Brother Saw Polo idi nayam-ammo kenkuana ti naisubli nga ebanghelio ni Jesucristo. Idi naam-ammok isuna, agserserbi a branch president iti adun a tawen, ngem naammuak a dina pay pulos nabasa ti Libro ni Mormon gapu ta di pay available daytoy iti pagsasaona a Burmese. Idi dinamagko no kasano a naammuanna a pudno ti libro a saanna pay a nabasa daytoy, insungbatna nga inaldaw nga inadalna ti libro ti ladawan iti Dagiti Estoria ti Libro ni Mormon babaen iti panangbuyana kadagiti ladawan, nga inusarna ti diksionario nga agipatarus kadagiti balikas iti Ingles, ken panangisuratna iti no ania ti nasursurona. Inlawlawagna, “Tunggal panagadalko, ikararagak maipapan iti nasursurok, ket mariknak ti kapia ken rag-o, malawlawagan ti panunotko, ken mapalukneng ti pusok. Nariknak ti Espiritu Santo a mangipampaneknek kaniak a pudno daytoy. Ammok a ti Libro ni Mormon ti balikas ti Dios.”

Kas ken ni Brother Saw Polo, mabalin nga adalen ti tunggal maysa kadatayo ti Libro ni Mormon a mayannurot kadagiti kasasaadtayo. No tarigagayantayo a patien ken utoben dagiti sursurona iti puspusotayo, mabalin nga agdamagtayo iti Dios a sipapammati no pudno dagiti sursuro.¹² No napudnotayo iti tarigagaytayo a maammuan ken addaan iti napudno a panggep nga agtignay, sungbatannatayonto iti puspusotayo babaen ti Espiritu Santo. Ket babaen ti pannakabalin ti Espiritu Santo maammuantayonto ti kinapudno ti amin a banag.¹³ No magun-odtayo ti nadiosan a pammaneknek iti Libro ni Mormon, maammuantayonto met babaen iti kasta met laeng a pannakabalin a ni Jesucristo ti Mangisalakan ti lubong, a ni Joseph Smith ti propetana, a ti Ti Simbaan ni Jesucristo dagiti Santo iti Ud-udina nga Aldaw ti naisubli a Simbaanna.¹⁴

Kas maysa a barito a mangrugrugi ti serbisiok kas misionario, nagluganak iti eroplano nga agturong iti Australia. Mariknak unay a sisiak, madanagan, ken diak kabaelan ngem nagkumitka nga agserbi, kasapulak unay ti pammatalged a pudno ti pammatik. Sipapasnek a nagkararag ken nagbasaak kadagiti nasantuan a kasuratak, ngem bayat ti panagtayab, kumarkaro ti duaduak ket kimmapuyen ti pisikal a kasasaadko. Kalpasan ti panagkarigatak iti sumagmamano nga oras, adda nagna a flight attendant iti pasilio ket nagsardeng iti batogko. Innalana ti Libro ni Mormon a basbasaek manipud iti imak. Kinitana ti akkub ket kinunana, “Nagpintas dayta a libro!” sana insubli ti libro kaniak ket intuloyna a nagna. Diak pulos nakitan isuna manen.

Idinto a pampanunotek dagiti saona, nalawag a nangngeg ken nariknak iti pusok, “Addaak ditoy, ket ammok no sadino ti ayanmo. Aramidem laeng ti amin a kabaelam, ngem taripatuekto ti dadduma.” Iti dayta nga eroplano iti ngatuen ti Pacific Ocean, nakaawatak ti personal a saksi babaen iti panagadalko ti Libro ni Mormon ken dagiti parikna ti Nasantuan nga Espiritu nga am-ammonak ti Mangisalakan ken pudno ti ebanghelio.

