“Umaykayo, Sumurot Kaniak”
Awisennatayo ni Jesucristo a mangala iti dana ti katulagan nga agsubli iti pagtaengan kadagiti Nailangitan a Nagannaktayo ken makadenna dagiti ay-ayatentayo.
Ay-ayatek a kakabsatko, maragsakankami iti asawak a ni Wendy ta makaduadakayo iti daytoy a bigat ti Sabbath. Adun dagiti napasamak manipud idi napalabas a sapasap a komperensiatayo. Naidatonen dagiti baro a templo iti Concepción, Chile; Barranquilla, Colombia; ken Rome, Italy. Napadasantayon ti nabaknang a pannakaibukbok ti Espiritu kadagitoy sagrado a pasamak.
Kablaawak dagiti adu a babbai (ken lallaki) a nagbasa itay nabiit iti Libro ni Mormon ken natakuatanda ti rag-o ken dagiti nailemmeng a gameng. Naparegtaak kadagiti report maipapan kadagiti milagro a naawat.
Masdaawak kadagiti agtawen iti sangapulo-ket-maysa nga agtutubo a lallaki, a kas deacon itan, sikakari nga ipasada ti sakramento iti tunggal Domingo. Mapanda iti templo a kakuyogda dagiti agtawen iti sangapulo-ket-maysa nga agtutubo a babbai, a sigagagar itan nga agsursuro ken agserserbi kas Beehive. Agpada dagiti agtutubo a lallaki ken agtutubo a babbai nga agikasaba kadagiti kinapudno ti ebanghelio nga addaan iti kinalawag ken natured a pammati.
Maragsakanak kadagiti ubbing ken agtutubo a tumultulong a mangisuro iti ebanghelio kadagiti pagtaenganda bayat ti pannakitinnulongda kadagiti nagannak kadakuada a mangsurot iti naisentro iti pagtaengan, ken suportado ti Simbaan a kurikulum.
Inawatmi daytoy a ladawan ti uppat-ti-tawenna a ni Blake, nga, iti nasapa a bigat ti sabado, nangala iti libro ti Simbaan ket insawangna, “Nasken a pakanek ti espirituk!”
Blake, maragsakankami kenka ken iti dadduma pay a mangpilpili a mangpakan iti espirituda babaen ti panagbussog kadagiti kinapudno ti naisubli nga ebanghelio ni Jesucristo. Ken maragsakankami iti pannakaammo nga adu dagiti umaw-awat iti bileg ti Dios iti biagda bayat ti panagdaydayaw ken panagserbida iti templo.
Kas iti ammo ti adu kadakayo, nakapadas ti pamiliami iti pannakisina tallo a bulanen ti napalabas idi pumanaw ti anakmi a ni Wendy manipud iti daytoy mortal a biag. Kadagiti maudi nga aldaw a pannakirangetna iti kanser, naparaburannak iti gundaway a maaddaan iti ama-iti-anak a panagsarita tapno agpakada.
Inigganak dagiti imana ket imbagak kenkuana no kasano ti kadakkel ti panagayatko kenkuana ken no kasano ti panagyamanko tapno agbalin nga amana. Kinunak: “Nagkallaysaka iti templo ken sipupudno a dinayawmo dagiti katulagam. Siraragsak a pinasangbayyo nga agassawa ti pito nga ubbing iti pagtaenganyo ket pinatanoryo ida nga agbalin a napasnek a disipulo ni Jesucristo, natutured a miembro ti Simbaan, ken managtulong a makipagili. Ken nangpilida kadagiti assawa nga addaan iti kababalin a kapada ti adda kadakuada. Maipagpannakkelnaka unay unay ni tatangmo. Nangyegka kaniak iti nalaus unay a rag-o!”
Siuulimek nga insungbatna, “Agyamanak kenka, Tatang.”
Daytoy ti kanito a napnuan emosion ken lua para kadakami. Kabayatan ti 67 a tawenna, nagkaduakami nga agtrabaho, nagkaduakami nga agkanta, ken masansan a nagkaduakami nga ag-ski. Ngem iti dayta a rabii, napagsaritaanmi dagiti banag a kapatgan, kas kadagiti katulagan, ordinansa, pammati, pamilia, panagtalek, ayat, ken agnanayon a biag.
