Naannad bersus Aleng-aleng
Bayat ti agtultuloy a panangawat kadagiti impluensia ti lubong iti dakes, nasken nga ikarigatantayo iti amin a kinapasnek nga agtalinaed a sititibker iti dana a mangiturong kadatayo a sitatalged iti Mangisalakantayo.
Iti naminsan adda nakitak a karatula iti tawa ti pagtagilakuan a kunana, “Kinaragsak, $15.00.” Nagusisaak a mangammo no kasano ti kadakkel ti ragsak a magatangko iti $15 ket simrekak a mangkita. Adu ti nakitak a nalalaka a ganggandiong ken pakalaglagipan—awan maysa a banag a nakitak kadagitoy a makaparagsak kaniak a kas nailanad iti karatula! Iti panaglabas dagiti tawen, namin-adu a nalaglagipko maipapan iti dayta a karatula ken no kasano ti kalaka ti agsapul iti pagragsakan kadagiti banag a nalaka wenno saan a manayon. Kas miembro ti Ti Simbaan ni Jesucristo dagiti Santo iti Ud-udina nga Aldaw, nabendisionantayo a mangammo no kasano ken no sadino ti pakasarakan iti pudno a ragsak. Masarakan daytoy iti naannad a panagbiag iti ebanghelio nga impasdek ti Apo ken Mangisalakantayo, ni Jesucristo, ken iti panangikarigatantayo nga agbalin nga ad-adda pay a kas Kenkuana.
Adda patpatgenmi a maysa a gayyem nga inheniero iti tren. Maysa nga aldaw kabayatan ti panagmanehona iti tren iti rutana, nakitana ti maysa a kotse a nasardeng iti riles iti masanguananna. Dagus a napanunotna a naipit ti kotse ket saan a makaballasiw iti riles. Dagus nga inkabilna ti tren iti emergency mode, a nangipakagat iti preno iti tunggal boxcar nga umabot iti tallo nga apagkapat ti milia (1.2 km) iti likud ti makina, nga addaan kargana a 6,500 tonelada (5,900 metric tons). Awan ti gundaway a makapagsardeng ti tren sakbay a dungparenna ti kotse, ket nadungparna ngarud daytoy. Nagasat dagiti tao iti kotse ta nangngegda ti busina ti tren ket nakalibasda manipud iti kotse sakbay a nadungpar. Idi kasarsarita ti engineer ti imbestigador a pulis, inasitgan ida ti makaunget a maysa a babai. Impukkawna a nakitana ti sibubukel a pasamak ket sinaksianna a saan man la a pinadas ti engineer a liklikan ti kotse!
Nalawag a no nakaliklik ti engineer ket naisiasi ti tren tapno maliklikan ti aksidente, natay koma daytoy ken nadiskaril ti sibubukel a tren iti kellaat a panagsardengna. Pagsayaatanna kenkuana, nalagda ti pannakaikapet dagiti ligay ti tren iti riles kabayatan ti nadaras a panagtaray daytoy nga agturong iti destinasionna uray no adda lapped iti dalanna. Pagsayaatanna kadatayo, addatayo met iti dalan, maysa a dana ti katulagan nga inkaritayo a pagdalanan idi nabuniagantayo kas miembro ti Ti Simbaan ni Jesucristo dagiti Santo iti Ud-udina nga Aldaw. Nupay mabalin a no dadduma maipasangotayo kadagiti tubeng iti dalan, daytoy a dana ti agtultuloy a mangiturong kadatayo iti tartarigagayantayo unay nga agnanayon a pagtungpalantayo no agtalinaedtayo a sititibker iti daytoy.
