agtutubo nga agdaldalus iti pader

Nobiembre 13–19

Santiago

“Managtungpalkay Koma iti Sao, ket Saan Laeng a Managdengngeg”

Bayat ti panangbasam iti Surat ni Santiago, ikasom dagiti balikas ken ragup ti balikas a napateg kenka. Kasano a naguyugoyka nga agbalin a “managtungpal” kadagitoy a balikas? (Santiago 1:22).

Isuratmo dagiti Impresionmo

No dadduma maysa laeng a bersikulo ti nasantuan a kasuratan ti makapagbalbaliw iti lubong. TiSantiago 1:5 kasla simple lang a balakad—no kasapulam ti kinasirib, agdawat iti Dios. Ngem idi basaen ti 14-ti tawenna a Joseph Smith dayta a bersikulo, “kas man la simmeksek a napnuan bileg iti amin a rikna ti puso[na]” (Joseph Smith—Pakasaritaan 1:12) Kasta a naparegta, nagtignay ni Joseph iti balakad ni Santiago ket nagdawat iti kinasirib manipud iti Dios babaen iti kararag. Ket pudno a siwawaya a mangted ti Dios, a nangted ken ni Joseph iti maysa kadagiti kakasdaawan a nailangitan nga isasarungkar iti pakasaritaan ti tao—ti Umuna a Parmata. Binaliwan daytoy a parmata ti turongen ti biag ni Joseph ken nangiturong iti Pannakaisubli ti Simbaan ni Jesucristo iti rabaw ti daga. Nabendisionantayo amin iti agdama gapu ta binasa ken nagtignay ni Joseph Smith iti Santiago 1:5.

Ania ti masarakam bayat ti panagadalmo iti Surat ni Santiago? Nalabit maysa a bersikulo wenno dua ti mangbalbaliwto kenka wenno ti maysa a tao nga ay-ayatem. Masarakam ti pannarabay bayat ti panagkalikagummo a mangipatungpal ti misionmo iti biag. Masarakam ti pammaregta nga agsao a nasayaat wenno agbalin a naan-anus. Mabalin a mariknam a naguyugoyka a maitunos dagiti tignaymo a nasaysayaat iti pammatim. Ania man a makaparegta kenka, ipalubosmo dagitoy a balikas a “sumrek … iti amin a rikna ti puso[m].” Ket kalpasanna, no “ awatenyo a sieemma ti sao,” kas insurat ni Santiago, managtungpalkay iti sao, saan laeng a managdengngeg (kitaen iti Santiago 1:21–22).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Asino ni Santiago?

Patien ti kaaduan a ti nagsurat ti Surat ni Santiago ket anak a lalaki ni Maria, ti ina ni Jesucristo, ket ngarud kabsat ti Mangisalakan. Nadakamat ni Santiago iti Mateo 13:55; Marcos 6:3; Dagiti Aramid 12:17; 15:13; 21:18; ken Taga Galacia 1:19; 2:9. Makita a manipud kadagitoy a nasantuan a kasuratan a ni Santiago ket maysa a lider idi iti Jerusalem, ket naawagan kas maysa nga Apostol (kitaen iti Taga Galacia 1:19).

Santiago 1:2–4; 5:7–11

Ti naanus a panagandur ti mangiturong iti kinaan-anay.

Kalpasan ti panangbasam iti Santiago 1:2–4; 5:7–11, ania ti masaom iti kangrunaan a mensahe ni Santiago maipapan iti kinaanus? Mabalin a makatulong nga utoben no ania ti nasursuro ti pamilia ni Elder Jeremy R. Jaggi maipapan iti kinaanus manipud kadagitoy a bersikulo (kitaen iti “Let Patience Have Her Perfect Work, and Count It All Joy!,” Liahona, Nob. 2020, 99–101). Ania ti “aramid a naan-anay” ti kinaanus? (Santiago 1:4). Kasano a maipakitam iti Apo a natallugodka nga agbalin a naanus?

Santiago 1:3–8, 21–25; 2:14–26; 4:17

Agkasapulan ti pammati iti panagtignay.

Kasano nga ammom no addaanka iti pammati ken ni Jesucristo? Kasano a mangipakita dagiti aramidmo iti pammatim iti Dios? Panunotem ti maipapan kadagitoy a saludsod bayat ti panagadalmo kadagiti pannursuro ni Santiago maipapan iti pammati. Mabalin a makaparegta a basaen met ti maipapan kada Abraham ken Raab, dua a pagarigan a dinakamat ni Santiago (kitaen iti Genesis 22:1–12; Josue 2). Kasano nga impakitada nga adda pammatida iti Dios?

Ti panagbasa iti Santiago 1:3–8, 21–25; 2:14–26; 4:17 ket mabalin a makatulong kenka a mangpanunot kadagiti wagas a pakapagbalinam a nasaysayaat nga agipatpatungpal iti balikas. Isuratmo dagiti ania man nga impresion a maawatmo, ket agaramid kadagiti plano nga agtignay kadagitoy.

Kitaen met iti Alma 34:27–29; 3 Nephi 27:21.

Ni Abraham nga agkarkararag iti ruar ti toldana

“Ni Abraham pinatina ti Dios, ket naibilang kenkuana a kinalinteg” (Santiago 2:23). Ni Abraham kadagiti Tanap ti Mamre, ni Grant Romney Clawson

Santiago 1:26; 3:1–18

Dagiti balikas nga isaok ket adda bilegda a mangpasakit wenno mangbendision kadagiti dadduma.

