Panagpennek kadagiti Balikas ni Cristo
Mapasamak ti panagpennek kadagiti balikas ni Cristo iti ania man a kanito ken iti ania man a gundaway no isaganatayo ti puspusotayo.
Ay-ayatennatayo ti Nailangitan nga Amatayo. Nangipaay iti naan-anay a plano para kadatayo tapno agragsak kadagiti bendisionna. Iti daytoy a biag, maawistayo amin nga umasideg ken ni Cristo ken umawat iti naisubli nga ebanghelio ni Jesucristo babaen ti panagbuniag, panangawat iti sagut ti Espiritu Santo, ken sipupudno a panagbiag iti ebanghelio. Iladawan ni Nephi ti panagkumittayo a mabuniagan a kas iti iseserrek iti “nailet ken akikid a dana,” ken ipalagipna kadatayo a mangituloy nga “agtultuloy a sitatalingenngen ken ni Cristo, … agpennek iti balikas ni Cristo, ken agibtur agingga iti panungpalan,” tapno umawat iti amin a bendision ti Nailangitan nga Ama para kadatayo (2 Nephi 31:19–20).
Ipalagip pay ni Nephi kadatayo a no “agpennek[tayo] kadagiti balikas ni Cristo,” “ibagadanto [kadatayo] ti amin a banag a nasken nga aramiden[tayo]” (2 Nephi 32:3) ken mapabilegtayonto a mangparmek kadagiti “naranggas a pana ti kabusor” (1 Nephi 15:24).
Ania ti Panagpennek?
Idi ubingak pay, impagarupko a ti panagpennek ket simple laeng a makan a kaadda ti adu nga innapuy, sushi, ken toyo. Ammok itan a ti pudno a panagpennek ket ad-adda pay ngem dagiti naimas a makan. Daytoy ti padas ti kinarag-o, pannakataraon, panagrambak, panangiburay, panangyebkas iti ayat iti pamilia ken kadagiti ipatpateg, panangipeksa iti panagyamantayo iti Dios, ken panangbangon kadagiti panaglilinnangen bayat ti pannangan iti nawadwad, nakaim-imas a taraon. Mamatiak a no agpennektayo kadagiti balikas ni Cristo, nasken a pampanunotentayo ti kastoy met laeng a kita ti padas. Ti panangpennek kadagiti nasantuan a kasuratan saan laeng panangbasa kadagitoy. Nasken a mangyeg kadatayo daytoy iti pudno a rag-o ken mangpapigsa iti relasiontayo iti Mangisalakan.
Silalawag a naisuro daytoy iti Libro ni Mormon. Lagipenyo ti tagtagainep ni Lehi a nakakitaanna iti kayo a “makaay-ayo ti bungana a makaparagsak.” Daytoy a bunga ti mangibagi iti ayat ti Dios, ket idi ramanan ni Lehi ti bunga, “nalaus ti sam-itna a mangrimbaw iti amin a naramanan[na].” “Pinennekna ti kararua[na] iti nalaus a ragsak” ken daytoy ti maysa a banag a kayatna nga ibinglay iti pamiliana (1 Nephi 8:10–12).
No agpennektayo, nalabit pay a maammuantayo a ti kaadu wenno kita ti taraon nga adda kadatayo ket saan a nasken no napno iti panagyaman ti puspusotayo. Nagbiag ti pamilia ni Lehi iti saan a naluto a karne iti langalang, ngem inladawan ni Nephi daytoy narigat a pannubok, a kinunana, “Nabuslon ti bendision ti Apo” a “dagiti assawami … napigsada” ken “nagdaliasatda a saan nga agdaydayamudom” (1 Nephi 17:1–2).
No dadduma ti panagpennek mangiraman iti panangpadas ken panangraman. Agsarita ni Alma maipapan iti nasayaat a bukel a naimula iti puspusotayo. Bayat ti panagpadastayo iti daytoy, maamiristayonto a ti bukel mangrugi “a nananam” (kitaen iti Alma 32:28–33).
Panagpennek kadagiti Balikas ni Cristo
Nabileg ken makapagbalbaliw iti biag dagiti bendision ti panagpennek kadagiti balikas ni Cristo . Adda tallo a kangrunaan a banag a kayatko a yawis kadakayo a maiyaplikar iti biagyo.
