Para Kenkuana
Ti panangammo no asino ken no apay nga iti panagserbi iti dadduma ket matulongannatayo a mangipaawat a kangatuan a panangipakita iti ayat ti debosion iti Dios.
Iti daytoy kapatgan a sardam, ipeksak ti ayat ken panagyamanko kadakayo amin, patpatgek a kakabsatko a babbai. Ania man ti edad, lugar, wenno kasasaadtayo, aguummongtayo ita iti kaykaysa, pigsa, panggep, ken pammaneknek a patpatgen ken iturongnatayo ti Amatayo iti Langit; ti Mangisalakantayo, ni Jesucristo; ken ti sibibiag a propetatayo, ni President Russell M. Nelson.
Baro kami pay la nga agassawa idi, inawagannakami ti bishopmi a mangsarungkar ken agminister iti pamilia a saan a nakimismisa iti adun a tawen. Siaayat nga inawatmi ti assignment ket napankami iti balayda kalpasan ti sumagmamano nga aldaw. Dagus a nalawag kadakami a saanda a kayat dagiti sangaili a naggapu iti Simbaan.
Iti sumaruno nga isasarungkarmi, intugotanmi ida iti cookies, nangipagarup a lumag-an ti riknada kadakami gapu iti chocolate chips. Saan gayam. Kinasaodakami ti agassawa iti screen ti ridaw, nalawag kadakami a saandakami a kayat a pasangbayen. Bayat ti kaaddami iti lugan nga agawid, siguro a no koma Rice Krispies Treat ti intugotmi baka pinastrekdakami.
Gapu ta kurangkami iti naespirituan a pannirigan napaaykami latta kadagiti simmaruno nga isasarungkarmi. Nadagsen ti rikna ti saan a maawat. Kalpasan ti adu a panawen nasaludsodmi iti bagimi, “Apay nga ar-aramidenmi daytoy? Ania ti panggepmi?”
Napaliiw ni Elder Carl B. Cook daytoy: “Ti panagserbi iti Simbaan … mabalin a mapannubok no makiddawtayo nga agaramid iti maysa a banag a pagbutbungantayo, no nabannogtayon nga agserbi, wenno no naawagantayo nga agaramid iti maysa a banag nga iti damo ditayo magustuan.”1 Napadasanmi ti kinapudno dagiti sao ni Elder Cook idi inkeddengmi a nasken a gun-odenmi ti pangiturong ti Maysa a Parsua a dakdakkel ti panniriganna ngem iti bukodmi.
Kalpasan ti adu a napudno a kararag ken panagadal, naawatmi ti sungbat no apay nga agserserbikami. Adda panagbaliw ti pannakaawatmi, panagbaliw ti puso, kinapudnona maysa a naipalgak a padas.2 Iti panagsapulmi iti pangiturong manipud iti nasantuan a kasuratan, insuro ti Apo kadakami no kasano nga aramiden a nalaklaka ken napatpateg ti wagas ti panagserbi iti dadduma Daytoy ti bersikulo a nabasami a namagbalbaliw iti puso ken wagasmi: “Ayatenyo ti Apo a Diosyo iti amin a pusoyo, iti amin a kabaelan, panunot, ken pigsayo; ken iti nagan ni Jesucristo agserbikayo kenkuana.”3 Nupay pamiliar unay daytoy a bersikulo, kasla kasasaonakami iti baro ken napateg a wagas.
Naamirismi a sipupudno nga inkarkarigatanmi a pagserbian daytoy a pamilia ken nagserbi iti bishopmi, ngem nasken a saludsodenmi iti bagimi no pudno nga agserserbikami gapu ta ay-ayatenmi ti Apo. Inlawlawag ni Ari Benjamin daytoy a paggidiatan idi kinunana, “Adtoy, kunak kadakayo nga agsipud ta kinunak kadakayo a binusbosko ti aldawko iti panagserbik kadakayo, diak tarigagayan ti agparammag, ta addaak laeng iti serbisio ti Dios.”4
Asino ti pudno a pagserserbian ni Ari Benjamin? Ti Ama iti Langit ken ti Mangisalakan. Ti panangammo no asino ken no apay a ti panagserbi iti dadduma ket matulongannatayo a mangipaawat a kangatuan a panangipakita iti ayat ti debosion iti Dios.
