Dagiti Nagannak ken Annak
Ibaga kadakayo ti naindaklan a plano ti Amatayo iti Langit no asinokayo ken ti panggep ti biagyo.
Patpatgek a kakabsatko a babbai, nagpintasen nga addaantayo iti daytoy baro a sesion dagiti babbai iti sapasap a komperensia ti Simbaan nga agtawen iti walo ken natataengan. Nangngeganmi dagiti makaparegta a mensahe manipud kadagiti lider a kakabsat a babbai ken manipud ken ni President Henry B. Eyring. Naayatkami ken ni President Eyring nga agtartrabaho babaen ti panangiturong ni President Russell M. Nelson, ken pasungadanmi ti napadtuan a mensahena.
I.
Dagiti annak ti kapatgan a sagut manipud iti Dios—ti agnanayon a panagadutayo. Ngem, agbibiagtayo iti panawen a saan a kayat ti adu a babbai ti agpasngay ken agpadakkel kadagiti annak. Itantan ti adu a babbaro ken babbalasang ti kallaysa agingga a di mapennek dagiti temporal a kasapulan. Ngimmato ti gagangay nga edad ti kallaysa dagiti miembro ti Simbaan iti nasurok a dua a tawen, ken bimmaba ti bilang dagiti naipasngay kadagiti miembro ti Simbaan. Maipasango ti Estados Unidos ken sabsabali pay a pagilian iti masakbayan ti nakabasbassit a bilang dagiti ubbing a dumakkel a nataengan a pangsuporta iti bilang dagiti agretiro a nataengan.1 Nasurok a 40 porsiento dagiti naipasngay nga ubbing iti Estados Unidos kadagiti saan a nagkallaysa nga inna. Nalaka a masulisog dagita nga ubbing. Maaramid dagitoy nga ayo a maibusor iti nadiosan a plano ti pannakaisalakan.
II.
Maawatan dagiti Santa iti Ud-udina nga Aldaw a ti panagbalin nga ina ti kangatuan a prayoridadda, ti kangrunaan a rag-oda. Kinuna ni President Gordon B. Hinckley: “Makita dagiti babbai iti kaaduan a paset ti kadakkelan a pannakapnekda, kadakkelan a ragsakda iti pagtaengan ken pamilia. Immula ti Dios iti uneg ti babbai ti maysa a nadiosan a mangyebkas iti bagina ti naulimek a pigsa, iti pannakamuli, iti talna, iti kinaimbag, iti saguday, iti kinapudno, iti ayat. Ket masarakan iti kinaina ti amin dagitoy a napipintas a kababalin ti kapudnuan ken makapakapnek a panangipeksada.”
Intuloyna: “Ti kaindaklan a trabaho nga aramidento ti asino man a babai ket iti panangaywan ken panangisuro ken panangbiag ken panangparegta ken panangpadakkel kadagiti annakna iti kinalinteg ken kinapudno. Awan ti sabali pay a banag a pangidasiganto iti dayta, ania man ti aramidenna.”2
Inna, patpatgek a kakabsat a babbai, ay-ayatendakayo asinokayo man ken no ania man ti aramidenyo para iti amin kadatayo.
Iti napateg a mensahena iti 2015 a napauluan iti “A Plea to My Sisters,” kinuna ni President Russell M. Nelson:
“Di maileppas ti pagarian ti Dios no awan dagiti babbai nga agaramid iti sagrado a katulagan ken agtungpal kadagitoy, babbai a makapagsao babaen ti bileg ken turay ti Dios!
“Ita, … kasapulantayo dagiti babbai a makaammo nga agaramid iti napateg a banag a mapasamak babaen ti pammatida ken natured a mangsaluad iti moralidad ken dagiti pamilia iti managbasol a lubong. Kasapulantayo dagiti babbai a napasnek nga agay-aywan kadagiti annak ti Dios iti dalan ti katulagan nga agturong iti pannakaitan-ok; babbai a makaammo nga umawat iti bukod a paltiing, a makaawat iti bileg ken talna ti endowment iti templo; babbai a makaammo nga umawag kadagiti bileg ti langit a mangsaluad ken mangpapigsa kadagiti annak ken pamilia; babbai a natured a mangisuro.”3
Dagitoy naparegta a pannursuro ket maibatay amin iti “Ti Kaamaan: Maysa a Waragawag ti Lubong,” a pangitalgedan daytoy naisubli a Simbaan iti doktrina ken aramid a maisentro iti plano ti Namarsua sakbay a pinarsuana ti daga.
