Umaykayo, Denggenyo ti Timek ti Propeta
Iti panangpatibkertayo iti biagtayo ti kannawidan a dumngeg ken agtungpal iti timek ti sibibiag a propeta, apitentayo ti naikari a manayon a bendision.
Maipanggep iti Presidente ti Ti Simbaan ni Jesucristo dagiti Santo iti Ud-udina nga Aldaw, impakaammo ti Apo:
“Ket manen, ti pagrebbengan ti Presidente ti opisina ti High Priesthood isu ti panangiturongna iti intero a simbaan, ken agbalin a kas ken ni Moises—
“... Wen, agbalin a mammadto, mammaltiing, ken propeta, maaddaan iti amin a sagut ti Dios a maited iti pangulo ti simbaan”(Doctrina ken Katulagan 107:91–92; emphasis added).
Napagasatanak a nakasaksi iti sagut ti Dios kadagiti Propetana. Ibingayko man ti maysa a sagrado a padas? Sakbay ti agdama a pagrebbengak, timmulongak a nangkita ken nangirekomenda iti lugar ti sumaruno a templo. Kalpasan ti Setiembre 11, 2001, nangednged ti panagdaliasat nga umay ken rumuar iti United States. Kas banagna, adu a miembro ti masapul nga agbiahe iti dua wenno tallo nga oras manipud iti Vancouver, Canada, a mapan iti Seattle Washington Temple. Insingasing ni Presidente Gordon B. Hinckley, a Presidente ti Simbaan kadagidi a panawen, a masapul nga adalen dagiti miembro ti Simbaan iti Vancouver, ti sabali a lugar a saan a kukua ti Simbaan.
Nasarakanda iti asideg ti Trans-Canadian Highway ti napintas a lugar a mabalin a pagpatakderan. Nalaka a masarakan ti daga a napalawlawan iti napipintas a kayo ti Canada, ken makaay-ayo ti aglawlaw ta nalaka a makita ti aglabas a rinibu a motorista.
Impakitami dagiti ladawan ken mapa ti lugar iti binulan a miting ti komiti ti lugar ken panagbangon iti Temple. Inaprobaran daydi Presidente Hinckley nga idatagmi ti panggepmi a manggatang ken aramiden dagiti nasken nga adalen. Iti Disiembre iti dayta a tawen, impakaammomi iti komiti a kompleton ti panangadal, ket indawatmi ti pannakaanamong ti igagatang. Idi mangngegda ti reportmi, kinuna ni Presidente Hinckley, “Kayatko a makita dayta a lugar.”
Ti arinunos dayta a bulan, dua nga aldaw kalpasan ti Paskua, napankami iti Vancouver kada Presidente Hinckley; Presidente Thomas S. Monson; ken Bill Williams nga arkitekto ti templo. Sinabatnakami ni Paul Christensen, ti presidente ti stake sadiay, a nangitunda kadakami iti lugar. Nabasa ken naangep iti daydi nga aldaw, ngem dimsaag a dagus ni Presidente Hinckley iti lugan ket nagpagnapagna iti lugar.
Kalpasan ti kaaddami iti dayta a lugar, dinamagko ken ni Presidente Hinckley no kayatna a kitaen dagiti sabali a lugar. Imbagana a wen. Iti kasta, iti panangkitami kadagiti dadduma a lugar, napagdiligmi dagiti pagdudumaanda.
Nagrikuskami a nagpakanawan iti Vancouver a nagsapul iti dadduma a daga, agingga a nakadanonkami iti likud ti immuna a lugar. Kinuna ni Presidente Hinckley, “Napintas daytoy a lugar.” Sana dinamag, “Mabalin a mapantayo iti pasdek ti Simbaan nga agarup apagkapat a kilometro[0.4 km] ti kaadayo?”
“Mabalin, President,” insungbatmi.
Nagsublikami kadagiti lugan ket napankami iti pasdek. Iti isasangpetmi iti kapilia, kinuna ni Presidente Hinckley, “Agsikkokayo iti kanigid.” Nagsikkokami ket sinurotmi ti kalsada kas naibilin. In-inut nga agsang-at ti kalsada.
Apaman a nakadanon ti luganmi iti tuktok, kinuna ni Presidente Hinckley, “Isardengyo ti lugan, isardengyo ti lugan.” Intudona ti kanawan a paset ti daga sana kinuna, “Kasano daytoy a daga? Ditoy ti pagtakderan ti templo. Daytoy ti kayat ti Apo a yan ti templo. Maalayo kadi?”
