Natibker ken Matalek a Pammati ken ni Cristo
Tapno ipamaysa ti natibker ken matalek a pammati ken ni Cristo masapul a sumeksek ti ebanghelio ni Jesucristo iti puso ken kararua.
Iti pakasaritaan ti Daan a Tulag, mabasatayo ti agsasaruno a panawen idi intakderan dagiti annak ti Isarel ti katulaganda ken ni Jehova ket nagkurnoda Kenkuana ken dadduma a panawen a tinallikudanda ti katulaganda ket nagkurnoda kadagiti didiosen wenno Baalim.
Ti panagturay ni Ahab ti maysa kadagiti panawen ti ikakalilis iti amianan a pagarian ti Israel. Imbaga iti naminsan ni propeta Elias ken ni Ari Ahab nga ummongenna dagiti tao ti Israel kasta met dagiti propeta ken papadi ni Baal iti Bantay Carmel. Idi naguummongen dagiti tao, kinuna ni Elias kadakuada, “Kaano pay a nagkadua ti kapanunotanyo? [wenno iti ababa a pannao, “Kaano pay a nagkaykaysakayo?”] No ti Apo ti Dios, surotenyo: ngem no ni Baal, surotenyo. Ket saan a nakasungbat dagiti tao.” Isu nga imbilin ni Elias nga isu ken dagiti propeta ni Baal partienda ti bumaro a baka ket ikabilda iti akaba a tabla iti saggaysa nga altar, ngem dida tunuen.” Kalpasanna, “Sa ayabanyo dagiti didiosenyo, ket ayabak met ti Apo: ket ti Dios nga agkuna babaen ti apuy, bay-anyo nga isu ti Dios. Ket insungbat dagiti amin a tao, Nalawagen.”
Malagipyo nga indawat dagiti padi ni Baal iti awan a dios iti adu nga oras a mangyeg iti apuy, ngem “awan naurayda a sao, wenno sungbat, wenno ania man.” Idi simmublat ni Elias, tinarimaanna ti nadadael nga altar ti Apo, inyaplagna ti tabla ket inkabilna ti sagut, ket imbilinna iti amin a masuyatan iti danum, saan a mammaminsan, wenno mamindua, ngem mamitlo. Awan duadua nga awan makaaron uray isu wenno ania man a bileg ti tao.
“Ket napasamak iti oras ti daton iti rabii ti panangidaton, nga immasideg ni Elias a propeta iti Apo a Dios da Abraham, Isaac, ken ti Israel, tapno maammuan iti dayta nga aldaw a sika ti Dios ti Israel, ken siak ti katulongam, ken inaramidko amin dagitoy a banag kas saom. …
“Ket gimmil-ayab ti apuy ti Apo, ket inibusna ti napuoran a sakripisio, ken ti kayo, ken dagiti bato, ken ti tapok, ken inigupna ti danum iti puttot.
Ket idi nakita amin dagiti tao, nagrukbabda: ket kinunada, Ti Apo, isu ti Dios; ti Apo, isu ti Dios.”
Ita mabalin a kuna ni Elias:
-
Adda man ti Dios, ti Nailangitan nga Amatayo, wenno awan, ngem no adda, agrukbabkayo Kenkuana.
-
Anak man ti Dios ni Jesucristo, ti nagungar a Mannubbot ti sangkatawan, wenno saan, ngem no isu, surotenyo.
-
Balikas man ti Dios ti Libro ni Mormon, wenno saan, ngem no balikasna, ngarud, “umasidegkayo iti Dios babaen [panangadal ken] isusurot iti linaonna.”
-
Nakita man ni Joseph Smith ken nakasaritana ti Ama ken ti Anak iti dayta a panagsusulbod ti 1820, wenno saan, ngem nakitana, ngarud surotenyo ti kagay ti propeta, ken dagiti tulbek ti pammatalged a siak, ni Elias, intedko kenkuana.
