2:3

Ti Priesthood Playbookyo

Ni Elder Gary E. Stevenson

Ti Korum dagiti Sangapulo-ket-dua nga Apostol

Mangaramidkayo iti bukod a playbookyo no kasano a paneknekanyonyo ti bagiyo kas maysa a disipulo ni Cristo.

Itay napalabas a Disiembre, impakaammo ti Umuna a Panguluen a dagiti agtawen iti 11 a babbarito ket “mangrugi a dumar-ay kadagiti korum ti Aaronic Priesthood … iti rugi ti Enero iti tawen nga ag-12-ti-tawenda.”

Kas bungana, bayat ti umuna a paset iti daytoy a tawen, adda dagiti nasdaaw nga agtawen iti 11 a nangipapan nga agtalinaedda iti Primary agingga iti sumaruno a panagkasangayda ngem agipaspasada itan iti sakramento iti Domingo a kas kabarbaro la unay a naordenan a deacon.

Asino ngata ti kangrunaan a masdaaw iti panagbalbaliw—dagiti baro a deacon wenno dagiti nagannak kadakuada. Kaadagitoy dandani 80,000 akabarbaro a deacon, kaduatayo ti adu ita a rabii iti daytoy dakkel a Conference Center wenno makiramraman babaen ti teknolohia. Naragsak nga isasangbay iti napateg a panangkikinnabsatan iti priesthood!

Daytoy a panagbalbaliw ti mangaramid a napnuan pakasaritaan daytoy a miting—nalabit a daytoy ti kadakkelan a grupo dagiti Aaronic Priesthood holder a dumar-ay iti sapasap a sesion ti priesthood iti sapasap a komperensia. Maibilang iti daytoy espesial nga okasion, iturongko dagiti saritak nangnangruna kadagiti babbarito iti Aaronic Priesthood.

Dagiti Nasursuro a Leksion manipud iti Isports

Kas estudiante, adu met kadakayo ti mangpadpadur-as kadagiti paglaingan, pagesman, ken pagliwliwaan babaen dagiti extracurricular nga aktibidad iti pagadalan wenno kadagiti pribado a leksion, bunggoy, ken grupo iti ruar ti pagadalan, agraman ti isports.

Iti panaggustok iti isports iti unos ti biagko, kanayon a dinaydayawko dagiti mangpadur-as kadagiti kabaelanda a kas atleta iti punto a pagay-ayamanda kadagiti nangato a lebel. Tapno agbalin ti maysa a tao a pudno a nalaing iti ania man a banag, kas pangnayon iti natural a talentona, kasapulan ti adu a panagdisiplina, panagsakripisio, ken adu nga oras a panagsanay ken panagpraktis. Masansan a makangngeg dagita nga atleta kadagiti nasasakit a panagdillaw dagiti coach ken sitatallugodda a mangitantan no ania ti kayatda itan para iti maysa a banag a napatpateg iti masakbayan.

Ammotayo dagiti miembro ti Simbaan ken priesthood holder a nakapadasen iti balligi kadagiti kangatuan a lebel ti propesional nga atletiks. Adu dagiti napintas a pagarigan, ngem sumagmamano laeng ti mailistak ditoy gapu ta bassit ti oras. Mailasinyo ti sumagmamano kadagitoy nga atleta ti : iti baseball, Jeremy Guthrie ken Bryce Harper; iti basketball, Jabari Parker ken Jimmer Fredette; iti soccer, Ricardo Rojas; ken rugby league, William Hopoate; ken iti football, Taysom Hill ken Daniel Sorensen. Inaramid ti tunggal maysa ti napateg a kontribusion iti isportda.

Bayat ti panagballigi iti isportsda, dagitoy nga atleta ti umuna a mangako nga isuda dagiti saan a perpekto nga atleta wenno tao. Nagtrabahoda a napasnek tapno agbalin a kalaingan iti isportda—ken agbiag iti ebanghelio. Bumangonda no madalebda ken agpasnekda nga agibtur iti inggana.