Kadagiti nabaknang a panangiladawan nga inaramat ni Santiago iti pakabuklan ti suratna, sumagmamano kadagiti kalawagan a pagsasao ti masarakan iti balakadna maipapan iti pagsasao. Ibilangmo ti panangaramid iti maysa a listaan ti amin a wagas a panangiladawan ni Santiago iti dila wenno ngiwat. Ania ti isingasing ti tunggal panangidasig wenno ladawan maipapan kadagiti balikas nga isaotayo? Mangpanunotka iti maysa a banag a maaramidmo a mangbendision iti maysa a tao kadagiti balikasmo (kitaen iti Doktrina ken Katulagan 108:7).

Santiago 2:1–9

Kas maysa a disipulo ni Jesucristo, nasken nga ayatek ti amin a tao, ania man dagiti kasasaadda.

Binallaagan ni Santiago dagiti Santo nangnangruna a maibusor iti panangpabor kadagiti nabaknang ken panangumsi kadagiti nakurapay, ngem mabalin a maaramat ti ballaagna kadagiti ania man a panangayon wenno dakes a panangipapan a mabalin nga adda kadatayo iti dadduma. Bayat ti nainkakararagan a panagadalmo iti Santiago 2:1–9, sukisokem ti bukodmo a puso ket denggem dagiti parikna ti Espiritu Santo. Mabalin a makatulong a mangsukat kadagiti ragup ti balikas kadagitoy a bersikulo, kas iti “maysa a napanglaw a nagpagan-anay iti nanumo” (bersikulo 2), iti sabali a balikas wenno ragup ti balikas a mangiladawan iti maysa a tao a mabalin a masulisog a manghusga iti saan a nainkalintegan. Mariknam kadi dagiti ania man a panagbalbaliw a nasken nga aramidem iti wagas a panangtratom wenno panangpanunotmo iti dadduma?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Santiago 1:5.Kalpasan ti panangbasa iti Santiago 1:5, mabalin a gupgopen ti pamiliam ti pakaammuan ti Umuna a Parmata (kitaen iti Joseph Smith—Pakasaritaan 1:8–20) wenno buyaen ti video “Ask of God: Joseph Smith’s First Vision” (ChurchofJesusChrist.org). Awisem ti sumagmamano a miembro ti pamilia a mangibinglay iti pammaneknekda maipapan ken ni Propeta Joseph Smith ken dagiti padasda idi sinungbatan ti Nailangitan nga Ama dagiti kararagda.

Santiago 1:26–27.Ibilang ti panangbuya iti video “True Christianity” (ChurchofJesusChrist.org). Kalpasanna basaem ti kaipapanan ti “natarnaw a relihion” iti Santiago 1:26–27, ken paglilinnawagan dagiti wagas a maaramid ti pamiliam a natartaranaw ti panangaramatyo iti relihion.

Santiago 3.Iraman tiSantiago 3 dagiti adu a ladawan a mabalin a mangparegta kadagiti nakallalagip a banag nga adalen [object lesson] a mangtulong iti pamiliam a manglagip iti nasayaat a panagsasao. Kas pagarigan, makapagparnuaykayo nga aggigiddan iti maysa nga apoy ket pagsasaritaanyo no kasano a makaigapu iti dakkel a parikut ti maysa a bassit, naalas a balikas (kitaen dagiti bersikulo 5–6). Wenno mabalinmo ti mangiserbi iti maysa a banag a naalsem iti maysa a banag a gagangay a mausar para iti nasam-it a taraon—kas iti lemon juice iti garapon ti diro ti uyokan. Mangiturong daytoy iti panaglilinnawag maipapan iti panangusar kadagiti makaay-ayo ken makaparegta a balikas (kitaen dagiti bersikulo 9–14).

Santiago 4:5–8.Apay a nasken nga “umadani[kayo] iti Dios (Santiago 4:8) no maipasangotayo iti sulisog?

Santiago 5:14–16.Insuro ni Presidente Dallin H. Oaks a “nasken a yallukoy dagiti nagannak ti ad-adu pay a bendision iti priesthood iti pamilia” (“The Powers of the Priesthood,” Liahona, Mayo 2018, 67). Nalabit a ti panagbasa iti Santiago 5:14–16 ken panangibinglay kadagiti padas maipapan iti panangawat iti bendision iti priesthood ket makaallukoy kadagiti miembro ti pamilia nga agkiddaw iti bendision no masakit wenno agkasapulanda iti naespirituan a pigsa.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “Have I Done Any Good?,” Hymns, no. 223.

Panangpadur-as iti Bukod a Panagadal

Agtignayka iti no ania ti nasursurom. Bayat ti panagadalmo, dumngegka kadagiti parikna manipud iti Espiritu maipapan iti no kasano a mayaplikarmo no ania ti masursurom iti biagmo. Ikumitmo ti mangsurot kadagitoy a parikna ken agbiagka a naan-anay iti ebanghelio. (Kitaen iti Panangisuro iti Wagas ti Mangisalakan, 35.)

Ni Joseph Smith nga agbasbasa iti Biblia

Ti balakad ni Santiago nga “agdawat iti Dios” (Santiago 1:5) ti nangparegta ken ni Joseph Smith tapno agkalikagum a maaddaan iti sirib manipud iti Dios. Rinetrato ni Christina Smith.