“Setiembre 4–10. 1 Taga Corinto 14–16: ‘Ti Dios Saan a Dios ti Riri, no Di ti Talna’” Umaykayo, Sumurot Kaniak—Para iti Primary: Baro a Tulag 2019 2019)
“Setiembre 2–8. 1 Taga Corinto 14–16,” Umaykayo, Sumurot Kaniak—Para iti Primary: 2023
Septiembre 4–10
1 Taga Corinto 14–16
“Ti Dios saan a Dios ti Riri, no Di ti Talna”
Bayat ti panangbasam iti 1 Taga Corinto 14–16, tulongannakanto ti Espiritu Santo a mangammo no ania ti isurom kadagiti ubbing iti klasem. Irebyum daytoy a balabala para kadagiti nayon pay a kapanunotan.
Yawis ti Panagbibinninglay
Mabalinmo nga irugi ti adalen iti daytoy a lawas babaen ti panangbasa iti 1 Taga Corinto 14:26 iti napigsa. Ilawlawag a no aggigiddantayo a mapan iti simbaan, maitandudotayo (wenno mapadur-as ken matulongan) dagiti dadduma no ibinglaytayo no ania ti masursurotayo. Saludsodem kadagiti ubbing no ania ti maibinglayda a mangitandudo iti maysa a tao iti klase ita nga aldaw.
Isuro ti Doktrina: In-inaudi nga Ubbing
Makapagnaedak iti sidong ti Nailangitan nga Ama kalpasan ti ipapatayko gapu ta nagungar ni Jesucristo.
Kasano a maisurom kadagiti ubbing iti klasem a gapu ta nagungar ni Jesucristo makapagbiagtayo manen?
Dagiti Mabalin nga Aktibidad
-
Ulitem iti sumagmamano a daras kadagiti ubbing ti ragup ti balikas a: “Mabiagdanto amin ken Cristo” (1 Taga Corinto 15:22). Ipakitam ti maysa a ladawan ti nagungar a Mangisalakan (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia) wenno ipabuya ti video a “Jesus Is Resurrected” (ChurchofJesusChrist.org). Ilawlawag a mataytayonto amin iti maysa nga aldaw, ngem gapu ta nagungar ni Jesus, agbiagtayonto manen kalpasan ti ipapataytayo.
-
Ipakitam kadagiti ubbing ti maysa a diaket, a mangibagi kadagiti bagitayo. No sibibiagtayo, adda kadagiti bagitayo dagiti espiritutayo, ken makagaraw dagiti bagitayo (ikawes ti diaket). No mataytayo, pumanaw dagiti espiritutayo kadagiti pisikal a bagitayo, ket saanen a makagaraw dagiti bagitayo (ikkaten ti diaket ken iparabaw daytoy iti lamisaan wenno tugaw tapno mangibagi iti maysa a bagi nga awanan iti espirituna). No nagungartayo, agsubli dagiti espiritutayo iti bagitayo (ikawes manen ti diaket), ket saanda nga agsina manen iti kaano man. Pagsisinublatem dagiti ubbing a mangikawes iti diaket ken mangikkat iti daytoy kabayatan idinto nga ilawlawag ti sabali pay nga ubing no ania ti mapasamak no agungartayo.
Mabalinko ti mabuniagan para kadagiti tao a natayen.
Bayat ti panagsagana dagiti ubbing para iti bukodda a pangbuniag, ibilangmo no kasano a matulongam ida a mangpasungad pay iti gundaway ti panagbalin a mabuniagan para kadagiti natay.
Dagiti Mabalin nga Aktibidad
-
Tulongam dagiti ubbing nga agpanunot kadagiti banag a saanda a maaramid para iti bagida. Siasino ti tumulong kadakuada a mangaramid kadagitoy a banag? Ipakitam ti maysa a ladawan ti maysa kadagiti kapuonam a natay a saan a nabuniagan. Isaritam kadagiti ubbing maipapan itoy a tao, ken ilawlawag a kasapulan daytoy a tao ti tulongtayo tapno mabuniagan.
