Oktubre 2–8

Taga Efeso

“Maipaay iti Pannakapaan-anay dagiti Santo”

Makitam kadi dagiti ania man a pagnaigan dagiti mensahe iti sapasap a komperensia ken ti Surat ni Pablo kadagiti taga Efeso?

Isuratmo dagiti Impresionmo

Idi nangrugi ti ebanghelio a naisaknap iti Efeso, nangigapu iti “riri a saan a bassit” (Dagiti Aramid 19:23) kadagiti taga Efeso. Imbilang dagiti lokal a trabahador nga agar-aramid kadagiti altar ti pagano a diosa a maysa a peggad ti Kristianismo ti pagsapulanda, ket iti saan a nabayag “napnoda iti pungtot, … ket ti siudad napno iti riri” (kitaen iti Dagiti Aramid 19:27–29). Ipapanmo a maysaka a kabumbuniag iti ebanghelio iti kasta a situasion. Adu a taga Efeso ti immawat ken nagbiag iti ebanghelio iti baet daytoy nga “arimbangaw” (Dagiti Aramid 19:40), ket impatalged ni Pablo kadakuada a ni “Cristo … ti talnatayo” (Taga Efeso 2:13–14). Dagitoy a balikas, a kagiddan ti awisna nga “isu amin a pait, ken gura, ken unget, ken ariwawa, ken dakes a panagsao, maikkat koma kadakayo” (Taga Efeso 4:31), kasla naitiempo ken makaliwliwa ita a kas idi. Para kadagiti taga Efeso, a kas para iti tunggal maysa kadatayo, ti dumteng ti pigsa a mangsango kadagiti rigat “iti Apo, ken iti pigsa ti pannakabalinna” (kitaen iti Taga Efeso 6:10–13).

Dagiti Kapanunotan para iti Bukod a Panagadal iti Nasantuan a Kasuratan

Taga Efeso 1:4–11, 17–19

Pinilinak ti Dios, wenno pinilinak sakbay a nayanak idin, tapno mangipatungpal kadagiti masinunuo a pagrebbengan iti daga.

Nasao ni Pablo a dagiti Santo “tinudinganen a nasaksakbay” ti Dios ken “napilin … sakbay ti pannakabukel ti lubong” tapno agbalin a tattaona. Nupay kasta, kas iti nakitan ni Presidente Henry B. Eyring, saan a kaipapanan daytoy “a nalabit nga inkeddengen ti Dios a nasapsapa no asino kadagiti annakna ti isalakanna ken inaramidna a sidadaan ti ebanghelio kadakuada, idinto a dagiti saan pay a nakangngeg iti ebanghelio ket gagangay a saan a ‘napili.’ … Ngem ad-adda a managayat ken nalinlinteg ti ayat ti Dios ngem iti dayta. Aggagar ti Nailangitan nga Amatayo a mamagkaykaysa ken mangbendision iti amin a pamiliana” (“Gathering the Family of God,” Liahona, Mayo 2017, 20–21). Amin nga annak ti Dios ti makaawat iti ebanghelio ken dagiti ordinansana gapu iti aramid a maannong para kadagiti natay kadagiti nasantuan a templo.

Nupay awan ti natudingan a nasaksakbay a maisalakan wenno saan a maisalakan, isuro ti kabaruanan a paltiing a napili ti sumagmamano kadagiti annak ti Dios, wenno “napili[dan] sakbay a nayanak[da],” iti biag sakbay daytoy a lubong tapno mangipatungpal kadagiti masinunuo a pagrebbengan iti pannakairingpas dagiti panggep ti Dios iti daga. Bayat ti panangbasam iti Taga Efeso 1 ken Gospel Topics, “Foreordination” (topics.ChurchofJesusChrist.org), utobem no kasano a maaramat kenka daytoy a kinapudno.

Taga Efeso 1:10

Ti Diosto ti “mamagkaykaysa kadagiti amin a bambanag ken Cristo.”

Apay iti panagkunam a maawagan ti aldawtayo iti “pannakaisagana ti pannakatungpal dagiti panawen? Ania ti kayat a sawen ti “mapagkaykaysa dagiti amin a bambanag ken Cristo”? Bayat ti panangutobmo kadagitoy ragup ti balikas, basaem dagiti sumaganad a nasantuan a kasuratan: Taga Efeso 4:13; 2 Nephi 30:7–8; Doktrina ken Katulagan 110:11–16; 112:30–32; 128:18–21. Mabalin a mariknam a naparegtaka a mangisurat kadagiti bukodmo a pannakailawlawag dagitoy a ragup ti balikas.

Kitaen met iti Elder David A. Bednar, “Gather Together in One All Things in Christ,” Liahona, Nob. 2018, 21–24.

Taga Efeso 2:19–22; 3:1–7; 4:11–16

Nabuangay ti Simbaan kadagiti apostol ken propeta, ken ni Jesucristo ti kangrunaan a bato a pasuli.

Segun iti Taga Efeso 2:19–22; 3:1–7; 4:11–16, apay nga addaantayo kadagiti propeta ken apostol? Panunotem dagiti mensahe manipud kadagiti propeta ken apostol a nangngegamon kabayatan ti sapasap a komperensia. Kasano a mangipatungpal dagiti pannursuroda kadagiti panggep nga inladawan ni Pablo? Kas pagarigan, kasano a nakatulong kenka dagitoy a pannursuro a saan a “pailawlaw iti amin nga angin ti sursuro wenno doktrina”?

