Aramid ti Misionario: Panangibinglay No Ania Ti Adda iti Pusom
Sadino man ti yanyo iti daytoy a daga, adu dagiti gundaway a mangiburay iti naimbag a damag ti ebanghelio ni Jesucristo.
Itay napalabas a bulan dagiti Sangapulo-ket-dua ket inawis ti ay-ayatentayo a propeta, ni Presidente Russell M. Nelson, nga agbiahe a kaduana a mapan iti pannakaidaton ti Rome Italy Temple. Bayat ti panagbiahe, napanunotko ni Apostol Pablo ken dagiti panagdaliasatna. Iti panawenna, iti ipapan iti Roma manipud iti Jerusalem, kasapulan daytoy ti agarup 40 nga aldaw. Ita, iti maysa kadagiti paggugustok nga eroplano, kasapulan daytoy ti nakurang a 3 nga oras.
Mamati dagiti iskolar ti Biblia nga adda idi ni Pablo idiay Roma idi insuratna ti sumagmamano kadagiti suratna, a napateg iti panangpapigsa kadagiti miembro ti Simbaan idi ken ita.
Ni Pablo ken ti dadduma pay a miembro ti nagkauna a Simbaan, dagiti Santo idi Nagkauna nga Aldaw, ket mismo a napasaranda ti napalaus a sakripisio. Adu ti nakaro a naparparigat, agingga iti ipapatayda.
Iti napalabas a 200 a tawen, napadasan met dagiti miembro ti naisubli a Simbaan ni Jesucristo, dagiti Santo iti Ud-udina nga Aldaw, ti adu a kita ti pannakaparparigat. Ngem iti baet dayta a pannakaparparigat (ken no dadduma gapu iti daytoy), nagtultuloy a dimmakkel ti Ti Simbaan ni Jesucristo dagiti Santo iti Ud-udina nga Aldaw ket masarakan itan iti amin a suli ti lubong.
Nakaad-adu dagiti Aramiden
Nupay kasta, sakbay nga agrambaktayo, ken kablaawan ti bagitayo iti daytoy nakaskasdaaw a panagballigi, nasken nga ikabiltayo daytoy a panagdur-as iti umno a puesto daytoy.
Agarup pito ket kagudua a billion ti tattao iti lubong, a maikumpara iti sumagmamano a 16 million a miembro ti Ti Simbaan ni Jesucristo dagiti Santo iti Ud-udina nga Aldaw—a talaga a bassit nga arban.1
Idinto a, bumasbassiten ti bilang dagiti Kristiano a mamati iti sumagmamano a paset ti lubong.2
Uray iti naisubli a Simbaan ti Apo—idinto nga agtultuloy nga umad-adu dagiti miembro—nakaad-adu dagiti saan a makagun-od kadagiti bendision a gapuanan ti masansan a pannakiraman iti Simbaan.
Iti sabali a pannao, sadino man ti yanyo iti rabaw daytoy a daga, adu dagiti gundaway a pakaibinglayan ti naimbag a damag3 ti ebanghelio ni Jesucristo kadagiti tao a maam-ammom, kaklasem, ken kabbalaymo wenno katrabahom ken kapulapolmo.
Kabayatan daytoy napalabas a tawen, naaddaanak iti naragsak a gundaway a makiraman kadagiti sangalubongan nga aktibidad a misionario (worldwide missionary activities) ti Simbaan. Masansan nga inutobko ken inkararagak maipapan iti dakkel a pagrebbengan nga inted ti Mangisalakan kadagiti disipulona—kadatayo, dagiti annakna—nga “inkayo ngarud, ken isuroyo amin a nasion, a bautisaranyo ida iti nagan ti Ama, ken ti Anak, ken ti Espiritu Santo.”4
Narigatanak a nangsungbat iti saludsod “Kasano a datayo, kas miembro ken disipulo ni Cristo, kasayaatan a mangipatungpal iti dayta dakkel a bilin iti inaldaw a panagbiagtayo?”
Ita nga aldaw awisenkayo a mangutob iti dayta met la a saludsod iti puso ken panunotyo.5
Ti Sagut para iti Aramid ti Misionario
Inyunay-nay dagiti lider ti Simbaan ti napalaus nga awag ti “Misionario ti tunggal miembro!” iti uneg ti adu a dekada.6
Dagiti miembro ti Simbaan ni Jesucristo—agpada iti napalabas a panawen kasta met iti panawentayo—ket sireregta ken sirarag-o a nangibinglay iti ebanghelio kadagiti gagayyem ken am-ammoda. Nagrayray iti puspusoda ti pammaneknek ni Jesucristo, ken sipupudno a kayatda a padasen dagiti dadduma ti isu met la a rag-o a nasarakanda iti ebanghelio ti Mangisalakan.
