Natibker ken Manayon a Kombersion iti Nailangitan nga Ama ken ni Apo Jesucristo

Ni Elder Quentin L. Cook

Ti Korum dagiti Sangapulo-ket-dua nga Apostol

Panggeptayo ti mangtimbeng iti Simbaan ken dagiti padas iti pagtaengan iti wagas a mangpatibker iti pammati ken kinaespirituan ken mangpauneg iti kombersion.

Kas iti napintas ken nalawag nga inrugi ni Presidente Russell M. Nelson, Napagsasaritaan dagiti lider ti Simbaan iti napaut a panawen ti plano a “naisentro iti pagtaengan ken suportaran ti Simbaan a plano iti panagsursuro iti doktrina, panangpapigsa iti pammati, ken panangpatibker iti dakdakkel a bukod a panagdayaw.” Kalpasanna impakaammo ni Presidente Nelson ti panagbalbaliw tapno magun-od ti natimbeng a panangisuro iti ebanghelio iti pagtaengan ken iti Simbaan.”¹

Tapno masurot daytoy a panggep—inladawan ken inturong ni Presidente Russell M. Nelson ken mainugot iti pangngeddeng ti Konseho ti Umuna a Panguluen ken ti Korum ti Sangapulo-ket-dua nga Apostol—mabaliwan ti miting iti Domingo iti sumaganad a wagas, mangrugi intono Enero 2019.

Iskediul ti Miting iti Domingo

Buklento dagiti miting ti Simbaan iti Domingo ti 60-minuto a miting iti sakramento iti tunggal Domingo, maipamaysa iti Mangisalakan, ti ordinansa ti sakramento, ken dagiti naespirituan a mensahe. Kalpasan ti kanito para iti transision kadagiti klase, dar-ayanto dagiti miembro ti Simbaan ti 50-minuto a klase nga agsinnublatto iti tunggal Domingo:

Maangayto ti Sunday School iti umuna ken maikadua a Domingo ti bulan.
Maangayto dagiti miting ti korum iti priesthood, Relief Society, ken Young Women iti maikadua ken maikapat a Domingo.
Iturongto ti bishop ti miting iti maikalima a Domingo.

Maangayto ti Primary iti tunggal lawas a maipada iti daytoy 50-minuto ket mairamanto ti oras ti panagkanta ken klase.

Ladawan

Iskediul iti Domingo

Maipanggep iti iskediul ti miting iti Domingo, ammo dagiti nataengan a lider ti Simbaan iti adun a tawen nga adda dagiti napateg a miembrotayo, narigat kadakuada ti tallo nga oras nga iskediul iti Domingo. Agpayso daytoy kadagiti nagannak nga addaan babassit nga annak, ubbing iti Primary, babbaket ken lallakay a miembro, kabarbaro a miembro, ken dadduma pay.²

Ngem ad-adu pay iti daytoy a panagbalbaliw ngem iti panangyababa laeng iti iskediul iti kapilia iti Domingo. Inawat a siyayaman ni Presidente Nelson no kasano ti maiwakas kas banag ti kinapudnoyo kadagiti napalabas nga awis. Isu, ken ti sangabukel a liderato ti Simbaan, tarigagayda ti mangyeg iti naragrag-o nga ebanghelio—kadagiti nagannak, ubbing, agtutubo, awanan assawa, lallakay ken babbaket, kabarbaro a miembro, ken dagiti tao nga isursuro dagiti misionario—babaen ti agtunos a pannakaisentro ti pagtaengan, ken ti panangsuporta ti Simbaan. Dagiti panggep ken bendision a mainaig iti daytoy a panagbalbaliw ken dadduma pay a napalabas panagbalbaliw ket mairaman iti sumaganad:

Pannakaipangpangruna ti kombersion iti Nailangitan nga Ama ken ni Apo Jesucristo ken ti pannakapatibker ti pammatida Kadakuada.
Panangpatibker kadagiti indibidual ken pamilia babaen ti kurikulum iti pannakaipangruna ti pagtaengan, ti pannarabay ti Simbaan a mangted iti ragsak iti panagbiag iti ebanghelio.
Panangngilin iti aldaw ti Sabbath, a maipamaysa iti ordinansa ti sakramento.
Panagtulong kadagiti annak ti Nailangitan nga Ama iti agsumbangir ti belo babaen ti aramid ti misionario ken yaawat kadagiti ordinansa ken katulagan ken bendision ti templo.