Iti napalabas a sapasap a komperensia, impakdaar ni Presidente Russell M. Nelson, “Di rumbeng a masdaawkayo maipanggep iti pudno [kitaen iti Moroni 10:5] . Di rumbeng a masdaawkayo no asino ti natalged a pagtalkanyo. Babaen ti bukod a paltiing, maawatyo ti bukodyo a pammaneknek a balikas ti Dios ti Libro ni Mormon, a propeta ni Joseph Smith, ken daytoy ti Simbaan ti Apo. Ania man ti sawen wenno aramiden ti dadduma, awan ti makapukaw iti saksi a nagtaud iti puso ken panunotyo maipanggep iti pudno.”
Idi inkari ni Santiago a ti Dios “nawaya nga itedna iti amin a tao” nga agsapul iti kinasirib, imballaagna pay:
Ngem dawatenna koma a sipapammati, nga awan duadua. Ta isu nga agduadua kaarngina ti dalluyon a pasabuagen ti angin.
“Ta maammuan koma dayta a tao nga awan ti ania man a maawatna iti Apo.”
Ti agpangpangngadua a tao saan a matalek iti amin nga aramidna.”
Ti Mangisalakantayo, iti sabali a bangir, ti naan-anay a pagwadan ti kinatibker. Kinunana, “Dinak binaybay-an ti Ama; ta aramidek a kanayon dagiti banag a mangparagsak kenkuana.” Panunotenyo dagitoy a panangiladawan iti nasantuan a kasuratan kadagiti tao a, kas iti Mangisalakan, natibker ken matalek:
“Napasurotda iti pudno a pammati; ket dida panawan daytoy, gapu ta natibkerda, ken matalek, ken di maisin, a situtudio nga awan duadua a mangtaginayon kadagiti bilin ti Apo.”
“Natibker ti pampamunotda, ken agtultuloy ti panagtalekda iti Dios.”
“Ket adtoy, ammuenyo ti bagbagiyo, ta napaneknekanyo, a kas iti kaadu dagiti nayasideg iti pannakaammo iti kinapudno,… natibkerda ken matalek iti pammati, ken iti banag a nakawayawayaanda.”
“Ket intultuloyda a matalek iti doktrina ken panangiwanwan dagiti apostol, ken iti panangpirsay iti tinapay, ken agkararag.”
Tapno maipamaysada ti natibker ken matalek a pammatida ken ni Cristo ket agkasapulan a sumlep ti ebanghelio ni Jesucristo iti puso ken kararuada, kayatna a sawen nga agbalin ti ebanghelio saan la a maysa kadagiti paratignay iti biagda, ngem isu ti pakaipamaysaan ti biag ken kinataoda. Kinuna ti Apo:
“Ikkankayo met iti baro a puso, ken baro nga espiritu: ket paluknengek ti bimmato a pusoyo, ken ikkankayo iti puso a lasag.
“Ket ibatik ti espirituk kadakayo, ket magnakayo a kalanglangak, ket taginayonenyo dagiti pangngeddengko ken ipatungpalyo ida.
“Ket … wen agbalinkayto a taok, ket siakto ti Diosyo.”
Daytoy ti katulagantayo idi agbuniagtayo ken kadagiti ordinansa iti templo. Ngem adda pay la di nakaawat a naan-anay ti ebanghelio ni Jesucristo iti biagda. Nupay, kas kinuna ni Pablo, “naitanemdan ken ni [Cristo] babaen ti panagbuniag,” awan pay kadakuada ti “kas ken ni Cristo, nagungar kadagiti natay. … , kasta met … a masapul a magnatayo iti kabarbaro a biag.” Di pay la ida namuli ti ebanghelio. Saanda pay la a naisentro ken ni Cristo. Managpilida maipanggep iti doktrina ken bilin a surotenda ken sadino ken kaano nga agserbida iti Simbaan. Maigidiat itoy, ti panangsurotda iti katulaganda nga awan kurang dagiti “napili maibatay iti katulagan” liklikanda ti pannakaallilaw ket agtalinaedda a natibker iti pammati ni Cristo.
