Ti Korum: Maysa a Lugar a Pakaibilangan
Pabangon ti Apo kadakayo ti maysa a napigsa a korum. No ummongenna dagiti annakna, kasapulanda ti lugar a pakaibilangan ken pagdur-asan.
Idi 2010, barito nga agsapsapul iti kinapudno ni Andre Sebako. Nupay di pulos nagkararag a naimpusuan, inkeddengna a padasen. Nabiit kalpasanna naam-ammona dagiti missionary. Inikkanda iti pass-along card nga adda maysa a ladawan ti Libro ni Mormon. Adda narikna ni Andre ket dinamagna no ilako dagiti missionary ti libro kenkuana. Kinunada a matagikuana ti libro nga awan bayadna no mapan iti simbaan.1
Nakimisa ni Andre iti nabiit pay idi a nabuangay a Mochudi Branch iti Botswana, Africa, nga is-isuna. Ngem naayat, nagkaykaysa a grupo a buklen ti agarup 40 a miembro ti branch.2 Inawatda ni Andre iti nabara nga ayat. Nasuruan kadagiti missionary lesson ket nabuniagan. Nakaskasdaaw!
Ngem kalpasanna ania? Kasano nga agtalinaed nga aktibo ni Andre? Asino ti mangtulong iti panagdur-asna iti dana ti katulagan? Ti korumna iti priesthood ti sungbat dayta a saludsod!3
Tunggal priesthood holder, ania man ti kasasaadna, ket mairanud manipud iti maysa a napigsa a korum. Agtutubo a kakabsatko nga addaan iti Aaronic Priesthood, pinabuangay ti Apo kadakayo ti maysa a napigsa a korum, lugar a pakaibilangan ti tunggal maysa ken tunggal barito, lugar a yan ti Espiritu ti Apo, lugar a maawat ken maipateg ti amin a miembro ti korum. No ummongen ti Apo dagiti annakna, kasapulanda ti lugar a pakaibilangan ken pagdur-asan.
Mangidaulo iti dalan ti tunggal maysa kadakayo a miembro ti quorum presidency no agsapulkayo iti inspirasion4 ken mangpatanor iti ayat ken panagkakabsat iti amin a miembro ti korum. Mangtedkayo iti espesial nga atension kadagiti baro a miembro, a di unay aktibo, wenno addaan iti espesial a kasapulan.5 Addaan iti bileg ti priesthood, bangonenyo ti maysa a napigsa a korum.6 Ket ti maysa a napigsa, nagkaykaysa a korum ti mangpaiduma iti biag ti maysa a barito.
Idi impakaammo ti Simbaan ti baro a pokus iti panagadal iti ebanghelio a naisentro iti pagtaengan,7 adda nagpanunot kadagiti miembro kas ken ni Andre ket nagdamag, “Kasano dagiti agtutubo a saan agad-adal ti pamiliada iti ebanghelio ken awan ti lugar a pagsursuruan ken pagbiagan iti ebanghelio iti pagtaengan? Mabaybay-andanto kadi?”
Saan! Awan uray maysa ti mabaybay-an! Ay-ayaten ti Apo ti tunggal barito ken tunggal balasitang. Kas priesthood holder, datayo dagiti ima ti Apo. Tulongantayo ti Simbaan kadagiti aramid a naisentro iti pagtaengan. No bassit ti suporta iti pagtaengan, dagiti korum iti priesthood ken dadduma pay a lider ken gagayyem ti mangkita ken mangsuporta iti tunggal tao ken pamilia no kasapulan.
Nakitakon nga omobra daytoy. Napadasakon. Idi innem ti tawenko, nagdiborsio dagiti dadakkelko ket pinanawan ti amak ti inak nga addaan lima a babassit nga annak. Nagtrabaho ti inak tapno maipaay dagiti kasapulanmi. Kasapulanna ti maikadua a panggedan iti dayta a panawen, kasta met ti nayon nga edukasion. Bassit ti panawenna nga agaywan. Ngem immay dagiti appo, uliteg, ikit, bishop, ken home teacher a tumulong iti nadungngo nga inak.