Panangsursuro iti Ebanghelio a Naisentro iti Pagtaengan, Suportaran ti Simbaan

Daytoy nga iskediul ti Domingo ket mangted iti ad-adu pay nga oras iti family home evening ken panagadal iti ebanghelio iti pagtaengan iti Domingo, wenno sabali pay nga oras kas pili ti indibidual ken ti pamilia. Ti aktibidad ti pamilia ket mabalin nga angayen iti Lunes wenno iti sabali nga oras. Gapu iti daytoy, masapul nga itultuloy dagiti lider nga ilatang a libre ti Lunes ket awan ti miting ken aktibidad iti Simbaan. Nupay kasta, ti mausar ti oras iti family home evening, panagadal iti ebanghelio, ken aktibidad para kadagiti indibidual ken pamilia ket mabalin a yiskediul a maibatay kadagiti kasasaad ti tunggal maysa.

Ladawan

Umaykayo, Sumurot Kaniak—Para kadagiti Indibidual ken Pamilia

Ti indibidual ken sangapamiliaan a panagadal iti ebanghelio iti pagtaengan ket maparegtanto babaen ti agtutunos a kurikulum ken ti baro nga Umaykayo, Sumurot Kaniak a resource para kadagiti indibidual ken pamilia a maitunos iti maisursuro iti Sunday School ken Primary. ³ Inton Enero, dagiti klase ti agtutubo iti Simbaan ken Sunday School dagiti nataengan ken Primary ket adalendanto ti Baro a Tulag. Ti baro a panagadal iti pagtaengan nga Umaykayo, Sumurot Kaniak a resource para kadagiti indibidual ken pamilia—ket sakupenna pay ti Baro a Tulag—nairanta a tumulong kadagiti miembro a mangadal iti ebanghelio iti pagtaengan. Ilawlawagna: “Agpaay daytoy a resource kadagiti indibidual ken pamilia iti Simbaan. Naisangrat daytoy a tumulong kadatayo a masursuruan a nasayaat iti ebanghelio—bukokd[tayo] man wenno iti kadua ti pamilia[tayo]. … Naurnos dagiti balabala iti daytoy [baro] a resource a maibatay iti linawas … nga iskediul.” ⁴

Dagiti baro nga adalen iti Primary nga Umaykayo, Sumurot Kaniak a maisuro iti simbaan ket mangsurotto iti isu met la a linawas nga iskediul. Dagiti klase dagiti nataengan ken agtutubo iti Sunday School iti umuna ken maikatlo a Domingo ket agtutunosto tapno suportarandanto ti baro nga Umaykayo, Sumurot Kaniak a resource iti pagtaengan. Iti maikadua ken maikapat a Domingo, dagiti nataengan iti Priesthood ken iti Relief Society ituloyda nga adalen ti pannursuro dagiti lider ti Simbaan, a mayunay-unay iti agdama a mensahe dagiti moderno a propeta.⁵ Dagiti agtutubo iti Young Women ken Aaronic Priesthood ket adalendanto dagiti topiko ti ebanghelio kadagita a Domingo.

Mangted ti baro a resource ti panagadal iti pagtaengan iti “Dagiti Kapanunotan para iti Panagadal iti Nasantuan a Kasuratan ken Family Home Evening.”⁶ Naglaon dagiti balabala para iti tunggal lawas iti makatulong a kapanunotan iti panagadal ken aktibidad para kadagiti indibidual ken pamilia. Ti Umaykayo, Sumurot Kaniak a resource para kadagiti indibidual ken pamilia ket aduan kadagiti ladawan a tumulong a mangparegta iti panagadal nga agmaymaysa ken kadua ti pamilia, nangruna dagiti ubbing. ⁷ Maited daytoy baro a resource iti tunggal pamilia inton Disiembre daytoy a tawen.

