Yangadyo dagiti Uloyo ket Agrag-okayo
Bayat ti panangsangotayo kadagiti narigat a banag iti wagas ti Apo, mayangadtayo koma ti ul-ulotayo ket agragsaktayo.
Idi 1981, napankami kada tatang, ken dua a nadekket a gagayyemko idiay Alaska. Agdissokami iti naiputputong a dan-aw ket umulikami iti sumagmamano a napintas a rangkis. Tapno lumag-an ti awitmi a masapul a bukod a bitbitenmi, binungonmi dagiti masapsapulmi iti kahon, binungonmi ida iti goma, ginalutanmi iti namarisan a pagilasinan, ket imbatomi ida iti tawa ti bassit nga eroplano iti panggepmi a papanan.
Idi makadissokami, nagsapulsapulkami, ngem napaaykami, awan nasarakanmi nga ania man kadagiti kahon. Agingga nga adda maysa a nakitami. Naglaon iti bassit a gas stove, kambas, babassit a kendi, ken sumagmamano a pakete ti Humburger Helper—ngem awan ti humburger. Awan ti wagas tapno makisarita iti saanmi a kadua, ket makalawas la ti pawayway ti panangalada kadakami.
Dua nga adal ti nasursurok itoy a padas: Umuna, dimo itinnag ti taraonmo iti tawa. Maikadua, no maminsan masapul a maipasangotayo kadagiti narigat a banag.
Masansan, ti umuna a mapanunottayo kadagitoy a banag “Apay a siak?” Nupay kasta, ti panagsaludsod no apay, saan a makapalag-an. Kayat ti Apo a parmekentayo dagiti pannubok, ket impakitana “nga amin dagitoy a banag mangtedda iti padas kadatayo, ket agbalinda a pagimbagantayo.”
No dadduma dawaten ti Dios kadatayo ti narikut a banag, ken no dadduma dagiti pannuboktayo ket bunga ti bukodtayo wenno ti dadduma a panangusar iti karbengan a pumili. Napadasan ni Nephi dagitoy dua a pasamak. Idi imbilin ni Lehi kadagiti annakna nga agsublida a mangala kadagiti plato manipud ken ni Laban, kinunana, “Adtoy nagtanabutob dagiti kakabsatyo, a kunada a narigat a banag ti imbagak kadakuada; ngem adtoy diak indawat kadakuada, ngem bilin ti Apo.” Iti sabali a gundaway, inusar dagiti kakabsat ni Nephi ti wayawayada a mangtubeng iti: “Linayatandak, ta adtoy, nalaus ti gurada, ket inrakeddak, ta kayatdak a patayen.”
Sinango ni Joseph Smith ti maysa a narigat a banag iti Liberty Jail. Iti kaawan ti tulong a makitana ken iti pannakaupay indawat ni Joseph, “O Dios, yanmo?” Awan duadua nga adda kadatayo nakarikna iti rikna ni Joseph.
Maipasango ti tunggal maysa kadagiti narigat a banag: ti ipapatay ti patpatgen, dibursio, nasukir nga anak, sakit, pannubok iti pammati, napukaw a trabaho, wenno dadduma pay.
Nagbalbaliwak a namimpinsan idi mangngegko ni Elder Neal A. Maxwell ti Korum ti Sangapulo-ket-dua, a nagkuna iti baet ti panagsagabana iti leukemia. Kinunana, “Agpampanunotak iti nauneg ket immapay iti panunotko dagitoy 13 a pakasursuruan ken pammatalged a balikas: ‘Inikkanka iti leukemia tapno maisurom a naimbag dagiti taok.’” Impeksana no kasano a nakatulong daytoy kenkuana iti “panirigan iti naindaklan a kinapudno ti agnanayon. … Makatulong kadatayo dagita a pannakaawat iti agnanayon nga idudur-as, a mabalin a narikut unay.”
Tapno makaruk-attayo kadagiti narikut a panawentayo iti pannakaawat iti agnanayon, isingasingko man dagitoy dua a banag. Masapul a sanguentayo dagiti narigat a banag, umuna, babaen ti pammakawantayo kadagiti dadduma ken, maikadua, babaen ti panangtedtayo iti bagitayo iti Nailangitan nga Ama.
