Mamati, Agayat, Agaramid
Magun-odtayo ti mabuslon a biag babaen ti panagbalin a pudno a disipulo ni Jesucristo—babaen ti isusurot iti wagas ken makigamulo iti aramidna.
Patpatgek a kakabsat,maysa a naindaklan nga okasion a makaduakayo iti sesion ita nga aldaw ti datdatlag a sapasap a komperensia; tapno dumngeg kadagiti naparegta a mensahe; dumngeg itoy datdatlag ken nadaeg a koro dagiti misionario a mangitakder kadagiti rinibribu a misionario iti intero a lubong—dagiti annaktayo ken kangrunaanna tapno makikaysa iti pammatitayo ita nga aldaw, tapno intay manen anamongan ti patpatgen a Presidente ken propeta, ni Presidente Russell M. Nelson, ti Umuna a Panguluen, ken dagiti Sapasap nga Opisial ti Simbaan. Anian a nagragsak nga aldaw a makaduakayo ita.
Ni nagkauna nga Ari Solomon ti maysa kadagiti kalatakan a nagballigi a tao iti pakasaritaan. Kasla adda amin kenkuana—kuarta, bileg, panagdayaw, latak, dayaw. Ngem kalpasan ti dinekdekada a nagpennek iti kayatna, kinalatak, ken kinasaliwanwan, kasano ti panangiladawan ni Ari Solomon iti biagna?
“Kinaparammag amin,” kinunana.
Daytoy a tao, nga adda kenkuana ti amin, nagbalin a di naragsak, managduadua, ken naliday iti baet ti kaadda ti amin kenkuana.
Adda balikas iti German, Weltschmerz. Mabalin a kuna, kinaliday gapu iti panagpampanunot maipanggep iti kinanumo ti lubong no idilig iti panangipapantayo.
Nalabit, adda sangkabassit a Weltschmerz kadatayo amin.
No ti naulimek a liday agkaradap kadagiti suli ti biagtayo. No ti liday abbatanna dagiti aldawtayo ket agturay ti nabengbeng nga anniniwan kadagiti rabiitayo. No ti trahedia ken inhustisia sumrek iti lubongtayo, a karaman ti biag dagiti patpatgentayo. No agbiahetayo iti bukodtayo ken naliday a dana ti kinamalas, ken ti saem pasipngetanna ti kinaulimektayo ken singaenna ti ulimektayo—mabalin nga umayontayo ken ni Solomon a nagkuna a nasaem ti biag ken awanan kaipapanan.
Ti Naindaklan a Namnama
Ti napintas a damag, adda namnama. Adda sungbat ti kinaubbaw, parammag, liday, kenWeltschmerz ti biag. Adda sungbat ti amin uray pay ti kakaruan a kinaubbaw, kaawan namnama, ken pannakauppapay ti mariknayo.
Masarakan daytoy a namnama iti mamaglupos a bileg ti ebanghelio ni Jesucristo ken ti makapasubbot a bileg ti Mangisalakan a mangpaimbag iti sakit ti kaunggantayo.
“Immayak,” impakdaar ni Jesus, “tapno maaddaanda iti biag, ken tapno ad-adu ti maited kadakuada.”
Matun-oyantayo dayta nabuslon a biag saan a babaen ti kasapulantayo wenno iti naragpattayo ngem babaen ti panagbalin a pudno a disipulo ni Jesucristo; babaen ti isusurot iti wagasna ken pannakiraman iti aramidna. Masarakantayo ti nabuslon a biag babaen ti pananglipattayo iti bagitayo ken pannakiraman a mangaramid iti panggep ni Cristo.
Isu ti panamati Kenkuana, agayat a kas iti panagayatna, ken agaramid kas iti inaramidna. Ni Jesus “napan nagaramid iti nasayaat.” Nagna kadagiti napanglaw, dagiti nauy-uyaw, dagiti masakit, ken naibabain. Nangasaba kadagiti awanan bileg, dagiti nakapsut, ken awanan gagayyem. Nagpalabas ti oras kadakuada; nakisarita kadakuada. “Ken inagasanna amin ida.”
