Ti Kinapudno ken ti Plano
No sapulentayo ti kinapudno maipanggep iti relihion, masapul nga usarentayo dagiti naespirituan a wagas a mainugot iti dayta a panagsukisok.
Ilawlawag ti agdama a paltiing ti kinapudno a kas maysa a “pannakaammo kadagiti banag a kas iti kasasaadda ita, ken kasasaadda idi, ken kasasaadda iti masakbayan” (Doktrina ken Katulagan 93:24). Dayta ti naan-anay a kayulogan para iti plano ti pannakaisalakan ken ti “Ti Kaamaan: Maysa a Waragawag iti Lubong.”
Agbibiagtayo iti panawen a nakalawlawa ti masakupan ti impormasion. Ngem saan a pudno amin dagitoy nga impormasion. Masapul nga agannadtayo bayat ti pagsapultayo iti kinapudno ken panagpili kadagiti paggapuan para iti dayta a panagsapul. Ditay koma matikaw iti nalatak nga aramid wenno awtoridad iti maikari a pagtaudan ti kinapudno. Masapul nga agannadtayo iti panagpannuray iti impormasion wenno balakad dagiti artista, nalatak nga atleta, wenno aglemlemmeng nga internet. Ti paglaingan iti maysa a banag dina kayat a sawen a nalaingen iti kinapudno ti sabali a banag.
Masapul met a naannadtayo maipanggep iti motibasion ti maysa a mangted iti impormasion. Dayta ti gapuna no apay a binallaagannatayo ti nasantuan a kasuratan a maibusor iti panaginsasaserdote (kitaen iti 2 Nephi 26:29). No awan nagan wenno di am-ammo ti naggapuanna, mabalin met a pagduaduaan ti impormasion.
Ti bukodtayo a pangngeddeng maibasar iti impormasion manipud kadagiti naggapuan a maikari iti topiko ken nawaya manipud kadagiti magimbubukod a motibasion.
I.
No agsapultayo iti pudno maipanggep iti relihion, usarentayo dagiti naespirituan a wagas a mainugot iti panagsukisok: kararag, ti saksi ti Espiritu Santo, ken panagadal iti nasantuan a kasuratan ken ti balikas dagiti moderno a propeta. Kanayon nga aglidayak no makangngegak iti maysa nga agipadamag iti pannakapukaw ti pammati iti relihion gapu kadagiti nailubongan a panursuro. Dagiti addaan idi iti naespirituan a sirmata ket mabalin nga agsagabada iti bukod a naespirituan a pannakabulsek. Kas iti kinuna ni Presidente Henry B. Eyring, “Ti problemada saan a nagtaud iti ipagarupda a nakitada; nagtaud iti saanda a nakita.”1
Dagiti wagas ti siensia ti mangiturong kadatayo iti aw-awagantayo iti sientipiko a kinapudno. Ngem ti “sientipiko a kinapudno” ket saan nga a ti sibubukel a biag. Dagiti saan nga agsursuro “babaen ti panagadal ken kasta met a babaen ti pammati” (Doktrina ken Katulagan 88:118) limitaranna ti pannakaawatda iti pudno iti kabaelanda a mangpennek babaen dagiti sientipiko a wagas. Iturong daytoy ti palso a pagkurangan iti panagsapul iti pudno.
Kinuna ni Presidente James E. Faust: “Dagiti [nabuniaganen] iturongda ti agnanayon a kararuada iti peggad babaen ti di naannad a panagsapulda iti nailubongan a paggapuan ti panagsursuro. Mamatitayo nga adda iti Ti Simbaan ni Jesucristo dagiti Santo iti Ud-udina nga Aldaw ti pakabuklan ti ebanghelio ni Cristo, a ti ebanghelio ti bugas ti kinapudno ken agnanayon a pammalag-an.”2
Masarakantayo ti pudno ken manayon a ragsak no maammuan ken agtignaytayo iti pudno a kinaasinotayo, ti kaipapanan ti mortal a biag, ken no sadino ti papanantayo no mataytayo. Dagita a kinapudno ket saan a masursuro babaen dagiti sientipiko wenno nailubongan a wagas.
II.
Agsaritaak ita maipanggep kadagiti kinpudno iti naisubli nga ebanghelio a napateg iti doktrina ti Ti Simbaan ni Jesucristo dagiti Santo iti Ud-udina nga Aldaw. Panunotenyo koma a nasayaat dagitoy a kinapudno. Ilawlawagda maipanggep ti doktrina ken kannawidantayo, nalabit a mainayon dagiti saan pay a maawatan.
