Septiembre 4–10

1 Taga Corinto 14–16

“Ti Dios saan a Dios ti Riri, no Di ti Talna”

Isuratmo dagiti impresionmo bayat ti panangbasam iti 1Taga Corinto 14–16. Agkararagka maipapan iti no ania ti isuro ti Espiritu kadakayo, ket dawatem iti Nailangitan nga Ama no adda pay kayatna a sursuruem.

Isuratmo dagiti Impresionmo

Gapu ta kabarbaro pay laeng ti Simbaan ken dagiti doktrinana iti Corinto, gagangay laeng a naipasango dagiti Santo iti Corinto iti pannakatikaw. Insuro idin ni Pablo kadakuada ti kangrunaan a kinapudno ti ebanghelio: “A ni Cristo natay gapu kadagiti basbasoltayo … ket naitanem, ket nagungar iti maikatlo nga aldaw” (1 Taga Corinto 15:3–4). Ngem sumagmamano kadagiti miembro iti saan a nabayag nangrugi a nangisuro nga “awan ti panagungar dagiti natay” (1 Taga Corinto 15:12). Impakaasi ni Pablo kadakuada a “laglagipenda” dagiti kinapudno a naisuro kadakuada (1 Taga Corinto 15:2). No maipasangotayo kadagiti aggigiddiat a kapanunotan maipapan kadagiti kinapudno ti ebanghelio, nasayaat a laglagipen a “ti Dios, saan a Dios ti riri, no di ti talna” (1 Taga Corinto 14:33). Ti panagdengdengngeg kadagiti natudingan a katulongan ti Apo ken panangtengngel kadagiti simple a kinapudno nga inulit-ulitda nga isuro ket makatulong kadatayo a mangsarak iti kappia ken “agtalinaed a sititibker iti pammati” (1 Taga Corinto 16:13).

Dagiti Kapanunotan para iti Bukod a Panagadal iti Nasantuan a Kasuratan

1 Taga Corinto 14

Makagun-odak iti sagut ti pammadto.

Ania ti sagut ti pammadto? Daytoy kadi ti kabaelan nga agipadto iti masakbayan? Para laeng kadi daytoy kadagiti propeta? Mabalin kadi ti asino man ti umawat iti daytoy a sagut?

Utobem dagitoy a saludsod bayat ti panagadalmo iti 1 Taga Corinto 14:3, 31, 39–40. Mabalinmo pay a basaen ti Apocalipsis 19:10 ken “Padto, Mamadto” iti Pangiwanwan iti Nasantuan a Kasuratan (scriptures.ChurchofJesusChrist.org). Batay iti no ania ti masursurom, kasano nga ilawlawagmo ti kaipapanan ti sagut ti padto? Ania ti mabalin a kayat a sawen ni Pablo idi inawisna dagiti Taga Corinto a “tarigagayanyo a nasged ti panagipadto”? (1 Taga Corinto 14:39). Kasano a maawatmo daytoy nga awis?

Kitaen met iti Joel 2:28–29; Alma 17:3; Doktrina ken Katulagan 11:23–28.

1 Taga Corinto 14:34–35

Kasano a mayaplikar ti palawag maipapan kadagiti babbai kadagitoy a bersikulo ita?

Iti aldaw ni Pablo, adda nadumaduma a namnamaen maipapan iti no kasano a nakiraman dagiti babbai iti kagimongan, agraman dagiti miting iti simbaan. Aniaman ti kaipapanan dagiti panursuro iti 1 Taga Corinto 14:34–35 idi panawen ni Pablo, saanda nga ipaspasimudaag a saan a makapagsarita ken makaidaulo dagiti babbai iti Simbaan ita a panawen (kitaen iti Patarus ni Joseph Smith, 1 Corinthians 14:34 [in 1 Taga Corinto 14:34, footnote b]). Kinuna ni Presidente Russell M. Nelson kadagiti babbai ti Simbaan ita: “Kasapulanmi … ti pigsayo, ti kumbersionyo, ti napigsa a pammatiyo, ti kabaelanyo a mangidaulo, ti siribyo, ken ti timekyo. Saan a kumpleto ken saan a makumpleto ti pagarian ti Dios no awan dagiti babbai nga agaramid iti sagrado a katulagan ken agtungpal kadagitoy, babbai a makapagsao babaen ti bileg ken turay ti Dios!” (“A Plea to My Sisters,” Liahona, Nob. 2015, 96).

1 Taga Corinto 15:1–34, 53–58

Nagun-od ni Jesucristo ti balligi iti ipapatay.

Napateg unay ti Panagungar ni Jesucristo iti Kristianismo, mabalin nga adda agkuna a no awan daytoy awan ti Kristianismo—no usaren dagiti balikas ni Pablo, “ngarud ti kaskasabami awan ti kapapay-anna, ket ti pammatiyo awan met kapapay-anna” (1 Taga Corinto 15:14). Ngem sumagmamano latta kadagiti Santo ti Corinto ti agisursuro nga “awan ti panagungar dagiti natay” (1 Taga Corinto 15:12). Bayat ti panangbasam ti sungbat ni Pablo iti 1 Taga Corinto 15, utobem biit no kasano a maiduma ti biagmo no dika namati iti Panagungar (kitaen iti 2 Nephi 9:6–19; Alma 40:19–23; Doktrina ken Katulagan 93:33–34). Ania ti kayat a sawen kenka ti ragup ti balikas nga “No ni Cristo saan a napagungar, awan kapapay-an ti pammatiyo”? (bersikulo 17).