Kaaduan kadatayo ti makaammo ita a kanito nga addatayo pay la iti nagbaetan ti awis ti gimong iti aramid ti ebanghelio iti bangir, ken ti naan-anay, nagkari a Kristiano iti pagayatan ti Dios iti sabali a bangir. Iti dayta a nagbaetan, sumrek ti napintas a damag iti ebanghelio ni Cristo iti pusotayo ket iturayanna ti kararuatayo. Saan a madagdagus a kasta, ngem masapul nga agtultuloy ti idudur-astayo iti dayta nagasat a kasasaad.
Makapakarit ngem napateg ti agtalinaed a natibker ken matalek no madlawtayo a maas-asatayo iti “pugon ti panagsagaba,” banag a mapasamak kadatayo amin iti ania man a kanito itoy a biag. No awan ti Dios, daytoy nadagsen a padas agbanag nga awan namnama, uppapay, ken mabalin a pait. No adda Dios, sukatan ti gin-awa ti saem, sukatan ti kappia ti pannakatikaw, ken sukatan ti namnama ti leddaang. Mangyeg ti panagtalinaed a natibker iti pammati ni Cristo iti umdas a panangngaasi ken pannarabayna, ken pagbalinenna ti pannubok a bendision, ken kadagiti balikas ni Isaias, “mangted…ngayed iti dapu.
Agapadek man ti tallo a pagarigan a mismo nga ammok:
Adda babai a nagsagaba iti nakaro, nabayagen a sakit nga agpakpakaro iti baet ti panagpadpadoktorna, bendision ti priesthood, ken panagayuno ken kararag. Nupay kasta, saan a naksayan ti pammatina ti bileg ti kararag ken ti kinapudno ti ayat ti Dios kenkuana. Intultuloyna iti inaldaw (no dadduma inoras) ti nagserbi iti kasapulan ti Simbaan ken, kadua ti lakayna, a mangiwanwan iti ubing a pamiliana, nga umisem iti kabaelanna. Napasnek ti pannakipagrikna iti dadduma, a pinatibker ti panagsagsagabana, ken no dadduma mabaybay-anna ti bagina iti panagserbina iti sabali. Intultuloyna ti matalek, ket naragsak dagiti tao iti aglawlawna .
Nasdaaw ti tao a dimmur-as iti Simbaan, nagserbi a misionario, ken nangasawa iti napintas a babai idi makitana ti sumagmamano a kakabsatna a nangrugi a mangbabalaw iti Simbaan, ken ni Propeta Joseph Smith. Saan a nagbayag pimmanawda iti Simbaan ket pinadasna nga allukoyen isuna a sumurot. Kas mapaspasamak iti kakasta a pasamak, binatikosda ida kadagiti sinurat, podcasts, ken video iti kritiko, a kaaduanna dagiti makagura ket sigud a miembro ti Simbaan. Inuyaw dagiti kakabsatna ti pammatina, a kunada a napakumbaba ken nayaw-awan. Awan sungbatna iti amin a pammabalawda, ket nangrugi a kumapuy ti pammatina gapu iti nakaro a pammabalaw. Napanunotna nga agsardeng isuna a makimisa. Kinasaritana ti asawana. Kinasaritana dagiti tao a matalekna. Nagkararag. Iti panangam-amirisna iti nakiro a panunotna, nalagipna dagiti gundaway a nakariknaanna iti Nasantuan nga Espiritu ket nakaawat iti pammaneknek ti kinapudno babaen ti Espiritu. Inggibusna, “No napudnoak iti bagik, masapul nga awatek a saan la a namimpinsan a sinagidnak ket pudno unay ti pammaneknek ti Espiritu.” Naaddaan iti napabaro a ragsak ken talna nga impaay ti asawa ken dagiti annakna.
