Agkaykaysakayo ken ni Cristo
Isuro ni Elder Soares no kasano a nasaysayaat a maparegta, matulongan, ken masuportarantayo dagiti kabarbaro a convert ken dagiti interesado iti Simbaan.
Naimbag a malemyo, patgek a kakabsat. Kas kunami iti Portuguese idiay Brazil, “Boa tarde!” Nagasatak ta mairamanak itoy a ragup ti naisangsangayan a sapasap a komperensia ti Ti Simbaan ni Jesucristo dagiti Santo iti Ud-udina nga Aldaw babaen ti panangiturong ti patpatgentayo a propeta, ni Presidente Russell M. Nelson. Tagipatgek daytoy naindaklan a gundaway a panagdengngegtayo iti timek ti Apo babaen dagiti katulonganna iti daga itoy ud-udina nga aldaw a yantayo.
Nabaknang ti nakayanakak a Brazil iti natural resources. Maysa kadagitoy ti nalatak a Karayan Amazon, maysa kadagiti kadakkelan ken kaatiddogan a karayan iti lubong. Buklen ti dua nga agsina a karayan, a dagiti Solimoes ken Negro. Ti makaawis unay, agayus a dua iti sumagmamano a kilometro sakbay nga agtiponda, gapu iti aggidiat a naggapuanda, pegges, temperatura, ken ti adda a kemikoda. Kalpasan ti mano a kilometro, agtipon ti danumda, a mamagbalin iti danumna a maigidiat iti sigud. Iti daytoy laeng a panagtipon, ti panagbalin ti Karayan Amazon a nakaap-apres nga iti idadanonna iti Taaw Atlantiko, iduronna ti danum ti baybay tapno adda pay la tamnay a danum iti adu a kilometro a dumanon iti taaw.
Mayarig kadagiti karayan a Solimoes ken Negro a mamataud iti naindaklan a Karayan Amazon, agkaykaysa dagiti annak ti Dios a mapan iti Simbaan ni Jesucristo manipud iti agduduma a nagpadasan iti gimong, tradision, ken kultura, a mangbukel itoy nakaskasdaaw a komunidad ti Sasanto ni Cristo. Pagangayanna, babaen ti panangparegta, suporta, ken panagpipinnateg itoy karayan ti kinaimbag, makaitedtayo iti “makabang-ar a danum” ti ebanghelio iti mawaw a lubong.
Tinignay ti Apo dagiti propetana a mangisuro kadatayo a mangtarabay ken agpipinnateg, tapno makapagkaykaysatayo iti pammati ken panggep a sumurot ken ni Jesucristo. Kas kinuna ni Pablo, dagiti “nabuniagan ken ni Cristo ti maipaay ken ni Cristo…: ta agkaykaysakayo ken ni Jesucristo.”1
No agkaritayo iti pabuniag a surotentayo ti Mangisalakan, ipaneknektayo iti Ama a sisasaganatayo a mangitakder iti nagan ni Cristo.2 Iti panangikagumaantayo a maaddaan iti nadiosan a galadna iti biagtayo, agbalintayo a maigidiat iti kasisigudtayo, babaen ti Pannubbot ni Cristo nga Apo, ket tumibker ti ayattayo iti amin a tao.3 Mariknatayo a pudno a maseknantayo iti pagimbagan ken ragsak ti tunggal maysa. Makitatayo ti tunggal maysa kas agkakabsat nga annak ti Dios nga addaan nadiosan a nagtaudan, galad, ken kabaelan. Tarigagaytayo ti agpipinnateg ken agtitinnulong.4
Kastoy ti panangiladawan ni Pablo, ti Apostol iti Baro a Tulag, iti kaasi.5 Inladawan ni Mormon, ti propeta iti Libro ni Mormon, kas “natarnaw nga ayat ni Cristo,”6 nga isu ti kaindaklan, kataknengan, ken kabilgan nga ayat. Inladawan itay nabiit ti agdama a propetatayo, ni Presidente Russell M. Nelson, iti natarnaw nga ayat ni Cristo kas panagserbi, a kabilgan a pamuspusan nga agayat ken mangtaripato kadagiti dadduma kas iti inaramid ti Mangisalakan.7
Kitaentayto ti prinsipio ti ayat ken pannaripato, kas iti inaramid ti Mangisalakan, babaen ti pammaregta, tulong, ken panangtarabay kadagiti kapaspasurot ken dagiti mangrugrugi (nga agessem) nga agatendar kadagiti serbisio ti Simbaan.