Napateg pay a kitaen nga imbasar ni Pablo ti panangbuniag para kadagiti natay kas pammaneknek para iti kinapudno ti panagungar (kitaen iti 1 Taga Corinto 15:29). Kasano a pinapigsa ti aramid iti templo ken family history ti pammatim iti doktrina ti panagungar?

Kitaen met iti Doktrina ken Katulagan 138:11–37.

1 Taga Corinto 15:35–54

Maigiddiat ti nagungar a bagi manipud kadagiti mortal a bagi.

Nasdaawkayo kadin no ania ti langa ti maysa a nagungar a bagi? Segun iti 1 Taga Corinto 15:35, sumagmamano kadagiti Taga Corinto ti nagsiddaaw kadaytoy iti kastoy met laeng a banag. Basaen ti sungbat ni Pablo kadagiti bersikulo 36–54, ken isurat dagiti balikas ken ragup ti balikas a mangiladawan kadagiti paggiddiatan dagiti mortal a bagi ken dagiti nagungar a bagi. No aramidem, mabalin nga idasig dagiti bersikulo 40–42 iti Doktrina ken Katulagan 76:50–112. Ania ti inayon daytoy a paltiing ken ni Propeta Joseph Smith iti pannakaawatmo? (Kitaen met iti Patarus ni Joseph Smith, 1 Taga Corinto 15:40 [iti 1 Taga Corinto 15:40, footnote a]). Apay a napateg kadatayo dagitoy a kinapudno?

Kitaen met iti Lucas 24:39; Alma 11:43–45; Doktrina ken Katulagan 88:14–33.

“Maysa ti dayag ti init” (1 Taga Corinto 15:41).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Taga Corinto 15:29.Masursurotayo manipud iti bersikulo 29 a nakiraman dagiti nagkauna a Kristiano kadagiti panangbuniag para kadagiti natay, a kas met laeng iti ar-aramidentayo iti agdama. Kasano a mailawlawagtayo iti dadduma no apay nga agbuniagtayo para kadagiti kapuonantayo? (kitaen iti “What Are Baptisms for the Dead?,” [video], ChurchofJesusChrist.org). Kasano ti ar-aramidentayo kas maysa a pamilia tapno mangipaay kadagiti ordinansa iti templo para kadagiti natay a kapuonantayo nga agkasapulan kadagitoy? Masarakam ti ad-adu pay a resources iti daytoy a topiko iti Gospel Topics article “Baptisms for the Dead” (topics.ChurchofJesusChrist.org) ken iti FamilySearch.org.

1 Taga Corinto 15:35–54.Ania dagiti banag wenno ladawan a mabalinmo nga ipakita a mangtulong iti pamiliam a makaawat iti sumagmamano a termino nga inusar ni Pablo a pangiladawan no kasano a maigiddiat dagiti mortal a bagi kadagiti nagungar a bagi? Kas pagarigan, tapno ipakita ti pagdumaan ti agrupsa ken saan nga agrupsa (kitaen dagiti bersikulo 52–54) mabalinmo ti mangipakita iti metal a naglati ken metal a di aglati. Wenno mabalin nga idasig ti maysa a nakapsut a banag iti maysa a nabileg a banag (kitaen iti bersikulo 43).

1 Taga Corinto 15:55–57.Mabalin a naipangpangruna a napateg ti panaglilinnawag maipapan kadagitoy a bersikulo no adda am-ammo ti pamiliam a maysa a tao a pimmusayen. Mabalin nga ibinglay dagiti miembro ti pamilia ti pammaneknekda iti kasano nga inikkat ni Jesucristo “ti pannilud ni patay” (bersikulo 56).

1 Taga Corinto 16:13.Tapno matulongan dagiti miembro ti pamilia a manginaig iti daytoy a bersikulo, mabalinmo ti mangidrowing iti maysa a sirkulo iti daga ket ibilin iti maysa a miembro ti pamilia nga “agtakder a natibker” iti uneg daytoy a nakaapput dagiti matana. Kalpasanna mabalin a padasen dagiti dadduma ti mangiduron wenno mangguyod kenkuana manipud iti sirkulo. Ania ti paggidiatan a maaramid no ti tao iti sirkulo ket saan a nakaapput dagiti matana ket “makakita”? Ania ti maaramidtayo tapno “agtakder a napigsa” no masulisogtayo nga agaramid kadagiti dakes a pili? (kitaen met iti “Stay in the Boat and Hold On!,” [video], ChurchofJesusChrist.org).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “He Is Risen!,” Hymns, no. 199.

Panangpadur-as iti Bukod a Panagadal

Agsapul kadagiti pagtuladan [pattern]. Masarakantayo kadagiti nasantuan a kasuratan dagiti pagtuladan a mangipakita no kasano nga aramiden ti Apo ti aramidna. Ania dagiti pagtuladan a masarakam iti 1 Taga Corinto 14 a makatulong kadatayo a makaawat no kasano nga itandudo ti tunggal maysa?

Babai, Apay nga Agsangsangitka?, © Simon Dewey 2021. Nausar nga addaan pammalubos ti Altus Fine Art/www.altusfineart.com