Kasano a maipada ni Jesucristo iti maysa a bato a pasuli para iti Simbaan? Kasano a maipada Isuna iti maysa a bato a pasuli para iti biagmo?

Kitaen met iti Dagiti Aramid 4:10–12.

Ni Jesucristo ti bato a pasuli ti Simbaan.

Taga Efeso 5:21–6:4

Ti panangsurot iti pagwadan ti Mangisalakan ti makapapigsa kadagiti relasion iti pamiliak.

Bayat ti panangbasam iti Taga Efeso 5:21–6:4, panunotem no kasano a makapapigsa dagitoy a bersikulo kadagiti relasion ti pamiliam?

Napateg a kitaen a naisurat dagiti balikas ni Pablo iti Taga Efeso 5:22–24 iti konteksto ti kannawidan ti kagimongan iti panawenna. Isuro dagiti propeta ken apostol iti agdama a saan a nangatngato dagiti lallaki ngem dagiti babbai ken nairanta dagiti agasawa nga “agpada nga agkadua” (kitaen iti “Ti Kaamaan: Maysa a Waragawag ti Lubong,” ChurchofJesusChrist.org). Nupay kasta, masarakam pay laeng ti adda pakainaiganna a balakad iti Taga Efeso 5:25–33. Kas pagarigan, kasano nga ipakita ni Cristo ti ayatna para kadagiti Santo? Ania ti isingasing daytoy no kasano ti nasken a panagtrinnato dagiti agassawa, kas agpada nga agkadua? Ania dagiti mensahe a masarakam para iti bagim kadagitoy a binatog?

Taga Efeso 6:10–18

Tulongannakto ti kabal ti Dios a mangsaluad kaniak manipud iti dakes.

Bayat ti panangbasam iti Taga Efeso 6:10–18, ibilangmo no apay a ninaganan ni Pablo ti tunggal pedaso ti kabal iti wagas ti panangaramidna. Ania ti pangsalakniban ti “amin a kabal ti Dios” kenka? Ania ti maaramidyo tapno ad-adda a naan-naay ti panangikawes ti tunggal pedaso ti kabal iti inaldaw?

Kitaen met iti 2 Nephi 1:23; Doctrina ken Katulagan 27:15–18.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Taga Efeso 1:10.Tapno maisuro maipapan daytoy a bersikulo, inusar ni Elder David A. Bednar ti pagarigan ti maysa a tali (kitaen iti “Gather Together in One All Things in Christ”). Ibilang ti panangipakita kadagiti miembro ti pamilia iti maysa a tali ken panangpaiggem ken panangpaamiris kadakuada iti daytoy idinto nga ibinglaymo dagiti paset ti mensahe ni Elder Bednar. Kasano a ti panangummong ti Dios iti amin a banag a sangkamaysa ken ni Cristo? Kasano a mabendisionantayo gapu iti daytoy a panangummong?

Taga Efeso 2:4–10; 3:14–21.Awisem dagiti miembro ti pamilia a mangibinglay kadagiti padas a nakariknaanda iti ayat ken asi ti Dios ken ni Jesucristo a nailadawan kadagitoy a bersikulo.

Taga Efeso 2:12–19.Mabalin a paggugusto ti pamiliam ti mangaramid kadagiti pader nga usarenda dagiti pungan wenno dadduma pay a banag nga adda iti pagtaenganyo ket kalpasanna tumbaenda dagitoy. Idinto nga intudo ni Pablo ti “pader” ti nagbaetan dagiti Gentil ken Judio, ania a kita dagiti pader ti mangisina kadagiti tao ita? Kasano a “dinadael” ni Jesucristo dagitoy a pader? Kasano a “maikappiana[tayo] iti Dios”? (bersikulo 16).

Taga Efeso 6:10–18.Mabalin nga agaramid ti pamiliam ti bukodda a “kabal ti Dios” nga us-usarenda dagiti banag nga adda iti balay. Ti video “The Armour of God” (ChurchofJesusChrist.org) makatulong kadagiti miembro ti pamilia a mangiladawan iti panunotda iti daytoy a kabal, ken masarakanda dagiti simple a panangilawlawag iti “The Whole Armor of God” (Friend, Hunio 2016, 24–25). Kasano a naespirituan a masalaknibannatayo ti tunggal pedaso ti kabal? Ania ti mabalin nga aramidentayo a makatulong iti tunggal maysa a “mangikawes ti amin a kabal ti Dios” (Taga Efeso 6:11) iti inaldaw?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “Hope of Israel,” Hymns, no. 259.

Panangpadur-as iti Bukod a Panagadal

Agpatarabayka iti Espiritu iti panagadalmo. Agbalinka koma a mangrikna iti Espiritu bayat ti panangiturongna kenka kadagiti banag a nasken a sursuruem iti tunggal aldaw, uray pay no iturongnaka daytoy a mangadal iti maysa a topiko a dimo immun-una a plinano.

Naespirituan a masalaknibannatayo ti panangikawes iti kabal ti Dios.