Insuro ni Elder David A. Bednar: “Ti pannakaammo a pudno ti ebanghelio ti kaipapanan ti maysa pammaneknek. Ti agtultuloy a panagbalin a napudno iti ebanghelio ti kaipapanan ti kumbersion.”¹⁵ Kasapulan ti kumbersiontayo nga agbalin a “managtungpal iti sao, ket saan laeng a managdengngeg.”¹⁶ Ti plano a tignay ti Apo para kadatayo—ti doktrina ni Cristo—ket nalawag a maisuro iti Libro ni Mormon.¹⁷ Iramanna daytoy:

• Umuna, panangaramat iti pammati ken ni Jesucristo babaen iti panagtalek Kenkuana, panagtungpal kadagiti bilinna, ken panangammo a tulongannatayonto.¹⁸

• Maikadua, panagbabawi iti inaldaw kadagiti bidduttayo ken panangpadas iti rag-o ken kapia no pakawanennatayo.¹⁹ Kasapulan kadatayo ti panagbabawi a mamakawan iti dadduma²⁰ ket tulongannatayo nga agtultuloy. Inkari ti Mangisalakan a pakawanennatayo a masansan no agbabawitayo.²¹

• Maikatlo, panangaramid ken panangtungpal kadagiti katulagan iti Dios babaen dagiti ordinansa kas iti panagbuniag. Daytoyto ti mangpatalinaed kadatayo iti dana ti katulagan nga agturong Kenkuana.²²

• Maikapat, panangawat iti sagut ti Espiritu Santo. Ipalubos daytoy a sagut ti kanayon a panangkadkadua ti maysa a mangpasanto, mangliliwa, ken mangtarabay kadatayo.²³

• Maikalima, panagibtur agingga iti panungpalan babaen iti panagtultuloy a sitatalingenngen bayat ti panagpennek iti inaldaw iti balikas ni Cristo.²² Babaen iti panagpennek manipud iti Libro ni Mormon ken panangsurot kadagiti sursurona, marimbawantayo dagiti sulisog ken umawat iti tarabay ken saluad iti unos ti biagtayo.²⁵

Babaen ti agtultuloy a panangaramat iti doktrina ni Cristo iti biagtayo, maparmektayto ti inertia a manglapped iti panagbaliw ken buteng a mangpaay iti tignay. Maawattayonto ti personal a paltiing, gapu ta ti Espiritu Santo “ ipakitananto kenka ti amin a banag a nasken nga aramidem,”²⁶ ken “dagiti balikas ni Cristo ibagananto kenka ti amin a banag a nasken nga aramidem.”²⁷

Iti uneg ti 20 a tawen, nairuam ni Brother Huang Juncong iti arak, sigarilio, ken panagsugal. Idi mayam-ammo ken ni Jesucristo ken iti naisubli nga ebangheliona, tinarigagayan ni Brother Huang ti agbalbaliw para iti baro a pamiliana. Kadakkelan a karitna ti panagsigarilio. Napeklan a mannigarilio, namin-adun a pinadasna nga isardeng ngem saan a nagballigi. Maysa nga aldaw, napanunotna dagitoy a balikas iti Libro ni Mormon: “naimpusuan, addaan iti pudno a panggep.”²⁸ Nupay dinagballigi iti panggepnanariknana a makapagagbaliw iti tulong ti Nailangitan nga Ama ken Jesucristo.

Pinagkaysa dagiti full-time missionary ti pammatida ken ti pammatina ket nangted iti mausar a plano nga aramiden, agraman ti adu a kararag ken panagadal ti balikas ti Dios. Addaan iti sinseridad ken napudno a panggep, nagtignay ni Brother Huang iti napudno a determinasion ket naammuanna a no ad-adda nga agpokus kadagiti baro nga ugali a kayatna a padur-asen, kas iti panagadal iti Libro ni Mormon, basbassit ti pokusna kadagiti ugali a kayatna nga ikkaten.

Iti pananglagipna ti padasna iti naglabas a15 a tawen, kinunana, “Diak malagip no kaano nga insardengko ti agsigarilio, ngem inaldaw nga inkarigatak nga aramiden dagiti banag nga ammok a nasken nga aramidek a mangawis iti Espiritu ti Apo iti biagko ken intuloyko nga aramiden dagitoy, diakon nagsigarilio manipud idin.” Iti panangaramat kadagiti sursuro ti Libro ni Mormon, nagbaliw ti biag ni Brother Huang, ket nagbalin a nasaysayaat nga asawa ken ama.