Umuna, matulongannatayo dagiti balikas ni Cristo a “mangpapigsa iti naespirituan kabaelan[tayo] nga umawat iti paltiing” (Russell M. Nelson, “Revelation for the Church, Revelation for Our Lives,” Liahona, Mayo 2018, 96) ken sitatalged mangtarabay kadatayo iti unos ti biagtayo. Isuro ni Mormon nga addaan dagiti balikas ni Cristo iti “dakkel a pigsa a mangiturong kadagiti tao nga agaramid iti [nainkalintegan]” ket nabilbilegda ngem iti ania man a banag a maaramid “ti espada” (Alma 31:5). Iti panagtarigagayko iti pagsiriban ti Dios iti panangsangok iti karit ti biag, kanayon a pinadasko ti “saguday ti balikas ti Dios” (Alma 31:5), nariknak a naparegtaak ken nabaelak ti nagaramid kadagiti masirib a pangngeddeng, mangparmek iti sulisog, ken mangbendision iti biagko iti napigpigsa a pammati ken ni Cristo ken ayat para kadagiti adda iti aglawlawko. Insuro kadatayo ti propetatayo, ni Russell M. Nelson, a “kadagiti umay nga aldaw, a saanto a posible ti naespirituan a maisalakan no awan ti panangtarabay, panangiturong, ken panangliwliwa, ken agtultuloy nga impluensia ti Espiritu Santo” (“Revelation for the Church, Revelation for Our Lives,” 96). Umayto ti kasapulan a paltiing no padasentayo ti “saguday ti balikas,” ket agbalinto ti balikas a nabilbileg ngem iti ania man a banag a mabalintayo a padasen wenno arapaapen.
Maikadua, no saantayo a sigurado iti bukodtayo a pakabigbigan ken agkurangtayo iti panangipateg iti bagitayo, ti “makaay-ayo a balikas ti Dios” (Jacob 2:8)kadagiti nasantuan a kasuratan tulongannatayonto a mangammo iti pudno a kinataotayo ket ikkannatayo iti pigsa a nabilbileg pay ngem iti adda kadatayo. Ti panangbigbigko nga anaknak ti Dios ket maysa kadagiti kasam-itan a kanito a napadasakon. Kadagiti nagkauna a tawen ti kinaagtutubok, awan ti ammok nga ania man a banag maipapan kadagiti pannursuro ti Mangisalakan. Idi damo a basaek ti Baro a Tulag, dagiti balikas ni Cristo ti pudno a nangpaimbag iti nasugatan a kararuak. Naamirisko a saanak nga agmaymaysa ken maysaak nga anak ti Dios. Idi nabigbigko iti pudno a kinataok iti sango ti Dios, naawatak ti awan patinggana a potensialko babaen ti Pannubbot ni Cristo.
Imbinglay met ni Enos ti bukodna a padas maipapan iti pannakalawlawag a sumangbay manipud iti panangpampanunotna kadagiti balikas ni Cristo. Idi pinalugodan ni Enos dagiti balikas nga insuro ti amana maipanggep iti “agnanayon a biag, ken ti ragsak dagiti santo, [a sumagepsep] iti puso[na],” ti kararuana “nabisinan; ket nagparintumeng [isuna] iti Namarsua[na] … iti napasnek a kararag” (Enos 1:3–4). Iti dayta a kararag naam-ammona ti Mangisalakan ket nasursurona a dakkel ti pategtayo, ken maipatpategtayo ken mabalin a mapakawantayo kadagiti bidduttayo, ken pudno nga annaknatayo ti Dios.
Maikatlo, maitag-aytayo ti biag dagiti dadduma babaen kadagiti balikas ni Cristo. Kas met laeng ken ni Enos iti bukodna a panawen ken lugar a nangsagidan dagiti balikas ni Cristo iti pusona, aramidento ti Apo ti pasetna a mangsagid iti puspuso dagiti tarigagayantayo a pangibinglayan iti ebanghelio. Adu kadatayo ti mabalin a nakarikna iti pannakaupay idi pinadastayo ti mangawis iti maysa a tao a dumngeg iti ebanghelio gapu ta saan a napasamak ti resulta a tinarigagayantayo. Ania man ti pagbanaganna, awisennatayo ti Apo nga ungapentayo ti ngiwattayo ket ibinglaytayo ti mensahe ti ebanghelio kadagiti dadduma.
