Ti Bileg ti Panangkanunong iti Pammati
Babaen ti panangingato iti imayo a kumanunong, agkarikayo iti Dios, a dagitoy a katulonganna, ket kanunonganyo ida.
Namin-adu a darasen a nangngegak dagiti priesthood leader a nangyebkas iti panagyamanda para iti panangkanunong iti pammati dagiti pagserbianda. Manipud iti rikna iti timekda, maammuanyo a ti panagyamanda ket nauneg ken napudno. Ti panggepko ita ket isu iti panangipakaammo iti panangdayaw iti Apo para iti panangkanunongyo kadagiti katulonganna iti Simbaanna. Ken panangallukoy met kadakayo a papigsaen ken padur-asenyo iti dayta a bileg ti panangkanunongyo kadagiti dadduma babaen iti pammatiyo.
Sakbay a nayanakkayo, impakitayo dayta a bileg. Lagipentayo no ania ti ammotayo iti lubong ti espiritu sakbay a nayanaktayo. Indatag ti Nailangitan nga Amatayo ti maysa a plano para kadagiti annakna. Addatayo sadiay idi. Sinuppiat ni Lucifer, ti espiritu a kabsattayo, ti plano a mangpalugod ti wayawayatayo a pumili. Kinanunongan ni Jehova, ti ay-ayaten nga Anak ti Nailangitan nga Ama, ti plano. Indauluan ni Lucifer ti panagalsa. Nagtalinaed ti panangkanunong a timek ni Jehova,ket nagboluntario nga agbalin a Mangisalakantayo.
Ti kinapudno nga addakayo iti mortalidad ket mangipatalged kadatayo a kinanunonganyo ti Ama ken ti Mangisalakan. Masapul ti pammati ken ni Jesucristo para iti panangkanunong iti plano ti kinaragsak ken ti lugar ni Jesucristo iti daytoy no bassit unay ti ammoyo maipanggep kadagiti karit a maipasango kadakayo iti mortalidad.
Ti pammatiyo a mangkanunong kadagiti katulongan ti Dios ket kasta met nga adda ragsak iti pusoyo iti daytoy a biag. Idi inawatyo ti karit ti maysa a missionary nga agkararag tapno maammuan a ti Libro ni Mormon ket balikas ti Dios, addaanka idin iti pammati a mangkanunong iti maysa a katulongan ti Apo. Idi inawatyo ti awis nga agpabuniag, kinanunonganyo ti maysa a napakumbaba a katulongan ti Dios.
Idi pinalubosanyo ti maysa a tao nga ipatay dagiti imana iti uloyo ken kunana, “Awatem ti Espiritu Santo,” kinanunonganyo isuna kas maysa nga addaan iti Melchizedek Priesthood.
Manipud iti dayta nga aldaw, babaen iti sipupudno a panagserbi, kinanunonganyo ti tunggal tao a nangitalek kadakayo ti priesthood ken nangorden kadakayo ti maysa a saad [office] iti dayta a priesthood.
Iti rugrugi ti padasyo ti priesthood, ti tunggal panangkanunong ket maysa a simple a pasamak a panangtalek iti maysa a katulongan ti Dios. Ita, adu kadakayo ti dimmur-as iti kasasaad a ti panagkanunongyo agkasapulan iti ad-adu pay.
Agpilikayo no kanunonganyo ti amin ngaawagan ti Apo—ania man ti nakaawagan kadakuada ti Apo. Dayta a panagpili ket mapasamak iti komperensia iti intero a lubong. Ket napasamak iti daytoy a komperensia. Kadagiti kasta a miting, maibasa dagiti nagan ti lallaki ken babbai—dagiti katulongan ti Dios—ket maawiskayo a mangingato iti imayo tapno kumanunong. Mabalin a diy ited ti pangkanunong a butosyo, wenno mabalin nga ikariyo ti pangkanunong a pammatiyo. Babaen iti panangingato iti imayo a mangkanunong, agaramidkayo iti maysa a kari. Agkarikayo iti Dios, a dagitoy katulonganna, ket kanunonganyo ida.
Saanda a perpekto a tattao, a kas met kadakayo. Kasapulan ti natibker a pammati ti panangtungpalyo kadagiti kariyo nga inawagan ida iti Apo. Ti panagtungpal kadagitoy a kari ket mangipaayto met iti agnanayon a kinaragsak. Ti saan a panagtungpal kadagitoy ket makaipaayto kadakayo ken dagiti ay-ayatenyo iti kinaliday—ken uray pay nalabes a pannakapukaw a saanyo a kabaelan a panunoten.