Nalaus ti pannakaulilami iti anakmi a babai. Nupay kassa, gapu iti naisubli nga ebanghelio ni Jesucristo, saankami a madanagan maipapan kenkuana. Bayat ti panagtultuloymi a mangdayaw kadagiti katulaganmi iti Dios, agbiagkami nga addaan iti namnama a makadenna manen isuna. Idinto nga, agserserbikami iti Apo ditoy ken agserserbi Kenkuana sadiay—iti paraiso.1
Kinapudnona, sinarungkaranmi iti asawak ti Paradise iti nasapa daytoy a tawen—ti Paradise, California. Gapu iti napasamak, naaramid ti nakaiskediul nga isasarungkarmi idiay iti kurang a 40 nga oras kalpasan ti ipapanaw ti anakmi a babai manipud ditoy lubong. Dakami, a kaduami ni Elder Kevin W. Pearson ken ti asawana, ni June, ket pinapigsadakami dagiti Santo ti Chico California Stake. Naammuanmi maipapan iti dakkel a pammatida, ti panagserbida, ken dagiti milagro a napasamak uray iti baet dagiti napukaw kadakuada gapu iti makadadael nga uram iti pakasaritaan ti California.
Bayat ti kaaddami sadiay, nabayag a nakasaritami ti maysa nga ubing a police officer, ni John, a maysa kadagiti adu a natured nga immuna a nagresponde. Nalagipna ti nabengbeng a kasipngetan a nangbalkot iti Paradise idi Nobiembre 8, 2018, idinto a ti apuy ken beggang ket alisto a nagwaras iti ili, a nanglamut kadagiti alikamen ken tagikua a kas maysa a salot nga awan ti ibatina no di dagiti binunton a dapo ken puro a lario a tsimenea.
Iti uneg ti 15 nga oras, nagmaneho ni John iti saan a mapagnaan a kasipngetan a napno iti maitaytayab nga alipato bayat ti saggaysa a panangtulongna nga agbalin a natalged ti tao ken pamilia, tunggal pamilia—amin dagitoy iti baet ti peggad ti bukodna a biag. Nupay kasta kabayatan dayta a narigat a pannubok, ti namangbuteng unay ken ni John ket ti kapatgan a saludsodna: “Sadino kadi ti pamiliak?” Kalpasan ti adu, ken nakabutbuteng nga oras ti panagsagaba, naammuanna iti kamaudianan a natalgedda a nakalasat.
Ti salaysay maipanggep iti pakaseknan ni John para iti pamiliana ket nangallukoy kaniak nga agsarita ita nga aldaw kadakayo a mabalin nga agsaludsod no asidegen ti gibus ti mortal a biagyo, “Sadino kadi ti pamiliak?” Iti dayta umay nga aldaw no nalpasyon ti pannubokyo iti daytoy a biag ken sumrekkayo iti lubong ti espiritu, maipasangokayonto iti dayta makaderder iti puso a saludsod: “Sadino kadi ti pamiliak?”
Isuro ni Jesucristo ti dalan nga agsubli iti agnanayon a pagtaengantayo. Maawatanna a nasaysayaat ti plano ti Nailangitan nga Amatayo iti agnanayon a panagprogresotayo ngem iti asino man kadatayo. Daytoy ket gapu ta Isu ti pagbatayan a bato ti relihiontayo. Isu ti Mannubbottayo, ti Mangngagastayo, ti Mangisalakantayo.
Manipud pay idi napapanaw da Adan ken Eva manipud iti Minuyongan ti Eden, indiaya ni Jesus a Cristo ti mannakabalin a takiagna a mangtulong iti amin a pumili a mangsurot Kenkuana. Naulit-ulit a naisurat kadagiti nasantuan a kasuratan nga iti laksid ti amin a kita dagiti basol ti amin a kita ti tattao, nakatanggaya latta dagiti takiagna.2
Ti espiritu iti tunggal maysa kadatayo ket gagangay nga agtarigagay nga agpaut ti ayat iti pamilia iti agnanayon. Dagiti kanta iti ayat ket mangted iti palso a namnama a ti ayat laeng ti kasapulan no kayatyo ti agdedenna iti agnanayon. Ken adda dagiti mamati a ti Panagungar ni Jesucristo ti mangipaay iti kari a makadennanto ti amin a tao dagiti ay-ayatenda kalpasan ti ipapatay.
Kinapudnona, inlawlawag a husto ti Mangisalakan Mismo nga idinto nga ipanamnama ti Panagungarna a tunggal tao a nagbiag ket pudno nga agungar ken agbiagdanto iti agnanayon,3 ad-adu pay ngem daytoy ti kasapulan no kayattayo ti maaddaan iti nangatngato a pribilehio ti pannakaintan-ok. Ti pannakaisalakan ket pagrebbengan ti tunggal tao, ngem ti pannakaintan-ok ket pagrebbengan ti pamilia.
