Makaaramidtayo iti Nasaysayaat ken Agbalin a Nasaysayaat
Ipamaysayo ti inaldaw a panagbabawi a napateg iti biagyo tapno mausaryo ti priesthood nga addaan dakdakkel a bileg ngem iti sigud.
Patpatgek a kakabsatko, makaparegta a kitaen daytoy dakkel a congregasion ti batalion dagiti priesthood bearer ti Apo. Nabileg a puersakayo iti pagimbagan! Patpatgendakayo. Ikararagandakayo. Ken pagyamanandakayo unay.
Itay nabiit napanunotko ti pangiturong ti Apo a naited babaen ken ni Propeta Joseph Smith: “Awan ibagam iti daytoy a kaputotan no di panagbabawi.”1 Masansan a maulit daytoy a palawag iti intero a nasantuan a kasuratan2 Mangparegta daytoy iti nalawag a saludsod: “Kasapulan kadi ti tunggal maysa ti agbabawi?” Wen ti sungbat.
Ibilang ti adu a tao a dusa ti panagbabawi—maysa a banag a liklikan malaksid kadagiti kadagsenan a kasasaad. Daytoy rikna a pannakadusa ket gapuanan ni Satanas. Lapdannatayo a kumita ken Jesucristo,3 a nakatanggaya ti takiagna,4 mangnamnama ken nakasagana a mangagas, mamakawan, mangdalus, mangpapigsa, mangpatarnaw, ken mangpasanto kadatayo.
Ti sao para iti panagbabawi iti Griego a Baro a Tulag ket metanoeo. Ti prefix a meta- kayatna a sawen ti “agbalbaliw.” Ti suffix a -noeo ket mainaig kadagiti sao a Griego a kayatna a sawen ti “panunot,” “ammo,” “espiritu,” ken “anges.”5
Ngarud, no kiddawennatayo ni Jesus nga “agbabawi,”6 awisennnatayo a mangbalbaliw iti panunot, ammo, ken espiritutayo—uray ti panagangestayo. Dawatenna nga agbalbaliwtayo iti panagayat, panagpanunot, panagserbi, panangbubos iti orastayo, panangtrato iti assawatayo, panangisuro iti annaktayo, ken panangaywan iti bagitayo.
Awan ti nawaywaya, nataktakneng, napatpateg iti panangdur-astayo ngem iti masansan, inaldaw a panangipamaysa iti panagbabawitayo. Ti panagbabawi saan a pasken; proseso daytoy. Daytoy ti tulbek iti ragsak ken talna ti panunot. No buyogan iti pammati, ti panagbabawi ti manglukat kadatayo iti bileg ti Pannubbot ni Jesucristo.7
Napasnekkayo man nga agtultuloy iti dana ti katulagan, naikaglis wenno nagsardengkayo, wenno saanyon a makita ti dana manipud iti yanyo ita, ipakaasik kadakayo nga agbabawikayo. Padasenyo ti pangpapigsa a bileg ti inaldaw a panagbabawi—ti panangaramid ken panagbalin a nasaysayaat bassit iti inaldaw.
No pilientayo ti agbabawi, pilientayo ti agbalbaliw! Palugodantayo ti Mangisalakan a mangbalbaliw kadatayo nga agbalin a kasingpetan. Pilientayo ti dumur-as a naespirituan ken agrag-o—rag-o ti panangsubbotna.8 No pilientayo ti agbabawi, pilientayo ti agbalin nga ad-adda kas ken ni Jesucristo!9
Kakabsat, naskentayo nga agaramid iti nasaysayaat ken agbalin a nasaysayaat gapu ta makirangettayo. Pudno ti pannakiranget iti basol. Padpadakkelen ti kabusor ti aramidna a mangsinga iti pammaneknek ken manglapped iti aramid ti Apo. Ikkanna dagiti adipenna iti nabibileg nga armas a maglapped iti pannakiranudtayo iti rag-o ken ayat ti Apo.10
Ti panangbabawi ti tulbek iti panangliklik iti liday gapuanan ti kabusor. Saan a namnamaen ti Apo ti kinaperpektotayo itoy a panawen iti agnanayon a panagdur-astayo. Ngem namnamaenna nga agbalintayo a natartarnaw. Ti inaldaw a panangbabawi ti dalan iti kinatarnaw, ket mangyeg ti kinatarnaw iti bileg. Ti bukod a kinatarnaw ket mapagbalinnatayo a nabileg a ramit iti ima ti Dios. Ti panagbabawitayo—ti kinatarnawtayo—ket pabilgennatayo a tumulong iti panangummong ti Israel.