Kasla addaan iti sumagmamano a miembro ti Simbaan ti kastoy a sagut. Magustuanda unay ti mangibagi iti ebanghelio. Situtured ken siraragsakda nga agserbi ken mangidaulo iti aramid kas maysa a miembro a misionario.
Nupay kasta, ad-adda nga agkedked dagiti dadduma kadatayo. No nailawlawag kadagiti miting ti Simbaan ti aramid ti misionario, nakadumog dagiti ulo agingga a nailumlomen iti tugaw, naitalimudok dagiti mata iti nasantuan a kasuratan wenno nakakidem iti nauneg a panagutob tapno maliklikan ti panangperreng iti dadduma pay a miembro.
Apay a kastoy? Nalabit a makonsensiatayo a ditayo sinaysayaat ti nangibinglay iti ebanghelio. Nalabit nga agduaduatayo no kasano nga aramiden daytoy. Wenno nalabit a mabaintayo a mangaramid iti maysa a banag a di komportable kadatayo.
Maawatak daytoy.
Ngem laglagipen, di kaano man indawat ti Apo ti eksperto, awan biddut a panagkagumaan ti misionario. Ketdi, “kalikaguman ti Apo ti puso ken ti natallugod a panunot.”7
No naragsakkayo iti aramid ti misionario, ituloyyo koma, ket agbalin a maysa a pagwadan kadagiti dadduma. Bendisionannakayto ti Apo.
Nupay kasta, no agduaduakayo maipapan iti panangibinglay iti mensahe ti ebanghelio, mabalin kadi nga isingasingko ti lima a banag a maaramid ti asino man a makiraman iti naindaklan a bilin ti Mangisalakan a tumulong a mangummong iti Israel?
Lima a Simple a Singasing
Umuna, umasideg iti Dios. Ti umuna a naindaklan a bilin ket agayat iti Dios.8 Daytoy ti kangrunaan a gapu no apay nga addatayo ditoy a daga. Saludsodem iti bagim, “Talaga kadi a mamatiak iti Nailangitan nga Ama?”
“Ay-ayatek ken agtalekak kadi Kenkuana?”
No umas-asidegkayo iti Nailangitan nga Amatayo, ad-adda nga agraniag ti silaw ken ti rag-ona iti kaungganyo. Madlawto dagiti dadduma nga adda maysa a banag a naidumduma ken naisangsangayan maipapan kadakayo. Ket saludsodendanto ti maipapan iti daytoy.
Maikadua, punnuenyo ti pusoyo iti ayat para kadagiti dadduma. Daytoy ti maikadua a naindaklan a bilin.9 Padasenyo a sipupudno nga ibilang ti tunggal maysa iti aglawlawyo kas maysa nga anak ti Dios. Agserbikayo kadakuada—uray no saan a nairaman ti naganda iti listaanyo ti ministering sister wenno brother.
Makipagkatawakayo kadakuada. Makipagrag-okayo kadakuada. Makipagsangitkayo kadakuada. Dayawenyo ida. Agasan, paregtaen, ken papigsaenyo ida.
Ikagumaanyo a tuladen ti ayat ni Cristo ken maaddaan iti panangngaasi kadagiti dadduma—uray pay kadagiti natangsit kadakayo, manglalais kadakayo ken agtarigagay a mangdangran kadakayo. Ayatenyo ida ken tratuenyo ida a kas pada nga annak ti Nailangitan nga Ama.
Maikatlo, ikarigatantayo ti magna iti dana ti kinadisipulo. Kabayatan ti iyuuneg ti ayatmo para iti Dios ken dagiti annakna, umun-uneg met ti panagkumityo a sumurot ken ni Jesucristo.
Masursuroyo ti maipapan iti wagasna babaen ti panagpennek iti balikasna ken panagdengngeg ken panagbiag kadagiti pannursuro dagiti kabaruanan a propeta ken apostol. Dumur-askayo iti panagtalek ken tured a mangsurot iti dalanna bayat ti pannakisaritayo iti Nailangitan nga Ama nga addaan iti masuruan, napakumbaba a puso.
Ti pannagna iti dana ti kinadisipulo ket agkasapulan iti panagsanay—inaldaw, in-inut, “tunggal parabur,”10 tunggal binatog.”11 No dadduma umaddangtayo iti mamindua nga agpasango ken agsanud iti maminsan.