Ti panagpakawan kadagiti nangigapu iti pagrigatantayo ken panangitunostayo iti “bagi[tayo] iti pagayatan ti Dios” ket mabalin a narigat unay. Ad-adda a makasair iti rikna no ti narigat a banag ket pinataud ti maysa a miembro ti pamilia, maysa a nasinged a gayyem, wenno uray pay ti bagitayo a mismo.
Idi nabiitak pay a bishop, naadalko ti mangpakawan idi imbingay ti stake presidentko, ni Bruce M. Cook, daytoy sumaruno nga estoria. Inlawlawagna:
“Idi arinunos ti 1970, adda kaduak a nanglukat iti negosio. Nupay awan ilegal nga inaramidmi, adda di nasayaat a desision, a dinagnayan ti narikut nga ekonomia idi, ti nakaigapuan ti pannakalugimi.
“Adda dagiti imbestor a nangisaklang kadakami tapno mapasublida ti pukawda. Maysa pay met ngarud a mamagbaga ti bishopric ti abogadoda. Narigat unay a kanunongan ti tao a mangpanggep a mangdadael kaniak. Narigat unay a kanunongan ti tao a kasla mangpanggep a mangdadael kaniak. Adda timmaud a pannakasemsemko kenkuana ket imbilangko a kabusor Kalpasan ti lima a tawen ti legal a pannakilaban iti kaso, napukawmi amin a sanikuami, agraman ti pagtaenganmi.
Idi 2002, naammuanmi nga agassawa a mabaliwan a mabukel ti panguluen ti stake a nakaibilangak a maysa a mamagbaga. Iti panagbiahemi iti ababa a bakasion sakbay ti pannakai-releaseko, dinamagna no asino dagiti piliek a mamagbagak no siak ti mapili a baro a presidente ti stake. Diak kayat a pagsaritaan maipapan daytoy, ngem nagpilit isuna. Idi agangay, maysa a nagan ti panunotko. Sana dinakamat ti nagan ti abogado nga imbilangmi a nakaigapuan ti panagrigrigatmi iti napalabas a 20 a tawen. Bayat ti panagsaona, imparikna ti Espiritu nga isu ti maysa kadagiti mamagbaga. Mapakawanko kadi ti tao?
“Idi indiaya ni Elder David E. Sorensen kaniak ti awag nga agserbi a presidente ti stake, inikkannak iti maysa nga oras a mangpili iti counselorko. Babaen dagiti luak, impakitak nga inteden ti Apo dayta a paltiing. Idi ibagak ti nagan ti tao nga imbilangko a kabusor, napukaw ti pungtot, pannakasemsem, ken gurak. Iti dayta a kanito, naadalko ti talna a sumangbay iti pammakawan babaen ti Pannubbot ni Cristo.”
Iti sabali a pannao, “pinakawan” ti stake presidentko isuna, kas ken ni lakay a Nephi. Ammok a nalinteg a lider ti priesthood ni Presidente Cook ken ti mamagbagana nga agpimpinnateg. Inkeddengko ti agbalin a kas kadakuada.
Mano a tawen kasakbayanna, bayat ti napasamakmi idiay Alaska, naadalko a dagus a ti panangpabasol kadagiti kasasaadmi iti sabali—ti panagpaipuruak ti piloto kadagiti taraon iti kasipngetan—ket saan a makatulong. Nupay kasta, gapu iti bannogmi, kaawan ti taraon, sakit, ken pannaturog iti daga bayat ti bagyo a trapal laeng ti ulesmi, naadalko nga “awan ti imposible iti Dios.”
Agtutubo, ikkannakayo ti Dios kadagiti narigat a banag. Adda maysa a balasitang nga agtawen iti 14 ti nakiraman iti basketbol. Inarapaapna ti agay-ayam iti basketbol iti haiskul kas iti manangna. Sa naammuanna a naawagan dagiti dadakkelda a mangimaton iti maysa a mision idiay Guatemala.
Idi sumangpet, naduktalanna nga adda pay dagiti klasena iti Espaniol, ti lengguahe a dina pay naus-usar. Awan pay ti grupo ti sports dagiti babbalasitang iti eskuelada. Nagindeg isuna iti maika-14 a kadsaaran ti maysa a pasdek a nairut ti seguridad. Ken kangrunaanna, saan a makaruar nga is-isu gapu iti seguridad.
Dinengngeg dagiti dadakkelna ti panagsangsangitna a maturog iti mano a bulan. Daytoy ti nangpaliday kadakuada! Inkeddengda idi agangay a pagawidenda iti yan ni lelangna a pagadalanna iti high school.