Insuro ti Apo ken ni Propeta Joseph Smith “a dagiti kalintegan iti kinasaserdote saan a mabalin nga isina iti bileg ti langit, ken dagiti bileg ti langit saan a matengngel wenno maiggaman no saan laeng a kadagiti pagbatayan ti kinalinteg.”11
Ammotayo no ania ti mangted kadatayo iti dakdakkel nga access iti bileg ti langit. Ammotayo pay no ania ti manglapped iti panangdur-astayo—no ania ti nasken nga isardengtayo tapno dumakkel ti accesstayo iti bileg ti langit. Kakabsat, sikakararag nga awatenyo no ania ti manglapped iti dalan ti panagbabawiyo. Lasinenyo no ania ti mangpasardeng iti panangbabawiyo. Ket kalpasanna, agbalbaliwkayo! Agbabawikayo! Makaaramidtayo amin iti nasaysayaat ket agbalintayo a nasaysayaat ngem iti sigud.12
Adda dagiti wagas a pakapagbalinantayo a nasaysayaat. Maysa ti wagas a panangtratotayo iti bagitayo. Masdaawak iti milagro ti bagi ti tao. Maysa a nakaskasdaaw a parsua, napateg iti in-inut a panagdur-as iti nadiosan a potensialtayo. Ditayo makapagdur-as no awan daytoy. Iti panangtedna iti sagut ti bagi, pinalugodannatayo ti Dios nga agtignay iti panagbalin nga ad-adda a kas Kenkuana.
Maawatan ni Satanas daytoy. Napaay isuna gapu ta ti premortal nga apostasiana ti permanente a nangdiskualipado kenkuana iti daytoy a pribilehio, a nangigapu iti kanayon a panagilem ken panagbabawina. Isu nga adu, no di kaaduan, a dagiti pannulisogna ket mangigapu iti panangabuso iti bagitayo ken ti bagi ti sabali. Gapu ta naliday ni Satanas nga awanan iti bagi, kayatna nga aglidaytayo gapu iti bagitayo.13
Ti bagiyo ti bukodyo a templo, naparsua a pagyanan ti agnanayon nga espirituyo.14 Nasken nga aywananyo dayta a templo. Ita, saludsodek kadakayo kakabsat, naes-esemkayo kadi iti panangkawes ken panangurnos iti bagiyo a mangpagusto iti lubong ngem iti mangparagsak iti Dios? Ti sungbatyo iti daytoy a saludsod ti mangted iti direkta a mensahe Kenkuana maipapan iti riknayo maipanggep iti nakaskasdaaw a sagutna kadakayo. Itoy panagraem kadagiti bagitayo, kakabsat, panagkunak makaaramidtayo iti nasaysayaat ken agbalin a nasaysayaat.
Maysa pay a wagas a makaaramidtayo iti nasaysayaat ken agbalin a nasaysayaat ket ti panangdayawtayo kadagiti babbai iti biagtayo, mangrugi kadagiti assawa ken annaktayo a babbai, kadagiti inna ken kakabsattayo a babbai.15
Adu a bulan ti napalabas, immawatak iti naliday a surat manipud iti patpatgek a kabsatko a babai. Insuratna: “[Mariknami kadagiti annakko a babbai] nga agpadpadaskami iti nadagsen a karit iti napasnek nga atension dagiti assawa ken annakmi a lallaki, addaan iti 24/7 sports updates, video games, stock market updates, [ken] awan inggana a panagamiris ken panagbuya iti game tunggal ay-ayam a propesional. Mariknami a dikami napateg kadagiti assawa ken annakmi a lallaki gapu iti kanayon a panangbubosda iti oras ken atensionda iti [isports ken ay-ayam].”16
Kakabsat, umuna ken kangrunaan a pagrebbenganyo kas priesthood bearer ti ayaten ken aywananyo ti asawayo. Makikaysa kenkuana. Agbalin a kaduana. Palakaen kenkuana nga agbalin a kukuanaka. Awan ti sabali pay nga aramid a napatpateg ngem iti panangbuangay iti agnanayon a relasion kenkuana. Awan iti TV, mobile device, wenno computer a napatpateg ngem iti pagimbaganna. Panunotenyo no kasano a binubosyo ti orasyo ken sadino ti nangtedanyo iti pigsayo. Dayta ti mangibaga no sadino ti pusoyo. Ikararagan a maikaysa ti pusoyo iti puso ti asawayo. Itden ti rag-o kenkuana. Dawaten ti balakadna ket dumngeg. Ti balakadna ti mangpasayaat iti tignayyo.