Dimi kinita idi daytoy a daga. Adda iti likud ken adayo iti dakkel a kalsada, ken saan a tagilako. Idi kunami a dimi ammo, intudo ni Presidente Hinckley ti daga sana inulit, “Daytoy ti pagtakderan ti templo.” Nagpalabaskami iti mano a kanito sakbay a napankami iti airport tapno agawidkamin.
Iti sumuno nga aldaw, inayabannakami ni President Hinckley a dua ken ni Brother Williams iti opisinana. Addan planona iti papel: dagiti kalsada, ti kapilia, agpakanigid ditoy, X inekisanna ti lugar ti templo. Dinamagna ti naammuanmi. Imbagami nga awanen ti narigrigat a gatangen a daga. Kukua ti tallo a tao: taga-Canada, taga-India, ken taga-China! Ken awan dagiti kasapulan para iti relihion.
“Ket, aramidenyo ti amin a kabaelanyo,” kinunana.
Ket napasamak ti milagro. Iti uneg ti mano a bulan nagatang ti daga, sa idi agangay impalubos ti siudad ti Langley, British Columbia, ti pannakabangon ti templo.
Iti panangpampanunotko itoy a padas, nabainanak iti pannakaamirisko nga idinto a nagadal ken adu a tawen ti padasmi ken ni Brother Williams iti panaggatang iti daga ken desenio ti templo, naaramid ni Presidente Hinckley a di nagsanay, ngem adda nabilbileg nga ammona, nga isu ti sagut ti kinapropeta. Nabaelanna a sinirmata no sadino ti rumbeng a pakabangonan ti templo ti Dios.
Idi binilin ti Apo dagidi nagkauna a Santo itoy mailatang a panangbangon iti templo, impakaammona:
“Ngem mabangon koma ti balay babaen ti naganko a maipada iti ipakitak kadakuada.
“Ket no di bangonen dagiti taok a mainugot iti pagtuladan nga ipakitak... , diakto awaten kadakuada.” (Doctrina ken Katulagan 115:14–15).
Kasta kadagiti nagkauna a Santo, kasta met ita: impakita ti Apo ket agtultuloy nga ipakitana iti Presidente ti Simbaan dagiti pagtuladan a pakaiturongan ti pagarian ti Dios iti panawentayo. Ken, iti bukodna a pagrukodan, nangted iti pangiwanwan no kasano nga iturong ti tunggal maysa kadatayo ti biagna, tapno iti kasta awaten ti Apo ti ugalitayo.
Idi Abril 2013, nagsaoak maipanggep iti pannakaisagana ken pannakaipatakder ti tunggal pondasion ti templo tapno maipanamnama a kabaelanna amin a bagyo ken kalamidad a mapasamak. Ngem pangrugian laeng ti pondasion. Mabangon ti templo babaen ti adu a pedaso, nga agtitinnulong a mainugot iti pagtuladan. No ti biagtayo agbalin a templo tunggal maysa ikarigatanna a bangonen kas insuro ti Apo (kitaen ti 1 Taga Corinto 3:16–17), a masaludsodtayo iti bagitayo, “Ania a pedaso ti aramatentayo tapno agbalin ti biagtayo a napintas, nadaeg, ken madaeranna dagiti bagyo ti lubong?
Masarakantayo ti sungbat daytoy a saludsod iti Libro ni Mormon. Maipanggep iti Libro ni Mormon, kinuna ni Propeta Joseph Smith: “Imbagak kadagiti kakabsat a ti Libro ni Mormon ti kapudnuan a libro ditoy daga, ken pamuon ti relihiontayo, ket nalaklaka nga umasideg ti tao iti Dios babaen ti panangtungpalna kadagiti alagaden, ngem ti ania man a libro.” (pakauna ti Libro ni Mormon). Iti pakauna ti Libro ni Mormon, naisuro kadatayo a dagiti addaan nadiosan a saksi manipud iti Espiritu Santo [a ti Libro ni Mormon ti balikas ti Dios] maammuanda met babaen ti pumada a bileg a ni Jesucristo ti Mannubbot ti Lubong, a ni Joseph Smith ti mammadto ken [propeta ti Pannakaisubli], kasta met a Ti Simbaan ni Jesucristo dagiti Santo iti Ud-udina nga Aldaw ti pagarian ti Apo a nabangon manen iti daga.”
Dagitoy ngarud dagiti napateg a pedaso ti bukodtayo a pammati ken pammaneknek:
-
Ni Jesucristo ti Mannubbot ti Lubong.