Inggunamgunam kadatayo ni Presidente Nelson, iti immuna a panagsaritana kadagiti miembro ti Simbaan idi Enero nga agsagana para iti Maikadua a Yaay ni Jesucristo babaen ti panangsurot iti dana ti katulagan.⁸

Ti kasasaad ti lubong ad-adda a makasapul iti naun-uneg a kumbersion ti tao ken panangpatibker iti pammati iti Nailangitan nga Ama ken ni Jesucristo ken ti Pannubbotna. Insagananatayo ti Apo, iti tunggal binatog, kadagiti nariribuk a panawen a sangsanguentayo. Kadagiti naglabas a tawen, indalannatayo ti Apo a mangimutektek kadagitoy sumaganad a pakaseknan, agraman ti:

Panangngilin iti aldaw ti Sabbath ken ti sagrado nga ordinansa ti sakramento a nayunay-unay manen iti napalabas a tallo a tawen.
Babaen ti panangiturong ti bishop, dagiti napatibker a korum ti elder ken ti Relief Society ket maipamaysa iti panggep ken nadiosan a naidutok a pagrebbengan ti Simbaan ⁹ ken ti itutulong kadagiti miembro nga agaramid ken agtungpal kadagiti sagrado a katulagan.
Ti ministering iti “nangatngato ken nasansantuan a wagas” ket siraragsak a masursurot.
Manipud iti kangrunaan a panggep, dagiti katulagan iti templo ken serbisio iti family history ket agbalbalinen a naipanggepan a paset ti dana ti katulagan.

Ti panagbalbaliw a naipakaammo ita nga agsapa ket sabali pay a pagarigan ti pangiwanwan para kadagiti karit iti panawentayo.

Ti kadaanan a kurikulum ti Simbaan ket inyunay-unayna ti padas iti Simbaan iti Domingo. Ammotayo a no adda nasaysayaat a panangisuro ken ad-adu ti miembro iti klase a naespirituan a nakapagsagana, nasaysayaat ti padastayo iti Simbaan iti Domingo. Nagasattayo ta masansan a palawaen ken patibkeren ti kumbersion iti Simbaan.

Ti baro a kurikulum ti naisentro iti pagtaengan ken suportaran ti Simbaan ket masapul a makaawis iti ad-adu a nabileg a panangimutektek ti pamilia ken ugali ken bukod a panagpaliiw ken ugali. Ammotayo ti naespirituan a bileg ken ti nauneg ken napaut a kumbersion a magun-od iti pagtaengan. Adun a tawen ti napalabas, impakita ti panagadal a tapno maawis dagiti agtutubo a babbai ken lallaki ti impluensia ti Espiritu Santo masansan a kakuyog ti bukod a panagadal iti nasantuan a kasuratan ken panagkararag iti pagtaengan. Panggeptayo a timbangen ti padas iti Simbaan ken iti pagtaengan iti wagas a mangpapigsanto iti pammati, espiritualidad, ken mangpasiken iti kumbersion iti Nailangitan nga Ama ken ni Apo Jesucristo.

Iti naisentro iti pagtaengan, a suportaran ti Simbaan a paset ti panagbalbaliw, nawaya ti bukod ken ti pamilia a mangikararag no kasano ken kaano ti pannakaipatungpalna. Kas pagarigan, idinto ta dakkel a bendision daytoy iti amin a pamilia, a maibatay iti kasapulan, mainumo unay kadagiti awanan asawa nga agtutubo ken agkabannuag ken nagannak nga awan asawana, ti saan a miembro amin ti pamilia, kabarbaro a miembro,¹⁰ ken dadduma pay nga aguummong iti ruar iti gagangay a pannakimisa iti Domingo a mangnanam iti ebanghelio ken mangpatibker babaen ti panagadal a sangkamaysa iti resource a naisentro iti pagtaengan, a suportaran ti Simbaan. Ipatungpalto daytoy dagiti agtarigagay a mangaramid.