Adda Dios, nga isu ti managayat nga Ama dagiti espiritu ti amin a nagbiag ken agbiagto.
Agnanayon ti katatao. Sakbay a naipasngaytayo ditoy daga, nagbiagtayo amin a lalaki wenno babai nga espiritu iti sidong ti Dios.
Nangngegantayo ti Tabernacle Choir iti Temple Square a nangkanta iti “I Will Follow God’s Plan.”3 Dayta ti plano nga inaramid ti Dios tapno dumur-as amin dagiti espiritu nga annakna iti agnanayon. Napateg unay kadatayo dayta a plano.
Babaen dayta a plano, pinarsua ti Dios daytoy a daga a pakaipasngayan dagiti patpatgenna nga espiritu nga annak tapno umawatda iti pisikal a bagi ken maaddaan iti gundaway para iti agnanayon a panagdur-as babaen ti panagpili iti nalinteg.
Tapno adda kaipapananna, ti pili a mortal maaramid iti nagbaetan ti aggidiat a puersa ti naimbag ken dakes. Masapul nga adda pagsusupadian ket, ngarud, ti kabusor, a napapanaw gapu iti yaalsa ken napalubosan a mangsulisog kadagiti annak Dios a mangkontra iti plano ti Dios.
Ti panggep ti plano ti Dios isu ti panangtedna kadagiti annakna iti gundaway a mangpili iti agnanayon a biag. Matun-oyan la daytoy babaen laeng iti padas iti mortalidad ken, kalpasan ti ipapatay, babaen ti idudur-as kalpasan ti ipapatay iti lubong ti espiritu.
Bayat ti kaadda ditoy mortal a biag, mabungontayonto iti basol bayat iti isusukotayo kadagiiti dakes a sulisog ti kabusor, ket mataytayonto iti kamaudianan. Inawattayo dagita a karit a paset ti plano, iti panagtalek iti pammatalged a mangted ti Dios nga Amatayo iti maysa a Mangisalakan, ti Bugbugtong nga Anakna, a mangsalbar kadatayo babaen ti sapasap a panagungar iti biag kalpasan ti ipapatay. Kasta met a mangted ti Mangisalakan iti pannubbot a mangbayad iti gatad para iti amin tapno madalusan ti basol kadagiti alagaden nga impaulogna. Mairaman kadagita nga alagaden ti pammati ken ni Cristo, panagbabawi, panagbuniag, ti sagut ti Espiritu Santo, ken dadduma pay nga ordinansa nga ipatungpal ti turay ti priesthood.
Ti naindaklan a plano ti Dios iti ragsak mangted iti panagpatas ti agnanayon a hustisia ken ti kaasi a magun-odtayo babaen ti Pannubbot ni Jesucristo. Ikkannatayo met iti gundaway nga agbalin a baro a parsua ken ni Cristo.
Tulongan ti managayat a Dios ti ti tunggal maysa kadatayo. Ammotayo a babaen ti Ayatna ken gapu iti Pannubbot ti Bugbugtong nga Anakna, “maisalakan ti amin a sangkatawan babaen ti panagtungpal kadagiti linteg ken ordinansa ti Ebanghelio[na]” (Pagannurotan ti Pammati 1:3; nainayon ti panangyunay-unay).
