Panangisagana iti Pundasion ti Naindaklan nga Aramid
Dagiti adalen a naisuro babaen dagiti kannawidan nga ipasdektayo iti pagtaengantayo, bassit man ken gagangay, ket napategda unay iti agdama a lubong.
Kas nagannak iti Zion, adda sagrado a pagrebbengantayo a mangriing iti tarigagay ken pinget dagiti annaktayo a mangtun-oy iti ragsak, lawag, ken kinapudno iti ebanghelio ni Jesucristo. Bayat ti panangpatan-aytayo kadagiti annaktayo, mangbukeltayo iti kannawidan iti pagtaengantayo ken binuangaytayo dagi ti pagtuladan ti panagsasarita ken ugali iti relasion ti pamiliatayo. Iti kasta, ti buklentayo a kannawidan maipasdektayo ti natibker, saan a maisin a kinaimbag kadagiti annaktayo a mangparegget kadakuada a sumango kadagiti karit iti biag.
Iti adun a tawen nagpennek ti pamiliami iti tinawen a kannawidan mga agkamping iti Bambantay ti Uintah iti amianan a daya ti Utah. Agbiahekami iti 20 milia (32 a kilometro iti kabatuan a kalsada sakbay a makadanonkami iti napintas a berde a tanap, nga addaan natatayag a tikaptikap a derraas a pagayusan ti karayan nga addaan nalamiis, nalitnaw a danum. Tinawen, mangnamnamakami a mapatibker ti pateg ti doktrina ti ebanghelio ken kannawidan iti kaunggan dagiti annak ken appokomi, ket imbagami ken ni Susan kadagiti innem nga annakmi ken ti pamiliada a mangisaganada iti ababa a mensahe iti topiko a mariknada a napateg nga elemento iti pannakabangon ti taeng a naisentro ken ni Cristo. Naguummongkami para iti debosional ti pamilia iti napakni a lugar, ket inted ti tunggal maysa ti mensaheda.
Ita a tawen, insurat dagiti appokomi ti mensaheda iti bato, kalpasanna, saggaysa, inkalida a nagaabay, a mangibagi iti natibker a pundasion a pakabuklan ti naragsak a biag. Nairaman iti innem a mensaheda ti saan a mabaliwan, agnanayon a kinapudno a ni Jesucristo ti panuli a bato dayta a pundasion.
Iti balikas ni Isaiah, “Gapuna kinuna ti Apo a Dios, Adtoy, ipasdekko idiay Zion ti pundasion a bato, ti natenneb a bato, ti napateg a bato a panuli, ti natibker a pundasion.”1 Ni Jesucristo dayta napateg a panuli ti pundasion ti Zion. Isu ti nangipalgak ken ni Propeta Joseph Smith: “Gapuna, dikay mabannog nga agaramid iti nasayaat, ta mangipaspasdekkayo iti pundasion ti naindaklan nga aramid. Ta babassit a banag ti pagtaudan ti naindaklan.”2
Nupay bassit ken gagangay dagiti adalen a naisuro kadagiti kannawidan a naaramid iti pagtaenganmi, napategda met unay iti agdama a lubong. Ania dagita babassit ken gagangay a banag, a no mairuam, agbalinda a naindaklan nga aramid iti biag dagiti annakmi?
Nagsarita itay nabiit ni Presidente Russell M. Nelson iti dakkel a kongragasion idiay Toronto, Canada, ket naiparikna ti pannakaipalagip kadagiti nagannak ti sagrado a pagrebbengantayo a mangisuro kadagiti annaktayo. Maysa kadagiti kangrunaan a pagrebbengan nga inyunay-unay ni Presidente Nelson kadatayo kas nagannak ti panangisuro kadagiti annaktayo a maawatanda no apay a makiranudtayo iti sakramento, ti kaipapanan ti pannakaipasngay iti katulagan, ken ti pateg ti panagsagana ken yaawat iti bendision ti patriarka, ken inggunamgunamna kadagiti nagannak nga idauluanda ti panagbasa iti nasantuan a kasuratan ti pamilia. .3 Babaen dagitoy nga aramid, inggunamgunam ti patpatgentayo a propeta a pagbalinentayo dagiti pagtaengantayo a“sangtuario ti pammati.”4
Iti Libro ni Mormon, inrekord ni Enos ti napudno a panagyaman iti nariknana a pagarigan ti amana a “nangisuro kenkuana iti balikasna, ken iti pannaraon ken pammatalged ti Apo.” Napnuan rikna nga impeksa ni Enos, “Ket madaydayaw ti nagan ti Diosko.”5
Impategko dagiti babassit ken gagangay a kannawidan a sinursurotmi iti pagtaenganmi iti nasurok a 35 a tawen a panagdennami nga agassawa. Adu dagiti babassit a kannawidan ngem nabagasda. Kas pagarigan:
-
Kadagiti rabii nga adayoak iti pagtaenganmi, ammok a kanayon nga idauluan ti inauna a barok ti nakaisigudan, uray awan mangibagbaga, iti panagbasa iti scripture ken panagkararag ti pamilia. 6
-
Sabali pay a kannawidan—dikami rummuar iti balay wenno gibusan ti pannakisarita iti telepono, a saanmi a sawen ti, “Ay-ayatenka.”