No dagiti baro a gagayyemtayo rummuardan iti lubong ket awatendan ti ebanghelio ni Jesucristo, a sumurotdan iti Simbaan, agbalindan a disipulona, ta maipasngayda manen babaen Kenkuana.8 Pumanawda iti nakairuamanda a lubong ket pilienda ti sumurot ken ni Jesucristo, a sipupuso, a sumurotda iti baro a “karayan” kas iti nabileg a Karayan Amazon—ti karayan a naipanurok ti bileg ti kinaimbag ken kinalinteg nga agayus iti taeng ti Dios. Inladawan ida ni Apostol Pedro kas “napili a henerasion, natakneng a priesthood, nasantuan a nasion, naidaduma a tattao.”9 Iti pannakailaok dagitoy baro a gagayyem iti daytoy baro a karayan, makariknada iti apagapaman a pannakatikaw iti baro nga aglawlaw. Makita dagitoy baro a gagayyem ti bagida a makilaok iti karayan iti bukodda a nagtaudan, temperatura, ken nakabuklan a kemiko—ti karayan nga addaan bukod a tradision, petsa a suroten, kultura, ken bokabulario. Mabalin a masnebanda itoy baro a nakristianuan a biag. Panunotennyo biit ti mariknada iti damo a pannakangngegda kadagiti pagsasao kas iti “FHE,” “BYC,” “Domingo a panagayuno,” “panangbuniag kadagiti natay,” “Relief Society,” “Melchizedek Priesthood,” “tallo a kombinasion,” ken dadduma pay.
Nalaka a makita no apay a mariknada a dida maikari iti yanda. Iti kasta a kasasaad, masaludsodda iti bagida, “Adda kadi lugarko ditoy? Maikariak kadi iti Ti Simbaan ni Jesucristo dagiti Santo iti Ud-udina nga Aldaw? Ditoyak kadi a talaga? Masapulnak kadi ti Simbaan? Makasarakak kadi iti baro a gagayyem a tumulong ken mangtarabay kaniak?
Patgek a gagayyem, iti kasta a gundaway, kadagiti maigidiat ti paniriganna a nabayagen a tumultulong masapul nga itanggayada ti nabara a pannarabayda kadagiti baro a gagayyemtayo, awaten ida no asinoda man, ken tumulong, ipateg, ken iraman ida iti biagtayo. Napateg amin dagitoy baro a gagayyem nga annak ti Dios.10 Ditay kabaelan a mapukaw ti uray maysa kadakuada gapu ta, kas iti Karayan Amazon agpannurayda met iti tulong, masapultayo ida a kas iti pannakasapulda kadatayo, tapno agbalin a nabileg a puwersa para iti pagsayaatan ti lubong.
Mangyeg dagiti baro a gagayyemtayo iti talento nga inted ti Dios, gagar, ken kinaimbag iti Simbaan. Makaawis ti reggetda iti ebanghelio, ngarud makatulong a mangpasiken iti testimoniatayo. Mangyegda pay iti baro a panirigan iti pannakaawattayo iti biag ken iti ebanghelio Mangyegda pay iti baro a panirigan iti pannakaawattayo iti biag ken iti ebanghelio. Kas nasaokon, masapultayo ida a kas iti pannakasapulda kadatayo a mainayon iti nabileg a karayan bayat ti panagtuloyna nga agayus iti taaw.