-
Saludsodem kadagiti ubbing no addaanda iti asino man a miembro ti pamilia a nakapanen iti templo a nangannong kadagiti panagbuniag para kadagiti natay. Ipakitam dagiti ladawan ti puente a pagbuniagan iti templo. Saludsodem kadagiti ubbing no ammoda no ania ti mapasamak ditoy. Ilawlawag nga iti templo mabalintayo ti mabuniagan para kadagiti tao a natayen a saan a pay a nabuniagan. Kalpasanna mabalin a pilien dagita a tao no awatenda met laeng ti panagbuniag.
Kayat ti Nailangitan nga Ama a makipagnaedak Kenkuana iti celestial a pagarian.
Kasano a maisurom kadagiti ubbing maipapan kadagiti pagarian a celestial, terrestrial, ken telestial? Makatulong dagitoy nga aktibidad.
Dagiti Mabalin nga Aktibidad
-
Isurat iti pisarra ti celestial, terrestrial, ken telestial. Tulongam dagiti ubbing nga agsursuro a mangisao kadagitoy a balikas.
-
Ipakitam dagiti ladawan ti init, bulan, ken dagiti bituen. Awisem dagiti ubbing a mangurnos kadagiti ragup ti balikas iti husto nga urnos manipud iti karaniagan agingga iti di unay naraniag. Ibasam ti 1 Taga Corinto 15:40–41 kadagiti ubbing (kitaen met iti Patarus ni Joseph Smith iti bersikulo 40, footnote a). Ilawlawag a ti init, bulan ken dagiti bituen ti mangibagi kadagiti pagarian a mabalin pagnaedantayo kalpasan iti panagungartayo. Iti pagarian a celestial, makapagnaedtayo iti sidong ti Nailangitan nga Ama.
-
Ikkam dagiti ubbing iti kopia ti panid ti aktibidad iti daytoy a lawas tapno koloranda. Bayat ti panagkolorda, ibinglaymo kadakuada ti riknam maipapan iti Mangisalakan ken no ania ti inaramidna tapno maaramid a posible nga agnaedtayo manen iti sidong ti Nailangitan nga Ama.
“Maysa ti dayag ti init” (1 Taga Corinto 15:41).
Isuro ti Doktrina: In-inauna nga Ubbing
Gapu ken ni Jesucristo ken ti Panagungarna, agungarakto.
Maawatan kadi dagiti ubbing a sursuruam ti kinapateg ti Panagungar ni Jesucristo? Makatulong dagitoy a kapanunotan.
Dagiti Mabalin nga Aktibidad
-
Awisem dagiti ubbing nga agsisinublat iti panangbasa kadagiti bersikulo iti 1 Taga Corinto 15:12–22, a mangsapsapul kadagiti sungbat dagiti saludsod “Ania ti mapasamak no awan ti panagungar?”
-
Awisem dagiti ubbing a mangyakem no kasano nga ilawlawag ti panagungar iti maysa a tao. Para kadagiti kapanunotan, mabalinda nga irebyu ti maysa a kanta maipapan iti Panagungar ti Mangisalakan, kas iti “Did Jesus Really Live Again?” (Children’s Songbook, 64). Kitaen met iti video “Until We Meet Again” (ChurchofJesusChrist.org). Ibinglaymo ti pammaneknekmo maipapan iti Panagungar ni Cristo.
1 Taga Corinto 15:12–13, 20–22, 29
Makapagsaganaak a mapan iti templo tapno agpabuniag para kadagiti natay.
Ti panagbuniag para kadagiti natay ket maysa a naragsak nga aramid ti ayat a maipaay kadagiti kapuonantayo. Kasano a matulongam dagiti ubbing a makiraman iti daytoy nga aramid?