Iti adu a paset ti lubong, kaykayat dagiti tao ti agyan iti kapilia kalpasan ti gagangay nga iskediul iti Domingo a mangnanam iti pannakipulapol. Awan ti makasinga iti daytoy naipakaammo a panagbalbaliw a mangtubeng iti daytoy naindaklan ken napateg nga aramid iti ania man a wagas.

Tapno matulongan dagiti miembro nga agsagana para iti Sabbath, adda dagiti ward a nangipakaammon babaen ti email, text, wenno social media iti ngalay ti lawas. Babaen daytoy a panagbalbaliw, isingasingmi ti kastoy a komunikasion. Daytoy nga awis ipalagipna kadagiti miembro ti iskediul ti miting iti Domingo, a pakairamanan ti sumaruno nga adalen, ken suporta ti agtultuloy a kumbersion iti ebanghelio iti pagtaengan. Maysa pay, ti miting dagiti nataengan iti Domingo ti mangted iti impormasion a mamagkaysa ti Simbaan ken ti panagadal iti pagtaengan iti tunggal lawas.

Agkasapulan iti nainkararagan a panangibilang iti miting iti sakramento ken ti klase tapno maipanamnama a mayunay-unay dagiti naespirituan a prioridad kadagiti aramid nga administratibo. Kas pagarigan, maipatungpal dagiti panagipakaammo ti kadakkelan a paset iti ngalay ti lawas wenno iti naimaldit a programa. Idinto nga adda panglukat ken pangrikep a kararag iti miting ti sakramento, pangrikep a kararag ti kasapulan laeng iti maikadua a miting.¹¹

Kas nadakamat a nasapsapa, saan a marugian ti baro nga iskediul ti Domingo agingga iti Enero 2019. Adda dagiti gapu para iti daytoy. Ti dua a kapatgan, umuna, tapno adda panawen nga agibunong iti Umaykayo, Sumurot Kaniak a resource para kadagiti indibidual ken pamilia ken, maikadua, tapno maikkan iti panawen dagiti stake president ken bishop a mangurnos kadagiti iskediul ti miting, nga adda panggep a tun-oyen wenno goal a maaddaan iti ad-adu pay a ward nga agmimiting a nasapsapa iti dayta nga aldaw.

Bayat ti panagkalikagum dagiti lider a makagun-od iti paltiing, ti pannarabay a naawat sumagmamano a tawenen ti napalabas ket ti panangpatibker iti miting iti sakramento, panangngilin iti Aldaw ti Sabbath, ken panangparegta ken panangtulong kadagiti nagannak ken dadduma pay tapno aramidenda ti pagtaenganda a pagtaudan ti naespirituan a pigsa ken napatibker a pammati—maysa a lugar ti rag-o ken ragsak.

Dagiti Nakaskasdaaw a Bendision

Ania ti kaipapanan dagitoy a panagbalbaliw kadagiti miembro ti Ti Simbaan ni Jesucristo dagiti Santo iti Ud-udina nga Aldaw? Mangnamanamakami a mabendisionan dagiti miembro iti nakaskasdaaw a wagas. Ti Domingo ti aldaw a panagadal iti ebanghelio ken panangisuro iti simbaan ken iti pagtaengan. No makiraman dagiti indibidual ken pamilia iti family council, family history, ministering, serbisio, panagdaydayaw, ken naragsak a kanito ti kaamaan, pudno a makaparagsakto ti aldaw ti Sabbath.