Ti Simbaan ni Jesucristo dagiti Santo iti Ud-udina nga Aldaw ket umno a maam-ammo a kas Simbaan a maisentro iti pamilia. Ngem ti saan unay a maawatan ket maipamaysa dagiti pamiliatayo iti ad-adda pay a relasion ti tao. Dagiti agnanayon a relasion ket napateg pay iti relihiontayo. “Inordenan ti Dios ti kaamaan.”4 Babaen ti naindaklan a plano ti naayat a Namarsuatayo, ti mision ti naisubli a Simbaanna isu ti itutulong kadagiti annak ti Dios a mangtun-oy iti pannakaitan-ok iti kangatuan a pagarian. Daytoy kangatuan a bendision magun-od laeng babaen ti agnanayon a kallaysa ti maysa a lalaki ken ti maysa a babai (kitaen iti Doktrina ken Katulagan 131:1–3). Insuro ti Apo kadatayo a ti “seks [gender] ket maysa a kangrunaan a talugading ken panggep ti tao sakbay ti yaayna iti daga ken ti “kallaysa iti nagbaetan ti lalaki ken babai ket napateg unay iti agnanayon a planona.”5
Kamaudiananna, naindaklan unay ti ayat ti Dios a, malaksid ti sumagmamano a nairanta nga agbalin nga annak a lallaki ti manangdadael, nangipaay Isuna iti nagloriaan a pagtungpalan ti amin nga Annakna. Mairaman iti “amin nga annakna” dagiti pimmusayen. Annongentayo dagiti ordinansa para kadakuada babaen ti panangisaup [proxy] kadagiti templotayo. Ti panggep ti Simbaan ni Jesucristo isu ti pannakaikari dagiti annakna iti kangatuan a tukad ti gloria, nga isu ti pannakaitan-ok wenno agnanayon a biag. Para kadagiti saan nga agtarigagay wenno maikari iti dayta, inikkanna ida iti sabali, nupay nababbaba, a pagarian ti gloria.
Maawatan ti asino man a makaawat kadagitoy agnanayon a kinapudno no apay a panunoten dagiti miembro ti Ti Simbaan ni Jesucristo dagiti Santo iti Ud-udina nga Aldaw kas kadakami ken aramidenda ti kas iti aramidmi.
III.
Ibagak ita ti sumagmamano a pakausaran dagitoy agnanayon a kinapudno, a maawatan laeng no awaten ti plano ti Dios.
Umuna, dayawentayo ti karbengan a pumili ti tunggal maysa. Kaaduanna ti makaammo kadagiti dadakkel a panagkagumaan ti naisubli a Simbaan a mangitandudo iti wayawaya ti relihion iti Estados Unidos ken iti intero a lubong. Saan a mangitandudo dagitoy a panagkagumaan iti bukodtayo laeng a pagimbagan ngem, maibatay iti planona, agpanggep a tumulong kadagiti amin nga annak ti Dios nga agragsak iti wayawaya a pinilida.
Maikadua, misionariotayo a tattao. No dadduma madamag kadatayo no apay nga agibaontayo iti misionario iti adu a nasion, uray pay kadagiti populasion ti Kristiano. Umawattayo iti umarngi a saludsod no apay nga agit-itedtayo iti adu a minilion a doliar a tulong kadagiti tao a saan a miembro ti Simbaan ken no apay a ditayo iraman daytoy a tulong kadagiti aramid ti misionariotayo. Aramidentayo daytoy gapu ta bigbigentayo nga amin a tao a nabiag kas annak ti Dios—kakabsattayo ida—ket kayattayo nga iburay iti tunggal maysa ti naespirituan ken temporal a sanikuatayo.
Maikatlo, sagrado ti biag kadatayo. Ti karitayo iti plano ti Dios ket agkasapulan a kontratayo iti panagpaikkat iti sikog wenno aborsion ken panangidaras iti ipapatay.
Maikapat, mariribukan ti dadduma kadagiti kannawidan ti Simbaan maipanggep iti kallaysa ken annak. Ti ammotayo iti naipalgak a plano ti Dios iti panangisalakan ket agkasapulan iti isusuppiattayo iti agdama a puersa ti politika, legal, ken iti gimong a mangbaliw iti kannawidan iti kallaysa wenno panagbalbaliw a mangtikaw wenno mangsukat iti katatao [gender] wenno mangpunas iti paggidiatan ti lallaki ken ti babbai. Ammotayo a ti relasion, pagilasinan, ken rebbengen dagiti lallaki ken babbai ket napateg unay iti panangipatungpal iti naindaklan a plano ti Dios.
Maikalima, adda met maigidiat a pannirigantayo kadagiti ubbing. Bigbigentayo a ti panagpasngay ken panangpatan-ay kadagiti ubbing ket paset ti plano ti Dios ken naragsak ken sagrado a rebbengen dagiti naikkan iti bileg a makiraman. Mamatitayo a dagiti kapatgan a gameng iti daga ken iti langit ket dagiti annaktayo ken kaputotantayo. Ngarud, masapul nga isuro ken saluadantayo dagiti prinsipio ken kannawidan a mangted kadagiti kasayaatan a kasasaad para iti panagdakkel ken ragsak dagiti ubbing—amin nga ubbing.