III.
Ita agsaritaak kadagiti ub-ubing a grupo dagitoy agbuybuya. Patpatgek a kakabsatko a babbalasitang, gapu iti pannakaammoyo iti naisubli nga ebanghelio ni Jesucristo, naidumdumakayo. Ti pannakaammoyo ti mangpabaelto kadakayo a mangibtur ken mangparmek iti rigrigat ti panagdakkel. Manipud idi ubingkayo, nakiramankayon iti proyekto ken programa a nangpadur-as iti talentoyo, kas iti panagsurat, panagsarita, ken panagplano. Naadalyon ti responsable a galad ken no kasano a liklikanyo dagiti sulisog nga agulbod, agkusit, agtakaw, wenno agusar iti makabartek wenno druga.
Nabigbig ti kinaidumdumayo iti panagadal ti Unibersidad ti North Carolina maipapan kadagiti agtutubo ken relihion iti America. Ti artikulo a Charlotte Observer ket addaan iti paulo a “Mormon teens cope best: Study finds they top peers at handling adolescence.” Inggibus daytoy nga artikulo a “Kalaingan dagiti Mormon iti panangliklik iti makapeggad a tignay, nalaing iti eskuela ken kaadda ti napintas a galad maipanggep ti masakbayan.” Maysa kadagiti agsuksukisok iti panagadal, a nanginterbyu iti kaaduan nga agtutubotayo, kinunana, “Dumani tunggal kategoria a makitami, adda nalawag a pagtuladan: umuna dagiti Mormon.”4
Apay nga agballigikayo kadagiti rigrigat ti panagdakkel? Babbalasitang, gapu ta maawatanyo ti naindaklan a plano ti ragsak ti Ama iti Langit. Daytoy ti mangibaga no asinokayo ken ti panggep ti biagyo. Dagiti agtutubo a makaawat iti dayta ket umuna iti panagsolbar iti problema, umuna iti panagpili iti umno. Ammoyo a matulongannakayo ti Apo a mangparmek iti amin a rigrigat ti panagdakkel.
Maysa pay a gapu ti kinasamayyo ket maawatanyo nga annaknakayo ti Ama iti Langit a mangipatpateg kadakayo. Siguradoak nga ammoyo ti napintas a himnotayo a “Dearest Children, God is Near You.” Daytoy ti umuna a berso a kinanta ken patientayo amin:
Patpatgenmi nga annak, asideg ti Dios kadakayo,
Aldaw ken rabii a bantayannakayo,
Naragsak a mangawag ken mangparabur kadakayo,
No ikarigatanyo nga aramiden ti umno.5
Dua ti sursuro iti dayta a berso: Umuna, asideg ti Ama iti Langit kadatayo ket bantayannatayo iti aldaw ken rabii. Panunotenyo! Patpatgennatayo ti Dios, asideg kadatayo, ken bantayannatayo. Maikadua, naragsak a mangbendision kadatayo no “ikarigatantayo nga aramiden ti umno.” Anian a pannakaliwliwa iti baet dagiti panagdandanag ken panagrigrigat!
Wen, babbalasitang, nagasatkayo ken nagsayaatkayo, ngem kapadakayo amin dagiti annak ti Ama iti Langit a kasapulanyo nga “ikarigatan nga aramiden no ania ti umno.”
Ditoy mabalakadankayo iti adu a nadumaduma a banag, ngem pinilik a saritaen maipapan iti dua laeng.
Maipanggep kadagiti celfon ti umuna a balakadko. Naammuan iti kaudian a nationwide survey a kinuna ti nasurok a kagudua dagiti agtutubo iti Estados Unidos a busbosenda ti adu unay a panawen kadagiti celfonda. Kinuna ti nasurok a 40 porsiento nga agdanagda no maisinada kadagiti celfonda.6 Ad-adda a gagangay daytoy kadagiti babbai ngem dagiti lallaki. Babbalasitang a kakabsatko—kasta met dagiti nataengan a babbai—maparaburanto ti biagyo no limitaranyo ti panagusar ken panagpannurayyo kadagiti celfon.
Napatpateg ti maikadua a balakadko. Agbalinkayo a nasayaat kadagiti dadduma. Ti kinasayaat ket ar-aramidenen ti adu nga agtutubotayo. Adda dagiti grupo ti agtutubo iti komunidad ti nangipakitan iti dalan para kadatayo amin. Naparegtakami iti aramid a kinasayaat dagiti agtutubotayo kadagiti agkasapulan iti ayat ken tulong. Iti adu a wagas, makatulong ken mangipakitayo iti dayta nga ayat iti tunggal maysa. Tarigagayanmi a tuladen koma ti amin ti pagwadanyo.