Dua a tawenen ti napalabas, sinagid ti Apo ti puso ti patpatgek nga inak, a timmulong kenkuana a mangikeddeng nga umawat iti ordinansa ti panagbuniag. Inurayko a mapasamak dayta nga aldaw iti uneg ti dumani 35 a tawen. Tapno maaramidna dayta a pangngeddeng, adu a miembro ti Simbaan ti pudno a timmulong kenkuana a kas iti aramiden koma ni Cristo. Iti maysa nga aldaw ti Domingo, nariknana a nasken a mapan makimisa. Sinurotna ti parikna. Bayat ti panagtugawna iti akinsango a pagtugawan ken inurayna a mangrugi ti serbisio ti sakramento, maysa nga ubing a lalaki nga uppat-ti tawenna ti nagtakder iti sangona ket kimmita kenkuana. Kinablaawanna daytoy a siiisem. Alisto a pimmanaw ti bassit nga ubing a lalaki ket nagsubli iti tugawna iti sabali a bangir a kahilera ti tugaw a nagtugawan ti inak. Adda innala daytoy bassit nga ubing a lalaki iti tugawna ket nagsubli ken inyawatna ti maysa a hymnbook iti inak ket nagsubli iti tugawna. Nadlaw ti inak nga adda hymnbook a naikabil iti tunggal maikadua a tugaw iti kapilia. Nalaka koma met a nakaala iti maysa manipud iti tugaw nga asideg kenkuana. Nupay kasta, nakaawis unay ti riknana iti gagangay nga inaramid a kinasayaat ti ubing a lalaki, a nasursurona iti pagtaenganna ken iti simbaan. Nagpintasen daytoy a kanito para kenkuana. Naiparikna unay kenkuana a ti Dios ti mangaw-awis kenkuana nga umasideg ken sumurot iti Mangisalakan. Nariknana a nasken a mabuniagan. Saan a nagkalikagum daytoy bassit nga ubing a lalaki iti pammadayaw iti inaramidna, ngem inaramidna laeng ti amin a kabaelanna tapno agbiag iti balikas ti Dios ket agayat iti padana a tao. Ti kinasingpetna ti nangparnuay iti napateg a panagbalbaliw ti puso ti inak.
Dagiti balikas ni Cristo ti napalaus a mangsagid iti puspuso ken manglukat kadagiti mata dagiti saan pay a nakakita Kenkuana. Iti dalan nga agturong ti Emaus, nakipagna ti dua a disipulo ken ni Jesus. Nagladingitda ket saanda a naammuan a nagballigi ti Mangisalakan iti patay. Iti panagladingitda, saanda a nabigbig a makipagpagna kadakuada ti sibibiag a Cristo. Nupay ni Jesus “impalawagna kadakuada dagiti nasantuan a kasuratan dagiti banag a maipanggep iti bagina,” saanda latta nailasin Isuna kas nagungar a Mangisalakan agingga a nagtugaw ken nagpirsapirsayda iti tinapay a kaduada Isuna. Kalpasan dayta naluktan dagiti “matada.” No datayo—wenno dagiti gagayyem, kakadua, ken kaarrubatayo—ket agpennek ket mangpirsapirsay iti tinapay a kadua Isuna, maluktanto dagiti matatayo iti pannakaawat. Idi inutob dagiti disipulo iti Emaus iti panawenda a kaduada ti nangungar a Mangisalakan, kinunada a gimmil-ayab ti puspusoda iti kaungganda bayat ti pananglukatna kadagiti nasantuan a kasuratan kadakuada (kitaen iti Lucas 24:27–32). Pumudnonto daytoy para kadatayo amin.
Panangigibus
Kas panangigibus, paneknekak a ti panagpennek kadagiti balikas ni Cristo ket mabalin a mapasamak iti ania man a kanito ken iti ania man a gundaway no isaganatayo ti puspusotayo nga umawat kadagitoy. Ti panagpennek kadagiti balikas ni Cristo ket mangisangbayto iti paltiing a mangpapigsa iti biag, mangpennek iti pudno a kinatao ken kinapategtayo iti sanguanan ti Dios kas anakna, ken mangiturong kadagiti gagayyemtayo ken ni Cristo ken iti agnanayon a biag. Kayatko nga igibus babaen ti panangdakamatko manen iti awis ni Nephi idi kinunana: “Masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat ti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaankayto iti biag nga agnanayon” (2 Nephi 31:20). Iti nagan ni Jesucristo, amen.