Kamaudiananna, datayo ti maipatpateg nga annak ti Nailangitan nga Ama, a nangisuro kadatayo a ti kinalalaki ken kinababai, kallaysa ti lalaki ken ti babai, ken ti panagpasngay ken panangpatan-ay kadagiti ubbing ket napategda amin iti naindaklan a planona iti ragsak. Dagiti saadtayo kadagitoy a kangrunaan a banag ket masansan a mangparnuay iti oposision wenno isusuppiat iti Simbaan. Ammotayo a di maliklikan dayta. Paset ti plano ti oposision wenno isusuppiat, ket ti kakaruan nga oposision ni Satanas ket maiturong iti ania man a kapatgan iti plano ti Dios. Kayatna a dadaelen ti aramid ti Dios. Ti kangrunaan a wagasna ket ti panangtagibassitna iti Mangisalakan ken ti nadiosan a turayna, a mangpunas iti bileg ti Pannubbot ni Jesucristo, a manglapped iti panagbabawi, mangbalusingsing iti paltiing, ken mangkontra iti bukod a sungsungbatan. Kasta met a kayatna a tikawen ti katatao [gender], a dadaelen ti kallaysa, ken manglapped iti panaganak—nangruna dagiti nagannak a mangpatan-ayto kadagiti annakda iti kinapudno.
IV.
Ti aramid ti Apo ket agtultuloy iti baet dagiti naurnos ken kanayon a sumupiat a mangsango kadatayo bayat ti panangipamaysatayo nga agbiag iti pannursuro ti Ti Simbaan ni Jesucristo dagiti Santo iti Ud-udina nga Aldaw. Kadagiti agduadua iti babaen dayta nga oposision, mangtedak kadagitoy tallo a singasing.
Laglagipenyo ti prinsipio ti panagbabawi a naaramid babaen ti awan umartap a bileg ti Pannubbot ni Jesucristo. Kas inyallukoy ni Elder Neal A. Maxwell, dikayo pumada kadagidiay “tao a mangpadas a mangbalbaliw iti Simbaan imbes a ti bagbagida ti baliwanda.”6
Kas inyallukoy ni Elder Jeffrey R. Holland:
“Kumpet a naimbag iti no ania ti ammoyon ken agtalinaedkayo a natibker agingga nga umay ti nayon a pannakaammo agingga a dumteng ti nayon a pannakaammo. …
“… Iti daytoy a Simbaan, kanayon a rimbawan ti ammotayo ti ditayo ammo.” 7
Usarenyo ti pammatiyo ken ni Apo a Jesucristo, nga isu ti umuna a pagbatayan ti ebanghelio.
Kamaudiananna, agpatulongkayo. Ay-ayatendakayo dagiti lidertayo iti Simbaan ken agkiddaw iti naespirituan a pannarabay a makatulong kadakayo. Mangtedkami iti adu a resources wenno pagadawan kas koma no agsapulakayonto babaen ti LDS.org ken dadduma pay a pangtulong iti panagadal iti ebanghelio iti pagtaengan. Addaantayo pay kadagiti agserserbi a kakabsat a lallaki ken babbai [ministering brothers and sisters] a naawagan a mangted iti naayat a tulong.
Kayat ti managayat a Nailangitan nga Amatayo nga agragsaktayo nga isu ti panggep ti pannakaparsuatayo. Agnanayon a biag dayta naragsak a pagtungpalan, a magun-odtayo babaen ti panagtultuloytayo a dumur-as kas iti masansan nga awag ti propetatayo, ni Presidente Russell M. Nelson a “dana ti katulagan.” Adtoy ti kinunana iti umuna a mensahena kas Presidente ti Simbaan: “Agtalinaedkayo iti dana ti katulagan. Ti panagkumityo a mangsurot iti Mangisalakan babaen ti panagaramid kadagiti katulagan Kenkuana ket kalpasanna ti panagtungpal kadagita a katulagan ket manglukatto iti dalan iti naespirituan a bendision ken pribilehio a sidadaan a magun-od dagiti lallaki, babbai, ken ubbing iti amin a lugar.”8
Sipapasnek a paneknekak a pudno dagiti banag nga insaok, ket naipatungpalda babaen ti pannursuro ken Pannubbot ni Jesucristo, a naipatungpal babaen ti naindaklan a plano ti Dios, ti Agnanayon nga Amatayo. Iti nagan ni Jesucristo, amen.