Dagiti agassawa nga agtultuloy ti ragsakda sinurotda ti pamagbaga dagiti Kakabsat a Lallaki iti biagda a nagsagaba iti tuok ken napadasanda iti kaadda ti annakda. Dakkel a kantidad ti nagastoda iti panagpapaagasda kadagiti nalaing a doktor ket iti panaglabas ti panawen, naparaburanda iti lalaki nga anak. Ti kas-angna, kalpasan la ti makatawen, nagbalin ti ubing a biktima ti aksidente nga awan ti akimbasol a nakapukawan ti riknana ta naapektaran ti utekna. Immawat iti kasayaatan a panangasikaso, ngem di maibaga dagiti doktor no ania ti masakbayanna. Ti anak dagitoy agassawa nga inkararaganda unay a maipasngay iti lubong, agarup mapukawdan, ket dida ammo no maisubli pay kadakuada. Marigatanda unay ita a mangisakad iti kasapulan ti anakda iti baet ti dadduma pay a pagrebbenganda. Iti kastoy a narikut a kanito, kimmamangda iti Apo. Nagtalekda iti “inaldaw a taraon” nga ipaayna kadakuada. Tinarabay ida dagiti manangngaasi a gagayyem ken pamilia ken napatibker iti bendision ti priesthood. Ad-adda a nagsisinningedda, nabilbileg la ketdi itan ti panagkakaduada ken naan-anay ngem iti saan.
Idi Hulio 23, 1837, inturong ti Apo ti paltiing iti daydi agdama a presidente ti Korum ti Sangapulo-ket-dua nga Apostol, ni Thomas B. Marsh. Nairaman ti sumaganad:
“Ket ikararaganyo dagiti kakabsat iti Sangapulo-ket-dua. Palagipanyo ida para kaniak, ket mapalagipanda koma iti amin a basolda, ket agbalinkayo a napudno iti imatangko babaen ti naganko.
Ket kalpasan ti pannakasulisogda, ken ad-adu a riribuk, adtoy, Siak, ti Apo, ipariknak kadakuada, ket no dida agsuksukir, ken dida agbalin a natangig a maibusor kaniak, mapasublida, ket agasak ida.”
Patiek a maipaay kadatayo amin dagiti pagbatayan a naipeksa kadagitoy a berso. Dagiti sulisog ken riribuk a napadasantayo, sa ania man a pammadas nga imparikna kadatayo ti Apo, mangiturong kadatayo iti naan-anay a pannakapasurot wenno kumbersion ken panangpaimbag. Ngem mapasamak daytoy no, laeng no ditay agsuksukir ken agtangig maibusor Kenkuana. No agtalinaedtayo a natibker ken matalek, matun-oynatayo ti pannakapasurot nga inranta ti Mangisalakan idi imbagana ken ni Pedro, “No napasurotkayon, papigsaenyo dagiti kakabsatyo,” ti naan-anay a pannakapasurot a saanen a maisubli. Ti naikari a pangpaimbag isu ti panangdalus ken pannakapasanto ti nagbasol a kararuatayo, a mangpasanto kadatayo.
Maipalagip kaniak ti pamagbaga ni nanangko: “Sidam dagiti natengmo; pasalun-atennaka.” Husto dagiti innatayo, ket iti bugas ti agtalek iti pammati, “panangsidayo iti natengyo” isu ti kanayon a panagkararag, inaldaw nga agpennek kadagiti nasantuan a kasuratan, agserbi ken agdaydayaw iti Simbaan, maikari a makiraman iti sakramento iti linawas, ken situtulnog iti Dios nga ibaklayyo ti krusyo iti inaldaw.
Laglagipenyo ti kari dagiti dumteng a naimbag a banag, ita ken iti agnanayon, para iti natibker ken matalek a pammati ken ni Cristo. Laglagipenyo ti “agnanayon a biag, ken ti rag-o dagiti santo,” “O dakayo amin a natarnaw ti puspusona, tumangadkayo ket awatenyo ti makabang-ar a balikas ti Dios, ket agpennekkayo iti ayatna; tapno agnanayonkayo, no natibker ti panunotyo.” Iti nagan ni Jesucristo, amen.