Mabalin a naidawaten kadakayo, wenno maidawatto kadakayo, no kanunonganyo ti bishopyo, stake president, dagiti General Authority, ken dagitiSapasap nga Opisial ti Simbaan. Mabalin a mapasamak daytoy no makiddawkayo a mangkanunong kadagiti opisial ken lider iti maysa a komperensia. No dadduma maaramid daytoy iti interbyu iti maysa a bishop wenno stake president.
Balakandankayo a damagenyo iti bagiyo dagitoy a saludsod a nasaksakbay, nga addaan iti naannad ken nainkararagan a kapanunotan. No aramidenyo , mabalin a malagipyo dagiti nabiit pay a kapanunotan, balikas, ken aramidyo. Padasenyo a laglagipen ken buklen dagiti isungbatyo no mainterbyunakayo ti Apo, ammoyo nga aramidennanto daytoy iti maysa nga aldaw. Makapagsaganakayo babaen iti panangdamag ti bagiyo dagiti saludsod a kas iti sumaganad:
-
Napanunotko wenno nakapagsaritaak kadinmaipapan iti pagkapsutan ti tao kadagiti tao nga nga inkarik a kanunongan?
-
Naimatangakk kadin ti pakakitaan nga iturturong ti Apo?
-
Sipapasnek ken napudnoak kadi iti panangsurotko iti panangidauloda?
-
Naisaok kadin ti maipapan iti pakakitaan a makitak nga isuda dagiti katulongan ti Dios?
-
Ikarkararagak kadi ida a kanayon babaen ti naganda ken addaan iti rikna ti ayat?
Dagita a saludsod para iti kaaduan kadatayo, ket mangiturongto iti saan a makaidna a rikna ken kasapulan a panagbabawi. Binilinnatayo ti Dios ti saan a saantayo a manghusga kadagiti dadduma iti saan a nalinteg, ngem iti aramid, marigatantayo a liklikan daytoy. Dandani amin a banag nga aramidentayo iti panagtrabaho kadagiti tao ket mangiturong kadatayo a mangamiris kadakuada. Ket dandani iti tunggal aspekto ti biagtayo, idiligtayo ti bagbagitayo kadagiti dadduma. Mabalin a maaramidtayo daytoy iti adu a rason, nainkalintegan ti sumagmamano kadagitoy, ngem mangiturong daytoy kadatayo nga agbalin a managdillaw.
Nangted ni Presidente George Q. Canon iti maysa a ballaag nga ipasak met kadakayo. Mamatiak nga insaona ti kinapudno: “Pinili ti Dios dagiti katulonganna. Kunana a karbenganna ti mangdusa kadakuada, no kasapulanda ti pannakadusa. Saanna nga inted daytoy iti tunggal maysa kadatayo tapno babalawen ken dusaenna ida. Awan ti tao, nupay kasano ti kinabileg ti pammatina, nupay kasano ti kinangato iti Priesthoodna, ketmakapagsao iti dakes maipapan iti tinudingan iti Apo ken mangsapul iti biddut iti awtoridad ti Dios iti daga a saan nga agbanag iti pannakasairna. Pumanawto ti Espiritu Santo manipud iti kasta a tao, ket mapanto isuna iti kasipngetan. Ta iti daytoy, saanyo kadi a makita no kasano ti kapateg ti nasken a panagannadtayo?”1
Madlawko a napudno iti tunggal maysa dagiti miembro ti Simbaan iti intero a lubong ken kadagiti mangidaulo kadakuada. Nupay kasta, adda dagiti pagsayaatan a mabalin ken nasken nga aramidentayo. Mapasayaattayo pay iti bilegtayo a mangkanunong iti tunggal maysa. Agkasapulanto iti pammati ken panangikagumaan. Adtoy ti uppat a singasing nga inaramidko iti daytoy a komperensia a mabalintayo nga aramiden.
-
Mabalintayo nga ammuen dagiti naipangruna nga aramid nga insingasing dagiti nagsarita ket rugian itan nga ipatungpal dagitoy. No aramidentayo, pumigsanto ti bileg ti panangkanunongtayo kadakuada.
