Sinarungkaran ti Mangisalakan ni Pablo iti pagbaludan (kitaen iti Dagiti Aramid 23:11). Mawayawayaannatayo ni Jesucristo manipud iti sangol ti pannakaadipen” (Taga Galacia 5:1).

Septiembre 25–Oktubre 1

Taga Galacia

“Magna iti Espiritu”

Bayat ti panangbasam iti Taga Galacia, isuratmo dagiti impresion a maawatmo. Ti panangaramid ti mangtulongto kenka a manglagip ken mangutob kadagitoy iti masakbayan.

Isuratmo dagiti Impresionmo

Mangted ti ebanghelio ni Jesucristo iti wayawaya manipud iti naespirituan a pannakaadipen. Ngem no dadduma tallikudan dagiti tao a nakapadasen ti panangwaywaya iti ebanghelio ket “tarigagayanyo manen a pakaadipenan” (Taga Galacia 4:9). Daytoy ti ar-aramiden dagiti sumagmamano a Santo iti Galacia—taltallikudanda ti wayawaya nga indiaya ni Cristo kadakuada (kitaen iti Taga Galacia 1:6). Ti Surat ni Pablo kadagiti Taga Galacia, ngarud, ket maysa a kasapulan unay nga awag nga agsubli iti “panagwayawaya a linuk-atannatayo ni Cristo” (Taga Galacia 5:1). Daytoy nga awag ti maysa pay a kasapulantayo a denggen ken ipangag gapu ta idinto nga agbalbaliw dagiti kasasaad, agtultuloy ti panagkarigatan iti nagbaetan ti wayawaya ken pannakaadipen. Kas insuro ni Pablo, saan nga umdas a “naawagankayo iti panangwayawaya” (Taga Galacia 5:13); naskentayo met nga “agtalinaed” iti daytoy (Taga Galacia 5:1) babaen iti panagpannuray ken ni Cristo.

Dagiti Kapanunotan para iti Bukod a Panagadal iti Nasantuan a Kasuratan

Taga Galacia 1–5

Winayawayaannak ti linteg ni Cristo.

Nagsurat ni Pablo kadagiti Santo ti Galacia idi naammuanna a naiturongda iti pannakayaw-awan babaen kadagiti palso a pannursuro (kitaen iti Taga Galacia 1:6–9). Maysa kadagitoy a pannursuro ket tapno maisalakan, masapul a makugit dagiti Gentil nga immawat iti ebanghelio ken agtungpal kadagiti dadduma a kannawidan iti linteg ni Moises (kitaen iti Taga Galacia 2). Inawagan ni Pablo dagitoy a kannawidan iti “sangol ti pannakaadipen” (Taga Galacia 5:1). Bayat ti panangbasam iti balakad ni Pablo kadagiti Taga Galacia, sapulem dagiti pagbatayan a makatulong kenka tapno maawatam ti no ania ti pudno a wayawaya. Mabalinmo pay nga utoben no ania dagiti palso a kannawidan wenno dadduma pay a sangol ti pannakaadipen a mabalin nga adda iti biagmo. Adda kadi ania man a mangpawil kenka manipud iti panangpadpadas ti wayawaya nga idiaya ti ebanghelio? Kasano a “nangwayawaya [kenka]” ni Cristo ken ti ebangheliona? (Taga Galacia 5:1).

Kitaen met iti 2 Nephi 2:27; 9:10–12.

Taga Galacia 3

Siak ti agtawid kadagiti bendision a naikari ken ni Abraham.

Naseknan dagiti sumagmamano kadagiti Santo iti Galacia gapu ta saanda a nagtaud a mismo (“bin-i”) ken ni Abraham, saanda nga umawat kadagiti bendision a naikari ken ni Abraham, agraman ti pannakaitan-ok. Segun iti Taga Galacia 3:7–9, 13–14, 27–29, ania ti makaikari iti maysa a tao nga agbalin a “bin-i ni Abraham”?

Ti panagsursuro maipapan kadagiti bendision a naikari ken ni Abraham ken dagiti bendision a mabalintayo a tawiden kas bin-ina, kitaen iti Gospel Topics, “Abrahamic Covenant,” topics.ChurchofJesusChrist.org. Apay a napateg kenka dagiti bendision a naikari ken ni Abraaham?

Taga Galacia 3:6–25

Adda ken ni Abraham ti ebanghelio ni Jesucristo.

Inlawlawag ni Propeta Joseph Smith: “Ditayo mabalin a patien a dagiti nagkauna iti amin a panawen ket kuneng unay iti sistema ti langit a kas ipapan ti adu, agsipud ta amin a naisalakan, naisalakan babaen ti bileg iti daytoy naindaklan a plano ti pannakasubbot, kas kaaduan sakbay ti yaay ti Cristo nanipud pay idi. … Nagidaton ni Abraham iti sakripisio, ket iti laksid daytoy, naikasaba ti Ebanghelio kenkuana” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, JosephSmithPapers.org). Apay iti panagkunam a napateg a maammuan dagiti Santo iti panawen ni Pablo nga adda ti ebanghelio ni Jesucristo ken ni Abraham ken dagiti dadduma pay a nagkauna a propeta? Apay a napateg a maammuam daytoy? (Kitaen iti Helaman 8:13–20; Moises 5:58–59; 6:50–66.)

