Kumita ken ni Jesucristo
No kumitatayo ken ni Jesucristo, tulongannatayto nga agbiag kadagiti katulagantayo ket padakkelenna ti takemtayo kas elder ti Israel.
Idi nagna ni Jesus iti dalan nga asideg ti Capernaum1 a linawlaw ti dakkel nga ummong, maysa a babai a nakaro ti sakitna iti sangapulo-ket-dua a tawen ti nangsagid iti gayadan ti pagan-anayna. Dagus a nalaingan daytoy.2
Insurat dagiti nasantuan a kasuratan a ni Jesus, iti pannakaawatna “a naikkat ti [bileg] [Kenkuana],”3 “bimmallaet iti ummong”4 ket “sinapulna … ti nagaramid itoy a banag.”5 “Idi saan a makapaglemmeng ti babai,”6 “nagtamed iti sangona, ket imbagana kenkuana ti amin a kinapudno.”7
“Kinuna ni Jesus kenkuana, “Anakko, ti pammatim pinasalun-atnaka; inkan a sitatalna.”8
Insalakan ni Jesucristo ti babai. Naagasan ti bagina, ngem idi tumaliaw ni Jesus a kumita kenkuana, imbagana ti pammatina Kenkuana ket inagasanna ti pusona.9 Kinasaona nga addaan itiayat, impanamnamana kenkuana ti yaanamongna, ket binendisionanna iti talna.10
Kakabsat, kas agikut iti nasantuan a priesthood, mairamantayo iti aramid ti pannakaisalakan. Iti maudi a tawen impabaklay ti Apo ti panangidaulo iti daytoy nga aramid kadagiti elder ti Israel.11 Makaparegta ti rebbengentayo manipud iti Apo— makipagtrabaho iti kakabsattayo a babbai, agserbitayo iti nasansantuan a wagas, padarsentayo ti pananguummong ti Israel iti agsumbangir ti belo, ipasdektayo ti pagtaengantayo kas santuario ti pammati ken pagadalan iti ebanghelio, ken isagana ti lubong iti Maikadua a Yaay ni Jesucristo.12
Iti amin a banag, impakita ti Apo kadatayo ti wagas: nasken a kumita ken agserbitayo ken Jesucristo kas iti kumita ken agserbi iti Amana.13 Kinuna ti Apo ti kastoy ken ni Propeta Joseph:
“Kitaendak iti tunggal panunot; saankayo nga agduadua, saankayo nga agbuteng.
“Imutektekanyo dagiti sugat a naipalay iti bakrangko, ken kasta met ti nagnaan dagiti lansa kadagiti dakulap ken dapanko; agbalinkayo a napudno, tungpalenyo dagiti bilinko, ket tawidenyonto ti pagarian ti langit.”14
Iti premortal a pagarian inkari ni Jesus iti Amana nga aramidenna ti pagayatan ti Amana ket agbalin a Mangisalakan ken Mannubbottayo. Idi damagen ti Amana, “Asino ti ibaonko?”15 Insungbat ni Jesus:
“Adtoyak, ibaonnak.”16
“Ama, maaramid ti pagayatam, ket kukuam ti gloria iti agnanayon.”17
Iti unos ti mortal a biagna, tinungpal ni Jesus dayta a kari. Iti kinapakumbaba, kinaemma, ken ayat, insurona ti doktrina ti Amana ket inaramidna ti trabaho ti Amana nga addaan iti bileg ken turay nga inted ti Amana Kenkuana. Him.18
Inted ni Jesus ti pusona iti Amana. Kinunana:
“Ay-ayatek ti Ama.”19
“Kanayon nga aramidek dagiti banag a pagragsakanna.”20
“Immayak … saan a mangaramid iti pagayatak, no di ti pagayatan [ti Ama a] nangibaon kaniak.”21
Iti panagtuokna iti Getsemani, inkararagna “Nupay kasta saan a pagayatak no di ti pagayatam.”22
No awagan ti Apo dagiti elder ti Israel a “kitaendak iti tunggal panunot” ket “imutektekanyo dagiti sugat” iti nagungar a bagina, daytoy ti awag a tallikudan ti basol ket umasideg ken agtungpal Kenkuana. Daytoy ti awag nga isuro ti doktrinana ken aramiden ti trabahona iti wagasna. Ngarud, awag daytoy nga agtalek a naan-anay Kenkuana, isuko ti pagayatan ken pusotayo Kenkuana, ket babaen ti pangsubbot a bilegna agbalintayo a kas Kenkuana.23
Kakabsat, no kitaentayo ni Jesucristo bendisionannatayo nga agbalin nga eldernaiti Israel—napakumbaba, naemma, natulnog, napno iti ayatna.24 Ket, yegtayonto ti rag-o ken dagiti bendision ti ebangheliona ken ti Simbaanna iti pamiliatayo ken kakabsattayo iti agsumbangir ti belo.