Nabayagen a maisursurotayo no kasano ti itutulongtayo kadagiti baro a gagayyem a mangrikna a maawat ken maipatpategda iti Simbaan ni Jesucristo. Masapulda ti tallo a banag tapno agtalinaedda a natibker ken napudno iti unos ti panagbiagda:
Umuna, masapulda ti kakabsat iti Simbaan a napudno a mangipateg kadakuada, napudno ken di manglipat a gagayyem a kanayon a makatulong kadakuada, a mangtarabay kadakuada, ken mangsungbat kadagiti saludsodda. Kas miembro, masapul a sisasaganatayo a mangkita kadagiti baro a rupa no mapantayo iti aktibidad ken miting ti Simbaan, ania man ti pagrebbengan, akem, wenno aramidtayo. Makatulongtayo iti uray bassit kadagitoy baro a gagayyem a mangrikna nga ipatpategtayo ida iti Simbaan, kas iti nabara a kablaaw, napudno nga isem, makikatugaw kadakuada nga agkanta, mangyam-ammo kadakuada kadagiti dadduma a miembro, ken dadduma pay. Iti pananglukattayo iti puspusotayo kadagiti baro a gagayyem, tungtungpalentayo ti espiritu ti ministering. No agserbitayo kadakuada kas iti inaramid ti Mangisalakan, dida marikna a “ganggannaetda iti ruangantayo.” Mariknada ti pannakaikarida ket maaddaanda iti gagayyem, ken kangrunaanna, mariknada ti ayat ti Mangisalakan babaen ti napudno a panangipateg.
Maikadua, masapul dagiti baro a gagayyem ti naidutok nga aramiden—ti gundaway nga agserbi iti dadduma. Ti panagserbi ti maysa kadagiti naindaklan nga aspekto ti Ti Simbaan ni Jesucristo dagiti Santo iti Ud-udina nga Aldaw. Daytoy ti proseso a mangpatibker iti pammati. Tunggal baro a gagayyem maikarida iti dayta a gundaway. Idinto a rebbengen ti bishop ken ti ward council ti mangted iti pagrebbengan, awan makalapped kadatayo a mangawis kadagiti baro a gagayyemtayo a tumulong kadatayo nga agserbi babaen ti proyekto ti panagserbi.
Maikatlo, masapul a “mataraonan dagiti baro a gagayyem iti nasayaat a balikas ti Dios.”11 Matulongantayo ida a mangipateg ken pamiliar kadagiti nasantuan a kasuratan bayat ti panangibasa ken pangilawlawag dagiti pannursuro kadakuada, a mangted iti konteksto kadagiti estoria ken mangilawlawag kadagiti narigat a balikas. Maisurotayo pay ida nga umawat iti bukod a pannarabay babaen ti masansan a panagadal iti nasantuan a kasuratan. Mainayon pay, mabalintayo a sarungkaran dagitoy baro a gagayyem iti pagtaenganda ken awisen met ida iti pagtaengantayo iti ruar iti naituding a miting ken aktibidad ti Simbaan, tumulong kadakuada a makiraman iti nabileg a karayan ti komunidad dagiti Santo.
Iti panangbigbig kadagiiti panagbalbaliw ken pannubok kadagiti baro a gagayyemtayo iti panagbalinda a miembro ti pamilia ti Dios, kas kakabsat, maibagatayo no kasano ti panangparmektayo iti umarngi a pannubok iti biagtayo. Makatulong daytoy kadakuada a saanda a maymaysa ken bendisionan ida ti Dios iti panamatida iti karina.12
Iti panagtipon dagiti Karayan Solimoes ken Negro, bimmileg ken pimmigsa ti Karayan Amazon. Iti umarngi a wagas, no agtutunostayo kadagiti baro a gagayyem, ad-adda a pumigsa ken tumibker ti Simbaan ni Jesucristo. Agyamankami unay iti kaingungotko, a ni Rosana, kadagiti timmulong kadakami a nakitipon iti daytoy baro a karayan adun a tawen ti napalabas idi inawatmi ti ebanghelio ni Jesucristo iti pagilianmi a Brazil. Iti unos dagiti tawen, pudno a nagserbi ken tinulongandakami dagitoy nasisingpet a tao a nangituloy iti panagayus ti kinalinteg. Agyamankami unay kadakuada.