Ni Jesus “napan nagaramid iti nasayaat.” Nagna kadagiti napanglaw, dagiti nauy-uyaw, dagiti masakit, ken naibabain. Nangasaba kadagiti awanan bileg, dagiti nakapsut, ken awanan gagayyem. Nagpalabas ti oras kadakuada; nakisarita kadakuada. “Ken inagasanna amin ida.”
Napan iti amin a lugar, insuro ti Mangisalakan dagiti “napintas a damag” ti ebanghelio. Imburayna dagiti agnanayon a kinapudno a mangwayawaya kadagiti tao a naespirituan ken para itoy a biag.
Dagiti mangipaay iti bagbagida iti kastoy a gapu maduktalanda ti pudno iti kari ti Mangisalakan: “Asino man a makapukaw iti biagna gapu kaniak masarakannanto.”
Biddut ni Solomon, patgek a kakabsat—saan a “palangguad” ti biag. Iti kasunganina, mabalin a napno iti panggep, kaipapanan, ken kappia.
Sisasagana ti bileg ti panangagas ni Jesucristo iti amin a mangsapul Kenkuana. Ti mamati ken mangayat iti Dios addaan nauneg ken makaawis nga impluensia kadatayo. Maikkannatayo iti baro a puso, maalay-ayanna ti saem, ken punnuenna ti kaunggantayo iti “aglaplapusanan a ragsak.”
Mamati, Agayat, Agaramid
Ket wen, agaramidtayo iti ad-adu ngem ti maaddaan iti nainsiriban a pannakaawat iti ebanghelio tapno magun-odtayo ti bileg ti panangagas iti biagtayo. Masapul nga inaigtayo iti biagtayo—aramidentayo a paset ti no asinotayo ita ken no ania ti arammidentayo.
Isingasingko a mangrugi ti kinadisipulo iti tallo a gagangay a balikas:
Mamati, agayat, ken agaramid.
Iti panamati iti Dios itundana iti pammati ken papigsaenna ti panagtalek iti Balikasna. Pabuslonen ti pammati nga agayat iti Dios ken dagiti dadduma. Bayat ti isasantak ti ayat, maawistayo a mangipamaysa iti Mangisalakan bayat ti panagdaliasattayo iti dana ti kinadisipulo
“Ngem,” kunam, “nakalaklaka unay dayta. Pudno, dagiti parikut ti biag—ti parikutko—nakirkiro nga amang para iti dayta gagangay a wagas. Di marisut ti Weltschmerz iti tallo a gagangay a balikas: Mamati, agayat, agaramid.”
Saan a ti pannakailawlawag ti pudno ti makapagpalaing. Ti ayat ti Dios ti mangsalbar, manglagda, ken mangalaw.
Am-ammonaka ti Dios. Sika ti Anakna. Ay-ayatennaka.
Uray pay no sungani ti riknam, wenno ipagarupmo a saanka a makaay-ayo, tultulongannaka.
Iti daytoy nga aldaw—inaldaw—tulongannaka, agtarigagay a mangpaimbag kenka, magparegta kenka, ken mangsukat ti kinaubbaw ti pusom iti aglaplapusanan a ragsak. Kayatna a wakniten ti sipnget iti biagmo ket punnuenna ti kaunggam iti lumawlawag, sagrado, ken narayray a rimat ti awan patinggana a gloriana.
Napadasak a mismo daytoy.
Ket daytoy ti saksik kas Apostol ni Apo Jesucristo nga amin nga umasideg iti Dios—amin a pudno a mamati, agayat, ken agaramid— mapadasanda met ti kasta.
Mamatikami
Isuronatayo ti nasantuan a kasuratan a, “No awan ti pammati imposible a mapagustuan ti [Dios]: ta asino man nga umasideg iti Dios masapul a mamati nga isu.”
Para kadagiti dadduma, narigat ti mamati. No dadduma managpannakkeltayo. Nalabit nga ipagaruptayo a masiribtayo, edukado, wenno aduan iti padas, ditay la ketdi mamati iti Dios. Ket rugiantayo a kitaen ti relihion a kas minamaag a kannawidan.
Iti padasko, ti pammati saan unay a makaay-ayo a kambas a kitaen ken dayawentayo, ken pagsasaritaan ken amirisentayo. Daytoy ti arado a pangsukaytayo kadagiti talon ken, babaen ti panagtrabahotayo, aggurittayo iti daga a pagmulaan iti bukbukel nga agbunga.