Inawagannatayo ni Presidente Russell M. Nelson a kumita ken Jesucristo iti kastoy a wagas: “Awan ti nalaka wenno awtomatiko maipapan iti panagbalin a kakasta a nabibileg a disipulo. Nasken a maipamaysa ti pokustayo iti Mangisalakan ken iti ebangheliona. Agkasapulan iti adu a panagpanunot a kumita Kenkuana iti tunggal panunot. No aramidentayo, maawan dagiti duadua ken butengtayo.”25
Napateg a balikas tiipamaysa . Kaipapananna nga irutan iti natibker, iggaman a naan-anay.26 Ipamaysatayo ti pokus ken Jesucristo ken ti ebangheliona babaen iti panagbiag iti katulagantayo.
No agbiagtayo iti katulagantayo, aringanda ti amin a sawen ken aramidentayo. Agbiagtayo iti katulagan27 a napno iti simple, inaldaw a tignay ti pammati nga ipokusnatayo ken Jesucristo: napudno a kararag iti naganna , nga agpennek iti balikasna , umasideg Kenkuana nga agbabawi iti basoltayo, agtungpal iti bilinna, ken mangngilin iti Sabbathna , masansan nga agrukbab iti nasantuan a templona , ken usarentayo ti nasantuan a priesthoodna nga agserbi iti annak ti Dios.
Dagitoy a panagpasnek iti katulagan ti manglukat iti puso ken panunottayo iti pangsubbot a bileg ti Mangisalakan ken pangpasanto a bileg ti Espiritu Santo. Iti tunggal binatog, a baliwan ti Apo ti mismo a kinataotayo, ad-adda a mapasurottayo Kenkuana ket agbiag ti katulagantayo iti puspusotayo.28
Agbalin a natibker dagiti kari nga aramidentayo iti Amatayo iti Langit, ti kaunggan a tarigagaytayo. Ikari ti Amatayo iti Langit a punnuennatayo iti panagyaman ken rag-o.29 Saanen nga annuroten a surotentayo dagiti katulagantayo ngem agbalin a prinsipio a mangiwanwan ken mangipamaysa ti pokustayo ken Jesucristo.30
Sidadaan amin dagitoy a panagpasnek, ubing ken nataengan. Dakayo a babbarito nga agiggem iti nasantuan nga Aaronic Priesthood, mayaplikar kadakayo ti amin nga insaok ita. Agyamanak iti Dios para kadakayo. Aramidenyo dagiti sagrado nga ordinansa ken katulagan a sidadaan kadagiti riniwriw a Santo iti Ud-udina nga Aldaw iti linawas. No isagana, bendisionan, wenno ipasayo ti sakramento; agserbi; mamuniag iti templo; awisen ti maysa a gayyem iti aktibidad; mangispal iti maysa a miembro ti korumyo, ar-aramidenyo ti aramid ti pannakaisalakan. Makitayo met ti Jesucristo ket agbiagkayo iti katulaganyo iti inaldaw. Ikarik a no aramidenyo, agbalinkayto a matalek a katulongan ti Apo ita ken, iti umay nga aldaw, maingel nga elder ti Israel.
