Umaykayo ken ni Cristo—Panagbiag kas dagiti Santo iti Ud-udina nga Aldaw
Makaaramidtayo iti naririgat a bambanag ken matulongantayo dagiti dadduma a makaaramid met iti kasta, gapu ta ammotayo no siasino ti mabalin a pagtalkantayo.
Agyamanak, Elder Soares, iti nabileg ken napadtuan a pammaneknekmo iti Libro ni Mormon. Iti nabiit, naaddaanak ti naidumduma a gundaway a mangiggem ti maysa a panid ti orihinal a manuskrito ti Libro ni Mormon. Iti daytoy a panid, iti umuna a gundaway iti daytoy a dispensasion, naisurat ditoy dagiti natingra a balikas ni Nephi: “Mapanak ket aramidek dagiti banag nga imbilin ti Apo, ta ammok a saan nga ited ti Apo ti bilin kadagiti annak ti tao, malaksid no naisagananan ti wagas nga agpaay kadakuada a mangtungpal kadagiti banag nga imbilinna.”1
Bayat ti panangiggemko iti daytoy a panid, napnoak iti nalaus a panagyaman kadagiti panagkagumaan ti agtawen-23 a Joseph Smith, a nangipatarus ti Libro ni Mormon babaen ti “sagut ken bileg ti Dios.”2 Nariknak pay ti panagyaman kadagiti balikas ti agtutubo a Nephi, a napagkiddawan a mangaramid ti narigat unay a trabaho a mangala kadagiti pinanid a gambang manipud ken Laban.
Ammo ni Nephi a no nagtultuloy a nangipamaysa iti Apo, agballiginto a mangipatungpal iti no ania ti imbilin ti Apo kenkuana. Nagtalinaed a nangipamaysa iti Mangisalakan iti intero a biagna uray pay naglasat kadagiti sulisog, pisikal a pannubok, ken panangliput ti sumagmamano a miembro ti nasinged a pamiliana.
Ammo ni Nephi no siasino ti mabalin a pagtalkanna.3 Di nagbayag kalpasan a kinunana, “O nakakaasiak a tao! Wen, agladingit ti pusok gapu iti lasagko,”4 Kinuna ni Nephi, “Ti Diosko ti nagsanggirak; isu ti nangibagnos kaniak manipud iti panagsagabak iti langalang; ken pinakirednak iti rabaw dagiti adalem a danum.”5
Kas pasurot ni Cristo, saantayo a maliklikan dagiti karit ken pannubok iti biagtayo. Masansan a maidawat kadatayo nga agaramid kadagiti narigat a banag a, no masulisogtayo nga agmaymaysa, makatalipupos ken mabalin nga imposible. Bayat ti panangawattayo iti awis ti Mangisalakan nga “umaykayo kaniak,”6 ipaaynanto ti suporta, liwliwa, ken kappia a kasapulan, kas iti inaramidna para kada Nephi ken Joseph. Uray pay kadagiti kaunggan a pannuboktayo, mariknatayo ti nabara nga arakup ti ayatna bayat ti panagtalektayo Kenkuana ken panangawattayo iti pagayatanna. Mapadasantayo ti rag-o a nailatang para kadagiti napudno a disipulona, gapu ta “rag-o ni Cristo.”7
Idi 2014, kabayatan ti panagserbik iti full-time mission, napadasan ti pamiliami ti saan a ninamnama a panagbaliw dagiti paspasamak. Bayat ti panagdaliasatmi nga agpababa iti maysa a narangkis a turod, natnag ti buridek nga anakmi a lalaki ket nadangran ti utekna a nangpapeggad iti biagna. Idi dumakes ti kasasaadna, intaray ti medical a personnel tapno maopera a dagus.
Nagparintumeng ti pamiliami iti suelo iti bakante a kuarto iti ospital, ket imbukbokmi dagiti pusomi iti Dios. Iti tengnga daytoy maktikaw ken nakalkaldaang a kanito, napnuankami iti ayat ken kappia ti Nailangitan nga Amami.