Ipakita kadatayo ti parmata iti kayo ti biag no kasano a mabalin a mangyadayo kadatayo dagiti epekto ti panangyaleng-aleng manipud iti dana ti katulagan. Panunotem a ti landok a pagkaptan ken ti nailet ken akikid a dana, wenno ti dana ti katulagan, ket direkta a nagturong iti kayo ti biag, a sidadaan a pakagun-odan ti amin a bendision nga ipaay ti Mangisalakan ken ti Pannubbotna kadagiti napudno. Nakita pay iti parmata ti karayan ti danum a mangibagi iti kinarugit ti lubong. Iladawan dagiti nasantuan a kasuratan a daytoy a karayan “agay-ayus iti dana ngem “lumabas laeng” iti “asideg” ti kayo, a saan nga agturong ditoy. Ti lubong napno iti adu a pannakasinga a mabalin a mangallilaw uray dagiti napili, a pakaigapuan ti panagyaleng-alengda iti panagtungpal kadagiti katulaganda—iti kasta mangiturong kadakuada iti asideg iti kayo, ngem saan nga agturong ditoy. No saantayo nga agannad iti panagtungpal kadagiti katulagantayo nga addaan iti kinahusto, dagiti panangyaleng-alengtayo a panagkagumaan mabalin a mangiturong kadatayo iti kamaudiananna kadagiti maiparit a dana wenno makikaduatayo kadagiti nakastreken iti dakkel ken nalawa a pasdek. No saan a naannad, mabalin a malmestayo pay iti tukot ti narugit a karayan.1
Adda naannad a wagas ken aleng-aleng a wagas a mangaramid iti amin a banag, agraman ti panagbiag iti ebanghelio. Bayat ti panangibilangtayo iti panagkumittayo iti Mangisalakan, naannadtayo kadi wenno mangyaleng-aleng? Gapu iti mortal a kasasaadtayo, no dadduma di kadi ikalintegantayo ti ugalitayo, no dadduma ibagbagatayo a dagiti aramidtayo ket saan a nasayaat ngem saan met a dakes, wenno pagtiponentayo ti nasayaat iti maysa a banag a saan unay a nasayaat? Ania man nga oras a kunatayo ti, “nupay kasta,” “malaksid,” wenno “ngem” no maaramat daytoy iti panangsurot kadagiti dadaulotayo a propeta wenno panagbiag iti ebanghelio a siaannad, kinapudnona ibagbagatayo ti, “Saan a mausar dayta a balakad kaniak.” Maikalintegantayo amin a tarigagayantayo, ngem ti kinapudnona, awan ti umno a wagas iti panagaramid iti biddut a banag!
Naala ti tema dagiti agtutubo para iti 2019 manipud iti Juan 14:15, a nagbilinan ti Apo iti, “No ayatendak, tungpalenyo dagiti bilbilinko.” No ayatentayo Isuna kas iti ibagbagatayo, saantayo kadi nga ipakita dayta nga ayat babaen ti panagbalin a naan-annad bassit iti panagtungpal kadagiti bilinna?
Ti panagbalin a naannad iti panagbiag iti ebanghelio saan a nasken a kayatna a sawen ti panagbalin a pormal wenno kadaanan. Ti kayatna a sawen ti panangaramid a maitutop dagiti kapanunotan ken ugalitayo kas disipulo ni Jesucristo. Bayat ti panangutobtayo ti paggidiatan ti naannad ken panangyaleng-aleng iti panagbiagtayo iti ebanghelio, dagitoy ti sumagmamano a kapanunotan nga ibilangtayo:
Naannadtayo kadi iti panagdaydayawtayo iti aldaw ti Sabbath ken iti panagsaganatayo a makiranud iti sakramento iti tunggal lawas?
Ad-adda kadi a makapagan-annadtayo kadagiti kararagtayo ken panagadaltayo iti nasantuan a kasuratan wenno naregregtatayo a makiraman iti Umaykayo, Sumurot Kaniak—Para kadagiti Indibidual ken Pamilia?
Naannadtayo kadi iti panagdaydayawtayo iti templo, ken naannad ken irantatayo kadi ti agtungpal kadagiti katulagan nga inaramidtayo iti panagbuniag ken iti templo? Naannadtayo kadi iti langatayo ken disente iti panagkawestayo, nangnangruna kadagiti sagrado a lugar ken kasasaad? Naannadtayo kadi iti panagsuottayo kadagiti sagrado a garment iti templo? Wenno mangidiktar kadi iti ad-adda a panangyaleng-aleng nga ugali dagiti uso ti lubong?
Naannadtayo kadi iti panagministertayo iti dadduma ken iti panangipatungpaltayo kadagiti pagrebbengantayo iti Simbaan, wenno ditayo ikankano wenno yaleng-alengtayo ti awagtayo nga agserbi?
Naannad wenno yaleng-alengtayo kadi no ania ti basaen ken buyaentayo iti TV ken kadagiti mobile device-tayo? Naannadtayo kadi iti panagsasaotayo? Wenno gagangay kadi nga awatentayo ti narusanger ken bastos?
Naglaon ti polieto a Para iti Pigsa dagiti Agtutubo kadagiti pagrukodan a, no masurot a naannad, mangisangbayto kadagiti nabaknang a bendision ket tulongannatayo nga agtalinaed iti dana ti katulagan. Nupay naisurat daytoy para iti pagimbagan dagiti agtutubo, saan nga agpaso dagiti pagrukodanna no pumanawtayon kadagiti programa ti Young Men ken Young Women. Maaramatda iti tunggal maysa kadatayo iti amin a panawen. Ti panangrebyu kadagitoy a pagrukodan mabalin a mangguyugoy iti dadduma pay a wagas a pakapagbalinantayo a naan-annad iti panagbiagtayo iti ebanghelio.
