Pannakiraman dagiti Kakabsat a Babbai iti Pannakaummong ti Israel
Idanonko ti napadtuan a pakaasik kadakayo, babbai ti Simbaan, a sukogenyo ti masakbayan babaen ti panangtulong a mangummong iti nawarawara nga Israel.
Nakaskasdaaw a makaduakayo, patpatgek ken napapateg a kakabsatko a babbai. Nalabit ti kallabes a padas ti mangipalagip kadakayo no ania ti nariknak kadakayo ken dagiti nadiosan a kabaelan a nakaparaburanyo.
Maysa nga aldaw bayat ti panagsaritak iti kongregasion iti South America, naragsakanak unay iti topikok, ken iti dayta napateg a kanito, kinunak, “Kas ina ti 10 nga annak, maibagak kadakayo a …” Ket kalpasanna intuloyko nga inleppas ti mensahek.
Diak naamiris a naisaok ti balikas nga ina. Ti translatorko, iti pagarupna a nagbiddutak, sinukatanna ti balikas nga ina iti ama, tapno saan nga ammo ti kongregasion nga imbilangko ti bagik a kas ina. Ngem nangngeg daytoy ti asawak a ni Wendy, ket naragsakan iti saan a naigagara a biddutko.
Iti dayta a kanito, ti nalaus a panaggagarko a makaaramid iti pakaidumaan iti lubong—kas iti ina laeng ti makaaramid—ket naipeksa manipud iti kaunggak. Bayat ti biagko, no madamag kaniak no apay a pinilik ti agbalin a medical doctor, maysa laeng ti kanayon a sungbatko: “Gapu ta diak mapili ti agbalin a maysa nga ina.”
Kitaenyo a tunggal usarek ti balikas nga ina,diak sarsaritaen laeng maipapan kadagiti babbai a nagpasngayen wenno dagiti naampon nga annak ditoy a biag. Sarsaritaek maipapan iti amin a nataengan a babbai nga annak dagiti Nailangitan a Nagannaktayo. Tunggal babai ket maysa nga ina gapu iti agnanayon a nadiosan a pagtungpalanna.
Ita a sardam, kas ama ti 10 nga annak—siam nga annak a babbai ken maysa nga anak a lalaki—ken kas Presidente ti Simbaan, ikararagko a mariknayo koma no kasano ti kadakkel ti panagriknak kadakayo—maipanggep iti kinasiasinoyo ken iti amin a naimbag a maaramidyo. Awan ti asino man a makaaramid iti maaramid ti maysa a nalinteg a babai. Awan ti asino man a makatulad iti impluensia ti maysa nga ina.
Kabaelan ken masansan nga ipakaammo dagiti lallaki ti ayat ti Ama iti Langit ken ti Mangisalakan kadagiti dadduma. Ngem adda naisangsangayan a sagut dagiti babbai para ditoy—maysa a nadiosan a talugading. Kabaelanyo a riknaen ti kasapulan ti maysa a tao—ken no kasapulanna daytoy. Mabalinyo ti mangtulong, mangliwliwa, mangisuro, ken mangpapigsa iti maysa a tao iti mismo nga oras ti panagkasapulanna.
Aggidiat ti panagkita iti bambanag dagiti babbai ken lallaki, ket o, anian a panagkasapulanmi iti panniriganyo! Ti galadyo ti mangiturong iti panangpanunotyo nga umuna kadagiti dadduma, nga ibilangyo ti epekto ti ania man a tignay a maaramidto kadagiti dadduma.
Kas iti inlawlawag ni President Eyring, ti nadayag nga Inatayo nga Eva—nga addaan kapatgan a panniriganna iti plano ti Amatayo iti Langit—ti nangirugi iti awagantayo a “Pannakatnag.” Ti nasirib ken natured a pilina ken ti mangsupsuporta a pangeddeng ni Adan ti nangpadur-as iti plano ti Dios iti ragsak. Inaramidda a makaumay ti tunggal maysa kadatayo ditoy daga, umawat iti bagi, ken mangpennek a pilientayo nga itakderan ni Jesucristo ita, kas iti inaramidtayo sakbay daytoy a biag.
Patpatgek a kakabsatko a babbai, addaankayo iti naespirituan a sagut ken ayo. Ita a sardam ipakaasik kadakayo, iti amin a namnama ti pusok, nga agkararagkayo tapno maawatanyo dagiti naespirituan a sagutyo— tapno padur-asen, usaren, ken padakkelenyo pay dagitoy, nga ad-adda pay ngem iti sigud. Mabalbaliwanyonto ti lubong no aramidenyo daytoy.
Kas babbai, paregtaenyo dagiti dadduma ken mangipakitakayo iti maysa a pagrukodan a maikari a tuladen. Mangtedak man kadakayo iti bassit nga impormasion maipapan iti dua a dadakkel a panangipakaammo iti napalabas a sapasap a komperensiatayo. Dakayo, kakabsatko a babbai, napategkayo iti tunggal maysa.