No nasken nga agbabawikayo gapu iti panangtratoyo kadagiti babbai a kasingedan kadakayo, rugian itan. Ket, laglagipen a pagrebbenganyo ti mangtulong kadagiti babbai iti biagyo nga umawat kadagiti bendision nga aggapu iti panagbiag iti linteg ti Apo iti kinadalus iti dayaw. Saan iti kaano man nga agbalin a rason a saan a kabaelan ti babai nga umawat kadagiti bendisionna iti templo.
Kakabsat, nasken nga agbabawitayo amin. Nasken a bumangontayo ket agkutitayo, ket mariing manipud iti naespirituan a kinasaduttayo. Orasen tapno ikawestayo ti naan-anay a kalasag ti Dios tapno makiramantayo iti kapatgan nga aramid iti daga. Orasen tapno “ipakan dagiti kumpay[tayo], ket agani[tayo] iti amin a kabaelan, panunot, ken pigsa[tayo].”17 Saan a nagtuloy dagiti puersa ti dakes a nabilbileg ngem iti aramidda ita. Kas katulongan ti Apo, ditayo maturog bayat ti panagtultuloy daytoy a panagranget.
Masapul ti pamiliayo ti panangidaulo ken ayatyo. Masapul ti korumyo ken dagiti adda iti ward wenno branchyo ti pigsayo. Ken nasken a maammuan ti amin a mangted iti kasapulanyo no ania ti langa ken tignay ti pudno a disipulo ti Apo.
Ay-ayatek a kakabsatko, pinilinakayo ti Amatayo nga umay iti daga iti daytoy napateg a panawen gapu iti naespirituan a turedyo sakbay daytoy a biag. Maibilangkayo kadagiti kasingpetan, katuredan a lallaki nga immay iti daga. Am-ammonakayo ni Satanas ken am-ammonakayo sakbay daytoy a biag ken maawatanna ti aramid a nasken a malpas sakbay ti panagsubli ti Mangisalakan. Ket kalpasan ti sangaribu a tawen a panangusarna kadagiti nasikap a wagasna, ti kabusor aduan iti padas ken saan a kabaelan a maatur.
Siyayaman, ti priesthood nga iggemtayo ket napigpigsa nga amang ngem kadagiti panangallilaw ti kabusor. Ipakaasik kadakayo nga agbalinkayo a lallaki ken babbarito a kasapulan ti Apo kadakayo a pagbalinanyo. Ipamaysayo ti inaldaw a panagbabawi a napateg iti biagyo tapno mausaryo ti priesthood nga addaan dakdakkel a bileg ngem iti sigud. Daytoy laeng ti wagas tapno mapagtalinaedyo a naespirituan a natalged ti bagiyo ken ti pamiliayo kadagiti mapannubok nga aldaw nga agur-uray.
Kasapulan ti Apo dagiti nasingpet a lallaki a mangipangruna iti pagimbagan ti sabali ngem iti bukodda. Kasapulanna dagiti lallaki nga agpanggep a dumngeg iti timek ti Espiritu a silalawag. Kasapulanna dagiti natulagan a lallaki nga agtungpal iti katulaganda nga addaan integridad. Kasapulanna dagiti lallaki a determinado a mangpatalinaed a natarnaw ti bagida—maikari a lallaki a makiddaw iti apagkanito a mangted bendision nga addaan iti natarnaw a puso, nadalus a panunot, ken nakasagana nga ima. Kasapulan ti Apo dagiti lallaki a nagagar nga agbabawi—lallaki a napasnek nga agserbi ken paset ti buyot dagiti maikari a priesthood bearer ti Apo.
Bendisionankayo nga agbalin a kasta a lallaki. Bendisionankayo iti tured nga agbabawi iti inaldaw ken agadal a mangusar iti naan-anay a bilegyo iti priesthood. Bendisionankayo a mangipeksa iti ayat ti Apo iti asawa ken annakyo ken iti amin a makaam-ammo kadakayo. Bendisionankayo nga agaramid iti nasaysayaat ken agbalin a nasaysayaat. Bendisionanakayo a no aramidenyo dagitoy a panagkagumaan, mapadasanyonto dagiti milagro iti biagyo.
Mairamantayo iti aramid ti Mannakabalin a Dios. Ni Jesus ti Cristo. Datayo ti katulonganda. Paneknekak iti nagan ni Jesucristo, amen.