Dumngeg kadagitoy a balikas nga insao ni Apo Jesucristo iti propetana: “Amin a katulagan, kontrata, piansa, pagrebbengan, sapata, kari, maaramidan, am-ammo, kagimongan, wenno inanamaen, a saan naaramid ken naiserrek ken pinatalgedan ti Nasantuan nga Espiritu ti kari … awan ti kaipapananda, saguday, wenno bileg bayat ken kalpasan ti panagungar manipud kadagiti natay; ta aggibus amin a kontrata a saan a naaramid iti kastoy no matayen dagiti tao.”4
Ngarud, ania ti kasapulan tapno maitan-ok ti pamilia iti agnanayon? Maikaritayo para iti dayta a pribilehio babaen ti panangaramid kadagiti katulagan iti Dios, panagtungpal kadagita a katulagan, ken panangawat kadagiti kasapulan nga ordinansa.
Pudno daytoy manipud pay idi punganay ti panawen. Da Adan ken Eva, ni Noe ken ti asawana, da Abraham ken Sara, da Lehi ken Saria, ken amin a napasnek a dadduma pay a disipulo ni Jesucristo—manipud pay idi naparsua ti lubong—nagaramidda kadagiti isu met laeng a katulagan iti Dios. Inawatda dagiti isu met laeng nga ordinansa nga inaramidtayo kas miembro ti naisubli a Simbaan ti Apo: dagita a katulagan nga awatentayo iti panagbuniag ken iti templo.
Awisen ti Mangisalakan ti amin a sumurot Kenkuana kadagiti danum ti panagbuniag ken, iti agangay, agaramid kadagiti nayon pay nga ordinasa iti Dios iti templo ken umawat ken agbalin a napudno kadagiti nayon pay a kasapulan nga ordinansa. Kasapulan amin dagitoy no kayattayo ti maitan-ok a kadua dagiti pamiliatayo ken iti Dios iti agananayon.
Nasaem iti pusok nga adu a tao nga ay-ayatek, a daydayawek, a raraemek ti saan nga umawat iti awisna. Saanda nga ikaskaso dagiti pakaasi ni Jesucristo no yawisna ti, “Umaykayo, sumurot kaniak.”5
Maawatak no apay nga agsangit ti Dios.6 Agsangitak met para kadagiti kasta a gagayyem ken kabagyak. Isuda dagiti madaydayaw a lallaki ken babbai, a managayat iti pamiliada ken napasnek kadagiti pagrebbenganda iti kagimongan. Itedda a sibubus-oy ti oras, pigsa, ken dagiti sanikuada. Ket agbalinto a nasaysayaat ti lubong gapu kadagiti aramidda a panagkagumaan. Ngem pinilida a saan nga agaramid kadagiti katulagan iti Dios. Saanda nga inawat dagiti ordinansa a mangitan-okto kadakuada a kadua dagiti pamiliada ken mangbegkesto kadakuada tapno agdedennadanto iti agnanayon.7
No mabalin la koma a sarungkarak ida ken awisek ida a mangpanunot iti nasayaat kadagiti mangted pannakabael nga ordinansa ti Apo. Napanunotko no ania koma ti mabalinko nga ibaga tapno mariknada ko kasano ti kadakkel ti panagayat ti Mangisalakan kadakuada ken no kasano ti kadakkel ti panagayatko kadakuada ken tapno maawatanda no kasano a maawat dagiti babbai ken lalaki nga agtungtungpal iti katulagan ti “pakabuklan ti rag-o.”8
Nasken a maawatanda nga uray no adda lugar para kadakuada iti bangir a biag—a kadua dagiti madaydayaw a lallaki ken babbai a pumili met a saan nga agaramid kadagiti katulagan iti Dios—dayta ket saan a lugar nga agkaykaysanto dagiti pamilia ken maikkan iti pribilehio nga agbiag ken dumur-as iti agnanayon. Dayta ket saan a pagarian a pakapadasanto iti naan-anay a rag-o—ti awan inggana a panagdur-as ken kinaragsak.9 Sumangbay laeng dagita a naindaklan a bendision babaen ti panagbiag iti naitan-ok a pagarian a celestial a kadenna ti Dios, ti Agnanayon nga Amatayo; ti Anakna, ni Jesucristo; dagiti nakaskasdaaw, maikari, ken kualipikado a miembro ti pamiliatayo.