Umasidegkayo iti Dios, ket yasidegnakayo Kenkuana. Daytoy ti kari iti amin a mamati.
Agayattayo
Ipalgak dagiti nasantuan a kasuratan a no yad-addatayo ti agayat, agbalintayo a naragragsak. Ti nasao ni Jesus nga ayat, nupay kasta, saan a magatadan, di tagipatgen, saan a sinsinan a maayat. Saan nga ayat a maisao sa kalpasanna malipatan. Saan a daytoy ti kita ti ayat a “kitaek-no-adda-maaramidko.”
Ti ayat a kinuna ti Dios isu ti umagsep iti puspusotayo no agriingtayo iti bigat, agtalinaed kadatayo iti agmalem, ken bumsog iti puspusotayo no agkararagtayo kalpasan ti rabii.
Daytoy ti saan a maipeksa nga ayat ti Nailangitan nga Ama para kadatayo.
Daytoy ti awan gibusna a panangngaasi a manglawag iti panagkitatayo kadagiti dadduma no asinoda. Babaen ti lente ti nadalus nga ayat, makitatayo dagiti imortal a tao nga addaan iti awan inggana a kabaelan ken pateg ken maipatpateg nga annak ti Mannakabalin a Dios.
Apaman a makitatayo dagiti tao iti kasta, ditayo magatadan, mabaybay-an, wenno tagibassiten ida.
Aramidentayo
Iti aramid ti Mangisalakan, masansan a “babaen ti bassit ken gagangay a pamuspusan” a “mapasamak dagiti naindaklan a banag.”
Ammotayo a masapul ti panangulit-ulit tapno agbalin a nalaing iti ania man a banag. Uray pay iti panagtokar iti clarinet, panangikugtar iti bola iti net, agtarimaan iti kotse, wenno agpatayab iti eroplano, masapul ti panagsanay tapno lumalaingtayo.
Ti panangbangon ti Mangisalakantayo ditoy daga iti—Ti Simbaan ni Jesucristo dagiti Santo iti Ud-udina nga Aldaw—matulongannatayo nga agaramid. Mangidiaya iti lugar nga agsanay nga agbiag kas iti insuro ken imburayna kadagiti dadduma.
Kas miembro ti Simbaan, maikkantayo iti takem wenno pagrebbengan ken gundaway a mangtulong nga addaan iti panangngaasi ken serbisio kadagiti dadduma.
Itay nabiit, inted ti Simbaan ti napabaro a panangyunay-unay iti ministering, wenno panagserbi wenno panangipateg kadagiti dadduma. Namin-adu a pinanunot daytoy tapno maikeddeng no ania ti nasken a yawag iti daytoy naisangsangayan a panangyunay-unay.
Maysa kadagiti nagan a naibilang ti panangaywan [shepherding], ti mainugot a pangawag iti awis ni Cristo: “Pakanem ti karnerok.” Nupay kasta, adda maysa a pakababalawanna: ti panangusar iti dayta a balikas agbalinak aGerman shepherd. Ngarud, mapnekakon iti balikas a ministering.
Agpaay Daytoy nga Aramid iti Tunggal Maysa
Siempre, saan a baro daytoy a panangyunay-unay. Mangted daytoy iti napabaro daytoy ken napapintas a gundawaytayo nga agtungpal iti bilin ti Mangisalakan nga “aggiinnayat” maysa a nasamay a mangipatungpal ken mangaramid iti panggep ti Simbaan.
Panunotenyo ti aramid ti misionario; ti natured, napakumbaba, ken natalek a panangibingay iti ebanghelio ket napintas a pagarigan ti panangministering iti naespirituan a kasapulan dagiti dadduma, asino man ti kinataoda.
Wenno panagaramid iti temple work—agsapul iti nagan dagiti kapuonantayo ken idiayatayo kadakuada iti bendision ti kinaagnanayon. Anian a kinadiosan a wagas ti ministering!
Panunotenyo ti panangsarak kadagiti nakurapay ken agkasapulan, mangitag-ay iti ima dagiti nauppapay, wenno mangbendision iti masakit ken agsagsagaba. Saan kadi a daytoy ti kapatgan a tignay ti panangibabaet ti kannawidan ti Apo idi immay iti daga?