Umuna, ministering. Kangatuan a pagrukodan para iti ministering ket ti panagserbi ti Mangisalakantayo, ni Jesucristo. Gagangay, ken kanayon nga as-asideg dagiti babbai iti dayta a pagrukodan ngem dagiti lallaki. No pudno nga agserserbikayo, surotenyo ti riknayo a mangtulong iti maysa a tao a mangpadas nga ad-adda pay ti ayat ti Mangisalakan. Ti ayo nga agserbi ket napateg unay kadagiti nalinteg a babbai. Am-ammok dagiti babbai nga agkararag iti inaldaw, “Asino ti kayatyo a tulongak ita nga aldaw?”
Sakbay ti panangipakaammo idi Abril 2018 maipapan ti nangatngato ken nasansantuan pay a wagas ti panangaywan iti dadduma, ugali dagiti dadduma a lallaki a mangi-check iti assignment-da iti home teaching a “nalpasen” ket ituloyda iti sumaruno nga aramiden.
Ngem idi nariknayo nga agkasapulan iti tulong ti maysa a kabsat a babai a sarsarungkaranyo a suruan, tinulonganyo a dagus agingga iti makabulan. Iti kasta, no kasano ti isasarungkayo a panagisuro ti nangparegta kadakami tapno sukatanmi daytoy iti ministering.
Maikadua, iti napalabas a sapasap a komperensia, inulitmi a binukel dagiti korum ti Melchizedek Priesthood. Idi inkararaganmi no kasano a matulongan dagiti lallaki ti Simbaan a nasamsamay kadagiti pagrebbenganda, siaannad nga imbilangmi ti pagwadan ti Relief Society.
Iti Relief Society, agtitipon a sangkamaysa dagiti babbai iti agduduma nga edad ken agpang ti biag. Mangyeg ti tunggal dekada ti biag iti naidumduma a karit, ngem, addakayo dita, linawas, nga aglilinnangen, agpipinnadur-as ken agsisinnuro iti ebanghelio, ken agar-aramid iti pudno a pakaidumaan iti lubong.
Ita, iti panangsurot iti pagwadanyo, miembro ti elders quorum dagiti addaan iti Melchizedek Priesthood. Agtawen dagitoy a lallaki manipud iti 18 agingga 98 (wenno nasursurok pay), agduduma dagiti padasda iti priesthood ken iti Simbaan. Makaparnuay itan dagitoy a kabsat a lallaki iti natibtibker a silpo iti panagkikinnabsatan, aggigiddan a masuruan, ken nasamsamay a mangbendision iti dadduma.
Malagipyo itay napalabas a Hunio, kinasaomi ken ni Sister Nelson dagiti agtutubo ti Simbaan. Inawismi ida a kumappeng iti buyot dagiti agtutubo ti Simbaan a tumulong a mangummong iti Israel iti agsumbangir a belo. Daytoy a panaguummong ti “ti kadaklan a karit, ti kadaklan a panggep, ken ti kadaklan nga aramid iti daga ita”!1
Daytoy ti gapu nga agkasapulan unay kadagiti babbai, gapu ta dagiti babbai ti mangsukog iti masakbayan. Ita a sardam idanonko ti napadtuan a pakaasik kadakayo, babbai ti Simbaan, a sukogenyo ti masakbayan babaen ti panangtulong a mangummong iti nawarawara nga Israel.
Sadino ti pangrugianyo?
Mangtedak man iti uppat nga awis:
Umuna, awisenkayo a makiraman iti 10-aldaw a panangisardeng iti social media ken dadduma pay a media a mangted iti madi ken narugit a pampanunot iti isipyo. Ikararagan no ania dagiti impluensia nga ikkaten bayat ti panangisardengyo. Masdaawkayo iti epekto ti 10-aldaw a panangisardeng iti media. Ania ti madlawyo kalpasan ti panaginanayo kadagiti pannirigan ti lubong a nangdangran iti espirituyo? Adda kadi panagbaliw no sadino itan ti kayatyo a pangbubosan iti oras ken pigsayo? Adda kadi nagbaliw kadagiti ipangpangrunayo—uray bassit laeng? Ipakaasik kadakayo nga isurat ken surotenyo koma ti tunggal impresion.
Maikadua, awisenkayo a mangbasa iti Libro ni Mormon mangrugi itan agingga iti gibus ti tawen. Imposible a kas iti amin nga ikarkarigatanyo nga imatonan iti biagyo, no awatenyo daytoy nga awis a napnuan panggep ti puso, tulongannakayonto ti Apo a mangsarak iti wagas tapno magun-odyo daytoy. Ken, no nainkararagan nga agadalkayo, ikarik a maluktanto ti langit kadakayo. Bendisionannakayonto ti Apo iti nayon a pammaregta ken paltiing.