Saanmi nga ammo no ania ti adda iti masakbayan wenno no makitaminto pay a sibibiag ti anakmi a lalaki. Nakalawlawag nga ammomi a ti biagna ket adda kadagiti ima iti Dios ken dagiti bungana, manipud iti agnanayon a pannirigan, ket agpaay para iti pagimbaganna ken pagimbaganmi. Babaen ti sagut ti Espiritu, naan-anay a nakasaganakami a mangawat ti ania man a pagbanaganna.
Saan a nalaka daytoy! Nagresulta ti aksidente iti dua a bulan a panagtalinaed iti ospital bayat ti panangidaulomi iti nasurok a 400 a full-time a missionarry. Nakapadas ti anakmi a lalaki iti dakkel a pannakapukaw itimemoriana. Nairaman iti panagimbagna ti atiddog ken narigat a sesion iti pisikal, speech ken occupational therapy. Nagtalinaed dagiti karit, ngem iti panaglabas ti panawen, nasaksianmi ti maysa a milagro.
Nalawag a maawatanmi a saan a ti tunggal pannubok a sanguentayo ket maaddaan ti kayattayo a resulta. Nupay kasta, bayat ti panangipamaysatayo ken ni Cristo, mariknatayo ti kappia ken makitatayo dagiti milagro ti Dios, ania man dagitoy, iti panawenna ken iti wagasna.
Addanto dagiti panawen a saanta yonto a kabaelan a makita ti ania man a wagas a paggibusanto ti agdama a situasion ket mabalin nga ipeksatayo, kas ken ni Nephi, “Agladingit ti pusok gapu iti lasagko.”8 Mabalin nga adda dagiti panawen a ti laeng namnama nga adda kadatayo ket ni Jesucristo. Anian a bendision ti maaddaan iti dayta a namnama ken panagtalek Kenkuana. Ni Cristo ti maysa a kanayonto nga agtungtungpala kadagiti karina. Ti panaginanana ket naipanamnama para iti amin nga umasideg Kenkuana.9
Tarigagayan unay dagiti lidertayo a marikna ti amin ti kappia ken liwliwa nga aggapu babaen iti panagtalek ken panangipamaysa iti Mangisalakan a ni Jesucristo.
Ti sibibiag a propetatayo, ni Presidente Russell M. Nelson, ket makisarsaritan iti pamata ti Apo para iti lubong ken para kadagiti miembro ti Simbaan ni Cristo: “Simple ken napudno ti mensahetayo iti lubong: awisentayo ti amin nga annak ti Dios iti agsumbangir ti belo nga umay iti Mangisalakanda, umawat iti bendision ti nasantuan a templo, maaddaan iti naandur a rag-o, ken maikari iti agnanayon a biag.”10
Daytoy nga awis nga “umaykayo ken Cristo” ket addaan kadagiti naipangpangruna a kaipapanan para kadagiti Santo iti Ud-udina nga Aldaw.11 Kas miembro ti Simbaan ti Mangisalakan, nagaramidtayo kadagiti katulagan Kenkuana ken nagbalin a kas naespirituan nga annakna a lallaki ken babbai.12 Naikkantayo met ti gundaway a makipagtrabaho iti Apo iti panangawis kadagiti dadduma nga umasideg Kenkuana.
Bayat ti pannakipagtrabahotayo ken ni Cristo, ti kangrunaan a pangipamaysaantayo kadagiti panagkagumaantayo ket iti uneg dagiti pagtaengantayo. Addanto dagiti panawen a maipasango dagiti miembro ti pamilia ken gagayyemyo kadagiti karit. Dagiti timek iti lubong, ken mabalin a dagiti bukodda a tarigagay, nalabit ti makagapu a pagduaduaanda ti kinapudno. Aramidentayo amin a kabaelantayo tapno matulongantayo ida a makarikna iti ayat ti Mangisalakan ken ti ayattayo. Naipalagip kaniak ti bersikulo ti nasantuan a kasuratan a nagbalin a pagaayattayo himno a “Love One Another” a mangisursuro kadatayo a, “Gapu itoy … mailasindanto … a dakayo ti adalak, no adda ayatyo iti maysa ken maysa.”13
Iti panagayattayo kadagiti agduadua iti kinapudno, mabalin a padasen ti kabusor ti amin a kinaragsak nga iparikna kadatayo a liputantayo dagiti ay-ayatentayo no datayo ket agtultuloy nga agbiag iti pakabuklan ti ebanghelio ken mangisuro kadagiti kinapudnona.