Ket adda korumko. Agyamanak unay kadagiti gagayyemko—kakabsatko a lallaki—a nangayat ken nangsuporta kaniak. Ti korumko ti lugar a pakaibilangan. Adda mangibilang a bassit ti gundawayko nga agballigi ken dumur-as gapu iti kasasaad ti pamiliak. Mabalin a kastaak. Ngem binaliwan dagiti korum iti priesthood dagita a gundaway nga agballigi. Tinulongannak ti korumko ket nawadwad a nangparabur iti biagko.
Bassit ti gundaway nga agballigi ken dumur-as iti amin nga aglawlawtayo. Nalabit nga addatayo amin iti maysa a dalan wenno sabali. Ngem adda korum ti tunggal maysa kadatayo ditoy, lugar a pakaawatan ken pakaitedantayo iti pigsa. Ti korum ket “agkikinnaysa ken agtitinnulong ti amin.”8 Daytoy ti lugar a pagsisinnuruantayo, pagserbian iti dadduma, ken pangbangonan iti panagkaykaysa ken panagkikinnabsatan kabayatan ti panagserbitayo iti Dios.9 Daytoy ti lugar a mapasamak dagiti milagro.
Kayatko nga isarita kadakayo maipapan iti dadduma pay a milagro a napasamak iti korum ni Andre iti Mochudi. No isaritak daytoy a pagarigan, siputanyo dagiti prinsipio a mangpapigsa iti tunggal korum iti priesthood a mayaplikar kadakuada.
Kalpasan a nabuniagan ni Andre, kinaduana dagiti missionary iti panangisuroda iti uppat pay a barito, a nabuniagan met. Itan adda lima a barito. Nagrugi a pinapigsada ti tunggal maysa ken ti branch.
Nabuniagan ti maikanem a barito, ni Thuso. Insuro ni Thuso ti ebanghelio iti tallo a gagayyemna, ket iti nabiit adda siam.
Masansan a kastoy nga agummong dagiti disipulo ni Jesucristo—saggabassit iti maminsan, no awisen dagiti gagayyemda. Idi punganay, idi nakita ni Andres ti Mangisalakan, napan a daras iti kabsatna a ni Simon ket “inyegna ken ni Jesus.”10 Maipada, nabiit kalpasan a nagbalin a pasurot ni Cristo ni Felipe, inawisna ti gayyemna a ni Natanael nga “umay ken mangkita.”11
Iti Mochudi, kimmappeng iti nabiit ti maika-10 a barito iti Simbaan. Nasarakan dagiti missionary ti maika-11. Nabuniagan ti maika-12 a barito kalpasan a nakitana ti epekto ti ebanghelio kadagiti gagayyemna.
Naragsakan dagiti miembro ti Mochudi Branch. Dagitoy a babbarito ket “napasurot iti Apo, ken … nagkaykaysa iti simbaan.”12
Napateg ti akem ti Libro ni Mormon iti pannakapasurotda.13 Nalagip ni Thuso, “Binasak ti Libro ni Mormon … tunggal kanito a nawayaak, iti balay, iti eskuela, iti sadino man.”14
Nagessem ni Oratile iti ebanghelio gapu iti pagwadan dagiti gagayyemna. Inlawlawagna: “Kasla nagbalbaliw[da] iti apagdarikmat. … Panagkunak adda … pakainaiganna idi iti bassit … a libro nga itugtugotda … iti eskuela. Makitak idi no ania a nasingpet a lallaki ti nagbalinanda. … Kayat[ko] met ti agbalbaliw.”15
Nagummong ken nabuniagan ti amin a 12 a babbarito iti uneg ti dua a tawen. Tunggal maysa ket is-isu a miembro ti Simbaan iti pamiliana. Ngem tinulongan ida ti pamiliada iti Simbaan, agraman ni Presidente Rakwela,16 ti branch presidentda; da Elder ken Sister Taylor,17 agassawa a senior missionary; ken dadduma pay a miembro ti branch.
Ni Brother Junior,18 ti quorum leader, inawisna dagiti babbarito iti balayna kadagiti malem ti Domingo ket sinuruanna ida. Aggigiddan nga inadal dagiti babbarito dagiti nsantuan a kasuratan ket inangayda dagiti linawas a home evening.