Adalenyo ti Playbook

Iti team isports, mapadur-as dagiti ay-ayam iti umno a kasasaad ti ay-ayam ket maidulin iti playbook. Sursuruen dagiti atleta ti naipangruna nga aramidenda iti tunggal ay-ayam. Adalen dagiti naballigian nga agay-ayam ti playbook tapno no mayawag iti panagay-ayam, ammodan, no sadino ti papanan ken aramidenda.

Iti maipada a wagas, addaantayo met a priesthood holder iti maysa a team (korum) ken maysa a playbook dagiti nasantuan a kasuratan ken balikas dagiti agdama a propeta).

Papigsaenyo kadi dagiti kaduayo iti team?

Kasano ti kalaingan a panagadalyo iti playbookyo?

Maawatanyo kadi a naan-anay dagiti aramidenyo?

Panangsango iti Panagsupiat

Noisaksakup pay ti analohia, ammo dagiti coach dagiti pagpigsaan ken pagkapsutan ti teamda kasta met dagiti sumupiat. Aramidenda ti game plan a mangtedto kadakuada iti kasayaatan a gundaway nga agballigi. Ania met kadakayo?

Ammoyo no ania dagiti sulisog a kangrunaan a pagkapsutanyo, ken mapugtuanyo no kasano a padasento a pagsardengen ken upayennakayo ti kabusor. Nangaramidkayo kadi iti bukodyo a game plan ken playbook tapno ammoyo ti agresponde no maipasango iti pannakasuppiat?

No naipasangokayo iti agduduma a sulisog iti dayaw—adda kaduayo man wenno dakdakayo a magmatmatmat iti maysa a screen—ammoyo ti game planyo. No isingasing ti maysa a gayyem nga uminumkayo iti arak wenno mangpadas iti druga, ammoyon ti game. Nagpraktiskayo ket ammoyon no kasano ti aramiden a nasapsapa.

Iti maysa a game plan, maysa a playbook, ken maysa a natibker a panagkumit a mangipatungpal iti akemyo, makitayonto a nakapsut ti sulisog kadakayo. Nakapangeddengkayon no kasano a sanguenyonto ken no anianto ti aramidenyo. Saan a nasken a mangeddengkayo iti tunggal kanito a masulisogkayo.

Insarita ti maysa iti Sangapulo-ket-dua nga Apostol itay kallabes ti estoria a mangipakita iti daytoy a prinsipio. Kas maysa a priest iti haiskul, makikuykuyog isuna idi kadagiti gagayyemna. Kalpasan a gimmatangda iti makan, addada iti lugan idi insingasing ti maysa a kaduana a mapanda agbuya iti maysa a sine. Ti problema ket ammona a nasken a saanna a buyaen dayta a sine. Nupay dagus a nariknana ti pammilit ken panagdanag, nagplanon para iti daytoy. Daytoy ti kasasaad a naplano iti priesthood playbookna.

Immanges iti nauneg ket situtured nga imbagana, “Diak agessem iti dayta a sine. Idagasdak latta diay balaymin,” nga isu ti inaramidda. Maysa a gagangay a tignay a nangiturong iti balligi! Sumagmamano a tawen kalpasanna, inladawan ti gayyem a kaduana iti dayta a rabii no kasano a pinaneknekan daytoy a pagarigan tapno agbalin a pigsa kenkuana nga agbalin a natured a mangsango kadagiti isu met la a kasasaad iti bukodna a biag.

Dagiti Panid manipud iti Playbook

Indawatko iti sumagmamano a Kakabsat a lallaki a mangisingasing kadagiti ay-ayam a mabalinyo nga iraman iti playbook. Dagitoy ti sumagmamano a naparegta a singasingda:

Inaldaw nga agkararagkayo para iti naranraniag a lawag ken napigpigsa a pammaneknek maipapan ken ni Jesucristo.
Dumngegkayo a nasayaat iti pannursuro dagiti nagannak kadakayo, bishopyo, ken dagiti lideryo iti Young Men ken dagiti korumyo.
Liklikanyo ti pornograpia ken imoral wenno narugit a linaon ti social media.
Laglagipenyo dagiti kari nga inaramidyo iti Dios, ken tungpalenyo dagitoy.
Adalenyo dagiti estoria dagiti naindaklan a propeta iti nasantuan a kasuratan ket tuladenyo dagiti nasayaat a kababalinda.
Bendisionanyo dagiti annak ti Nailangitan nga Ama babaen iti serbisio.
Agsapulkayo kadagiti gagayyem a mangtulong kadakayo nga agbalin a tao a kayatyo a pagbalinan.
Agbalinkayo nga eksperto iti panagusar iti FamilySearch app, ket sukisokenyo ti bukodyo a family history.
Planuenyo dagiti lugar a natalged a mabalin a paglibasanyo kadagiti impluensia ti kinadakes.
Ayaten ken tulonganyo a mapapigsa dagiti dadduma pay a miembro ti korumyo iti priesthood.

Nakasaritak met dagiti atleta a kabuybuyatayo dagiti ladawanda. Natakuatakak a makaay-ayo daytoy a saanda a yam-ammo laeng ti bagbagida babaen ti no ania ti ar-aramidenda, kas propesional nga atleta, no di ketdi pay babaen ti kinasiasinoda, kas annak ti maysa a managayat a Nailangitan nga Ama ken agik-ikut iti priesthood ti Dios.

Ita denggentayo koma dagiti kapanunotanda:

Jimmer Fredette, ditoy a kas maysa a deacon, kinunana: “Nasursurok ti agpannuray unay iti pannakaammok ken pammatik iti kinapudno ti ebanghelio. Daytoy ti nangtarabay kaniak nga agbalin a … maysa a maikari a priesthood holder ken kangrunaan ti amin—maysa a napintas a pagwadan.”
Bryce Harper, ditoy a kas maysa nga asawa, insuratna: “Impagarupko a ti panaglatak, kinabaknang, ken ti MVP award ti mangparagsak kaniak. Adda maysa a kurangna. Isu a, nagsaganaak … .ket [simrekak] iti templo. Addaak itan iti dalan nga [agsubli] iti Nailangitan nga Amak ken addaanak iti agnanayon a pamilia—a daytoy ti kaindaklanan a rag-o iti lubong!”
Daniel Sorensen, ditoy a kas maysa a missionary, kinunana: “Ti nasayaat a playbook ket maysa a plano a mangusar kadagiti paglaingan ken pagpigsaan ti tunggal miembro ti team. … No adalek ken usarek dagiti pannursuro ti ebanghelio ni Jesucristo, maammuak no kasano nga usarek dagiti pagpigsaak nga agserbi iti priesthood.”
Jeremy Guthrie, ditoy agdama nga agserserbi a kas mission president, imburayna: “Kas maysa a deacon nga agtawen iti 12 … [Nariknak] ti Espiritu a mangipaneknek kaniak [a] ‘daytoy a biag ti panawen … nga agsagana a sumabat iti Dios.’ Ti game plan ket isu ti pammati iti Dios nga agtignay [ken] panagbabawi babaen iti Mangisalakan. … Ti playbook ket masarakan kadagiti nasantuan a kasuratan ken dagiti sibibiag a propeta.”
Jabari Parker, ditoy iti pannakaordenanna iti saad ti elder, kinunana: “Diak maipagarup a kastoy koma ti tao a nagbalinak no saanko nga inaramid ti pangngeddeng a mabuniagan. … Agyamanak unay ta addaanak iti Dios iti biagko a mangtarabay kaniak iti inaldaw.”
Ricardo Rojas, ditoy agdama nga agserserbi kas branch president, kinunana: “Babaen iti priesthood ti [Dios] makatulong[tayo] iti aramidna. Naawagantayo nga ‘agbalin a napigsa ken natured’ a mangsaluad iti kinapudno.” Daytoy ti nangtulong kenkuana nga agballigi iti pitch ken kas maysa a priesthood holder.
Taysom Hill, ditoy kas maysa a missionary, mariknana a nagpaay ti ebanghelio ni Jesucristo kas maysa a playbookna iti biagna. Imburayna, “Ti pammatik iti plano ti [Dios] ken panangaramidko iti amin a kabaelak a mangipatungpal iti akemko iti daytoy ket nangted kaniak iti nalaus a kaipapanan ti talna ken ragsak iti biagko, nga ammok a naragsakan ti Dios kadagiti aramidko a panagkagumaan.”
William Hopoate, ditoy iti panangted iti pammendision iti anak ti barona kas paset ti uppat a henerasion, kinunana a ti ebanghelio ti mangtultulong kenkuana a “mangbigbig kadagiti estratehia ti oposision ken mangted iti naespirituan a samay a mangsarked kadagiti dumardarang a gayang ken nasaysayaat nga agserbi kadagiti dadduma.”