-
Mabalin nga ikararagantayo ida bayat ti panagsaritada tapno idanonto ti Espiritu Santo dagiti balikasda iti puspuso dagiti maipangruna a tattao nga ay-ayatentayo. No maammuantayo iti agangay a nasungbatan ti kararagtayo, dumakkelto ti bilegtayo a mangkanunong kadagita a lider.
-
Mabalin nga ikararagantayo dagiti maitudo nga agsarita tapno mabendisionan ken maparegtada bayat ti panangtedda kadagiti mensaheda. No makitatayo a naparegtada, bumilegto ti pammatitayo a mangkanunong kadakuada, ket manayonto daytoy.
-
Mabalin a denggentayo dagiti mensahe manipud kadagiti agsarita kas maysa a sungbat kadagiti bukodtayo a kararag nga agpatulong. No umay dagiti sungbat, ken umaydanto, bumilegto ti pammatitayo a mangkanunong kadagiti amin a katulongan ti Apo.
Kas nayon iti panangpadur-as iti panangkanunong kadagiti agserbi iti Simbaan, masursurotayo nga adda dagiti sabali pay a gundaway a pakapapigsaantayo itikasta a bileg. Idiay, makaisangbayda iti nalablabon pay a bendision kadatayo. Adda daytoy iti pagtaengan ken pamilia.
Agsaoak para kadagiti naub-ubing a priesthood holder nga agnanaed iti pagtaengan a kadennana ti amana. Palubosandak nga agsarita manipud iti bukodko a padasko no ania ti kaipapanan para iti maysa nga ama a makarikna iti pangkanunong a pammatiyo. Mabalin a makitam ti kompiansana. Ngem ad-adu pay a karit ti maipaspasango kenkuana ngem iti pannakaammom. No dadduma saanna a makita ti wagas a pangresolbat kadagiti parikut iti sanguananna.
Makatulongto kenkuana ti panagdayawmo kenkuana. Ad-adda pay a makatulongto kenkuanan ti panangipategmo kenkuana. Ngem ti kangrunaan a makatulongto ket dagiti napudno a balikas a kas kadagitoy: “Tatang, inkararaganka, ket nariknak a tulongannakanto ti Apo. Agballiginto ti amin a banag. Ammok a mapasamakto daytoy.”
Dagiti balikas a kas kadagitoy ket addaan met iti bileg iti sabali a turongen, ti ama iti anak. No nakaaramid ti maysa nga anak iti nadagsen a biddut, nalabit iti banag a mainaig iti kinaespirituan,mariknana a saan a nagballigi. Kas amana, iti dayta a kanito, mabalin a masdaawkayo no, kalpasan a nagkararagkayo a mangammo no ania ti aramidenyo, napaltiingannakayo ti Espiritu Santo kadagitoy a balikas: “Anak, kaduaka iti amin a kanito . Ay-ayatennakayo ti Apo. Babaen iti tulongna, makapagsublikayo Kenkuana. Ammok a kabaelayo ket aramidenyonto. Ay-ayatenkayo.”
Iti korum ti priesthood ken iti pamilia, ti napapigsa a pammati a mangkanunong ti tunggal maysa ket ti wagas a pangbangonantayo iti Zion a kayat ti Apo nga a buangayentayo. Babaen iti tulongna, kabaelantayo ket aramidentayto. Kasapulan a sursuruentayo nga ayaten ti Apo iti amin a puso, kabaelan, panunot, ken bilegtayo ken ayatentayo iti tunggal maysa kas iti bagitayo.
Bayat ti panagdur-astayo iti dayta a natarnaw nga ayat ni Cristo, lumukneng ti puspusotayo. Pakumbabaennatayonto dayta nga ayat ken iturongnatayo nga agbabawi. Ti panagtalektayo iti Apo ken iti tunggal maysa ket dumur-asto. Ket kalpasanna rumang-aytayto nga agbalin a maymaysa, kas iti inkari ti Apo a kabaelantayo.2
Paneknekak nga am-ammo ken ay-ayatennakayo ti Nailangitan nga Ama. Ni Jesus ti sibibiag a Cristo. Daytoy ti Simbaanna. Iggemtayo ti priesthoodna. Dayawennanto dagiti panagkagumaantayo a mangpadur-as ti bilegtayo a mangpapigsa iti daytoy ken iti panangkanunong iti tunggal maysa. Paneknekak daytoy iti sagrado a nagan ni Jesucristo, amen.