Sadino ti Pagturonganto Daytoy?
Agaramidtayo kadagiti nasaysayaat a pili ken pangngeddeng no kitaentayo dagiti alternatibo ken utobentayo no sadinonto ti pagturonganda.
Allukoyennatayo ti ebanghelio ni Jesucristo a mangpanunot maipapan iti masakbayan. Ilawlawagna ti panggep ti mortal a biag ken ti kinapudno ti biag kalpasanna. Isurona dagiti napateg a mkapanunotan maipapaniti masakbayan a mangtarabay kadagiti tignaytayo iti agdama.
Iti kasupadina, am-ammotayo amin dagiti tao a maseknan laeng iti agdama: agbubos ita, agragsak ita, ken saan nga agdanag iti masakbayan.
Naragragsakto ti agdama ken masakbayantayo no kanayon nga ammotayo ti masakbayan. No mangngeddengtayo iti agdama, nasken a kanayon a saludsodentayo, “Sadino ti pagturonganto daytoy?”
I.
Adda dagiti pangngeddeng nga agpili nga agaramid wenno saan. Nangngegak ti maysa a pagarigan maipanggep daytoy a kita ti pili iti komperensia ti stake iti United States adun a tawen ti naglabas.
Napasamak iti napintas a kampus ti kolehio. Nakatugaw ti ummongdagiti agtutubo nga estudiante iti karuotan. Kinuna ti nangisarita iti daytoy a padas a sinipsiputanda ti maysa a bassit a tree squirrel a dakkel ken napuskol ti dutdot ti ipusna nga agay-ayam iti puon iti napintas a kayo. No dadduma adda daytoy iti daga, no dadduma umuli ken bumaba ket lawlawenna ti puon. Ngem apay a maallukoy dagiti estudiante iti gagangay a buya?
Iti asideg nakaidda iti karuotan ti maysa nga aso nga Irish. Isu ti magustuan dagiti estudiante, ket ti squirrel ti magustuan ti aso. Tunggal kanito a saan a makita biit ti squirrel a manglawlaw iti kayo, siuulimek nga agkaradap nga agpasango ti aso sa agidda manen a kasla awan essemna iti aglawlawna. Daytoy ti nagustuan dagiti estudiante. Naulimek ken saan nga agkutkuti, naipamaysa ti pasnekda iti umadanin a mapasamak.
Kamaudiananna, linagtuan ti aso ti squirrel a mangsakmal iti daytoy iti ngiwatna. Naklaat dagiti estudiante, dagusda nga immasideg a mangagaw iti bassit nga ayup a yadayo iti aso, ngem naladaw unayen. Natayen ti squirrel.
Iti dayta nga ummong adda koma nangballaag iti squirrel babaen iti panangipayapay iti imada, ngem awan ti nangballaag. Buybuyaenda laeng ti umas-asideg ti awan duadua a bungana. Awan ti nagdamag, “Sadino ti pagturonganto daytoy?” Idi napasamak ti naipadles, nagdardarasda amin a manglapped, ngem naladawen. Aglulua a nagbabawida amin.
Kita ti pangngarig dayta pudno nga estoria. Mayaplikar daytoy iti bambanag a makitatayo iti biagtayo mismo ken iti biag ken pasamak iti aglawlawtayo. No mapasamak dagiti pagpeggadan a mangapekto iti tattao nga ay-ayatentayo, agpilitayo nga agsao wenno agtignay wenno agulimek. Damagentayo iti bagitayo, “Sadino ti pagturonganto daytoy?” No pettat ken serioso dagiti bunga, no ditayo aggunay addanto madi a mapasamak. Nasken nga umno a mangballaagtayo wenno sumuporta kadagiti maitutop nga aramid a pangliklik no adda pay oras.
Dagiti pangngeddeng nga inladawak ket mangiraman kadagiti pili nga agtignay wenno saan nga agtignay. Ad-adda a gagangay dagiti pili a maysa a tignay wenno sabali pay. Iraman dagitoy ti panagpili iti nasayaat wenno dakes, ngem ad-adda a masansan ti panagpili iti dua a nasayaat. Ditoy met a makaay-ayo a damagen no sadino ti pagturonganto daytoy. Adu ti aramidentayo a pili iti dua a nasayaat, masansan a mangiraman no kasano a bubosentayo ti orastayo. Saan a dakes ti agay-ayam iti video game wenno agteks wenno agbuya iti TV wenno agtelepono. Saggaysa nga iramanda ti makuna nga “opportunity cost,” kayatna a sawen a no agbubostayo iti oras nga agaramid iti maysa a banag, awan gundawaytayo nga agaramid iti maysa pay. Ammok a makitayo a nasken a panunotentayo a naimbag no ania ti mapukawtayo no bubosentayo ti oras iti maysa nga aramid, nupay nasayaat daytoy.
Itay kallabes nagsaritaak iti napauluan iti, “Nasayaat, Nasaysayaat, wenno Kasayaatan.” Iti dayta a bitla kinunak a “gapu ta nasayaat ti maysa a banag saan nga umdas a gapu iti panangaramid iti daytoy. Dakdakkel nga amang ti bilang ti nasayaat a banag a maaramidtayo ngem iti oras a mausar a pannakaileppasda. Adda dagiti banag a nasaysayaat, ket dagitoy dagiti banag a nasken nga ipangpangrunatayo iti biagtayo. … Bay-antayo ti dadduma a nasayaat a banag tapno pilientayo ti sabali a nasaysayaat wenno kasayaatan.”1
Ibilang ti nabilbileg a pannirigan. Ania ti epekto iti masakbayantayo dagiti pangngeddeng nga aramidentayo iti agdama? Laglagipen ti pateg ti pananggun-od iti adal, panagadal iti ebanghelio, panangpabaro ti katulagantayo babaen ti pannakiranud iti sakramento, ken idadar-ay iti templo.