Intugot ida ni Brother Junior a sumarungkar kadagiti miembro, tattao a sursuruan dagiti missionary, ken asino man nga agkasapulan a masarungkaran. Limmugan ti amin a 12 a babbarito iti likud ti trak ni Brother Junior. Imbabana ida kadagiti pagtaengan iti sagdudua wenno saggatlo nga agkompanion ket dagasenna ida kalpasanna.
Nupay agsursuro pay laeng dagiti babbarito maipapan iti ebanghelio ket mariknada a bassit pay ti ammoda, imbaga ni Brother Junior kadakuada nga ibinglayda ti maysa wenno dua a banag nga ammoda iti tattao a bisitaenda. Dagitoy nga agtutubo a priesthood holder ket nangisuro, nagkararag, ken timmulong a nagaywan iti Simbaan.19 Tinungpalda dagiti pagrebbenganda iti priesthood ket napadasanda ti rag-o nga agserbi.
Kinuna ni Andre, “Sangkamaysakami a nagay-ayam, nagkatawa, nagsangit, ket nagbalinkami nga agkakabsat.”20 Kinapudnona, inawaganda ti bagida iti “ti Banda dagiti Agkakabsat [the Band of Brothers].”
Naggigiddan a nag-setda iti goal nga agserbida amin iti mision. Gapu ta is-isuda laeng ti miembro ti pamiliada, adu dagiti tubengda a parmekenda, ngem nagtitinnulongda a sarangten ida.
Saggaysa, nga immawat dagiti babbarito iti awag nga agmision. Sinuratan dagiti immuna a pimmanaw dagiti agsagsagana pay laeng, nga isarsaritada dagiti padasda ken al-allukoyenda ida nga agserbi. Sangapulo-ket-maysa a babbarito ti nagmision.
Insuro dagitoy a babbarito ti ebanghelio kadagiti pamiliada. Napasurot ken nabuniagan dagiti inna, kakabsat, gagayyem, kasta met dagiti tao a sinuruanda iti misionda. Napasamak dagiti milagro ket naparaburan ti adu a biag.
Panagkunak adda kadakayo ti mangipagarup a mapasamak laeng ti kasta a milagro iti lugar kas iti Africa, nataba a daga a pangidarasan iti panaguummong ti Isarel. Nupay kasta, paneknekak a dagiti prinsipio a naaramat iti Mochudi Branch ket pudno iti sadino man. Sadinokayo man, mapadakkel ti korumyo babaen ti panagaktibo ken panangibinglay iti ebanghelio. No tulongan ti maysa a disipulo ti maysa a gayyem, ti maysa agbalin a dua. Ti dua makapagbalin nga uppat. Ti uppat makapagbalin a walo. Ti walo makapagbalin a sangapulo-ket-dua. Dagiti branch makapagbalin a ward.
Insuro ti Mangisalakan, “No agummong ti dua wenno tallo [wenno ad-adu pay] iti naganko, … adtoy, addaakto iti baetda.”21 Isagsagana ti Nailangitan nga Ama ti panunot ken puso dagiti tao iti amin nga aglawlawtayo. Masurottayo dagiti parikna, makigayyem, maibinglay iti kinapudno, ken maawis ida nga agbasa iti Libro ni Mormon, ken maayat ken matulongantayo ida a mangam-ammo iti Mangisalakan.
Dumani 10 a tawen manipud idi rinugian ti Mochudi Band of Brothers ti sangkamaysa a panagdaliasatda, ket isuda pay laeng ti banda dagiti agkakabsat.
Kinuna ni Katlego, “Mabalin nga agaddayokami iti distansia ngem addakami latta idiay para iti tunggal maysa.”22
Sapay koma ta awatentayto ti awis ti Apo a makikaykaysa Kenkuana kadagiti korumtayo iti priesthood tapno ti tunggal korum ket agbalin a maysa a lugar a pakaibilangan, lugar a pagguummongan, lugar a pagdur-asan.
Ni Jesucristo ti Mangisalakantayo, ket aramidna daytoy. Paneknekak daytoy iti nagan ni Jesucristo, amen.