Ladawan

pamilia Carvalho

Miembro iti stake ti maysa a pamilia idiay Brazil a nakapadasen iti Umaykayo, Sumurot Kaniak a baro a resource iti pagtaengan. Impakaammo ni Brother Fernando, ti ama, a nagserbi a misionario, a kaduana ti asawana, ni Nancy, a nagannak iti uppat nga ubbing: “Idi nayam-ammo ti programa iti Umaykayo, Sumurot Kaniak iti stakemi, naragsakanak unay, ket napanunotko a ‘mabalbaliwan ti wagas a panagadalmi iti nasantuan a kasuratan iti pagtaenganmi.’ Napasamak a talaga iti pagtaengak, ket kas lider ti Simbaan nakitak a napasamak met iti dadduma pay a pagtaengan. … Natulongannakami a nagsasarita maipanggep iti nasantuan a kasuratan. Nasaysayaaten a maawatanmi nga agassawa ti topiko a maadal . … Natulongannakami. … a nangpadur-as iti pannakaammomi iti ebanghelio ken nangpatibker iti pammati ken pammaneknekmi. … Paneknekak. … a pinaregta daytoy ti Apo tapno ti masansan ken nasamay a panagadal kadagiti prinsipio ken doktrina a linaon dagiti nasantuan a kasuratan ket mangisangbay iti pammati, pammaneknek, ken lawag kadagiti pamilia. … iti matmatnagen a lubong.”¹²

Kadagiti nagpadasan a stake iti lubong, nangato ti bilang dagiti mangayat itiUmaykayo, Sumurot Kaniak a resource iti pagtaengan. Adu ti nagreport a simmayaatda manipud iti panagbasada iti nasantuan a kasuratan iti talaga a panagadalda iti nasantuan a kasuratan. Gagangay met a narikna a ti padas ket pannakaitandudo ti pammati ken naaddaan iti nakaskasdaaw nga epekto iti ward.¹³

Nauneg ken Manayon a Kombersion

Ti panggep a tun-oyen wenno goal dagitoy a panagbalbaliw ket ti pananggun-od iti nauneg ken manayon a kumbersion dagiti agkabanuag ken ti tumantanor a kaputotan. Ipakita ti umuna a panid ti resource ti indibidual ken ti pamilia: “Ti panggep ti amin a panagadal iti ebanghelio ken panangisuro ket mangpauneg iti kombersiontayo ken tumulong kadatayo nga agbalin nga ad-adda pay a kas ken ni Jesucristo . … Kayatna a sawen daytoy ti panagtalek ken ni Cristo a mangbalbaliw iti puspusotayo.”¹⁴ Matulongan daytoy ti panangragpat “iti labes ti siled ti klase agingga iti puso ken pagtaengan ti tao. Agkasapulan daytoy iti agtultuloy, inaldaw a panagkagumaan ken panangawat ken panagbiag iti ebanghelio. Agkasapulan ti pudno a kumbersion iti impluensia ti Espiritu Santo.”¹⁵

Ti kapatgan a panggep a tun-oyen wenno goal ken ti kangatuan a bendision ti nauneg ken manayon a kumbersion ket ti pannakaikari a mangawat kadagiti katulagan ken ordinansa iti dana ti katulagan .¹⁶

Agtalekkami kadakayo nga aggiinnuman ken agkalikagum a manggun-od iti paltiing para iti pannakaipatungpal dagitoy a panagbalbaliw—idinto a saan a kumitkita iti labes ti marka wenno panangpadas a mangpilit iti aramiden dagiti indibidual ken pamilia. Maibinglayto ti nayon pay nga impormasion kadagiti masungad a komunikasion, a pakairamanan ti maysa a surat ti Umuna a Panguluen ken ti karagpinna.

Ipaneknekko nga iti panagsasarita ti Konseho ti Umuna a Panguluen ken ti Korum ti Sangapulo-ket-dua nga Apostol iti templo, ken kalpasan ti araraw ti patpatgentayo a propeta iti Apo para iti paltiing a mangituloy kadagitoy a panagbalbaliw, inawat ti amin ti nabileg a pammatalged. Ni Russell M. Nelson ti sibibiag a Presidente ken propetatayo. Dagiti panagipakaammo a naaramid ket agbanagto kadagiti naruay a bendision para kadagiti sipapasnek nga umawat kadagiti panagbalbaliw ken agkalikagum a manggun-od t iti pannarabay ti Espiritu Santo. Umas-asidegtayto iti Nailangitan nga Amatayo ken iti Apotayo ken Mangisalakan, a ni Jesucristo, nga awan duaduak a paneknekan. Iti nagan ni Jesucristo, amen.