Ni Jesus a makisarsarita iti bassit nga ubing

Septiembre 18–24

2 Taga Corinto 8–13

“Ti Dios Ayatenna ti Mangted a Siaayat”

Ti panangisurat kadagiti naespirituan nga impresion tulongannakanto a lagipem no ania dagiti nasursurom kabayatan ti panagadalmo iti nasantuan a kasuratan. Mabalinmo ti agsurat iti study journalmo, agsurat iti margin ti bukodmo a nasantuan a kasuratan, ken mangnayon iti notes iti Gospel Library app, wenno agaramid iti audio recording dagiti kapanunotam.

Isuratmo dagiti Impresionmo

Ania koma ti aramidem no nangngegam a marigatan ti kongregasion dagiti Santo iti sabali a lugar gapu iti kinakurapay? Daytoy idi ti kasasaad nga inladawan ni Pablo kadagiti Santo iti Corinto iti 2 Taga Corinto 8–9. Ninamnamana nga allukoyen dagiti Santo iti Corinto a mangidonar iti sumagmamano a kinabaknangda kadagiti Santo nga agkasapulan. Ngem iti labes ti panagdawat iti donasion, naglaon pay dagiti balikas ni Pablo kadagiti nauneg a kinapudno maipapan iti panangted: “Tunggal maysa itdenna koma ti pinanggepna iti pusona; saan nga iti dakes a nakem wenno mapilpilit: ta ti Dios ayatenna ti mangted a siaayat” (2 Taga Corinto 9:7). Iti panawentayo, adda pay la dagiti Santo iti intero a lubong nga agkasapulan ti tulong. No dadduma ti kangrunaan a maaramidtayo para kadakuada ket agayuno ken mangted iti daton iti panagayuno. Iti sabali pay a kasasaad, mabalin nga ad-adda a direkta ken personal ti panangtedtayo. Ania man dagiti panggep dagiti sakripisiotayo, napateg ti panangamiristayo kadagiti motibasiontayo ti panangted. Dagiti kadi sakripisiotayo ket panangipeksa iti ayat? Kalpasan ti amin, ti ayat ti mamagbalin iti maysa a mangted a siaayat.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

2 Taga Corinto 8:1–15; 9:5–15

Mabalinko ti siaayat a mangibinglay iti no ania nga adda kaniak a mangbendision kadagiti nakurapay ken agkasapulan.

Adu dagiti tao iti intero a lubong ti agkasapulan. Kasano a mabalintayo nga agaramid iti pakaidumaan? Indiaya ni Elder Jeffrey R. Holland daytoy a balakad: “Nabaknang wenno napanglaw, intayo ‘aramiden ti kabaelantayo’ no agkasapulan dagiti dadduma [kitaen iti Marcos 14:6, 8]. … Tulongan ken tarabayennakayto ti [Dios] kadagiti naasi nga aramid ti kinadisipulo no sigaganetgetkayo nga agtarigagay ken agkararag ken agsapul kadagiti wagas nga agtungpal iti maysa a bilin nga intedna kadatayo a maulit-ulit” (“Are We All Not Beggars?,” Liahona, Nob. 2014, 41).

Basaem ti 2 Taga Corinto 8:1–15; 9:6–15, nga agsursurat kadagiti pagbatayan nga insuro ni Pablo maipapan iti panangaywan iti nakurapay ken agkasapulan. Ania ti makaparegta kenka maipapan iti balakad ni Pablo? Mabalinmo ti agkararag para iti pannarabay maipapan iti no ania ti maaramidmo a mangparabur iti maysa a tao nga agkasapulan. Penkem nga isuratmo dagiti ania man nga impresion a maawatmo ken agtignay kadagitoy.

Kitaen met iti Mosiah 4:16–27; Alma 34:27–29; Russell M. Nelson, “The Second Great Commandment,” Liahona, Nob. 2019, 96–100; Henry B. Eyring, “Is Not This the Fast That I Have Chosen?,” Liahona, Mayo 2015, 22–25.

2 Taga Corinto 11:1–6, 13–15; 13:5–9

“Sukimatenyo dagiti bagbagiyo met laeng, no addakayo iti pammati.”

Ita, kas iti aldaw ni Pablo, adda dagitay agkalikagum a mangyaw-awan kadatayo “manipud iti nadalus a singgalut a maipaay ken ni Cristo” (2 Taga Corinto 11:3). Gapu iti dayta, napateg nga aramiden no ania ti insingasing ni Pablo: “Sukimatenyo dagiti bagbagiyo met laeng, no addakayo iti pammati. (2 Taga Corinto 13:5). Mabalinmo nga irugi daytoy a proseso babaen ti panangpanunot no ania ti kayat a sawen ti “addakayo iti pammati.” Kasano nga ammom no addaka iti pammati? Ibilangmo dagiti adda kenka a gundaway a mangamiris iti bagim.