Ni Huang Juncong ken ti pamiliana

Inkari ni Presidente Russell M. Nelson: “No nainkararagan nga agadalkayo iti Libro ni Mormon iti inaldaw, makaaramidkayto iti nasaysayaat a desision—iti inaldaw. Ikarik a no utobenyo no ania ti adalenyo, maluktanto dagiti tawa ti langit, ket maawatyonto dagiti sungbat iti bukodyo a saludsod ken direksion iti biagyo. Ikarik a bayat iti inaldaw a panagbasayo iti Libro ni Mormon, masalaknibankayo a maibusor kadagiti dakes iti aldaw, uray pay ti di malapdan a sarot ti pornograpia ken dadduma pay a pakailuodan a pannakaadikto.”²⁹

Patpatgek a gagayyem, ti Libro ni Mormon ti balikas ti Dios, ket umas-asidegtayo Kenkuana no adalentayo daytoy.³⁰ Bayat ti panangpadastayo kadagiti balikasna, magun-odtayo ti saksi iti kinapudnona.³¹ Bayat ti panagtultulotayo nga agbiag a mayannurot kadagiti sursurona, “maawanton ti tarigagaytayo nga agaramid ti dakes.”³² Agbaliwto ti puso, langa, ken kababalintayo tapno agbalin a kas iti Mangisalakan.³³ Iburayko ti pudno a saksik a ni Jesus ti Cristo, ti Mangisalakan, Mannubbot, ken Gayyemtayo. Iti nagan ni Jesucristo, amen.

Dagiti Nagadawan

1. Kitaen iti Marcos 2:17.

2. Kitaen ti Salmo 147:3; Isaias 53:4; Mateo 8:17.

3. Kitaen iti 2 Nephi 25:23; Jacob 4:7; Ether 12:27.

4. Kitaen iti Mateo 19:21; Marcos 10:21; Lucas 18:22; 2 Nephi 31:10.

5. Kitaen iti Doktrina ken Katulagan 19:23.

6. Kitaen ti Isaias 41:10.

7. Kitaen ti Mosiah 2:41; 3:19; 5:2.

8. Kitaen iti 2 Nephi 25:21–22; Mormon 7:1; Ether 8:35.

9. Kitaen iti 2 Nephi 25:7; 31:2–3.

10. Kitaen iti 2 Nephi 2:25; Alma 40.

11. Kitaen iti Isaias 29:4, 11–18; Ezequiel 37:16–21; 2 Taga Corinto 13:1; 1 Nephi 13:38–42; 2 Nephi 3:12; 25:26.

12. Kitaen iti Alma 32:26–43.

13. Kitaen iti Moroni 10:3–5.

14. Kitaen ti pakauna iti Libro ni Mormon.

15. David A. Bednar, “Converted unto the Lord,” Liahona, Nob. 2012, 109.

16. Santiago 1:22.

17. Kitaen iti 2 Nephi 31; 3 Nephi 11:31–40; 27:13–22

18. Kitaen iti 1 Nephi 3:7; Moroni 7:33.

19. Kitaen iti Mosiah 4:3.

20. Kitaen iti Mateo 18:21–35; Marcos 11:25–26; Lucas 6:37; 3 Nephi 13:14–15; Doktrina ken Katulagan 64:10; 82:1.

21. Kitaen iti Mosiah 26:30; Moroni 6:8.

22. Kitaen iti 2 Nephi 31:17–18.

23. Kitaen iti 1 Nephi 10:19; 2 Nephi 33:1; 3 Nephi 11:32; 28:11; Moroni 6:4.

24. Kitaen iti 2 Nephi 31:20.

25. Kitaen iti 1 Nephi 15:24.

26. 2 Nephi 32:5; nainayon ti panangyunay-unay.

27. 2 Nephi 32:3; nainayon ti panangyunay-unay.

28. Moroni 10:4.

29. Russell M. Nelson, “The Book of Mormon: What Would Your Life Be Like without It?” Liahona, Nob. 2017, 62–63.

30. Iti panagsaona maipapan iti Libro ni Mormon, kinuna ni Propeta Joseph Smith nga “as-asidegto ti tao iti Dios babaen ti panangsurotna kadagiti linaonna, ngem iti sabali a libro” (pakauna iti Libro ni Mormon).

31. Kitaen iti Jacob 6:7; Alma 32:26-43.

32. Alma 19:33.

33. Kitaen ti 2 Taga Corinto 5:17; Mosiah 3:19; 5:2; Alma 5:14, 19.