Panagbalin a Pagwadan dagiti Santo iti Ud-udina nga Aldaw
Ibatik ti ayat ken bendisionko kadakayo, tapno mabalinyo ti agpennek iti balikas ti Apo ken maaramatyo dagiti pannursurona iti bukodyo a biag.
Daytoy ti makaparegta ken napnuan pakasaritaan a komperensia. Kumitatayo iti masakbayan nga addaan iti kinaregget. Naparegtatayo nga agaramid iti nasaysayaat ken agbalin a nasaysayaat. Nagpintasen dagiti nakaskasdaaw a mensahe a naisangbay manipud iti daytoy a pulpito babaen dagiti General Authority ken Sapasap nga Opisial ken ti musika! Guyugoyenkayo a mangadal kadagitoy a mensahe, a mangrugi iti daytoy a lawas.1 Dagitoy ti mangipeksa iti panunot ken pagayatan ti Apo para kadagiti taona, iti agdama.
Ti baro nga integrated kurikulum a nakasentro iti pagtaengan ken suportado ti Simbaan ket addaan iti potensial a mangwarwar iti bileg dagiti pamilia, no sumurot ti tunggal pamilia babaen ti napudno ken naannad tapno agbalin ti pagtaenganda a santuario ti pammati. Ikarik a bayat ti sipapasnek a panangtrabahoyo a mangurnos manen ti pagtaenganyo nga agbalin a maysa a sentro a pagsursuruan iti ebanghelio, agbalinto dagiti aldawyo iti Sabbath a maysa a pagragsakan. Aggagarto dagiti annakyo nga agsursuro ken agbiag kadagiti pannursuro ti Mangisalakan, ket ti impluensia ti kabusor iti biagyo ken iti pagtaenganyo kumapsutto. Maaddaanto iti dakkel ket agtultuloy a panangbalbaliw iti pamiliayo.
Kabayatan daytoy a komperensia pinapigsatayo ti pangngeddeng nga ipatungpal ti napateg a panagkagumaan a mangdayaw iti Apo a ni Jesucristo tunggal kanito nga itudotayo ti Simbaanna. Ikarik kadakayo a ti naannad nga atensiontayo a panangusar iti umno a nagan ti Simbaan ti Mangisalakan ken dagiti miembrona ket agbanag iti dakdakkel a pammati ken nayon a naespirituan a kabaelan kadagiti miembro ti Simbaanna.
Ita pagsasaritaantayo ti maipapan kadagiti templo. Ammotayo a napateg ti orastayo iti templo iti pannakaisalakan ken pannakaitan-oktayo ken dagiti pamiliatayo.
Kalpasan nga umawattayo kadagiti bukodtayo nga ordinansa iti templo ken agaramidtayo kadagiti sagrado a katulagan iti Dios, kasapulan ti tunggal maysa kadatayo ti agtultuloy a naespirituan pannakapapigsa ken pannakasursuro a posible laeng iti balay ti Apo. Ket kasapulandatayo dagiti kapuonantayo a nasken nga agserbi a kas mangisaup [proxy] para kadakuada.
Ibilang ti naindaklan a kaasi ken kinaimbag ti Dios, nga, idi sakbay ti pannakabukel ti lubong, nangipaay iti wagas a pakaitedan kadagiti bendision ti templo kadagiti natay nga awanan iti pannakaammo iti ebanghelio. Maar-aramiden dagitoy sagrado a seremonia iti templo idi un-unana. Para kaniak dayta a panagbalin a nagkauna ket mangted iti inspirasion ken maysa a pakakitaan iti kinapudnoda.2
Patpatgek a kakabsatko a lallaki ken babbai, ad-adda nga immadu ti panangdarup ti kabusor, iti nakarkaro ken iti nadumaduma a klase.3 Ti panagkasapulan iti masansan nga ipapan iti templo ket napatpateg pay ita. Ipakaasik kadakayo nga agkararagkayo a kumita no kasano a bubosenyo ti panawenyo. Mangipaaykayo iti oras iti masakbayanyo ken iti pamiliayo. No asidegkayo iti maysa a templo, allukoyenkayo a mangsapul iti wagas a regular a makipagkitakayo idiay iti Apo—iti nasantuan a balayna—kalpasanna aramidenyo dayta a paanakipagkita nga addaan iti kinahusto ken rag-o. Ikarik kadakayo nga isangbayto ti Apo dagiti milagro nga ammona a kasapulanyo kabayatan ti panangaramidyo kadagiti sakripisio nga agserbi ken agdaydayaw kadagiti templona.
Iti agdama addaantayon iti 159 naidaton a templo. Dagiti umno a panangaywan ken panangmentinir kadagita a templo ket napateg unay kadatayo. Iti panaglabas ti panawen, kasapulan a matarimaan ken mabalbaliwan dagiti templo. Gapu iti dayta, maar-aramiden ti plano ita nga i-renovate ken i-update ti Salt Lake Temple ken dadduma pay nga immuna a templo. Maibinglayto dagiti detalye kadagitoy a proyekto bayat ti pannakapasayaatda.
Ita nga aldaw maragsakankami a mangipakaammo kadagiti plano a mangipatakder iti 12 pay a templo. Mabangonto dagiti templo kadagiti sumaganad a lokasion: Mendoza, Argentina; Salvador, Brazil; Yuba a Siudad, California; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; ken Washington County, Utah.
Ti panangbangon ken panangmentinir kadagiti templo ket mabalin a saan a mangbalbaliw iti biagyo, ngem awan duadua a mangbalbaliwto iti biagyo ti panangbubosyo iti panawenyo iti templo. Kadagiti nabayagen a di nakapan iti templo, allukoyenkayo nga agsagana ken agsubli iti kabiitan no mabalin. Kalpasanna awisenkayo nga agrukbab iti templo ken agkararagkayo a mangrikna a naan-anay iti awan patinggana nga ayat ti Mangisalakan para kadakayo, tapno magun-od ti tunggal maysa kadakayo ti bukodyo a pammaneknek nga Isu ti mangiturong iti daytoy sagrado ken awan sardayna nga aramid.4
Kakabsat, agyamanak kadakayo iti pammati ken panagkagumaanyo. Ibatik ti ayat ken bendisionko kadakayo, tapno mabalinyo ti agpennek iti balikas ti Apo ken maaramatyo dagiti pannursurona iti bukodyo a biag. Ipanamnamak kadakayo nga agtultuloy ti paltiing iti Simbaan ken agtultuloyto agingga “ti pannakatungpal dagiti panggep ti Dios, ket kunanto ti Naindaklan a Jehova nalpasen ti aramid.”5
Bendisionankayo iti dakdakkel a pammati Kenkuana ken iti nasantuan nga aramidna, nga addaan iti pammati ken panaganus nga agibtur iti bukodyo a pannubok iti biag. Bendisionananka nga agbalin a pagwadan dagiti Santo iti Ud-udina nga Aldaw. Kasta met a bendisionankayo ken paneknekak a sibibiag ti Dios! Ni Jesus ti Cristo! Daytoy ti Simbaanna. Datayo dagiti taona, iti nagan ni Jesucristo, amen.