Idi in-inut a nagbaliw ti pokusmi, nagbaliw met dagiti kararagmi. Rinugianmi a pasungadan dagiti isasarungkarmi itoy a maipatpateg a pamilia gapu iti ayatmi iti Apo.5 Inaramidmi daytoy para Kenkuana. Saanen a narigat nga aramiden gapu Kenkuana. Kalpasan ti adu a bulan a panagtakder iti ruar ti ridaw, pinastreknakamin ti pamilia iti balayda. Idi agangay, kanayonkamin nga agkakadua nga agkararag ken agsasarita maipapan ti ebanghelio. Nagbalin a nasingedkamin nga aggagayyem. Dinaydayaw ken inay-ayatmi Isuna babaen ti panagayatmi iti annakna.
Malagipyo kadi ti panawen idi siaayatkayo a timmulong nga addaan napudno a panagkagumaan iti maysa nga agkasapulan ket nariknayo a saan a nadlaw wenno nabigbig ti pateg dagiti panagkagumaanyo? Iti dayta a kanito, nagduaduakayo kadi iti pateg ti panagserbiyo? No kasta, dagiti koma sao ni Ari Benjamin ti mangsukat iti duadua ken sakit ti riknayo: “Agserserbikayo laeng iti Diosyo.”6
Imbes nga agsakit ti nakem, mabalintayo a bangonen, babaen ti serbisio, ti naperperpekto a relasion iti Amatayo iti Langit. Ti ayat ken debosiontayo Kenkuana ti mangikkat iti panagkasapulan iti pammigbig wenno pammadayaw ken mangpalugod iti ayatna a maibukbok babaen kadatayo.
No dadduma iti damo makapagserbitayo gapu iti pagrebbengan wenno obligasion, ngem uray pay dayta a panagserbi makaallukoy kadatayo a mangusar kas pagtaudan ti banag a nangatngato iti kaunggantayo, maiturongnatayo nga agserbi iti “nalalaing a wagas”7—kas iti awis ni President Nelson iti “nabarbaro, nasansanto a wagas iti panangaywan ken panagserbi iti dadduma.”8
No agpokustayo iti amin nga inaramid ti Dios para kadatayo, ti serbisiotayo ti mangparegta iti managyaman a puso. No ditayo maseknan iti panagserbitayo a mangpadur-as kadatayo, maamiristayo ketdi a pokus ti panagserbitayo ti umuna a panangipangpangruna iti Dios.9
Insuro ni President M. Russell Ballard, “Iti laeng a no ayatentayo ti Dios ken ni Cristo iti amin a puso, kararua, ken panunottayo a kabaelantayo nga ibinglay daytoy nga ayat iti padatayo a tao babaen iti panangipakita iti kinaimbag ken panagserbi.”10
Ipakita ti umuna iti Sangapulo a Bilin daytoy nadiosan a sirib: “Siak ti Apo a Diosmo. … “Awan ti sabali a diosmo iti sangok.”11 Ti panangibilangtayo itoy a bilin ket matulongannatayo a makaawat a no ibilangtayo nga Isu ti umuna nga ipangpangrunatayo, maikabil ti amin a banag iti husto a pagyananda—kas iti panagserbitayo iti dadduma. No awatenna ti kapatgan a saad iti biagtayo babaen ti di naigagara a pilitayo, kabaelanna a bendisionan dagiti tignaytayo para iti pagimbagantayo ken ti pagimbagan dagiti dadduma.
Imbalakad ti Apo, “Kitaendak iti tunggal panunot.”12 Ket linawas makitulagtayo a mangaramid iti dayta—a “kanayon manglaglagip kenkuana.”13 Maitutop kadi ti kasta a nadiosan a pokus iti amin a banag nga aramidentayo? Ti panangaramid iti simple a banag agbalin kadi a gundaway a mangipakita iti ayat ken debosion Kenkuana? Patiek a mabalin daytoy.