Ditayo ibaba dagiti pagrukodantayo tapno maibagay wenno maiparikna a nagin-awa ti maysa a tao. Datayo dagiti disipulo ni Jesucristo, ket gapu iti dayta pagrebbengantayo ti mangingato iti dadduma, mangitag-ay kadakuada iti nangatngato, nasansantuan a lugar a mabalin a pangapitanda met kadagiti nain-indaklan a bendision.
Awisek ti tunggal maysa kadatayo nga agkalikagum a manggun-od iti pannarabay ti Espiritu Santo a mangammo no ania dagiti panagbalbaliw a kasapulantayo nga aramiden iti biagtayo tapno agbalin a naan-annad a maitunos kadagiti katulagantayo. Ipakaasik pay kadakayo a saanyo a dillawen dagiti dadduma nga agdaldaliasat met iti kastoy. “Kukuak ti panangukom, kinuna ti Apo.”2 Adda ti tunggal maysa kadatayo iti proseso ti panagdur-as ken panagbalbaliw.
Makaay-ayo kaniak ti estoria a naisalaysay iti Libro ni Mormon maipapan kadagiti naan-anay a timmalikud nga Amlicite. Maysa a wagas tapno maipakaammo iti dadduma nga awanen ti pakainaiganda ken ni Jesucristo ken iti Simbaanna, nangikabilda iti naidumduma a marka a nalabaga iti mugingda tapno makita ti amin.3 Iti kasupadina a wagas, ken kas disipulo ni Jesucristo, kasano ti panangmarkatayo iti bagbagitayo? Nalaka kadi a makita dagiti dadduma ti ladawanna iti langatayo ken ammoda kadi no asino ti ibagitayo babaen iti wagas a siaannad a panangimatontayo iti biagtayo?
Kas tattao ti katulagan, saantayo a ninamnama a mangtulad iti dadduma iti lubong. Naawagantayo a “naidumduma a tao”4—nagpintasen a pammadayaw! Bayat ti panagtultuloy a panangawat dagiti impluensia ti lubong ti kinadakes, nasken nga ikarigatantayo nga addaan iti amin a kinapasnek nga agtalinaed a sititibker iti dalan a mangiturong kadatayo a sitatalged iti Mangisalakantayo, a mangpalawa ti nagbaetan ti panangibiag kadagiti katulagantayo ken dagiti nainlubongan nga impluensia.
Bayat ti panangutobko iti pananggun-od iti manayon a ragsak, maamirisko a no dadduma ikalintegantayo dagiti palso a pangngeddengtayo. Ditayo maliklikan dagiti nangisit nga angep bayat ti pannagnatayo iti dana ti katulagan. Ti pannulisog ken panangyaleng-aleng ket mabalin a makaigapu tapno in-inut a mayaw-awantayo iti dalantayo nga agturong iti kinasipnget ti lubong ken mayadayotayo iti dana ti katulagan. Kadagiti gundaway a mabalin a mapasamak daytoy, inallukoynatayo ti patpatgentayo a propeta, ni Presidente Russell M. Nelson,nga agsublitayo iti dana ti katulagan ket aramidentayo a dagus daytoy. Pagyamanak iti sagut ti panagbabawi ken ti bileg ti Pannubbot ti Mangisalakan.
Imposible ti agbiag a perpekto. Maysa laeng a tao ti nakapagbiag a perpekto kabayatan ti panagnaedna iti daytoy a planeta a telestial. Dayta ni Jesucristo. Nupay nalabit a saantayo a perpekto, kakabsat, makapagbalintayo a maikari: maikari a makiranud iti sakramento, a maikari kadagiti bendision ti templo, ken maikari nga umawat iti bukod a paltiing.
Impaneknek ni Ari Benjamin dagiti bendision ken kinaragsak a sumangbay kadagiti siaannad a mangsurot iti Mangisalakan: “Ken kasta met, a tarigagayak a dakayo ti mangusig iti bendision ken naragsak a kasasaad dagiti agtungtungpal kadagiti bilin ti Dios. Ta adtoy, naparaburanda iti amin a banag, a nainlasagan ken naespirituan; ket no agtalinaedda a situtulnog agingga iti kamaudianan maawatdanto idiay langit, ket makipagtaengdanto iti Dios iti kasasaad nga awan ti gibusna a kinaragsak.”5
Mabalin kadi a magatang ti ragsak iti $15? Saan, saan a mabalin. Aggapu ti nauneg ken manayon a ragsak iti naigagara ken siaannad a panagbiag iti ebanghelio ni Jesucristo. Iti nagan ni Jesucristo, amen.