II.
“Sadino ti pagturonganto daytoy?” ti napateg pay iti panagpili no kasano nga awagan wenno panunotentayo ti bagbagitayo. Kapatgan iti amin, anak ti Dios ti tunggal maysa kadatayo nga addaan pagtungpalan iti agnanayon a biag. Tunggal maysa pay a pangawag, agraman pagtrabahuan, maris ti kudil, pisikal a kababalin, wenno pakaidayawan, ket temporario wenno saan a napateg no mainaig iti agnanayon. Diyo pilien nga awagan ti bagiyo wenno panunoten ti bagiyo no mainaig iti pananglimita iti mabalin nga ikarigatanyo a panggep a tun-oyen.
Kakabsatko a lallaki, ken kakabsatko a babbai a mangbuya wenno mangbasa iti isaritak ditoy, sapay koma ta ammoyo no apay nga ited dagiti lideryo dagiti sursuro ken balakad nga itedmi. Ay-ayatendakayo, ken ay-ayatennakayo ti Nailangitan nga Amatayo ken ti Anakna, ni Jesucristo. Planoda para kadatayo ti “naindaklan a plano ti panagragsak” (Alma 42:8). Iturongnatayo dayta a plano ken dagiti bilin ken ordinansa ken katulagan iti kaindaklan a ragsak ken rag-o itoy a biag ken iti biag nga umay. Kas katulongan ti Ama ken ti Anak, mangisuro ken mangbalakadkami kas iti panangiturongda kadakami babaen ti Espiritu Santo. Awan ti sabali a tarigagaymi no di agsao no ania ti pudno ken allukoyendakayo a mangaramid iti imbalabalada a dana iti agnanayon a biag, “a kapatgan iti amin a sagut ti Dios” (Doktrina ken Katulagan 14:7).
III.
Adtoy ti maysa pay a pagarigan ti epekto iti masakbayan dagiti pangngeddengtayo iti agdama. Mainaig daytoy iti pili nga agaramid iti agdama a sakripisio tapno gun-oden ti napateg a panggep a tun-oyen iti masakbayan.
Iti maysa a komperensia ti stake iti Cali, Colombia, imbaga ti maysa a kabsat a babai no kasano a tinarigagayanna ken ti nobiona nga agkallaysa iti templo, ngem iti dayta a panawen adda iti adayo a Peru ti kaasitgan a templo. Iti nabayag, inurnongda ti kuartada para iti plete iti bus. Kamaudiananna nagluganda ti bus nga agpa-Bogotá, ngem idi nakadanonda sadiay, naammuanda a naalan amin a tugaw iti bus nga agpa-Lima, Peru. Mabalin nga agawidda a saan a makallaysa wenno agkallaysada iti ruar ti templo. Pagsayaatanna, adda maysa pay nga alternatibo. Mabalin nga agluganda iti bus nga agpa-Lima no kayatda ti agtugaw iti suelo ti bus iti unos ti lima nga aldaw ken lima a rabii a panagbiahe. Pinilida nga aramiden daytoy. Kinunana a narigat, nupay no dadduma pagtugawen ida dagiti sumagmamano a pasahero tapno makaunnatda met iti suelo.
Ti nakaawisak iti bitlana ket ti insao daytoy a kabsat a babai nga agyamyaman ta nakapanda nga agassawa iti templo iti kastoy a wagas, gapu ta daytoy ti namagbaliw iti panagriknada maipapan iti ebanghelio ken iti kallaysa iti templo. Ginunggonaan ti Apo ida iti panagdur-as a sumangbay manipud iti sakripisio. Napaliiwna a ti lima nga aldaw a biaheda iti templo ket nakaipatungpal iti ad-adu pay iti panagdur-as iti espiritualidadda ngem iti adu nga isasarungkar iti templo nga awan ti panagsakripisio.
Kadagiti tawen manipud pay idi nangngegko dayta a pammaneknek, napanunotko no kasano koma ti biag dagiti ubbingnga agassawa no sabali ti pinilida—no binay-anda ti sakripisio a kasapulan tapno agkallaysa iti templo.
Kakabsat, adu ti aramidentayo a pili iti biag, sumagmamano ti dadakkel ken sumagmamano ti kasla babassit. No lagipen, makitatayo no ania ti kinadakkel ti pagdumaan ti sumagmamano a pilitayo iti biagtayo. Agaramidtayo kadagiti nasaysayaat a pili ken pangngeddeng no kitaentayo dagiti alternatibo ken utobentayo no sadinonto ti pagturonganda. No aramidentayo, sursurotentayo ti balakad ni Presidente Russell M. Nelson a mangrugi a sipapanunot iti pagpatinggaanna.2 Para kadatayo, ti pagpatinggaan ket kanayon iti dana ti katulagan babaen ti templo nga agturong iti agnanayon a biag, ti kapatgan iti amin a sagut ti Dios.
Paneknekak maipapan ken ni Jesucristo ken dagiti epekto ti Pannubbotna ken ti dadduma pay a kinapudno ti agnanayon nga ebangheliona iti nagan ni Jesucristo, amen.