Idi simrek ti asawak iti kuarto ti balasangmi tapno ibagana ti pangngeddengmi, nakitana ti balasangmi a nakaparintumeng nga iggemna ti Libro ni Mormon iti katrena. Inyarasaas ti Espiritu iti asawak, “Awanto ti problemana,” ket siuulimek ti asawak a rimmuar iti kuarto.
Saanmin a nangngegan nga agsangsangit sakbay a maturog. Gapu iti derterminasionna ken iti tulong ti Apo, situtured a sinagona dagidi tallo a tawen.
Idi aggibus ti misionmi, dinamagko iti balasangmi no kayatna ti mapan agmision. Ti sungbatna “Saan, Tang, nakapagmisionakon.”
Naayatanak iti dayta! Ngem kalpasan ti agarup innem a bulan, riniingnak ti Espiritu iti rabii gapu iti nalagipko: “Inawagakon ti balasangmo nga agmision.”
Adda iti panunotko ti “Nailangitan nga Ama, dakkelen ti naaramidna.” Inaturnak a dagus ti Espiritu ket naawatak a kasapulan ti Apo ti serbisiona kas misionaria.
Napankami nangaldaw a dua iti balasangko. Iti bangir ti lamisaan, kinunak, “Ganzie, ammom no apay nga addatayo ditoy?”
Kinunana, “Wen, Tang. Ammom a masapul nga agmisionak. Diak kayat ti mapan, ngem mapanak.”
Gapu ta immannugot iti kayat ti Nailangitan nga Ama, nagserbi Kenkuana a sipupuso, sipipinget, iti panunot, ken kabaelanna. Insurona ti amana a sumango no kasano ti agaramid iti narigat a banag.
Iti sangalubongan a debosional ni Presidente Russell M. Nelson para kadagiti agtutubo, nangkiddaw iti sumagmamano a naririgat a banag dagiti agtutbo. Kinuna ni Presidente Nelson: “Maikalima nga awisko ti pannakaidumdumayo; agbalinkayo a maigidiat iti lubong. … Ngarud, kasapulannakayo ti Apo nga aglanga, agtimek, aggunay, ken agkawes a kas maysa a pudno a disipulo ni Jesucristo.” Mabalin a narigat dayta a banag, ngem ammok a kabaelanyo—a sirarag-o.
Laglagipen a “panggep dagiti tao, ket tapno maaddaanda iti ragsak.” Iti amin a nagpadasan ni Lehi, nakarikna pay la iti ragsak. Malagipyo idi “kasta unay ti liday” ni Alma gapu kadagiti tao ni Ammonihah? Imbaga ti anghel kenkuana, “Nagasatka, Alma; gapuna, tumangadka ken agragsakka, … gapu ta napudnoka a mangsursurot kadagiti bilin ti Dios.” Naadal ni Alma ti naindaklan a kinapudno: makapagragsaktayo a kanayon no agtungpaltayo kadagiti bilin. Laglagipenyo a bayat dagiti gubat ken pannubok kadagiti panawen ni Kapitan Moroni, “awan ti naragragsak a panawen kadagiti tao ni Nephi.” Kabaelan ken nasken a sapulentayo ti ragsak no sanguentayo dagiti narigat a banag.
Sinango ti Mangisalakan dagiti narigat a banag: “ Ti lubong …ukomennanto isuna gapu iti kinamanagbasolda; gapuna a dusaenda, ket iturednanto; ken saplitenda, ket iturednanto. Wen, tupraanda, ket iturednanto, gapu iti naayat a panangngaasina ken ti naunday a panagituredna nga agpaay kadagiti annak ti tattao.”
Gapu iti dayta managayat a kaasi, intured ni Jesucristo ti Pannubbot. Kas banagna, imbagana iti tunggal maysa kadatayo, “Iti lubong addanto riribukyo: ngem agragsakkayo; naparmekkon ti lubong.” Gapu ken ni Cristo, maparmektayo met ti lubong.
Bayat ti panangsangotayo kadagiti narigat a banag iti wagas ti Apo, mayangadtayo koma ti ul-ulotayo ket agragsaktayo. Iti daytoy sagrado a gundaway a mangipaneknek iti lubong, ipakdaarko a sibibiag ti Mangisalakan ket iturongna ti Simbaanna. Iti nagan ni Jesucristo, amen. Iti nagan ni Jesucristo, amen.