Ibilang ti Kinaimbag ken Kinaindaklan ti Dios
Awisenkayo a manglagip iti inaldaw iti kinaindaklan ti Ama iti Langit ken ni Jesucristo ken ti inaramidda para kadakayo.
Iti unos ti panawen,uray ken nangruna kadagiti narigat a panawen, inallukoynatayo dagiti propeta a lagipen iti kinaindaklan ti Dios ken ibilang ti inramidna kadatayo kas indibidual, kas pamilia, ken kas tattao.1 Masarakan daytoy a direksion iti intero a nasantuan a kasuratan ngem makita iti Libro ni Mormon. Ilawlawag ti panid ti paulo a maysa a panggep ti Libro ni Mormon “nga ipakita iti natda ti balay ti Israel dagiti naindaklan a banag nga inaramid ti Apo para iti ammada.”2 Igibus ti Libro ni Mormon iti dawat ni Moroni: “Adtoy, igunamgunamko nga inton basaenyo dagitoy a banag … tapno malagipyo no kasano ti kinamanangngaasi ti Apo kadagiti annak ti tao, … ket usigenyo iti puspusoyo.”3
Ti agtultuloy a dawat dagiti propeta a mangutob iti kinaimbag ti Dios ket makaawis.4 Kayat ti Ama iti Langit a lagipentayo ti kinaimbagda iti Patpatgenna nga Anak, saan nga iti bukodda a pannakapnek ngem para iti impluensia iti pannakalagip kadatayo. Babaen iti panangibilang iti kinasayaatda, dimmakkel ti pannirigan ken panagawattayo. Babaen panangutob iti asida, agbalintayo a napakpakumbaba, managkararag, ken natibtibkertayo.
Maysa a napateg a padas iti sigud a pasiente ti mangipakita no kasano a mabaliwannatayo ti kinaparabur ken kinaasi. Idi 1987, naam-ammok ni Thomas Nielson, naimbag a tao nga agkasapulan iti transplant iti puso. Agtawen iti 63 ken agnaed iti Logan, Utah, iti United States. Kalpasan ti military service iti World War II, inkallaysana ni Donna Wilkes iti Logan Utah Temple. Nagbalin a naregta ken naballigian a brick mason. Iti maudi a tawtawen, kaay-ayona a katrabaho ti inauna nga apokona, ni Jonathan, no bakasion iti eskuela. Napaadda ti espesial a begkes ti dua gapu ta nakita unay ni Tom ti bagina ken ni Jonathan.
Makaupay ken Tom ti panagurayna iti donor ti puso. Saan isuna a naanus a tao. Kanayon a kabaelanna ti mangituding ken manggun-od kadagiti panggep a tun-oyenbabaen ti napasnek a trabaho ken determinasion. Iti panagkarigatanna iti sakit ti puso, no dadduma damagen ni Tom kaniak no ania ti ar-aramidek a mangpadaras iti maysa a banag. Siaangaw, imbagana dagiti wagas a pakagun-odak iti naidonar a puso a mausarna iti mabiit.
Maysa a naragsak ngem naames nga aldaw, adda magun-od a donor iti puso para ken ni Tom. Agpada ti kadakkel ken tipo ti dara, ken agtutubo nga agtawen iti disisais ti donor. Kukua ni Jonathan ti maidonar a puso, patpatgen nga apoko ni Tom. Iti nasapa dayta nga aldaw, napakaruan a naaksidente ni Jonathan idi dinungpar ti lumabas a tren ti kotse a naglugananna.
Idi bisitaek da Tom ken Donna iti ospital, katsta unay ti ladingitda. Narigat a panunoten no ania ti pagpaspasaranda, ammok a manayonan ti biag ni Tom babaen ti panangusar iti puso ti apokoda. Idi damo, nagkedkedda a mangibilang iti naidiaya a puso manipud kadagiti agladladingit a nagannak ni Jonathan, ti manugangda a babai ken lalaki. Ammo da Tom ken Donna, a natayen ni Jonathan, ket naawatanda a ti inkararaganda a maidonar a puso para ken Tom ket saan a gapu ti pannakaaksidente ni Jonathan. Saan, ti puso ni Jonathan ti sagut a makaparabur ken ni Tom iti oras a panagkasapulanna. Nabigbigda a mabalin nga adda maysa a bunga daytoy a trahedia ket inkeddengda nga ituloy.