Ania met kadakayo? Mabigbigyo kadi ti nangatngato ken nasansantuan a kinasiasinoyo kas maysa nga anak ti Dios, maysa nga agik-ikut iti nasantuan a priesthoodna? Iti panangpanunot ti daytoy agnanayon a pakabigbigan, agaramidkayo iti game plan ken playbookyo iti priesthood a mangtarabayto kadakayo kadagiti panawen ti pannakasulisog ken panagrigrigat. Ibilangyo dagiti agpada nga opensibo ken depensibo nga istratehia.

Dagiti opensibo nga istratehia ket tumulong a mangpatibker ti pammaneknek ken ad-adda a mangrisut iti panagtalinaed iti nailet ken akikid a dalan. Mairaman iti pagarigan ti kanayon a panagkararag, panagadal iti nasantuan a kasuratan, pannakimisa ken ipapan iti templo, panagbayad iti apagkapullo, ken panangsurot iti balakad a masarakan iti Para iti Pigsa dagiti Agtutubo a buklet.

Dagiti depensibo nga istratehia ket iramanna ti nasapsapa a panagplano no kasano a sanguenyonto ti sulisog. No masulisogkayo a mangikompromiso kadagiti bukodyo a pagrukodan, ammoyon kasakbayanna no anianto ti aramidenyo.

Kasapulanyo ti playbook para iti dayta.

Diyo kadi kayat ti agkararag ita nga aldaw? Orasen tapno ipatungpalyo ti tignay a naplanoyon iti ay-ayam.

Mariknayo kadi a kumapkapsuten ti pammaneknekyo? Adda tignayyo para iti dayta. Ammoyo no ania ti aramidenyo.

Ti Kinalaing nga Agaramid iti Imatang ti Dios

Dakayo ti agik-ikut iti nasantuan a priesthood ti Dios. Ti panagkumityo a kumpet a sititibker iti landok a pagkaptan ti mangbalbaliwto kadakayo nga agbalin nga agnanayon a pinarsua a nakaparsuaanyo a pagbalinan.

Am-ammo ken ay-ayatennakayo ti Dios. Bendisionan ken tarabayennakayonto kadagiti addangyo.

Mabalin a pampanunotenyo a saankayo nga espesial, a saankayo a nalaing. Ngem saan a pudno dayta. Diyo kadi ammo nga imbaga ti Dios, “Dumtengto dagiti nakapsut a banag iti lubong ket parmekenda dagiti maiingel ken napipigsa”?

Ngarud, kumakapsutkayo kadi? saan a napateg? Kablaawandakayo, naalakayo iti lineup!

Mariknayo kadi nga awan pategyo? nababa? Mabalin a ldakayo laeng ti kasapulan ti Dios.

Ania pay ti nain-indaklan a pagariganngem iti panagaddang ni ni David a mapan iti pagbabakalan tapno makiranget ti maysa a nakabutbuteng a kalaban, a ni Goliat? Ti panagpannurayna iti Apo, nga addaan iti maysa a plano, saan laeng insalakan ni David ti bagina no di ketdi pay ti buyot ti Israel! Ammoyo nga addanto kadakayo ti Apo no naturedkayo nga agtalinaed iti sibayna. “No kaduanatayo ti Dios, asino ti mangbusor kadatayo?”

Isu ti manglukat iti ridaw ken tulongannatayo a mangsapul kadagiti pagpigsaan ken kabaelan a ditayo kaano man nga ammo nga addaantayo.