Ti napateg ket saankayo a sumuko; agtultuloy iti panangikarigatan a mangaramid nga umno daytoy. Iti kamaudianan agbalinkayonto a nasaysayaat, naragragsak, ken ad-adda a napudpudno. Ti panangisaoyonto kadagiti dadduma maipapan iti pammatiyo ket aagbalinto a gagangay ken natural. Kinapudnona, agbalinto ti ebanghelio a kasta a kasapulan unay, napateg a paset ti panagbiagyo a mabalin a saan a gagangay ti marikrikna no saan nga isarita daytoy kadagiti dadduma. Mabalin a saan a mapasamak a dagus—tungpal biag a panagkagumaan daytoy. Ngem mapasamakto daytoy.
Maikapat, ibinglayyo no ania ti adda iti pusoyo. Diak idawdawat nga agtakderkayo iti maysa a suli ti kalsada nga addaan iti megaphone a mangipukpukkaw kadagiti bersikulo ti Libro ni Mormon. Ti idawdawatko ket kanayon nga agsapulkayo kadagiti gundaway a mangdakamat iti pammatiyo iti gagangay ken normal a wagas kadagiti tao—agpada nga iti personal kasta met iti online. Idawdawatko kadakayo nga “agtakder a kas saksi”12 ti bileg ti ebanghelio iti amin a kanito—ken no kasapulan, usarenyo dagiti balikas.13
Gapu ta “ti ebanghelio ni Cristo … ti bileg ti Dios iti pannakaisalakan,” makapagbalinkayo a natalek, natured, ken napakumbaba no ibinglayyo daytoy.14 Mabalin a kasla aggigidiat a kababalin ti panagtalek, kinatured, ken kinapakumbaba, ngem saan. Makita ditoy ti awis ti Mangisalakan a saan nga ilemmeng dagiti ik-ikkan a pateg ken pagbatayan ti ebanghelio iti salop ngem bay-anyo nga agraniag ti silawyo, a tapno madayaw dagiti nasayaat nga aramidyo ti Amayo iti Langit.15
Adu dagiti normal ken gagangay a wagas tapno maaramid daytoy, manipud iti inaldaw nga aramid ti kinasayaat agingga iti bukod a pammaneknek iti YouTube, Facebook, Instagram, wenno Twitter kadagiti simple a pannakisarita kadagiti tao a maam-ammoyo. Daytoy a tawen masursurotayo manipud iti Baro a Tulag kadagiti pagtaengantayo ken iti Sunday School. Anian a nakakaskasdaaw a gundaway a mangawis kadagiti gagayyem ken kaarruba nga umay iti simbaan ken kadagiti pagtaenganyo tapno masursuruan ti maipapan iti Mangisalakan a kaduadakayo. Ibinglayyo kadakuada ti Gospel Library app, a pakasarakanda iti Umaykayo, Sumurot Kaniak. No adda am-ammoyo nga agtutubo ken dagiti pamiliada, ikkanyo ida iti buklet a Para iti Pigsa dagiti Agtutubo ket awisenyo ida nga umay ken mangkita no kasano nga agkagumaan dagiti agtutubotayo nga agbiag babaen kadagita a pagbatayan.
No adda maysa a tao nga agsaludsod maipapan iti udi ti lawasmo, saanka nga agkedked nga agsarita maipapan iti no ania ti napadasanyo iti simbaan. Isaritayo maipapan kadagiti babassit nga ubbing a nagtakder iti sango ti kongregasion ken nagkantada a sigagagar no kasano ti panagkagumaanda nga agbalin a kas ken ni Jesus. Isaritam maipapan iti grupo dagiti agtutubo a nangbubos iti panawenda iti panangtulong kadagiti babbaket ken lallakay iti pagtaengan a paginanaan tapno mapagtitipon dagiti bukod a pakasaritaan. Isaritam ti maipapan iti kallabes a panagbalbaliw iti iskediul ti miting iti Domingo ken no kasano a bendisionan daytoy ti pamiliam. Wenno ilawlawagyo no apay a yunay-unaytayo a daytoy ti Simbaan ni Jesucristo ken datayo dagiti Santo iti Ud-udina nga Aldaw kas iti pannakaawag met a Santodagiti miembro ti nagkauna a Simbaan.
Iti ania man a wagas a kasla gagangay ken normal kadakayo, ibinglayyo no apay a napateg kadakayo ni Jesucristo ken ti Simbaanna. Awisenyo ida nga “umay ken mangkita.”16 Kalpasanna allukoyenyo ida nga umay ken tumulong. Adu dagiti gundaway a pakatulongan dagiti tao iti Simbaantayo.
Ikararagyo saan laeng a ti pannakasarak dagiti misionario ti pili. Agkararagkayo iti inaldaw iti amin a pusoyo a masarakanyonto dagiti umay ken mangkita, umay ken tumulong, ken umay ken agtalinaed. Kanayonyo nga iraman dagiti full-time missionary. Kaslada kadagiti anghel, a nakasagana a tumulong!