Nagballigi ti transplant. Kalpasanna, naidumduman a tao ni Tom. Ad-adda pay a simmayaat ti salun-atna a nagyamananna. Imbagana kaniak a binigat a pinanunotna ni Jonathan, ti manugangna a lalaki ken babai, ti sagut a naawatna, ti panagkasapulan iti dayta a sagut. Nupay makita pay laeng ti gagangay a ragsak ken kinaturedna, nadlawko a napaspasnek, masekseknan, ken naas-asi ni Tom.
Nagbiag ni Tom iti nayon pay a 13 a tawen kalpasan ti transplant, tawtawen a dina koma nadanonan. Nadakamat iti obituariona a pinalugodan dagitoy a tawen isuna a maparaburan ken maayatna ti pamiliana ken dagiti dadduma. Isu ti agmaymaysa a benefactor ken pagwadan ti optimismo ken determinasion.
Kas ken ni Tom, immawattayo iti sagsagut a ditayo maited iti bagbagitayo, sagsagut manipud Amatayo iti Langit ken ti Patpatgenna nga Anak, agraman ti pannakasubbot babaen ti pangsubbot a sakripisio ni Jesucristo.5 Immawattayo iti biag ditoy lubong; umawattayto iti pisikal a biag kalpasan ditoy, ken agnanayon a pannakaisalakan ken pannakaitan-ok —no pilientayo—gapu iti Ama iti Langit ken ni Jesucristo.
Tunggal usarentayo, mairanud, wenno panunotentayo dagitoy a sagut, nasken nga ibilangtayo ti sakripisio, parabur, ken kaasi dagiti mangmangted. Ti panagraem kadagiti mangmangted ket ad-adda pay a mamagyaman kadatayo. Ti panangutob iti sagsagutda ket makapagbalbaliw koma kadatayo.
Adda maysa a kasta a nakaskasdaaw a panagbalbaliw ken ni Alma nga Ub-ubing. Idi ni Alma ket “agal-alsa a maibusor iti Dios,”6 nagparang ti anghel. Iti “timek a kasla gurruod,”7 dinusa ti anghel ni Alma gapu iti panangidadanesna iti Simbaan ken “panangtakawna iti puspuso dagiti tao.”8 Innayon ti anghel daytoy a pammallaag: “Mapanka, ket laglagipem ti pannakabalud dagiti ammam iti daga … ken laglagipem dagiti napintas a banag nga inaramidna kadakuada.”9 Iti amin a mabalin a pammalaag, dayta ti inyunay-unay ti anghel.
Nagbabawi ken nanglagip ni Alma. Idi agangay imbinglayna ti pammallaag ti anghel iti anakna a ni Helaman. Imbalakad ni Alma, “Kayatko nga aramidem ti kas iti inaramidko, a manglagip iti pannakabalud dagiti ammatayo; ta naadipenda, ket awan ti nangisalakan kadakuada malaksid iti Dios ni Abraham, … Isaac, ken … ni Jacob; ket talaga nga insalakanna ida iti rigrigatda.”10 Kinuna ni Alma, “Nagtalekak kenkuana.”11 Naawatan ni Alma a babaen ti pananglagipna iti pannakaisalakan manipud iti pannakaadipen ken suporta bayat dagiti “pannubok ken riribuk iti amin a kita,” maam-ammotayo ti Dios ken ti kinapudno dagiti karina.12
Manmano kadatayo ti addaan iti makasagid rikna a padas kas iti padas ni Alma, ngem mabalin a kapada ti panagbalbaliwtayo. Inkari ti Apo idi ugma:
“Ikkankayto met iti baro a puso, ken baro nga espiritu isaadkonto iti unegyo: ket ikkatekto ti bimmato a puso iti unegyo … , ket ikkankayto iti puso a lasag.