Denggenyo dagiti matalek a coachyo—dagiti nagannak kadakayo, ti bishopyo, ken dagiti lideryo iti Young Men. Sursuruenyo ti playbook. Basaenyo dagiti nasantuan a kasuratan. Adalenyo dagiti balikas dagiti propeta iti agdama nga aldaw. Mangaramidkayo iti game plan no kasano a paneknekanyonto ti bagiyo kas maysa a disipulo ni Cristo.

Ammuenyo a nasapsapa dagiti tignay nga usarenyonto a mangpapigsa iti espirituyo ken mangliklik kadagiti pagsilo ti kabusor.

Aramidenyo daytoy ket awan duadua nga usarennakayonto ti Dios.

Ita, mabalin nga adda dagiti mangisina iti bagbagida iti ebanghelio ket mayaw-awanda. Mabalin a nakatugaw dagiti dadduma ket agbuybuyada iti ay-ayam manipud iti adayo. Mabalin nga andda dagiti angpili nga agtugaw lattan iti bangko, nupay pinadas nga imbaon ida ti coach. Awisenkayo a mangispal, mangsuporta, ken mangayat kadakuada kas pada a miembro ti team!

Kayat dagiti dadduma ti agay-ayam—ket aramidenda. Ti kapatgan ket saan a kinalaing dagiti agay-ayam no di ketdi ti kinatallugodda a mangiraman iti bagida iti ay-ayam. Dida urayen a mayawag ti numberoda, gapu ta ammoda dagiti nasantuan a kasuratan nga agkuna, “No adda tarigagayyo nga agserbi iti Dios maayabankayo nga agtrabaho.”

Maikabilyo ti bagiyo iti lineup.

Aramidenyo daytoy kabayatan ti panagadal ken panangipatungpalyo iti priesthood playbookyo.

Iti dalanyo madaleb ken mapaaykayonto—nalabit mamin-adu pay a gundaway. Saankayo a perpekto; ti pannakatnag ket paset ti pangpaikari a proseso a mangpalugod kadakayo a mangpasayaat iti kinataoyo ken agserbikayo a nasaysayaat ken naas-asi. Mangted ti Mangisalakan ken ti awan patingganana a Pannubbotna iti wagas a mangparmek kadagiti bidduttayo babaen ti napudno a panagbabawi.

Bubosen dagiti nalalaing nga atleta ti adu nga oras tapno mapasayaatda ti ay-ayamda. Kas maysa a priesthood holder, kasapulanyo ti kasta met a galad. No mapaaykayo, agbabawi ken masursuruankayo manipud iti daytoy. Praktisenyo tapno aramidenyonto a nasaysayaat iti sumaruno a gundaway. Kamaudiananna, adda kadakayo daytoy. Adalenyonto kadi ti playbook?

Allukoyenkayo: Agtalekkayo iti Apo. Ikawesyo ti sibubukel a kabal ti Dios, ket makiramankayo iti ay-ayam.

Bassitda nga agay-ayam iti propesional nga isports kadagiti kangatuan a tukad, ngem no maipapan iti kinadisipulo, adu ti mangpili a sumurot ken ni Cristo.

Kinapudnona, dayta ti misionyo iti daytoy a biag—masursuruan kadagiti wagas ti Apo, sumrek iti dana ti kinadisipulo, ken mangikarigatan nga agbiag a mayannurot iti plano ti Dios. Tarabayen ken bendisionannakayonto ti Dios no umasidegkayo Kenkuana. Maaramidyo daytoy gapu ta nalaingkayo iti imatangna.

Ikararagko ta sapay koma ta agkumitkayonto nga agbiag a maikari iti nasantuan a priesthood a mangikut ken mangipasnek a mangaramid iti sagrado nga akemyo iti inaldaw. Bendisionankayo iti kabaelan ken tarigagay a mangaramid iti daytoy. Inayonko ti pammaneknekko maipapan iti bileg ti priesthood nga iggemyo, dagiti sibibiag a propeta, ken ni Jesucristo ken ti akemna kas Mangisalakan ken Mannubbottayo. Iti nagan ni Jesucristo, amen.