-
Ti Libro ni Mormon ti balikas ti Dios.
-
Ti Simbaan ni Jesucristo dagiti Santo iti Ud-udina nga Aldaw ti pagarian ti Dios iti daga.
-
Propeta ni Joseph Smith, ken adda sibibiag a propetatayo iti daga ita.
Kadagiti napalabas a bulan, dimngegak iti tunggal sapasap a komperensia a nagsaritaan ni Presidente Nelson manipud idi maawagan nga Apostol. Minuli daytoy nga aramid ti biagko. Iti panangadal ken panangamirisko iti sirib ni Presidente Nelson a naurnong iti tallopulo-ket-uppat a tawen, nalawag ken di nagbalbaliw a tema ti nagtalinaed iti pannursurona. Amin dagitoy a tema impakitana dagidiay pedaso (ti bloke) a naagapad wenno sabali a tulbek ti pedaso iti bukodtayo a templo. Inramanda ti pammati ken ni Apo Jesucristo; panagbabawi; panagbuniag para iti pannakaugas ti basbasol; ti sagut ti Nasantuan nga Espiritu; pannakasubbot dagiti natay ken aramid iti templo; panagngilin iti Domingo; mangrugi iti gibus ti panunot; agtalinaed iti wagas ti katulagan. Sinarita amin ida ni Presidente Nelson a napnuan ayat ken kinapudno.
Ni Jesucristo ti kangrunaan a pamuon ken pedaso ti Simbaan ken ti biagtayo. Daytoy ti Simbaan. Ni Presidente Nelson ti propetana. Saksian ken ipamatmat dagiti pannursuro ni Presidente Nelson para iti pagimbagantayo ti biag ken kinaasino ni Jesucristo. Agsasao a sipapammateg ken mannakaammo iti galad ti Mangisalakan ken iti misionna. Nangted met iti masansan a napudno a pammaneknek iti nadiosan a rebbengen ti sibibiag a propeta—ti Presidente ti Simbaan—a pagserserbianna.
Ita, nga aldaw, gundawaytayo a mangkanunong kenkuana kas sibibiag a propeta ti Apo iti daga. Nairuamtayon a mangkanunong kadagiti lider ti Simbaan babaen ti nadiosan nga aramid iti panangitag-aytayo kadagiti imatayo tapno maipakita ti panangawat ken suportatayo. Inaramidtayo itay laeng. Ngem ti napudno a panangkanunong nalablabes pay ngem ti maipakita nga aramid. Kas mabasa iti Doctrina ken Katulagan 107:22, ti Umuna a Panguluen, “makanunongan babaen ti panagtalek, pammati, ken kararag ti simbaan.” Umaytayo a naan-anay ken napudno a mangkanunong iti sibibiag a propeta bayat ti panangidur-astayo iti pammatitayo kadagiti balikasna, nga addaan pammati a mangipakita kadagitoy, ken ti agtultuloy a kararagtayo iti Apo ti agtultuloy a bendision kenkuana.
No pampanunotek ni Presidente Russell M. Nelson, mapalag-ananak iti balikas ti Mangisalakan idi kunana, “Ket no denggen dagiti tao ti balikasko, ken iti balikas dagiti katulongak a pinusgak a mangidaulo kadagiti taok, adtoy, kunak kadakayo, dida maisin iti lugarda.” (Doctrina ken Katulagan 124:45).
Iti panagdengngeg ken panamati kadagiti sibibiag a propeta addaan iti naun-uneg, makapagbalbaliw-biag a bilegna iti biagtayo. Mapapigsatayo. Mapanamnamaan ken mapatalektayo. Mangngegtayo ti balikas ti Apo. Mariknatayo ti ayat ti Dios. Maadaltayo no kasano nga iturongtayo ti biagtayo.
Patpatgen ken kanunongak ni Presidente Russell M. Nelson ken dagiti dadduma a naawagan kas propeta, mammadto ken mammaltiing. Paneknekak nga addaan sagut ti Dios a naited iti ulona, ken saksiak a no patibkerentayo ti biagtayo ti ugali a dumngeg ken agtungpal iti timek dagiti sibibiag a propeta, mabangon ti biagtayo babaen ti nadiosan a pagtuladan ti Apo, ket apitentayonto ti naikari nga agnanayon a bendision. Naidiaya ti awis iti amin. Umaykayo, denggenyo ti timek ti propeta. Iti nagan ni Jesucristo, amen.