Kayatko nga ibaga kadagiti agduadua a gagayyemko:
Iti daytoy a biag, saanyo a kayat ti ania man a banag a maikadua laeng iti kasayaatan. Ngem, no agkedkedkayo a mangarakup iti naisubli nga ebanghelio ni Jesucristo, pilpilienyo a maikadua laeng iti kasayaatan.
“Kinuna ti Mangisalakan, ‘Idiay balay ti Amak adda adu a pagyanan.’10 Nupay kasta, no pilienyo ti saan nga agaramid kadagiti katulagan iti Dios, awatenyo ti naingpis nga atep iti rabaw ti uluananyo iti unos ti amin a kinaagnanayon.”
Nayonak pay ti awisko kadagiti agduadua a gagayyemko babaen ti panangisaok iti:
“Ibukbokyo ti pusoyo iti Dios. Saludsodenyo Kenkuana no pudno dagitoy a banag. Mangilatang iti oras a panagadal kadagiti balikasna. Pudno nga agadal! No pudno nga ay-ayatenyo ti pamiliayo ken no tarigagayanyo ti maitan-ok a kaduayo ida iti unos ti kinaagnanayon, trabahuenyo itan—babaen ti napasnek a panagadal ken panagkararag—tapno maammuanyo dagitoy agnanayon a kinapudno ken kalpasanna tungpalenyo dagitoy.
“No saankayo a sigurado a mamatikayo iti Dios, mangrugi sadiay. Awaten nga iti kaawan kadagiti padas iti Dios ti gapu iti panagduadua ti maysa tao nga adda Dios. Ngarud, ikabilyo ti bagiyo iti posision a mangrugi a maaddaan kadagiti padas Kenkuana. Ipakumbabayo ti bagiyo. Agkararagkayo tapno maaddaan iti mata a kumita iti ima ti Dios iti biagyo ken iti lubong iti lawlawyo. Idawatyo Kenkuana nga ibagana kadakayo nga adda talaga sadiay—no am-ammonakayo. Saludsodenyo Kenkuana no ania ti riknana kadakayo. Ket kalpasanna, dumngegkayo.”
Maysa nga ay-ayatek a gayyemko ti naaddaan kadagiti padas iti Dios. Ngem tinarigagayanna a makadenna ti pimmanaw nga asawana. Isu nga indawatna kaniak a tulongak. Inallukoyko a makipagkita kadagiti missionary tapno maawatanna ti doktrina ni Cristo ken masursuruan kadagiti katulagan, ordinansa, ken bendision ti ebanghelio.
Inaramidna dayta. Ngem nariknana a dagiti imbalakadda a dalan ket agkasapulan kenkuana iti adu a panagbalbaliw iti biagna. Kinunana, “Dagita a bilin ken katulagan ket narigat unay para kaniak. Kasta met a, diak makapagbayad iti apagkapullo, ken awan ti panawenko nga agserbi iti Simbaan.” Kalpasanna dinamagna kaniak, “Apaman a matayak, aramidem koma ti kasapulan nga aramid iti templo para kadakami iti asawak tapno makapagdennakami manen.”
Agyamanak, ta saan a siak ti mangkedngan iti daytoy a lalaki. Ngem agduaduaak iti samay ti proxy nga aramiden iti templo para iti lalaki a naaddaan iti gundaway a mabuniagan iti daytoy a biag—maordenan iti priesthood ken umawat kadagiti bendision iti templo kabayatan ti kaaddana ditoy a biag—ngem nagaramid iti pangngeddeng a saan nga awaten dayta a dalan.
Patpatgek a kakabsatko, awisennatayo ni Jesucristo a mangala iti dana ti katulagan nga agsubli iti pagtaengan kadagiti Nailangitan a Nagannaktayo ken makadenna dagiti ay-ayatentayo. Awisennatayo nga “umay, sumurot kaniak.”
Ita, kas Presidente ti Simbaanna, ipakaasik kadakayo a nangyadayon iti bagbagiyo manipud iti Simbaan ken kadakayo a saan pay a talaga a nagkalikagum a mangammo a naisublin iti Simbaan ti Mangisalakan. Aramidenyo ti naespirituan a trabaho tapno maammuan para iti bagbagiyo, ken aramidenyo koma daytoy itan. Maibusen ti oras.
Paneknekak a sibibiag ti Dios! Ni Jesus isu ti Cristo. Naisublin ti Simbaanna ken ti pakabuklan ti ebangheliona tapno mangbendision iti biagtayo iti rag-o, ditoy ken kalpasan daytoy a biag. Paneknekak iti nagan ni Jesucristo, amen.