Maaramidtayo ti tunggal banag iti listaan ti aramidentayo a maysa a wagas a pangitan-ok Kenkuana. Makitatayo ti tunggal aramid kas pribilehio ken gundaway nga agserbi Kenkuana, uray no adda nasken a leppasen, aramiden, wenno dalusantayo.
Kas kinuna ni Ammon, “Wen, ammok nga awananak; no ti pigsak nakapsutak; ngarud saanko nga ipalangguad ti bagik, ngem ipalangguadko ti Diosko, ta babaen ti pigsana maaramidko ti amin a banag.”14
No ipangruna a prayoridadtayo iti biag ti panagserbi iti Diostayo, mapukawtayo ti bagitayo, ken iti kamaudiananna, maam-ammotayo ti bagitayo.15
Insuro ti Mangisalakan daytoy a prinsipio a simple ken direkta: “Ngarud agraniag koma ti silawyo kadagitoy a tao, tapno makitada ti nasayaat nga aramidyo ket dayawenda ti Amayo nga adda sadi langit.”16
Ibinglayko kadakayo ti sumagmamano a nainsiriban a balikas a nasarakan iti pader ti pagamponan iti Calcutta, India: “No nasingpetkayo, mapabasoldakayo dagiti tao iti managimbubukod, di maipeksa a gandat. Nupay kasta, agbalin a nasingpet. No ania ti binangonyo iti adu a tawen, kabaelan a dadaelen ti maysa a tao iti paagdarikmat. Nupay kasta, agbangonkayo. Dagiti nasayaat nga aramidenyo ita, masansan a malipatan ti tao inton bigat. Nupay kasta agaramid iti nasayaat. Itedyo iti lubong ti kasayaatan nga adda kadakayo, ket mabalin a di umdas daytoy. Itedyo iti lubong ti kasayaatan a nagun-odyo. Kitaenyo, iti maudi nga analisis, nagbaetanyo daytoy iti Diosyo… nupay kasta.”17
Kakabsat, kanayon a nagbaetantayo daytoy iti Apo. Kas kinuna ni President James E. Faust: “‘Ania ti kadaklan a kasapulan iti lubong?’… ‘Di kadi ti kadaklan a kasapulan ti tunggal tao iti lubong ket maaddaan iti bukod, naynay, inaldaw, agtultuloy a relasion iti Mangisalakan?’ Ti kaadda ti kasta a relasion ti mangipakita iti kinadiosan iti unegtayo, ket awan makaaramid iti dakdakkel a pagdumaan iti biagtayo no maammuan ken maawatantayo ti nadiosan a relasiontayo iti Dios.”18
Maipada, idi inlawlawag ni Alma iti anakna, “Wen, italekmo amin nga aramidmo iti Apo, ket sadino man a papanam agturongda koma iti Apo; wen, maiturong koma amin a pampanunotmo iti Apo; wen, bay-am a ti pammateg ti pusom maipaay iti Apo iti agnanayon.”19
Insuronatayo ni President Russell M. Nelson, “No maawatantayo ti natallugod a Pannubbotna, ania man a rikna ti sakripisiotayo agbalin a naan-anay a rimbawan ti nauneg a rikna ti panagyaman iti gundaway a panagserbi Kenkuana.”20
Kakabsat, paneknekak a nangtrabaho kadatayo ni Jesucristo, babaen ti bileg ti Pannubbotna, nangrugi a nagtrabahobabaen kadatayo a mangparabur iti dadduma. Pagserbiantayo ida, ngem aramidentayo babaen ti panagayat ken panagserbi Kenkuana. Agbalintayo kas inladawan dagiti nasantuan a kasuratan: “Tunggal lalaki [ken a babai] maseknan iti pagimbagan ti padana a tao, ken mangaramid iti amin a banag a naitalimudok ti imatangna iti gloria ti Dios.”21
Nalabit nga ammo ti bishopmi a dayta ti adalen a masursuromi nga agassawa kadagiti naigandat, ngem saan a naan-anay nga aramid tapno agminister kadagiti patpatgenna nga annak ti Dios. Paneknekak ti kinaimbag ken ayat nga iburayna kadatayo uray no ikarigatantayo ti agserbi para Kenkuana. Iti sagrado a nagan ni Jesucristo, amen.