“Ket isaadkonto ti Espirituk iti unegyo. …
“… Ket dakayto dagiti tattaok, ket Siakto ti Diosyo.”13
Imbaga ti nagungar a Mangisalakan kadagiti Nephite no kasano ti rugi daytoy a panagbalbaliw. Inlasinna ti napateg a paset iti plano ti Ama iti Langit idi kinunana:
“Ket imbaonnak ti Amak tapno mailansa iti krus; ket kalpasan ti pannakailansak iti krus, tapno mayasideg koma amin a tao kaniak. …
“Ket nailansaak gapu iti daytoy; ngarud, babaen ti pannakabalin ti Ama yasidegko amin a tao kaniak.”14
Ania ti kasapulan tapno mayasidegka iti Mangisalakan? Ibilang ti panagtulnog ni Jesucristo iti pagayatan ti Amana, ti balligina iti patay, ti yaawatna iti Bagina iti basbasol ken biddutmo, ti yaawatna iti bileg ti Ama tapno maaramid ti panangibabaet para kenka, ken ti kangrunaan a panangsubbotna kenka.15 Umdas kadin dagitoy tapno mayasidegka Kenkuana? Para kaniak dagitoy. Ni Jesucristo “silulukat ti imana, mangnamnama ken naayat a mangpaimbag, mamakawan, mangdalus, mangpapigsa, mangpatarnaw, ken mangpasanto [kadatayo].”16
Ikkanatayo koma dagitoy a kinapudno iti baro a puso ken paregtaennatayo a pumili a mangsurot iti Ama iti Langit ken Jesucristo. Ngem dagiti baro a puso a “nalabit nga agalla-alla, … panawanna ti Dios nga ay-ayaten[tayo].”17 Tapno masaranget daytoy nga ayo, utobentayo koma iti inaldaw dagiti sagut a naawattayo ken ti nakairamananda. Imbalakad ni Ari Benjamin, “Kayatko a lagipenyo, ken kanayon a laglagipenyo, ti kinaindaklan ti Dios … ken ti kinaimbagna ken ti naunday a panagsagabana a maipaay kadakayo.”18 No aramidentayo, maikaritayo kadagiti nakaskasdaaw a nailangitan a bendision.
Ti panangutob iti kinaimbag ken asi ti Dios ket tulongannatayo nga agbalin a naespirituan nga umaw-awat. Ti ad-adda a naespirituan a manangrikna ket palugodannatayo a mangammo iti kinapudno ti amin a banag babaen ti bileg ti Espiritu Santo.19 Iraman daytoy ti pammaneknek maipapan iti kinapudno ti Libro ni Mormon; nga ammo a ni Jesus ti Cristo, ti personal a Mangisalakan ken Mannubbottayo; ken panangawat a naisublin ti ebangheliona kadagitoy maudi nga aldaw.20
No lagipentayo ti kinaindaklan ti Amatayo iti Langit ken ni Jesucristo ken no ania ti inaramiddan para kadatayo, ditayonto tagilag-anen Ida, kas iti saan a panangtagilag-an ni Tom iti puso ni Jonathan. Iti naragsak ken naraem a wagas, inaldaw a nalagip ni Tom ti trahedia a nangpapaut iti biagna. Iti rag-o ti panangammo a maisalakan ken maitan-oktayo, nasken a lagipentayo a dimteng ti pannakaisalakan ken pannakaitan-ok a dakkel ti pategna.21 Siraraem a makapagrag-otayo no maamiristayo a no awan ni Jesucristo, agpeggadtayo, ngem gapu Kenkuana, maawattayo ti kaindaklanan a sagut a maited ti Ama iti Langit.22 Pudno, daytoy a paqnagraem ket palugodannatayo nga agragsak iti kari “ti agnanayon a biag ditoy a lubong” ket iti agangay umawat iti “agnanayon a biag … uray imortal a gloria” iti umay a lubong.23
No ibilangtayo ti kinaimbag ti Amatayo iti Langit ken ni Jesucristo, dumakkel ti talektayo Kadakuada. Agbaliw dagiti kararagtayo gapu ta ammotayo nga Amatayo ti Dios ken annaknatayo. Ditayo kalikaguman a balbaliwan ti pagayatanna ngem itunostayo ti pagayatantayo Kenkuana ken gun-odentayo para iti bagitayo dagiti bendision a kayatna nga ited, no la ketdi kiddawentayo ida.24 Tarigagayantayo ti agbalin a napakpakumbaba, natartarnaw, natibtibker, ad-adda a kas ken Cristo.25 Dagitoy a panagbalbaliw ti mangpaikari kadatayo iti nayon a bendision ti langit.