Kitaen iti Teachings of Presidents of the Church: Joseph Smith (2007), 45–56.

Taga Galacia 5:13–26; 6:7–10

No “magna[ak] iti Espiritu,” awatekto ti “bunga ti Espiritu.”

Ti panangadal kadagitoy a bersikulo ti makatulong kenka a mangamiris no kasano a naan-anay a magmagnaka iti Espiritu. Mapadpadasam kadi ti bunga ti Espiritu a nadakamat kadagiti bersikulo 22–23? Ania ti sabali pay a bunga, wenno resulta, ti naespirituan a panagbiag a nadlawmo? Utobem no ania ti kasapulam nga aramiden tapno ad-adda a naan-anay a masukay daytoy a bunga. Kasano ti mabalin a panangsukaymo iti daytoy bunga tapno mapasayaat dagiti napateg a relasion iti biagmo?

Nasken a sapulek ti “bunga ti Espiritu” iti biagko.

No padpadasem ti magna iti Espiritu ngem kasla saan a mangmangted iti naikari a bunga dagiti panagkagumaanmo, basaem ti Taga Galacia 6:7–10. Ania ti mensahe a mariknam nga ited ti Apo kenka kadagitoy a bersikulo?

Kitaen met iti Alma 32:28, 41–43; Doktrina ken Katulagan 64:32–34.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Taga Galacia 3:11.Ania ti kayat a sawen ti “agbiag gapu iti pammati”? Kasano nga agbibiagtayo gapu iti pammati kas pamilia?

Taga Galacia 4:1–7.Mabalinmo a yam-ammo ti Taga Galacia 4 babaen ti panangilawlawag kadagiti paggidiatan ti nagbaetan dagiti adipen ti ari ken dagiti annakna. Ania dagiti gundaway wenno potensial nga adda iti anak ti maysa nga ari nga awan iti maysa nga adipen? Panunotem ti maipapan iti daytoy bayat ti panaggigiddanyo nga agbasa kadagiti bersikulo 1–7. Ania ti isuro dagitoy a bersikulo maipapan iti relasiontayo iti Nailangitan nga Ama?

Taga Galacia 5:16–26.Ibilang ti panangilawlawag iti paggidiatan ti “aramid ti lasag” ken ti “bunga ti Espiritu.” Tapno mangnayon iti sumagmamano a ragsak iti panaglilinnawagyo, mabalin a markaan ti pamiliam dagiti aggigiddiat a bunga kadagiti balikas nga inaramat ni Pablo a mangiladawan iti bunga ti Espiritu. Kalpasanna pumili ti tunggal miembro ti pamilia iti maysa, ilawlawagna ti kaipapanan daytoy, ket isaritana maipapan iti maysa a tao a mangipagwadan iti dayta a bunga. Daytoy ti mabalin a mangiturong iti panaglilinnawag maipapan kadagiti wagas a mabalin a pangawisan ti pamiliam iti Espiritu iti pagtaenganyo ken mangsukay iti daytoy a bunga. Kalpasan ti panaglilinnawag, mabalin magustuanyo ti aggigiddan a mangan iti ensalada a prutas.

Taga Galacia 6:1–2.Mabalin nga adda dagiti panawen idi maysa a tao iti pamiliam ti “kinamakam ti basol.” Ania a balakad a masarakam iti Taga Galacia 6:1–2 maipapan iti no ania ti aramiden iti kasta a situasion?

Taga Galacia 6:7–10.No naggigiddan ti pamiliam a nagmula iti maysa a banag, mabalinmo nga usaren dayta a padas a mangiladawan iti pagbatayan nga “ania man nga imulanto ti maysa a tao, apitennanto met” (bersikulo 7). Wenno mabalinmo a saludsoden kadagiti miembro ti pamilia maipapan iti paboritoda a prutas wenno natnateng ket isaritam no ania ti kasapulan nga agpadakkel iti mula nga agpartuat iti dayta a taraon. (Kitaen ti ladawan iti ungto daytoy a balabala.) Mabalin a pagsasaritaanyo maipapan kadagiti bendision a namnamaen ti pamiliam nga awaten ken no kasano nga “apiten” dagita a bendision.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Teach Me to Walk in the Light,” Children’s Songbook, 177.

Panangpadur-as iti Panangisurotayo

Tulongam ti pamiliam a mangyarig kadagiti nasantuan a kasuratan iti bagbagida. Kinuna ni Nephi, “Inaramatko amin a nasantuan a kasuratan kadatayo, tapno agbalinda koma a pakairanudan ken pagadalantayo” (1 Nephi 19:23). Tapno tulongam ti pamiliam nga aramidenda daytoy, mabalinmo nga awisen ida a mangutob kadagidi panawen a napadasanda ti bunga ti Espiritu a nailadawan iti Taga Galacia 5:22–23. (Kitaen iti Panangisuro iti Wagas ti Mangisalakan, 21.)

Insuro ni Pablo a no magnatayo iti Espiritu, mapadasantayto ti “bunga ti Espiritu” iti biagtayo.