-
Naparaburan ti biagmi iti kanayon a panangilatang iti oras a maay-ayo iti personal nga interbyu iti tunggal maysa kadagiti babbaromi. Iti naminsan, dinamagko iti barok maipanggep iti tarigagayna nga agsagana nga agmision. Bayat ti panagsarsaritami adda dagiti panagulimek, sa nagrukob bassit sana kinunana, “Tatang, malagipmo idi bassitak pay idi rinugianta ti agpatang?” kinunak, “Wen.” “Bueno,” kinunana, “inkarik idi a mapanak agmision, ken inkarim met a mapankayo ken ni Nanang agmision no nataengankayon.” Sa manen panagulimek. “Adda kadi problemayo a manglapped kadakayo iti panagserbiyo nga agmision—ngamin mabalin a makatulongak?”
Ti masansan, makaay-ayo a kanniwadan ti pamilia a mairaman ti kararag, panagbasa iti nasantuan a kasuratan, family home evening, ken idadar-ay kadagiti miting ti Simbaan, nupay kasla babassit ken gagangay, mangpataud iti pinnateg, respeto, panagkaykaysa, ken talged. Iti espiritu a maikadua kadagitoy nga aramid, mailiklik dagiti annakmi iti nadawis a pana dagiti kabusor a naibuddak iti nailubongan a kultura iti panawentayo.
Maipalagip kadatayo ti patigmaan ni Helaman iti anakna: “Laglagipem nga iti bato ti Mannubbottayo, a ni Cristo, ti Anak ti Dios, ti pangbangonam iti pundasionmo; tapno no ibaon ti diablo ti narungsot nga anginna, wen, dagiti urarona, wenno no basnotennaka ti narungsot a bagyona, awan kabaelanna a mangduprak kenka iti awan inggana a panagsagaba, gapu iti bileg a nakabangonam, nga isu ti pudno a pundasion, ti pundasion a no nabangon iti tao saan a marpuog.”7
Nabayag bassiten, idi agserserbiak a bishop, indawat ti nataengan a lalaki ti panagsarakmi. Inladawanna ti ipapanawna iti Simbaan ken dagiti nalinteg a kannawidan dagiti dadakkelna idi agtutubo pay. Sinaggaysana nga inladawan ti parikut a napadasanna iti biagna bayat ti panangsapulna iti manayon a ragsak, iti baet ti apagbiit a ragsak nga ipaay ti lubong. Ita, ta lakayen, napadasanna ti naanus, no dadduma mangaw-awis a parikna ti Espiritu ti Dios a mamagsubsubli kenkuana kadagiti adalen, aramid, rikna, ken naespirituan a talged idi ubing pay. Nagyaman kadagiti kannawidan dagiti dadakkelna, ken kadagiti balikas iti agdama, inusarna ti pakdaar ni Enos: “Madaydayaw koma ti nagan ti Diosko.”
Iti padasko, daytoy napateg a tao a nagsubli iti ebanghelio ti galad ti adu ket maulit-ulit kadagiti annak ti Dios a kimmayakay biit, tapno agsubli laeng kadagiti pannursuro ken aramid idi agtutuboda. Kadagita a kanito, masaksiantayo ti sirib ti mannurat iti proberbio a nangballaag kadagiti nagannak, “Iturongyo ti ubing iti dana a rumbeng a papananna: tapno inton nataenganen, saanto a pumanaw.”8
Tunggal nagannak adda kanito a maipasangoda iti pannakapaay ken dadduma pay bayat ti panagpatan-ayda iti annak. Nupay kasta, no usaren dagiti nagannak ti pammati bayat ti panangisuroda kadagiti annak, a napasnek ken naayat ken mangaramid iti amin a kabaelanda, umawatda iti naindaklan a namnama a ti immulada a bukel agramut iti puso ken panunot dagiti annakda.
Naawatan unay ni Moises ti kasapulan iti kanayon a panangisuro. Impatigmaanna, “Ket isuroyo [dagitoy a balikas] a sipapasnek kadagiti annakyo, ket kasaritayo ida no addakayo iti balayyo, ken no magmagmanakyo, ken no agid-iddakayo, ken no bumangonkayo.”9
Agparintumengtayo iti abay dagiti annakatayo no agkararag ti pamilia, tarabayentayo ida no agbasatayo iti nasantuan a kasuratan, aganustayo, siaayattayo, tarabayentayo ida no madama ti sfamily home evening, ket makipagriknatayo kadakuada no agparintumengtayo nga agdawat iti langit. O, anian a seggatayo kadagiti bukel nga imulmulatayo nga agramut kadagiti puspuso ken pampanunot dagiti annaktayo.
Mamatiak a saan unay a panunoten no “maawatan” dagiti annaktayo iti baet ti pannursurotayo, kas iti rigattayo nga agbasa iti nasantuan a kasuratan wenno mangaramid iti proyekto iti Duty to God wenno Young Women Recognition. Saan unay a panunoten no kadagita a kanito no maawatanda dagita nga aktibidad wenno saan unay a panunoten no, kas nagannak, umdas ti pammatitayo a sumurot iti balakad ti Apo no sursuroten, isuro, igunamgunam, ken matungpaltayo ti namnamaen nga adda iti ebanghelio ni Jesucristo. Isu dayta ti kabaelan a bunga ti pammatitayo—ti pammatitayo nga iti maysa nga aldaw ti bukel nga immulatayo idi ubbingda agramutto aguggot ken agrangpaya.
Dagiti banag a nasaotayo, dagiti banag nga inkasaba ken insurotayo, ti mangikeddeng kadagiti banag a mapasamakto kadatayo. Iti panangipasdektayo kadagiti nasayaat a kannawidan a mangisuro iti doktrina ni Cristo, saksian ti Espiritu Santo ti kinaagpayso ti mensahetayo ket taraonanna dagiti bukel ti ebanghelio a naimula iti puspuso dagiti annaktayo babaen ti panagkagumaantayo. Ipaneknekko iti nagan ni Jesucristo, amen.