Iti panangbigbig nga aggapu ken ni Jesucristo ti amin a nasayaat a banag, maipeksatayonto ti pammatitayo a nasamsamay iti dadduma.26 Maaddaantayonto iti tured no maipasangotayo kadagiti kasla imposible nga aramid ken kasasaad.27 Papigsaentayonto ti panggeptayo nga agtungpal kadagiti katulagan nga inaramidtayo a sumurot iti Mangisalakan.28 Mapnotayonto iti ayat ti Dios, kayattayo ti tumulong kadagiti agkasapulan a saantayo a managhusga, ayatent ken padakkelentayo dagiti annaktayo iti kinalinteg, pagtalinaedentayo ti pannakapakawan dagiti basoltayo, ken kanayontayo nga agrag-o.29 Dagitoy dagiti napintas a bunga ti pananglagip iti kinaimbag ken asi ti Dios.
Iti kasupadina, imballaag ti Mangisalakan, “Awan ti pagbasolan ti tao iti Dios, wenno awan ti pakaaronan ti pungtotna, malaksid kadagiti saan a mangipudno iti imana ti amin a banag.”30 Panagkunak saan a mainsulto ti Dios no manglipattayo Kenkuana. Ketdi, panagkunak nalaus ti pannakaupayna. Ammona a ditayo naikkan ti bagitayo iti gundaway nga umasideg Kenkuana babaen ti pananglagip Kenkuana ken ti kinaimbagna. Ngarud agliwaytayo Kenkuana iti ad-adda a yaasidegna kadatayo ken dagiti naipangruna a bendision nga inkarina.31
Awisenkayo a manglagip ti inaldaw iti kinaindaklan ti Ama iti Langit ken ni Jesucristo ken ti inaramidda para kadakayo. Natibtibker a maibegkes koma ti panangibilangyo iti kinaimbagda iti nagalla-alla a pusoyo Kadakuada.32 Utobenyo ti asida, ket mabendisionankayonto iti nayon a naespirituan a kinamanagrikna ket agbalin nga ad-adda a kas ken Cristo. Ti panangutob iti empatiada ket tulongannakayonto nga “agpaut dagiti napudno iti udina,” agingga a “maawatkayto idiay langit” a “makipagtaeng iti Dios iti kasasaad nga awan ti gibusna a kinaragsak.”33
Kinuna ti Amatayo iti Langit, a mangitudtudo iti Patpatgenna nga Anak, “Dumngegka Kenkuana!”34 No agtignaykayo segun kadagita a balikas ket dumngeg Kenkuana, laglagipenyo, sirarag-o ken siraraem, a pagaayat ti Apo nga isubli ti diyo maisubli; siaayat nga agasanna dagiti sugat a diyo maagasan; siaayat a tarimnenna dagiti saan a matarimaan a nadadael;35 ikarona ti ania man a saan a nainkalintegan a pannakadangranyo;36 ken pagaayatna a pagimbagen uray dagiti nagsakit a puspuso.37
Iti panangutobko kadagiti sagut a naggapu iti Amatayo iti Langit ken ni Jesucristo, naammuak ti awan inggana nga ayatda ken ti saan a matukod nga asida para iti amin nga annak ti Nailangitan nga Ama.38 Binalbaliwannak daytoy a pannakaammo, ket balbaliwannakayonto met. Iti nagan ni Jesucristo, amen.