Kakabsat, ammok a kasla aglablabes amin dagitoy. Ngem laglagipenyo koma dagitoy a balikas ti Mangisalakan: “Saanak nga agmaymaysa, gapu ta kaduak ti Ama.”31 Kastatayo met. Ditayo agmaymaysa. Patpatgendatayo ni Apo Jesucristo ken ti Amatayo iti Langit, ken kaduatayo Ida.32 Gapu ta kinita ni Jesus ti Amana ken lineppasna ti naindaklan a pangsubbot a sakripisio, makitatayo met ni Jesucristo a mangnamnama a tulongannatayto.
Awan kadatayo ti perpekto. No dadduma agsardengtayo. Masinga wenno maupaytayo. Madalupotayo. No kumitatayo ken ni Jesucristo nga addaan iiti agbabbabawi a puso, itag-aynatayto, dalusannatayo iti basol, pakawanennatayo, ken agasanna ti puspusotayo. Naanus ken naasi; awan patinggana ken di kaano man mapaay ti pangsubbot nga ayatna.33 Tulongannatayto nga agbiag kadagiti katulagantayo ket padakkelenna ti takemtayo kas elder ti Israel.
Ken bendisionannatayto ti Ama iti amin a banag a kasapulan tapno maipatungpal dagiti panggepna— “bambanag, iti langit ken iti daga nga agpadpada, ti biag ken ti lawag, ti Espiritu ken ti bileg, a naibaon babaen ti pagayatan ti Ama babaen ni Jesucristo, ti Anakna.”34
No agayus ti nadiosan a lawag ken bileg iti biagtayo, mapasamak ti tallo namilagruan a banag:
Umuna, makitatayo! Babaen ti paltiing makitatayo kas iti pannakakita ni Jesus iti babai:: iti labes ti rabaw iti puso.35 No kumitatayo a kas panangkita ni Jesus, bendisionannatayo nga ayatentayo dagiti pagserbiantayo iti ayatna. Iti tulongna, dagiti pagserbiantayo ket makitadanto ti Apo ken mariknada ti ayatna.36
Maikadua, adda bilegtayo iti priesthood! Adda turay ken bilegtayo nga agtignay iti nagan ni Jesucristo a “mangbendision, mangiwanwan, mangsaluad, mangpapigsa, ken mangagas kadagiti dadduma” ken mangyeg iti milagro kadagiti ay-ayatentayo ken mangpatalinaed a natalged ti kallaysa ken pamiliatayo.”37
Maikatlo, kaduanatayo ni Jesucristo! No sadino ti apanantayo, Isu ti papananna. No mangisurotayo, mangisuro Isuna. No mangliwliwatayo, mangliwliwa Isuna. No mangbendisiontayo, mangbendision Isuna.38
Kakabsat, awan kadi ti karbengantayo nga agragsak? Adda! Iggemtayo ti nasantuan a priesthood ti Dios. No kumitatayo ken ni Jesucristo, agbiag kadagiti katulagantayo, ket agpokustayo Kenkuana, kumaduatayto kadagiti kakabsattayo a babbai ket agserbitayo iti nasansantuan a wagas, mangummong iti nawarawara nga Israel iti agsumbangir ti belo, mangpapigsa ken mangilantip kadagiti pamiliatayo, ken mangisagana iti lubong iti Maikadua a Yaay ni Apo Jesucristo. Mapasamakto daytoy. Ngarud paneknekak.
Gibusak iti naimpusuan a kararagko, a datayo amin, tunggal maysa, kumitatayto ken ni Jesucristo iti tunggal panunot. Dikayo agduadua. Dikayo agbuteng. Iti nagan ni Jesucristo, amen.