Ammo dagiti propeta iti Western Hemisphere no kasano a pagtalinaeden dagiti baro a gagayyem a makilaok a sipapammati iti daytoy baro a karayan ti kinasayaat nga agturong iti agnanayon a biag. Kas pagarigan, iti pannakakitami iti panawenmi ken pannakaammomi a sumango kadagiti maipada a pannubok,13 inraman ni Moroni dagiti napateg nga addang iti panangisuratna iti Libro ni Mormon:
“Ket kalpasan ti pannakaawatda iti pagbuniagan, ken natubay ken nadalusanda babaen ti bileg ti Espiritu Santo, nairamanda kadagiti tao ti simbaan ni Cristo; ket nairaman dagiti naganda, tapno malaglagipdanto ken mataraunan babaen dagiti nasayaat a balikas ti Dios, tapno agtalinaedda iti umno a dana, tapno agtalinaedda a mangsiput babaen ti kararag, nga agtalek laeng kadagiti kinaimbag ni Cristo, nga isu ti awtor ken mangileppas iti pammatida.
“Ket masansan ti panagmimiting ti simbaan, nga agayuno ken agkararag, ken agsasarita maipanggep iti pagimbaganda.”14
Patpatgek a kakadua iti aramid ti Apo, mamatiak a makaaramidtayo iti nasaysayaat ken masapul nga agaramidtayo iti nasaysayaat iti panangawattayo kadagiti baro a gagayyem iti Simbaan. Awisenkayo a mangpanunot iti maaramidtayo a mangalamano, mangawat, ken tumulong kadakuada, mangrugi iti daytoy umay a Domingo. Annadanyo a di mabaybay-an ti rebbengenyo iti Simbaan a mangpasangbay kadagiti baro a gagayyem kadagiti miting ken aktibidad ti Simbaan. Gapu ta, napateg dagitoy a kararua iti imatang ti Dios ken napatpateg pay ngem kadagiti programa ken aktibidad. No tumulongtayo kadagiti baro a gagayyem a sipupuso a napnuan panangipateg kas iti Mangisalakan, ikarik kadakayo, iti naganna, a tulongannatayo iti aramidtayo. No agtignaytayo kas sipapammati a ministro, kas iti Mangisalakan, maaddaan dagiti baro a gagayyemtayo iti tulong a kasapulanda nga agtalinaed a natibker, napasnek, ken agnanayon a napudno. Makiramanda kadatayo nga agbalin a natibker a tao ti Dios ken tumulong kadatayo a mangidanon iti natarnaw a danum iti lubong a makasapul iti bendision ti ebanghelio ni Jesucristo. Dagitoy annak ti Dios mariknada a “saanda a ganggannaet, ngem kailian ida dagiti santo.”15 Ikarik a bigbigendanto ti kaadda ti Mangisalakan iti bukodna a Simbaan. Makipagayusda kadatayo a kas karayan iti burayok ti amin a kinaimbag agingga iti nakatanggaya a takiag ti Apotayo a ni Jesucristo; ket mangngegda a kuna ti Ama, “Maaddankayonto iti agnanayon a biag.”16
Awisenkayo a mangsapul iti tulong ti Apo a mangayat kadagiti dadduma kas iti panangipategna kadakayo. Insuro ni Mormon, “Gapuna, patpatgek a kakabsat, agkararagkayo iti Ama a naimpusuan, tapno mapnokayo iti ayatna, nga insagutna kadagiti amin a napudno a pasurot ti Anakna, ni Jesucristo.”17 Kadagitoy a kinapudno, paneknekak ket aramidek iti nagan ni Jesucristo, amen.