Bayat ti panangibinglayyo iti naimbag a damag, ti ebanghelio ni Jesucristo, aramidenyo nga addaan iti ayat ken anus. No iti pannakipulapoltayo kadagiti tao ket pampanunotentayo laeng ti panagaruatda iti puraw a kawes ken agpabuniag, biddut ti ar-aramidentayo.
Nalabit nga addanto dagiti umay ken mangkita, ket didanto kaano man agkameng iti Simbaan; addanto dagiti agkameng iti kamaudiananna. Dayta ti pilida. Ngem saan a dayta ti mangbalbaliw iti ayattayo para kadakuada. Ken saan a daytoy ti mangbalbaliw kadagiti naregget a panagkagumaantayo nga ituloy ti panangawis kadagiti indibidual ken pamilia nga umay ken mangkita, umay ken tumulong, ken umay ken agtalinaed.
Maikalima, agtalekkayo iti Apo a mangaramid kadagiti milagrona. Maawatanyo a saanyo a trabaho ti mangpasurot kadagiti tao. Dayta ti akem ti Espiritu Santo. Ti akemyo ket mangibinglay no ania ti adda iti pusoyo ken agbiagkayo a maitunos kadagiti pammatiyo.
Ngarud, saankayo a maupay no saan nga awaten a dagus ti maysa a tao ti mensahe ti ebanghelio. Saan a bukod a pannakapaay daytoy.
Dayta ket adda iti nagbaetan ti tao ken ti Nailangitan nga Ama.
Pagrebbenganyo nga ayaten ti Dios ket ayaten dagiti padayo a tao, dagiti annakna.
Mamati, agayat, agaramid.
Sumurot iti daytoy a dalan, ket agaramid ti Dios kadagiti milagro babaen kadakayo a mangbendision kadagiti napapateg nga annakna.
Dagitoy lima a singasing ti mangtulongto kadakayo nga agaramid iti inaramiden dagiti disipulo ni Jesucristo manipud pay kadagiti nagkauna a panawen. Ti ebangheliona ken ti Simbaanna ket napateg a paset ti biagyo ken ti kinasiasinoyo ken no ania iti ar-aramidenyo. Ngarud, awisenyo dagiti dadduma nga umay ken mangkita ken umay ken tumulong, ken aramidento ti Dios ti pangisalakan nga aramidna, ken umay ken agtalinaed[danto].
Ngem Kasano No Narigat?
“Ngem,” mabalinmo a saludsodem ti, “kasano no aramidek amin dagitoy ket awan ti reaksion dagiti tao? Kasano no dillawenda maipapan iti Simbaan? Kasano no saandak a gayyemen?”
Wen, mabalin a mapasamak dayta. Manipud pay idi nagkauna a panawen, masansan a naidadanes dagiti disipulo ni Jesucristo.17 Kinuna ni Apostol Pablo, “Agrag-o … iti pannakiramanyo iti panagsagaba ni Cristo.”18 Nagrag-o dagiti nagkauna a Santo “a naibilangda a maikari a nagsagaba iti pannakaibabain gapu iti naganna.”19
Laglagipenyo, agaramid ti Apo kadagiti nakaskasdaaw a wagas. Mabalin a babaen iti panangsungbatyo a kas ken ni Cristo iti saan a panangawat ket mapalukneng iti natangken a puso.
Kas maysa nga Apostol ni Apo Jesucristo, bendisionankayo iti panagtalek tapno agbalin a sibibiag a pammaneknek dagiti ik-ikkan pateg ti ebanghelio, nga addaan iti tured a kanayon a mabigbig kas maysa a miembro ti Ti Simbaan ni Jesucristo dagiti Santo iti Ud-udina nga Aldaw, nga addaan iti kinapakumbaba a tumulong iti aramidna a kas maysa a panangipeksa iti ayatyo para iti Nailangitan nga Ama ken dagiti annakna.
Patpatgek a gagayyemko, agrag-okayonto iti pannakaammo a maysakayo a napateg a paset iti nabayagen a naipadto a panaguummong ti Israel, nga agsagsagana para iti yaay ni Cristo iti “bileg ken naindaklan a dayag; ken amin dagiti nasantuan nga anghel.”20
Am-ammonakayo ti Nailangitan nga Ama. Ay-ayatennakayo ti Apo. Bendisionannakayto ti Dios. Inordenananna daytoy nga aramid. Maaramidyo daytoy. Maaramidtayo daytoy a sangsangkamaysa.
Paneknekak daytoy iti nagan ni Jesucristo, amen.