No basaenyo, markaanyo koma ti tunggal bersikulo a mangdakamat wenno mangitudo iti Mangisalakan. Kalpasanna, agsaritakayo ti maipapan ken Cristo, agrag-okayo ken Cristo, ken ikasabayo maipapan ken Cristo a kaduayo ti pamilia ken gagayyemyo.1 Umas-asidegkayo ken isudanto iti Mangisalakan babaen daytoy a wagas. Ket mangrugi a mapasamak dagiti panagbalbaliw, uray dagiti milagro.
Itay bigat, naaramid ti panangipakaammo maipanggep iti baro nga iskediul ti Domingo ken ti kurikulum a maisentro iti pagtaengan, masuportaran ti Simbaan. Patpatgek a kakabsatko a babbai, napategkayo iti balligi daytoy baro, natimbeng ken napagtutunos nga aramid a panangisuro iti ebanghelio. Isuroyo koma dagiti ipatpategyo no ania dagiti nasursuroyo kadagiti nasantuan a kasuratan. Suruanyo ida no kasano nga umasideg iti Mangisalakan para iti pangpaimbag ken pangdalus a bilegna no agbasolda. Ken suruanyo ida no kasano a magun-od ti pangpapigsa a bilegna iti inaldaw ti biagda.
Maikatlo, mangbukelkayo iti pagtuladan iti masansan nga idadar-ay iti templo. Mabalin nga agkasapulan daytoy iti ad-adu pay a sakripisio iti biagyo. Ti ad-adu nga orasyo iti templo ti mangpalugodto iti Apo a masuruannakayo no kasano a magun-od ti bilegna iti priesthood a nakatalugadinganyo iti templona. Kadagiti agnaed nga adayo iti templo, sikakararag nga adalenyo dagiti templo iti nasantuan a kasuratan ken iti balikas dagiti sibibiag a propeta. Ad-adda pay koma nga ammuen, maawatan, riknaenyo maipapan kadagiti templo ngem iti sigud.
Iti worldwide youth devotional itay napalabas a Hunio, insaritak maipapan iti maysa a barito a nagbalbaliw ti biagna idi sinuktan dagiti dadakkelna ti smartphone-na iti flip phone. Natured a babai iti pammati ti ina daytoy a barito. Nakitana ti anakna a mangrugin nga agaramid iti pili a makalapped kenkuana nga agserbi iti mision. Napan isuna iti templo a nagkararag tapno ammuen ti kasayaatan a makatulong iti anakna. Kalpasanna sinurotna segun iti tunggal impresion.
Kinunana: “Nariknak a tartarabayennak ti Espiritu a mangkita iti celfon ti anakko iti nalawag nga oras tapno makitak ti nalawag a banag. Diak ammo nga aramaten dagitoy a smartphone, ngem tinarabaynak ti Espiritu iti amin a social media a diak pay inusar! Ammok a tulongan ti Espiritu dagiti nagannak nga agsapsapul iti tarabay a mangsaluad iti annakda. [Idi damo] kinaguranak unay ti anakko. … Ngem kalpasan ti tallo nga aldaw, nagyaman kaniak! Mariknana ti pagkurangan.”
Nalaus a nagbalbaliw ti tignay ken ugali ti anakna. Ad-addan a managtulong isuna iti balay, nais-isem, ken masansan a dumardar-ayen iti simbaan. Naayat a nagserserbi iti baptistry iti templo ken nagsagsagana para iti misionna.
Ti maikapat nga awisko, para kadakayo a nataenganen, makiramankayo a naan-anay iti Relief Society. Ipakaasik kadakayo nga adalenyo ti agdama a palawag iti panggep ti Relief Society. Daytoy ti mangted iti inspirasion. Daytoy ti mangtarabay kadakayo iti panangpadur-as iti panggepyo iti bukodyo a biag. Idawatko pay a nanamenyo dagiti kinapudno iti palawag ti Relief Society a naipablaak iti dumani 20 a tawen ti napalabasen.3 Nakabitin ti naikuadro a kopia daytoy a palawag iti diding ti opisina ti Umuna a Panguluen. Naragsakak tunggal basaek daytoy. Daytoy ti mangiladawan no asinokayo ken no asino ti kasapulan ti Apo nga adda iti daytoyhusto nga oras no aramidenyo ti pasetyo a mangummong iti nawarawara nga Israel.
Patpatgek a kakabsatko a babbai, kasapulandakayo! “Kasapulanmi ti pigsayo, ti kumbersionyo,ti napigsa a pammatiyo, ti kabaelanyo a mangidaulo, ti siribyo, ken dagiti timekyo.”3 Saanmi a maummong ti Israel no awankayo.
Ay-ayatenkayo ken agyamanak kadakayo ket ita bendisionankayo iti kabaelan a mangpanaw iti lubong bayat ti panangtulongyo iti daytoy napateg ken kasapulan unay nga aramid. Makapagtitinnulongtayo iti amin a nasken a paaramid kadatayo ti Amatayo iti Langit a mangisagana iti lubong para iti Maikadua a Yaay ti Patpatgenna nga Anakna.
Ni Jesus ti Cristo. Daytoy ti Simbaanna. Paneknekak daytoy iti nagan ni Jesucristo, amen.