No saankayo a miembro ti Simbaan, awisenkayo nga “umay ken mangkita.” Makikappengkayo kadakami. No miembrokayo ti Simbaan ngem saankayo unay nga aktibo, awisenkayo: agsublikayo koma. Kasapulandakayo!
Umaykayo, inayonyo ti pigsayo kadakami.
Gapu iti naidumduma a talento, kabaelan, ken personalidadyo, tulongandakami nga agbalin a nasaysayaat ken naragragsak. Kas subadna, tulongandakayo met nga agbalin a nasaysayaat ken naragragsak.
Umaykayo, tulongandakami a mangbangon ken mangpatibker iti kultura ti panagpaimbag, kinasayaat, ken kinamanangngaasi kadagiti amin nga annak ti Dios. Gapu ta agkagkagumaantayo amin nga agbalin a baro a parsua a “pannakapalabas ti amin a daan a banag” ket “amin a banag … agbalin a baro.” Ipakita ti Mangisalakan kadatayo ti pagturongantayo—nga umaddang ken agpangato. Kinunana, “No ayatennak, tungpalem dagiti bilinko.” Agkaykaysatayo koma nga agtrabaho nga agbalin a tattao ti Dios kas nakaisangratantayo.
Daytoy ti kita ti kultura ti ebanghelio a kayattayo a pasantaken iti Simbaan ni Jesucristo. A pangtipdantayo iti sulisog a mangpabasol, saosao, ken mangiremrem. Lugar nga, imbes a mangitudo iti pagkurangan, itag-aytayo ken agtitinnulong nga agbalin a kasayaatan.
Awisenkayo manen. Rumamankayo kadakami. Masapuldakayo.
Saan a Perpekto a Tattao
Makitayonto a napno daytoy a Simbaan iti adu a nasasayaat a tao nga adda ditoy a lubong. Managkablaaw, managayat, ken napudnoda. Managsakripisio, nagaget, ken bannuarda no dadduma.
Ken saanda met a perpekto.
Agaramidda iti biddut.
No dadduma agsaoda iti saan a rumbeng. Agaramidda iti banag nga ammoda a dida koma inaramid.
Ngem adda pagpapadaanda—kayatda ti dumur-as ken mayasideg iti Apo, ti Mangisalakantayo.
Ikalkalikagumda ti agaramid iti nasayaat.
Mamatida.Agayatda.Agaramidda.
Kayatda ti agbalin a managparabur, ad-adda a mannakipagrikna, manaknakman, ad-adda a kas ken ni Jesus.
Ti Wagas nga Agragsak
Wen, narigat ti biag no maminsan. Pudno, adda panaglidaytayo ken pannakapaay.
Ngem ti ebanghelio ni Jesucristo mangipaay iti namnama. Ken, iti Simbaan ni Jesucristo, kaduadakami dagiti dadduma a mangsapul iti lugar a pakariknaantayo nga addakatayo iti pagtaengan—maysa a lugar a pagdur-asantayo a sangkamaysa a mamati, agayat, ken agaramidtayo.
Ania man ti paggigidiatantayo, kayattayo nga arakupen ti tunggal maysa kas annak ti Nailangitan nga Amatayo.
Saan a marukod ti panagyamanko iti kinamiembrok iti Simbaan ni Jesucristo dagiti Santo iti Ud-udina nga Aldaw ken makaammo nga ipatpateg ti Dios dagiti Annakna nga umdas a mangted iti ragsak ken kaipapanan itoy a biag ken wagas a mangpadas iti agnanayon a ragsak iti lugar ti gloria iti masungad a biag.
Agyamanak ta inikkannatayo ti Dios iti wagas a mangagas iti sakit ti kararua ken ti Weltschmerzti biag.
Paneknekak ket ibatik kadakayo ti pammendisionko no mamatitayo iti Dios, noayatentayo Isuna ken ayatentayo dagiti annakna a naimpusuan, ken agkagumaan ngaaramidentayo kas imbilin ti Dios kadatayo, masarakantayo ti pangpaimbag a kappia, ragsak ken kaipapanan. Iti sagrado a nagan ni Jesucristo, amen.