Kas paset ti panagamirismo, mabalin a kayatmo pay nga utoben ti ragup ti balikas “ti nadalus a singgalut a maipaay ken ni Cristo” (2 Taga Corinto 11:3). Kasano a nasarakam ti nadalus a singgalut nga agpaay ken ni Cristo ken iti ebangheliona? Kasano a “madadael ti [panunotmo] manipud iti [dayta] a nadalus a singgalut”? Ania ti makatulong a balakad a masarakam iti 2 Taga Corinto11:1–6, 13–15?

Ibilangmo pay daytoy a balakad manipud ken ni Presidente Dieter F. Uchtdorf: “No panunotenyo a saan a maipatpatungpal a nasayaat ti ebanghelio iti biagyo, awisenkayo a maaddaan iti oras, a mangamiris iti biagyo manipud iti nalawlawa a pannirigan, ket aramidenyo a simple no kasano ti panagbiagyo iti kinadisipulo. Ipokusyo dagiti pangrugian a doktrina, pagbatayan, ken pannakaaramat ti ebanghelio. Ikarik a tarabayen ken bendisionannakayto ti Dios iti danayo nga agturong iti maipatpatungpal a biag, ken nasaysayaat a maitrabahonto ti ebanghelio para kadakayo” (It Works Wonderfully,”,” Liahona, Nob. 2015, 22).

2 Taga Corinto 12:5–10

Umdas a mangtulong kaniak a mangbirok iti pigsa iti pagkapsutak ti parabur ti Mangisalakan.

Ditayo ammo no ania ti adda ken ni Pablo a “siit iti lasag,” ngem addaantayo amin kadagiti bukod a siit a kayattayo nga ikkaten ti Apo manipud iti biagtayo. Panunotem maipapan kadagiti siitmo bayat ti panagbasam iti 2 Corinthians 12:5–10, ket utobem no ania ti masursurom maipapan ken ni Jesucristo kadagitoy a bersikulo. Ania ti insuro ni Pablo kadagitoy a bersikulo maipapan kadagiti pannubok ken pagkapsutan? Ania ti kaipapananna kenka ti “umdas ti parabur [ti Dios] para kenka?

Kitaen met iti Mosiah 23:21–24; 24:10–15; Ether 12:27; Moroni 10:32–33.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

2 Taga Corinto 8–9.Ania ti masarakam kadagitoy a kapitulo a mangparegta kadatayo a tumulong kadagiti nakurapay ken agkasapulan? Mabalin a nasayaat daytoy nga oras a mangplano iti aramid a serbisio kas maysa a pamilia para iti maysa a tao nga agkasapulan.

2 Taga Corinto 9:6–7.Adda kadi maysa a tao nga am-ammo ti pamiliam a mabalin a mailadawan kas “mangted a siaayat”? Kasano a mapagbalintayo ti serbisiotayo iti dadduma nga ad-adda a siaayat? Mabalin dagiti miembro ti pamilia ti agaramid kadagiti tsapa a nakasurat ti “Maysaak a naayat a mangmangted.” Mabalinmo nga ited a gunggona dagiti tsapa kadagiti miembro ti pamilia no makitam ida nga agserserbi iti tunggal maysa a siaayat.

2 Taga Corinto 10:3–7.Kasano a masursuruam ti pamiliam maipapan iti intayo “pannakibakal” a maibusor iti kinadangkes? Paggugusto kadi ti pamiliam ti mangbangon iti maysa a pader wenno sarikedked nga usaren dagiti tugaw ken ules? Mabalin a daytoy ti mangiturong iti panaglilinnawag maipapan iti no kasano a mapapanaw dagiti banag a mangyadayo kadatayo iti Dios ken no kasano a “[maisangbay] ti kayawanda ti amin a panunot iti panagtulok ken Cristo.” Ania dagiti naespirituan nga “igam” nga usarentayo a mangpengdan kadagiti panunottayo? (kitaen iti Taga Efeso 6:11–18).

2 Taga Corinto 11:3.Ania ti mabalin nga aramiden ti pamiliam nga ad-adda nga agpokus iti “nadalus a singgalut a maipaay ken Cristo”?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Give,’ Said the Little Stream,” Children’s Songbook, 236.

Panangpadur-as iti Bukod a Panagadal

Isuratmo dagiti impresion. Imbaga ni Elder Richard G. Scott: “Ti naannad a pannakaisurat ti pannakaammo ket pannakaammo a sidadaan a mausar iti oras a panagkasapulan. … [Ti panangisurat iti naespirituan a panangiturong] ket mangpasayaat ti gundaway a makaawat iti ad-adu pay a silaw” (“Acquiring Spiritual Knowledge,” Ensign, Nov. 1993, 88; see also Panangisuro iti Wagas ti Mangisalakan, 12, 30).

dagiti agtutubo a tumultulong iti proyekto ti serbisio

“Tunggal maysa itdenna koma ti pinanggepna iti pusona; saan nga iti dakes a nakem wenno mapilpilit; ta ti Dios ayatenna ti mangted a siaayat” (2 Taga Corinto 9:7).