Ti kabaelantayo a mangtulong kadagiti dadduma nga umasideg ken ni Cristo wenno agsubli ken ni Cristo ket agpannuray iti bukodtayo a panagkumit nga agtalinaed iti dana ti katulagan.
No ti pudno a tarigagaytayo ket ti panangalaw kadagiti ay-ayatentayo, rumbeng a mismo a datayo ti agtalinaed a natibker ken ni Cristo babaen ti panangarakup ti Simbaanna ken ti pakabuklan ti ebangheliona.
Iti panangsublitayo ti estoria ni Nephi, ammotayo a ti panagduyos ni Nephi nga agtalek iti Apo ket naimpluensiaan ti kabaelan dagiti nagannakna nga agtalek iti Apo ken ti pagwadanda nga agtungpal kadagiti katulagan. Napintas a naiyulidan daytoy iti parmata ni Lehi maipapan iti kayo ti biag. Kalpasan ti pannanganna iti nasam-it ken napnuan-rag-o a bunga ti kayo, ni Lehi “inwaras[na] iti panagkita[na], tapno makita[na] met ti pamilia[na].”14 Nakitana da Sariah, Sam, ken Nephi a nakatakder “a kas man la dida ammo ti rumbeng a pagturonganda.”15 Kinuna ni Lehi, “inayabak ida; ket impukkawko met kadakuada nga umasidegda kaniak, ket mairanudda iti bunga.”16 Anagenyo a saan a pinanawan ni Lehi ti kayo ti biag. Nagtalinaed a naespirituan iti Apo ken inawisna ti pamiliana nga umay no sadino isuna a nakiranud iti bunga.
Allukoyen ti kabusor ti dadduma a panawan ti rag-o ti ebanghelio babaen ti panangisina kadagiti pannursuro ni Cristo manipud iti Simbaanna. Kayatna a patientayo a makapagtalinaedtayo a natibker iti dana ti katulagan iti bukbukodtayo, babaen ti bukodtayo nga espiritualidad, a sumina iti Simbaanna.
Kadagitoy maudi nga aldaw, naisubli ti Simbaan ni Cristo tapno matulongan dagiti natulagan nga annak ni Cristo nga agtalinaed iti dana ti katulagan.
Iti Doktrina ken Katulagan mabasatayo, “Adtoy, daytoy ti doktrinak—-asino man nga agbabawi ket umasideg kaniak, isu met laeng ti simbaanko.”17
Babaen ti Simbaan ni Cristo, mapatibkertayo babaen kadagiti padas kas maysa a komunidad dagiti Santo. Mangngegtayo ti timekna babaen kadagiti propeta, mammadto, ken mammaltiingna. Kangrunaan iti amin, babaen ti Simbaanna naikkantayo kadagiti kasapulan a bendision ti Pannubbot ni Cristo a maamiris laeng babaen ti pannakiraman kadagiti sagrado nga ordinansa.
Ti Simbaan ni Jesucristo dagiti Santo iti Ud-udina nga Aldaw isu ti Simbaan ni Cristo iti daga, a naisubli kadagitoy ud-udina nga aldaw para iti pagimbagan dagiti amin nga annak ti Dios.
Paneknekak a no umaytayo ken Cristo ken agbiag kas dagiti Santo ti Ud-udina nga Aldaw, mabendisionantayo iti ad-adu pay nga ayatna, rag-ona, ken kappiana. Kas ken ni Nephi, makaaramidtayo kadagiti narigat a bambanag ken matulongantayo ti dadduma a makaaramid met iti kasta, agsipud ta ammotayo no siasino ti mabalin a pagtalkantayo.18 Ni Cristo ti silawtayo, ti biagtayo, ken ti pannakaisalakantayo.19 Iti nagan ni Jesucristo, amen.