Kagiddanna, ammotayo a sulisogennatayo amin ti kabusor nga agbalin a natangsit, ket adu pay ti kastoy a pagarigan, uray kadagiti ubbing ken agtutubo. Ti agtultuloy a kinatangsit ket maawagan iti adu a nagan, kas iti panangab-abi, pagkukumplotan a mangdarup iti maysa a tao, wenno napagkaykaysaan a mangumsi kadagiti dadduma. Siraranta dagitoy a pagarigan ti mangdangran iti kaklase wenno gagayyem. Babbalasitang a kakabsatko,saan a maragsakan ti Apo no naulpit wenno natangsittayo kadagiti dadduma.
Daytoy ti pagarigan. Adda ammok a maysa a barito, makidagdagus ditoy Utah, a naangaw iti pannakaisabsabalina, agraman ti panagsaritana iti bukodna a pagsasao. Indadanes isuna ti bunggoy dagiti agtutubo agingga a nagibales a nakaigapuan ti pannakaibaludna iti nasurok a 70 nga aldaw bayat idinto a maibilbilang iti deportasion. Diak ammo ti namagpungtot itoy a grupo dagiti agtutubo, adu kadakuada dagiti Santo iti Ud-udina nga Aldaw kas kadakayo, ngem makitak ti epekto ti kinatangsitda, napeggad a padas iti maysa kadagiti annak ti Dios. Adda dagiti makadadael a bunga dagiti babassit nga aramid ti kinatangsit.
Idi nangngegko dayta nga estoria, indasigko daytoy iti mensahe ti propetatayo, ni President Nelson, iti kaudian a worldwide youth devotional. Iti panagkiddawna kadakayo ken iti dadduma pay nga agtutubo a tumulong iti pannakaummong ti Israel, kinunana: “Agpadlawkayo; maidumakayo iti lubong. Ammoyo ken ammok nga agbalinkayo koma a silaw iti lubong. Ngarud, kasapulannakayo ti Apo nga aglanga, agtimek, aggunay, ken agkawes a kas maysa a pudno a disipulo ni Jesucristo.”7
Ti buyot dagiti agtutubo nga inyawis ni President Nelson a kappenganyo ket saankayo nga agtangsit iti tunggal maysa. Surotendanto ti pannursuro ti Mangisalakan a tumulong ken agayat ken maseknan iti dadduma, uray no ipatungpa ti maysa pay a pingping no nagbiddut ti maysa a tao kadatayo.
Iti mensahena iti sapasap a komperensia maipapan iti panawen a nayanak ti adu kadakayo, dinayaw ni President Gordon B. Hinckley dagiti “napipintas a babbalasitang nga agkagkagumaan nga agbiag iti ebanghelio.” Inladawanna ida, kas panangiladawanko kadakayo:
“Managparaburda iti tunggal maysa. Papigsaenda ti tunggal maysa. Isuda ti dayaw kadagiti dadakkelda ken kadagiti pagtaengan a naggapuanda. Dumanin agbalasangda ken itugotdanto iti unos ti biagda dagiti pagwadan nga agdama a mangparegta kadakuada.”8
Kas katulongan ti Apo, kunak kadakayo a babbalasitang, kasapulan ti lubongtayo ti kinasayaat ken ayatyo. Agbalin a nasayaatkayo iti tunggal maysa. Insuronatayo ni Jesus nga aggiinnayat ken tratuentayo dagiti dadduma kas iti kayattayo a pannakatrato. No ikarigatantayo ti agbalin a naasi, umasidegtayo Kenkuana ken ti naayat nga impluensiana.
Patpatgek a kakabsatko a babbai, no makiramankayo iti ania man a kinatangsit wenno kinaulpit—agmaymaysa wenno kadua ti bunggoy— ikeddengyo itan ti agbalbaliw ken allukoyenyo dagiti dadduma nga agbalbaliw. Dayta ti balakadko, nga itdek kadakayo kas maysa a katulongan ti Apo a Jesucristo gapu ta tinignaynak ti Espiritu nga agsarita kadakayo maipapan iti daytoy a napateg a banag. Paneknekak ni Jesucristo, ti Mangisalakantayo, a nangisuro kadatayo nga aggiinnayat kas inayatnatayo. Ikararagko nga aramidentayonto, iti nagan ni Jesucristo, amen.