Dagiti Mabalin nga Aktibidad
-
Basaen ti 1 Taga Corinto 15:29. Ania dagiti inaramid dagiti Santo iti panawen ni Pablo a mabalintayo met nga aramiden iti agdama? Saludsodem kadagiti ubbing no apay a mabuniagantayo para kadagiti natay. No kasapulan, ilawlawag nga adu kadagiti kapuonantayo ti saan a naikkan iti gundaway a mabuniagan ken makumpirmaan kabayatan daytoy a biag. Iti templo, mabalintayo ti mabuniagan ken makumpirmaan para kadakuada.
-
Iti sumagmamano a lawas sakbay iti klase, kiddawem iti maysa a naganak ti maysa kadagiti ubbing a mangtulong iti anakna nga umay a nakasagana a mangibinglay iti maysa a family tree, wenno mangisarita iti estoria maipapan ti maysa a kapuonan. Mabalinmo pay nga ibinglay maipapan kadagiti bukodmo a kapuonan.
-
Awisem ti maysa a miembro ti bishopric wenno maysa nga agtutubo iti wardyo tapno mangibinglay iti sumagmamano a banag a maaramid dagiti ubbing nga agsagana a sumrek iti templo. Idawat kadagiti ubbing a mangnayon kadagiti kapanunotanda. Awisem ida a mangaramid iti panggep a tun-oyen [goal] a mapan iti templo iti maysa nga aldaw.
Kalpasan a nagungarak, makapagnaedak iti celestial a pagarian.
Tapno maisuro dagiti Taga Corinto maipapan kadagiti bagi nga awatentayonto iti Panagungar, nadakamat ni Pablo dagiti tallo a tukad ti gloria: celestial, terrestrial, ken telestial.
Dagiti Mabalin nga Aktibidad
-
Basaem ti 1 Taga Corinto 15:40–41 ken awisem ti maysa nga ubing a mangidrowing iti init, bulan, ken bituen iti pisarra. Kiddawen kadagiti ubbing a mangilasin no ania a kita ti nagungar a bagi ti mangibagi iti tunggal drowing.
-
Aggigiddan nga agkansion iti maysa a kanta a mainaig iti daytoy a topiko, kas iti “The Lord Gave Me a Temple” (Children’s Songbook, 153). Wenno ipabuya ti video a “Our Eternal Life” (ChurchofJesusChrist.org). Ania ti isuro ti kanta wenno ti video kadatayo maipapan iti panagsagana nga agnaed iti celestial a gloria?
-
Ilawlawag a naaddaan iti maysa a parmata ni Joseph Smith a nakakitaanna kadagitoy a tallo a pagarian a maipada kadagiti kita dagiti bagi nga inladawan ni Pablo. Tulongam dagiti ubbing mangsarak kadagiti ragup ti balikas manipud iti Doktrina ken Katulagan 76:50–53, 70; 76:71–79; 76:81–82 a mangiladawan kadagiti tallo a pagarian.
Yallukoy ti Panagsursuro iti Pagtaengan
Awisem dagiti ubbing a mangidawat kadagiti nagannak kadakuada nga isaritada kadakuada ti estoria maipapan kadagiti kapuonanda. Mabalinda nga ibinglay ti estoria iti klase inton sumaruno a lawas.
Panangpadur-as iti Panangisurotayo
Allukoyen dagiti ubbing nga agsaludsod. “Ikarigatam a mangkita kadagiti saludsod [dagiti ubbing] a kas gundaway, saan a pannakasinga wenno lapped iti leksionmo. … Dagiti kasta a saludsod ti mangted kenka kadagiti napapateg a nalawag a pannakaawat ken pannakaammo maipapan iti pampanunoten dagiti ubbing, no ania dagiti pakaseknanda, ken no kasano ti panangrespondeda kadagiti banag a sursuruenda. Tulongam ida a mangkita a dagiti sungbat kadagiti saludsodda ket masarakan kadagiti nasantuan a kasuratan ken balikas dagiti sibibiag a propeta” (Panangisuro iti Wagas ti Mangisalakan, 25–26).